Tiempomanta Munayniyoq Diospi confiasun

“Paymi tiempokunatapas mitakunatapas chayachimun, paymi reykunataqa wikch’unpas churanpas.” (DAN. 2:21.)

¿IMAYNATAN KUTICHISUNMAN?

¿Imaynatan kamasqakuna profeciakunaq hunt’akusqanpas rikuchin Jehová Tiempomanta Munayniyoq kasqanta?

¿Imata ruwanapaqmi kallpachawanchis Tiempomanta Munayniyoq Diosmanta yachasqanchis?

¿Imaraykun Diospa munaynin hunt’akunpuni?

1, 2. ¿Imaynapin yachanchis Diosqa tiempomanta allinta entiendesqanta?

MANARAQ runakunata kamashaspan Jehová Dios tiempota controlanapaq churarqan, ¿imata? Tawa kaq p’unchaypi kamashaspan nirqan: “Hanaq pachapi k’anchaqkuna kachun p’unchaytawan tutatawan t’aqananpaq, hinallataq mita-mitata, p’unchay-p’unchayta, wata-watatapas señalaqpaq”, nispa (Gén. 1:14, 19, 26). Chaymi Diospa munaynin karqan, chhaynataqmi sucederqan.

² Ichaqa kay tiempokamapas askha científico runakunan mana explicayta atinkuchu imapunichus tiempo kasqanta. Huk enciclopedia nin: “Tiempoqa mana entiendeymi, manan pipas yachanchu imapunichus kasqanta”, nispa. Ichaqa, ‘hanaq pachata [...] kay pachatapas ruwaq’ Jehová Diosqa allintan entienden imachus tiempo kasqanta. Pay kikinmi nin: “Qallariymantapachan willani qhepaman imaynachus tukukunanta, qhepaman imachus kanantan ñawpaqmantaña willani”, nispa (Isa. 45:18; 46:10). Kunanmi t’aqwirisunchis Diospa wakin kamasqankunata, hinallataq profeciakuna hunt’akusqanmanta. Chayta t’aqwirispaqa astawanmi confiasun Tiempomanta Munayniyoq Diospi, hinallataq Simin Qelqapipas.

KAMASQAKUNA DIOSPI IÑIYNINCHISTA WIÑACHIN

3. ¿Ima ejemplokunatan kamasqapi tarinchis k’apaqta funcionasqanmanta?

³ Jehová Diospa kamasqanqa hatunpas huch’uypas k’apaktan funcionan. Ejemplopaq, átomo * nisqakunaqa mana tatispan kaqllata kuyun. Chayta yachaspan runakuna fabricarqanku reloj atómico nisqata,  chay relojmi tiempota k’apaqtapuni marcan, 80.000.000 watakuna pasaqtinpas huk segundollatan desigualakunman. Chaymantapas, planetakuna ch’askakunapas k’apaktan muyun, chaykunata qhawarispan runakunaqa reparanku mayninta viajanankupaq, hinallataq hayk’aq huk estación qallarinanta. Arí, átomo nisqata ch’askakunatapas ruwaq Diosqa “sinchi atiyniyoqmi” chaymi payta alabananchis (leey Isaías 40:26).

4. ¿Kawsaqkunapi k’apaq funcionasqanmanta ima ejemplokunan rikuchin Diospa yachayninta?

⁴ Kawsaq kamasqakunapas tiempoq controlasqan kaspan k’apakta funcionan. Ejemplopaq, askha animalkuna plantakunapas ukhunkupi relojniyoqpas kankuman hinan kanku. Chaymi askha phalaq animalkuna kikillankumanta yachanku hayk’aq huk ladoman ripunankuta (Jer. 8:7). Runakunapipas kanmi reloj biológico nisqa, chhaynapin cuerponchis willawanchis hayk’aqchus tuta hayk’aqtaqchus p’unchay kasqanta. Hukniray horarioyoq kaq nacionman avionpi viajaqtinchisqa, yaqapaschá cuerponchis askha p’unchaypiraq chay horarioman yachakunqa. Arí, Diospa kamasqankunapiqa askha ejemplokunatan tarinchis k’apakta funcionasqanmanta, chaykunan rikuchin Jehová Dios Tiempomanta Munayniyoq kasqanta. Payqa ancha yachayniyoq tukuy atiyniyoqmi (leey Salmo 104:24). Chhayna kaqtinqa, seguron kashanchis Tiempomanta Munayniyoq Diospa yuyaykusqankuna llapallan hunt’akunanmanta.

