Willakun: Elva Gjerde

Yaqa 70 wata ñawpaqtaraq huk runa visitamuspa papayta nisqanmi kawsayniyta cambiarqan. Huk runakunapas yanapawarqanmi kawsayniypi. Astawanqa imamantapas aswan sumaq amistadtan tarirqani. Willarisqaykichis.

1932 WATAPIN nacerqani Sydney (Australia) llaqtapi. Tayta-mamayqa creyenten karqanku, ichaqa manan iglesiata riqkuchu. Mamitaymi niwaq: “Diosqa qhawashallasunkin, mana allinta ruwaqtiykiqa castigasunkin”, nispa, chaymi Diosta manchakuq kani. Chaywanpas Bibliaqa gustawarqanpunin. Sapa semana tukuytan kusisqa tiayta suyaq kani, Bibliamanta sumaq experienciakunata willawasqanrayku.

Warmallaraq kashaqtiymi, Jehová Diospa testigon kurak señora librokunata mamitayman qomusqa, chaytan papay leerqan. Leesqanpin muspharqanraq, hinan Biblia estudiayta qallarirqan. Huk tuta Bibliata estudiashaqtinkun pakallapi uyarisharqani, chayta reparaspan puñunaman kutinaypaq papay manaraq kamachiwashaqtin, Testigoqa papayta nirqan: “¿Manachu Elva ñoqanchiswan kuska tiyanman?”, nispa. Chay nisqanwanmi ñoqapaq mosoq kawsay qallarirqan, Jehová Dioswan amistadniypas.

Chay qhepallamanmi papaywan huñunakuykunaman rirqayku, hinan payqa kawsayninpi cambiarqan k’arak phiñakuyninpas pisiyarqan. Mamay, kurak turay Frank iman rikurqanku Biblia sumaqta papayta yanapasqanta, chaymi paykunapas huñunakuykunaman rirqanku. * Tawantiykun allinta estudiarqayku, hinaspan bautizakurqayku Jehová Diospa testigon kanaykupaq. Qhepamanmi askha kurak cristianokunawan amigantin karqani, paykunan yanapawarqanku sasachakuykunapi.

ALLIN CARRERATA AKLLAKUNI

Iñiq t’aqapi kurak iñiqmasikunawan kaymi kusichiwaq. Hukninmi karqan familiayman estudiota qoq Alice Place hermana, paymi abuelitay hina karqan. Predicaytan yachachiwarqan kallpachawarqantaq bautizakunaypaq, hinan 15 wataypi bautizakurqani.

Chaymantapas Percy Madge (Margaret) Dunham kurak hermanokunan amigoy kallarqankutaq, paykunaq ejemplonmi yanapawarqan allin carrerata akllakunaypaq. Matemática curson gustawarqan chaymi profesora kayta munarqani. 1930 watapin paykunaqa Letonia nacionpi misionero karqanku. II Guerra Mundial Europa ladopi  qallariqtinmi Australia nacionpi Betelmanñataq invitarqanku, chayqa Sydney llaqtaq qayllanpin tarikurqan. Willawaqkupunin misionero hina llank’asqankumanta. Reparachiwarqankun Bibliamanta yachachiy aswan importante matemática yachachiymanta kasqanta, chaymi decidikurqani hayk’aqllapas misionera kanaypaq.

Dunham hermanokunan kallpachawarqanku precursora kanaypaq, chay hinapi allin preparasqa kashanaypaq. Chaymi 1948 watapi, 16 watayoq kashaspa Hurstville (Sydney) iñiq t’aqapi chunka wayna precursorkunawan kuska llank’ayta kusisqa qallarirqani.

Nueva Gales del Sur, Queensland estadokunapi tarikuq tawa llaqtakunapin tawa wata predicarqani. Betty Law (qosanmanta, Remnant) warmimanmi ñawpaqtaqa Bibliamanta estudiota qorqani, iskay wata kurakniymi karqan, ichaqa ancha munakuqllaña. Chaymantataq kuska precursora hina Cowra llaqtachapi predicarqayku, chayqa 230 kilometropin Sydney llaqtamanta tarikun, inti haykuy ladopi. Pisi tiempollaña llank’arqayku chaypas, kunankamapas allin amigantinmi kayku.

Qhepamantaq Narrandera llaqtachapi predicanaypaq precursora especialta nombrawarqanku, chayqa Cowra llaqtamanta 220 kilómetro karupin tarikun. Joy Lennox (qosanmanta, Hunter) precursora hermanawanmi chaypiqa predicarqayku, paypas iskay wata kurakniymi karqan. Iskayllaykun chaypi Testigo karqayku. Ray, Esther Irons familiaq wasinpin puñurqayku, paykunan huk churin kinsa ususin ima predicasqaykupi interesakurqanku. Ray Irons churinpiwan sapa semana ovejata michiqku trigo chakratapas llank’aqku, Esthertaq iskay ususintin mikhunata apaqku. Sapa domingotaq Joywan wayk’uq kayku llapa familiapaq, 12 ferrocarrilpi llank’aqkunapaqwan. Chay hinapin alquilerta pagaq kayku. Maqchiyta pichayta tukuspataq Irons familiaman huk sumaq espiritual mikhunata haywaq kayku, chayqa sapa semana estudianapaq Qhawaq revistan karqan. Soqtantinkun Biblia estudiasqanku qhepaman bautizakapurqanku, chhaynapin Narrandera iñiq t’aqamanta primer Testigokuna karqanku.

