¿Rikuchishankichu Diospa qhapaq atiyninta?

‘Señorníy, Diosníy, [...] sutiykitaqa qhapaqchallasaqpunin.’ (SAL. 86:12.)

¿IMAYNATAN KUTICHIWAQ?

¿Imaraykun Jehová Dios hatunchayta atinchis huchayoq runa kashaspapas?

¿Imaynatan mañakuy huñunakuykunapas yanapawanchis Diospa qhapaq atiyninta rikuchinapaq?

¿Iman yanapawasunman Jehová Diosta hatunchashanallapaq?

1, 2. ¿Imaraykun runakuna atisunman Diospa sumaq kayninkuna rikuchiyta?

YAQA llapanchismi tayta-mamanchisman rikch’akunchis. Chaymi wakinqa qhari wawata rikuspa ninku: “¡Papayki kikillanmi kanki!”, warmi wawata rikuspataq ninku: “¡Mamaykitan yuyarichiwanki!”, nispa. Chaymantapas wawakunaqa tayta-mamankuq ruwasqanta qhawarispan kaqta ruwallankutaq. Ñoqanchisrí, ¿atisunmanchu Jehová Taytanchis hina kayta? Payta manaña rikunchischu chaypas, sumaq kayninkunatan reparanchis kamasqanta qhawarispa, Bibliata estudiaspa, hinallataq leesqanchispi yuyaymanaspa, astawanqa Jesucristoq yachachikuyninkunapi ejemplonpiwan (Juan 1:18; Rom. 1:20). Chhaynaqa, Diospa sumaq kayninkunata qatikuspan atisunman qhapaq atiynin rikuchiyta.

² Manaraq Adanta Evatapas kamashaspaqa, Diosqa yacharqanmi runakuna munayninta hunt’ay atinankuta, sumaq kayninkuna rikuchinankuta, hinaspa hatunchanankutapas (leey Génesis 1:26, 27). Kamaqninchis imayna kasqanta qatikuspan cristianokunaqa Diospa qhapaq atiyninta rikuchisunman. ¡May kusikunapaqmi chayqa! Chay rikuchiytaqa lliwmi atinchis, hinaña huk razamanta, huk llaqtamanta, profecionalña otaq manaña kanchis chaypas. Apóstol Pedroq nisqan hina, “Diosqa manan mayqen runatapas rikch’ayninta qhawaspachu akllan, aswanpas may suyupipas payta yupaychaspa chanin-kayta ruwaqtaqa chaskinmi.” (Hech. 10:34, 35.)

3. ¿Imaynan sientekunchis Diosta servispa?

³ Akllasqa cristianokunaqa Diospa qhapaq atiynintan rikuchinku. Apóstol Pablon qelqarqan: ‘Llapanchismi mana pakasqa uyayoq kaspanchis espejo hina Señorpa lliphlli-kayninta [otaq qhapaq atiyninta] k’ancharichinchis’,  “chay lliphlli-kayninmi ñoqanchistaqa tikrashawanchis Señorman rikch’akuq kananchispaq”, nispa (2 Cor. 3:18). Profeta Moisés Sinaí orqomanta Chunka Kamachikuykunata aparikuspa haykumuqtinmi uyan k’anchashasqa Dioswan rimamusqanrayku (Éxo. 34:29, 30). Cristianokunaqa manan chhaynapichu tarikurqanchis, uyanchispas manan k’ancharinchu. Ichaqa kusikuytan rikuchinchis runakunaman Diospa sumaq kayninkunamanta, kay pachapaq munayninmantapas willaspa. Ñawpa tiempopi metalmanta espejokuna hinan akllasqakuna huk cristianokunapas Diospa qhapaq atiyninta k’ancharichinchis kawsayninchispi servicionchispipas (2 Cor. 4:1). Chaymi sapankanchis tapukunanchis: “¿K’anchachishanichu Diospa qhapaq atiyninta kawsayniywan Reinomanta sapa kutilla predicaspa ima?”, nispa.

RIKUCHISUN DIOSPA QHAPAQ ATIYNINTA

4, 5. a) ¿Ima sasachakuypin lliwpas Pablo hina tarikunchis? b) ¿Imaynatan hucha afectawanchis?

⁴ Cristianokunaqa munanchismi tukuy ruwasqanchispas Kamaqninchista hatunchananta. Ichaqa askha kutipin mana atinchischu. Pablopunin chhayna sasachakuypin tarikurqan (leey Romanos 7:21-25). Paymi nirqan imarayku llapapas chhaynapi tarikusqanchista: “Llapallanmi huchallikurqanku, chaymi Diospa k’anchashaq qayllanmanta karupi kashanku” (Rom. 3:23). Arí, runakunaqa huchaq munaychakusqanmi tarikushanchis Adanmanta heredasqanchisrayku (Rom. 5:12; 6:12).

⁵ Ichaqa, ¿iman hucha? Chayqa Diospa kamachikuyninkunaq, sumaq kayninkunaq contranpi kaqmi. Huchaqa Dioswan allinpi kasqanchistan waqllichin. Hark’awanchismi qhapaq atiyninta allinta rikuchinanchista, imaynan huk runa flechasqanman mana hap’ichinchu hinata; huchamanqa urmasunmanmi yuyaypi otaq mana yuyaypipas (Núm. 15:27-31). Hucha ruwayqa sapankanchispin allin saphichasqa kashan, hanaq pacha Taytanchismantataq karunchawanchis (Sal. 51:5; Isa. 59:2; Col. 1:21). Yaqa llapa runan Diosmanta karunchasqa kawsanku, chhaynapin mana atinkuchu Diospa qhapaq atiyninta rikuchiyta. Qhawarisqanchis hina, huchaqa dañotan runakunata ruwan.

6. ¿Imaraykun atisunman Dios hatunchayta huchallikuqña kashaspapas?

⁶ Huchallikuqña kanchis chaypas, Diosmi ‘suyakuyta’ qowanchis (Rom. 15:13). Huchamanta librawananchispaqmi Churin Jesucristota kachamurqan sacrificiopi kawsayninta qonanpaq. Chay sacrificiopi iñispan manaña astawan ‘huchaq kamachinchu’ kanchis, chhaynapin atinchis Jehová Diospa qhapaq atiynin rikuchiyta (Rom. 5:19; 6:6; Juan 3:16). Sichus paywan allinpi kasun chayqa, kay tiempopin favorninta chaskisun, hamuq tiempopitaq mana huchayoq kasun wiñay kawsaytapas chaskisun. Kaypi yuyaykusun: huchallikuqña kanchis chaypas, Diosqa confianmi payta hatunchay atinanchispi. ¿Manachu chay kusikunapaq?

QHAPAQ ATIYNINTA RIKUCHINAPAQ YANAPAY

7. ¿Imatan reparakunanchis Diospa qhapaq atiyninta rikuchinapaq?

⁷ Diospa qhapaq atiyninta rikuchinapaqqa reparakunanchismi pantaq runa kasqanchista (2 Cró. 6:36). Hinaspataq kallpachakunanchis chayta controlanapaq, chhaynallapin Diostaqa hatunchasun. Ejemplopaq, sichus pornografía qhaway viciopi urmarqanchis chayqa, ¿imatan ruwananchis? Reconocenanchismi espiritualpi yanapay necesitasqanchista, hinaspa yanapayta maskhana (Sant. 5:14, 15). Chayta ruwaspaqa kawsayninchispin Diosta hatunchasun. Cristianokunaqa sapa kutillan qhawarikunanchis Bibliapi kamachikuykunaman hinachu kawsashanchis icha manachu chayta  (Pro. 28:18; 1 Cor. 10:12). Diospa qhapaq atiyninta rikuchinapaqqa kallpachakushanallan huchata atipanapaq, imaynaña kaqtinpas.

8. Huchayoq runaña kanchis chaypas, ¿imatan ruwananchis?

⁸ Jesusllan tukuy tiempopas Diosta kusichirqan, qhapaq atiynintapas allintapuni rikuchirqan. Ñoqanchisqa huchayoq runan kanchis, ichaqa tukuy atisqanchistan ruwananchis payman rikch’akunapaq (1 Ped. 2:21). Jehová Diosqa yachanmi hatunchananchispaq tukuy kallpachakusqanchista, chaymi bendicewanchis.

9. ¿Imaynatan Biblia yanapan Diosta kusichiyta munaq cristianokunata?

⁹ Bibliaqa kawsayninchispin pusariwanchis yanapawanchistaq allin cristiano kanapaq. Chaymi ancha importante leey, chaypi yuyaymanay, allinta t’aqwiypas (Sal. 1:1-3). Sapa p’unchay leespaqa kawsayninchispin allinpaq cambiasun (leey Santiago 1:22-25). Astawan Diospa Siminmanta yachaspaqa iñiyninchispin qaqata sayasun, aswantataq decidikusun hatun huchaman mana urmaspa Diosta kusichinapaq (Sal. 119:11, 47, 48).

10. ¿Imaynatan oración yanapawanchis aswantaraq Diosta servinapaq?