1951 watapin Sydney llaqtapi asamblea aparikurqan. Huk karpapitaq misionero kay munaq precursorkunapaq huñunakuy aparikurqan, chaymanmi asuykuranku kinsa pachak más precursorkuna. Chaypin Brooklyn Betelmanta Nathan Knorr explicawarqanku, pachantinpi Jehová Diosmanta allin willakuykuna urgente willakunan kasqanta. Chaytan ninripas ninri uyarirqayku. Tiempowantaq yaqa llapa chaypi huñukuq precursorkuna qallarichirqanku Reinomanta willayta Pacífico sur ladopi, huk cheqaskunapipas. Australia nacionmanta chunka qanchisniyoq precursorkunatawanmi invitawarqanku 19 clase Misionerokunapaq Escuelaman, chaymi aparikurqan 1952 watapi. ¡20 watayoq kashaqtiymi misionera kay munasqay hunt’akurqan!

CAMBIOKUNATA RUWANAY KARQAN

Misionerokunapaq Escuela yanapawarqan Bibliamanta allinta yachanaypaq, allin iñiyniyoq kanaypaq ima, hinaspapas yanapawarqanmi imayna yuyaykusqayta cambianaypaq. Sipasllaraq kashaspayqa imapas allinta ruwakunantan munarqani, chaymi hukkunapas mana pantaq kanankuta munaq kani. Ejemplopaq: huk p’unchaymi hermano Knorr wayna Betelitakunawan kuska béisbol phukllashaqta rikuspa muspharqaniraq.

 Misionerokunapaq Escuelapi experienciayoq yachachiqkunaqa repararqankuchá chhayna sientekusqayta, hinan ñoqapi interesakuspa yachachiwarqanku ama chhaynata yuyaykunaypaq. Pisi-pisimantan repararqani Jehová Diosqa mana allillantapuni ruwanatachu suyasqanta, aswanpas munakuq agradecikuq kasqanta. Askha compañeroykunan yanapawarqanku; huk kaq hermanan niwarqan: “Elva, Jehová Diosqa manan soq’anayoqchu ladonchispi purishan. Chhaynaqa ama nishuta imatapas allillanta ruwanaykipaq yuyaykuychu”, nispa. Chay hina sut’inta rimapayawasqanmi sonqoyman chayawarqan.

Graduwakusqayku qhepamanmi phisqa hermanokunata asignawarqanku Namibia (África) nacionman, pisi tiempollamanmi llapayku 80 estudiokunata qosharqayku. Gustawarqanmi chay cheqaspi misionera hina llank’ay, ichaqa Galaad Escuelamanta huk compañeroymi sonqoyta suwawarqan, paytaqa Suiza nacionmanmi kacharqanku. Chaymi huk wata qhepata chay llaqtata rirqani, hinaspa casarakurqayku. Chaypitaq iñiq t’aqakuna watukuypi llank’arqayku.

HATUN LLAKI QATIWARQAN

Phisqa wataña iñiq t’aqakunata visitashaqtiykun Suiza Betelpi llank’anaykupaq invitawarqanku. Espiritualpi allin takyasqa kurak hermanokunaq familian kayqa, ancha kusikunapaqmi karqan.

Hinallamanmi huk llaki qatiwarqan, Jehová Diosta ñoqatawanmi qosay traicionawasqaku. Saqewasqan qhepataqa manañan vidaypichu karqani. Betel familiamanta kurak hermanokunaq yanapayninwan munakuyninwan imallan sasachakuyniyta aguantarqani. Paykunan rimaqtiy uyariwarqanku, sapallay kayta munaqtiypas entiendewarqanku. Sumaq simiwan parlapayawasqanku, munakuywan ñoqapaq ruwasqanku iman chay llakita atipanaypaq yanapawarqan, astawantaq Jehová Diosman asuykachiwarqan.

Chhaynapi tarikuspan experienciayoq kurak cristianokuna parlapayawasqanta consejo qowasqankuta ima yuyarirqani. Madge Dunham niwarqan: “Elva, Diosta servisqaykipiqa iñiypi imaymana pruebakunan kanqa, aswan sasaqa munakusqayki runakunamantan hamunqa. Chhayna kaqtinqa, Jehová Diosmanmi hap’ipakunayki, paytan servinki manan pantaq runakunatachu”. Chay consejon anchata yanapawarqan, chaymi decidikurqani qosaypa pantasqan amapuni Jehová Diosmanta karunchawananpaq.