¹⁰ Diospa qhapaq atiyninta rikuchinapaqqa, kay consejotan kasukunanchis: “Diosmantaqa mañakushallaychispuni” (Rom. 12:12). Arí, Diosmantan mañakunanchis munasqanman hina yupaychanapaq. Kaykunatan mañakusunman: santo espiritunta, allin iñiyta, tentacionkunata atipanapaq kallpata, ‘cheqaq-kay simita allinta yachachinapaqpas’ (2 Tim. 2:15; Mat. 6:13; Luc. 11:13; 17:5). Imaynan huk wawa papanpi confian, chay hinatan ñoqanchispas hanaq pacha Taytanchispi confiananchis. Aswantaraq payta servinapaq mañakuspaqa, manan iskayananchischu yanapawananchismanta. Nitaq yuyaykunachu sapa kuti mañakusqanchiswan phiñakunanta. Paymanqa tukuy confianzawanmi oracionpi asuykusunman hatunchanapaq, graciasta qonapaq, sasachakuyninchiskunapi yanapawananchispaqpas. Chaymantapas yanapaynintan rogakusunman servicionchiswan ch’uya ‘sutinta qhapaqchanapaq’ (Sal. 86:12; Sant. 1:5-7).

11. ¿Imaynatan huñunakuykuna yanapawanchis Diospa qhapaq atiyninta rikuchinapaq?

¹¹ Diosqa munakusqan ovejankunatan “allin yuyayniyoq hunt’aq kamachi” cuidananpaq saqerqan (Mat. 24:45-47; Sal. 100:3). Chay ‘kamachin’ Diospa qhapaq atiynin rikuchinanchista munan. Imaynan siraq runa p’achanchista allichan, chay hinatan huñunakuyninchiskunapas “allichawanchis” allin cristiano kanapaq (Heb. 10:24, 25). Chaymi ancha importante tiemponpi chayay. Sichus tardellatapuni sapa kutipas chayasunman chayqa, wakillantan chaskisunman allin cristiano kanapaq yanapayta.

DIOSMAN RIKCH’AKUSUN

12. ¿Imaynapin Diosman rikch’akunchis?

¹² Diospa qhapaq atiyninta rikuchinapaqqa paymanmi rikch’akuna (Efe. 5:1). Chaytan hukninpi ruwasunman yuyaykusqanman hina imatapas qhawarispa. Sichus mana munasqanman hinachu kawsasunman chayqa, paytan pisichasunman kikinchistataq dañota ruwakusunman. Kay pachaqa Satanaspa kamachisqantaq kashan chayqa, anchatan cheqnikunanchis Diospa cheqnisqanta, munakunanchistaq paypa munakusqanta (Sal. 97:10; 1 Juan 5:19). Kaymantan seguro kananchis: yupaychasqanchista hanaq pacha Taytanchis chaskinanpaqqa, tukuy ima ruwasqanchispas payta hatunchanapaq hinan kanan (leey 1 Corintios 10:31).

13. ¿Imaraykun huchata cheqnikunanchis, imatan ruwananchis?

¹³ Jehová Diosqa cheqnikunmi huchata, ñoqanchispas chhaynatan qhawarinanchis. Huchata cheqnikunchis chayqa, karunchakusunmi  imapas huchaman apawaqninchis kaqkunamanta. Ejemplopaq, iñiymanta t’aqakuspa Diospa llaqtan contra yachachiq runakunamantan karunchakunanchis, imaymana yachachikuyninkunamantapas mana hinaqa manan Diosta hatunchayta atisunmanchu (Deu. 13:6-9). Chaymantapas, karunchakunanchismi cristianon kani nishaspa Diosta sarunchaqkunamanta, familianchisña kankuman chaypas (1 Cor. 5:11). Chay hina runakunawan otaq Diospa llaqtanmanta mana allinta rimaqkunawan parlayqa yanqan kanman. Hinaspapas manan yanqallapas qhawarinachu revistakunapi, Internetpi otaq imapipas lloqsimuqtinqa, espiritual kawsayninchispin waqllichiwasunman (leey Isaías 5:20; Mateo 7:6).

14. ¿Imatan astawanqa rikuchinanchis, imarayku?

¹⁴ Taytanchispa munakuyninta rikuchispan astawanqa payman rikch’akusun (1 Juan 4:16-19). Ñoqanchis pura munanakusqanchispin rikuchinchis Jesuspa qatikuqnin kasqanchista, Jehová Diospa serviqninkuna kasqanchistapas (Juan 13:34, 35). Mayninpi huchaña hark’awasunman chaypas, kallpachakunanchismi munakuy t’ikarinanpaq. Sichus chayta huk sumaq kaykunatawan wiñachisun chayqa, manan hukkunaq sonqonta k’irisunchu nitaq hatun huchakunamanpas urmasunchu (2 Ped. 1:5-7).

15. ¿Imaynatan munakuy yanapawanchis hukkunawan allinpi kananchispaq?