Chaymantataq Australiaman kutipurqani familiaypa ladonpi precursora kaspa llank’anaypaq. Barcopi viajashaspan askha runakunaman Bibliamanta willarqani, paykunawan kuskan sumaqta uyarirqan Arne Gjerde Noruega nacionmanta runa. Qhepamantaq Sydney llaqtaman visitamuwarqan, Bibliata allinta estudiaspataq bautizakurqan. 1963 watapin paywan casarakurqani iskay watamantaq Gary churiyku nacerqan.

HUK LLAKIÑATAQ

Familiaypiqa kusisqan kawsarqayku. Tayta-mamaywan kuska tiyaspa yanapanaykupaqmi wasita qosay hatunyachirqan. Ichaqa soqta wataña casado hina kashaqtiykun huk niraq llakipiñataq tarikurqani: qosay cáncer cerebral onqoyniyoq tarikusqantan yacharurqayku. Chaymi unayta chay  onqoyta tratachikurqan, ñoqataq sapa p’unchay hospitalpi cuidaq kani. Chay tratamientowanqa allinñan kasharan, chayllamanmi huk ataque cerebral manaña sayarichirqanchu, hinan niwarqanku pisi semanallaña kawsananta. Ichaqa pisi-pisimantan qhaliarqan wasimanpas kutipurqayku, tiempowantaq puririrqan iñiq t’aqapi umalli kaynintapas wakmanta chaskirqan. Kusisqa chansakuspa ima kasqanmi yanaparqan aswanta allinyananpaq, chhaynapin sapa kuti yanapayta atirqani.

1986 watapitaq wakmanta onqoynin hatarillarantaq. Chay tiempopaqqa ñan tayta-mamay wañupurqankuña, chaymi Sydney llaqtamanta lloqsispa montes Azules cheqasman astakurqayku, chaypin amigoykunaq qayllanpi tiyarqayku. Tiempowanmi Garyqa Karin sutiyoq sumaq espiritual warmiwan casarakurqan. Paykunan niwarqanku ñawpaqpi tiyasqayku wasiq cercanpi tiyanaykupaq, hinan pisi tiempollamanta chayman ripurqayku.

Wata partinmi munakusqay qosay manaña hataripurqanchu, chaymi yaqa tukuy tiempo wasillapi karqani yanapanaypaq. Sapa p’unchay iskay horata hina Bibliata estudiasqay, huk qelqanchiskunatapas leesqaypin allin consejokunata tarirqani, chaykunan yanapawarqan sasachakuyniypi. Chaymantapas, iñiq t’aqapi kurak hermanokunaq visitamuwasqankun kallpachawarqan. 2003 watapin Arne wañukapurqan, kawsarimpuy suyakuyta allinta hap’ikuspa.

ALLINTA KALLPACHAWAQNIY

Sipas kaspaqa mana pantaspa allinllatapuni imatapas ruwakunantan munarqani, kunanmi ichaqa yachani ima munasqaykipas mana allinpi kamachu tukusqanta. Mayninpiqa kusisqan kawsarqani mayninpitaq ichaqa sinchi llakisqa, iskay qosay saqewasqanrayku: ñawpaqkaqqa traicionawasqanrayku, qhepa kaqtataq onqoy rayku. Chay tiempokunapiqa askha runakunaq yanapayninta kallpachayninta iman chaskirqani. Ichaqa aswan kallpachawaqniyqa “Yuyaq Runa” Jehová Diosmi (Dan. 7:9). Paymi Simin Qelqawan yuyayniyta allinman cambiarqan, misionera hina sumaq llank’ayta aparinaypaqpas bendeciwarqan. Sasachakuykuna hamuqtin munakuyninwan yanapaykuwarqan sonqochaykuwarqan kusirichiwarqan ima (Sal. 94:18, 19). Hinaspapas familiay iñiqmasiykunaq munakuyninmi kallpachallawarqantaq. “Llaki-phutiy tiempopipas wawqe hina khuyapayakuq” kasqankutan rikuchiwarqanku (Pro. 17:17).

Job nirqan: “Kurak taytakunapin yachayqa kashan, askha watayoq runakunapin yuyayniyoq kayqa kashan” nispa (Job 12:12). Kawsayniyta yuyarispan chay textoq nisqan cheqaq kasqanta reparani. Kurak runakunan allin consejowan khuyapayakuywan ima yanapawarqanku, amistadninkuwantaq kallpachawarqanku. Chaymi ancha kusisqa sientekuni askha kuraq runakunaq amigan kaspa.

80 wataypiñan kashani, kunanqa ñoqañataqmi kurak kani. Imayna kawsasqaymi kallpachawan ñoqa hina edadniyoq runakunata visitaykuspa yanapanaypaq. Wayna-sipaskunawanpas kusisqan sientekuni, kallpachakusqankuta rikuspan kallpachakuni. Consejo qonaypaq niwaqtinkupas, kusikuywanmi paykunata yanapani.

[Uranpi willakuy]

[14 paginapi foto]

Joy Lennoxwan kashayku, Narranderapi precursora kaspa

[15 paginapi foto]

Elva Suiza Betelpi familiawan, 1960 watapi

[16 paginapi foto]

Arne qosayta cuidaspa