¹⁵ Munakuyqa kallpachawanchismi hukkunapaq allin kaqkunata ruwanapaq (Rom. 13:8-10). Sichus casado kawsaypi munanakusun chayqa, hunt’aqmi kasun. Sichus umallikunata munakunchis respetanchistaq chayqa, kasukuqmi kasun. Sichus wayna-sipaskuna tayta-mamankuta munakunku chayqa, sumaqtan qhawarinqaku, kasukunqakun manataqmi mana allinta paykunamanta rimanqakuchu. Sichus runamasinchista munakusun chayqa, respetowanmi tratasun, manan pisichaspachu (Sant. 3:9). Sichus umallikuna Diospa ovejankunata munakunku chayqa, sumaqtan tratanqaku (Hech. 20:28, 29).

16. ¿Imaraykun predicaspa munakuyta rikuchina?

¹⁶ Predicaspapas munakuytan rikuchinanchis. Jehová Diosta anchata munakusqanchisraykun allin willakuykunata predicashallanchis, hinaña runakuna mana uyarinkuchu mana allintaña tratawanchis chaypas. Chaymantapas, allintan preparakunchis, kallpachakunchistaq Reinomanta aswan allinta predicanapaq. Sichus Diosta runamasinchistapas munakunchis chayqa, manan hayk’aqpas chay llank’aytaqa sasa hunt’anapaq hinachu qhawarisun, aswanpas kusikuywan aparinapaq sumaq llank’ayta hinan (Mat. 10:7).

HATUNCHASHALLASUN DIOSTA

17. Diospa qhapaq atiyninta rikuchinanchistan hucha hark’awanchis, ¿imaynapin chayta yachay allinninchispaq?

¹⁷ Ñoqanchisqa entiendenchismi hucha dañota ruwawasqanchista, chaytan yaqa llapa runakuna mana yachankuchu. Chayraykun reparanchis Diospa qhapaq atiyninta rikuchinapaqqa, mana allinman aysawaqninchis kaqkuna atipananchista. Imakunapi pantasqanchista reparakusqanchismi yanapawanchis conciencianchista yachachinapaq, chhaynapi sonqonchispi ima mana allinpas wiñananpaq kashaqtinqa, allin ñanninta pusawananchispaq (Rom. 7:22, 23). Pisi kallpaña kanchis chaypas, Diosmi kallpata qowasun imaña kaqtinpas hunt’aqllapuni kanapaq (2 Cor. 12:10).

18, 19. a) ¿Imaynatan atipasunman millay espiritukunata? b) ¿Imapaqmi decidikunanchis?

¹⁸ Chaymantapas, Jehová Diosta hatunchanapaqqa millay espiritukuna contran sayananchis, chaypaqmi “Diospa qosqan llapallan tupapakuna p’achawan” churakunanchis (Efe. 6:11-13). Satanasqa kunankamapas  munashallanmi Dios hina hatunchasqa kayta. Chaymantapas imaymana trampakunatan churawanchis Dioswan mana allinpi kanapaq. Chaymi Saqraqa sarunchasqa tarikun waranqanpi qharikuna, warmikuna otaq wawakuna huchayoq kashaspapas Diosta hunt’aq sonqowan hatunchaqtinku. ¡Chaytan lliw cristianokuna ruwashanchis! Chhaynaqa hatunchasunpuni Diosta hanaq pachapi angelkuna hina, paykunan kunkawan ninku: “Qanqa Señor Diosniyku, hatunchaytapas, yupaychaytapas, atiytapas chaskinaykipaq hinapunin kanki, tukuy imaymanata qan kamasqaykirayku, chaymi munayniykiwan kashankupas, kamasqapas karqanku”, nispa (Apo. 4:11).

¹⁹ Allinta decidikusun imaña kaqtinpas Diosta hatunchanapaq. Diosqa anchatan kusikun askha runakuna payman rikch’akunankupaq, qhapaq atiyninta rikuchinankupaq ima kallpachakusqankuta rikuspa (Pro. 27:11). David hinan ninchis: “Señorníy, Diosníy, tukuy sonqoywanmi yupaychamusqayki, sutiykitapas qhapaqchallasaqpunin”, nispa (Sal. 86:12). Pisi tiempollamantan Diosta hunt’aq sonqowan serviq lliw runakuna Diospa qhapaq atiyninta mana imaq hark’asqan allinta rikuchinqaku, wiñay-wiñaypaqtaq alabanqaku. ¡May kusikunapaqmi chayqa kanqa! ¿Munawaqchu wiñaypaq Jehová Dios hatunchayta? Chhayna kaqtinqa, ¿ñachu tukuy kawsayniykipiña rikuchishanki?

[Tapuykuna]

[27 paginapi dibujokuna]

¿Rikuchishankichu Diospa qhapaq atiyninta kaykunata ruwaspa?