PROFECIAKUNAQ HUNT’AKUSQAN IÑIYNINCHISTA WIÑACHIN

5. a) ¿Imaynapin yachasunman hamuq tiempopi runakunapaq imachus kananta? b) ¿Imaynapin Dios yachan qhepaman imapas sucedenanta hayk’aq pasanantapas?

⁵ Kamasqankunata qhawarispaqa imaymanatan yachanchis mana ‘rikukuq’ sumaq kayninkunamanta; ichaqa manan kutichinchu wakin importante tapuykunata. Ejemplopaq, hamuq tiempopi imachus runakunapaq kanqa chayta (Rom. 1:20). Chaypaqqa Bibliapi Diospa nisqantan t’aqwinanchis. Chaypin tarisun askha profeciakuna tiemponpipuni hunt’akusqanmanta. ¿Imaynapin Dios yachan qhepaman imapas sucedenanta? Ñawpaqpi, payqa atinmi hamuq tiempota sut’ita qhawariyta. Chaymantapas, makinpin kashan imapas munayninman hina, tiempo churasqallanpi ruwakunanpaq.

6. ¿Imaynapin yachanchis Diosqa profeciakunaq hunt’akusqanmanta yachananchis munasqanta?

⁶ Diosqa munanmi serviqninkuna Bibliapi profeciakuna entiendenankuta, chaymanta beneficiakunankutapas. Manaña ñoqanchis hinachu sasachakun tiempota entiendenanpaq chaypas, imapas hayk’aq sucedenanta profetizaspaqa entiendenanchispaq hinan willan (leey Salmo 90:4). Ejemplopaq, Apocalipsis libron willan ‘tawa angelkunamanta, [...] paykunan chay watapaq, chay killapaq, chay p’unchaypaq, chay horapaq wakichisqa kasqaku’. Chay tiempokunataqa allintan entiendenchis (Apo. 9:14, 15). Qhawarisunchis Diospa willasqanman hina hunt’akuq wakin profeciakunata. Chayta t’aqwiriymi yanapawasun Tiempomanta Munayniyoq Diospi, hinallataq Simin Qelqapi tukuy sonqomanta confianapaq.

7. ¿Imaynatan Jerusalenmanta Judamantawan profecía hunt’akusqan rikuchin Dios Tiempomanta Munayniyoq kasqanta?

⁷ Yaqa 700 wata ñawpaqta m.J.h. sucedesqanmanta yuyarisun. ‘Judapi Josiaspa churin Joacim tawakaq watapi kamachikushaqtinmi, Señor Diosqa llapan Judá runakunamanta Jeremiasman willarqan’ (Jer. 25:1). Tiempomanta Munayniyoq Diosmi willarqan Jerusalén llaqta thunisqa kananmanta, Judiokunataq Babilonia llaqtaman apasqa kanankumanta, chhaynapi “qanchis chunka” wata ‘Babilonia reyta servinankupaq’. 607 watapin m.J.h. Babilonia ejército Jerusalén llaqtata thunirqan, judiokunataq Babiloniaman  apasqa karqanku. ¿Iman karqan 70 wata qhepaman? Jeremiasmi willarqanña: “Señor Diosmi nillantaq: Babiloniapi kasqaykichis qanchis chunka wata hunt’akuqtinmi, qankunaq allinniykichista ruwasaq, rimasqaytapas hunt’asaqpunin Babiloniamanta kayman kaqta kutichimpuspay”, nispa (Jer. 25:11, 12; 29:10). Chay profeciaqa tiemponpin hunt’akurqan 537 watapi m.J.h., medopersa ejército Babilonia llaqtamanta judiokunata librasqanku qhepaman.

8, 9. ¿Imaynatan Mesías chayamunanmanta, Reino takyachisqa kananmantawan profeciakuna rikuchin Diosqa Tiempomanta Munayniyoq kasqanta?

⁸ Ñawpaq tiempopi Diospa llaqtanmanta willaq profeciata t’aqwirisun. Iskay wata ñawpaqta manaraq Babiloniamanta lloqsishaqtinkun, profeta Danielwan Dios willachirqan: Jerusalén llaqta perqakunanpaq orden lloqsimusqanmantapachan 483 wata pasanan karqan Mesías chayamunanpaq. Chay ordentan rey medopersa Ciro 455 watapi m.J.h. lloqsichirqan. Hinan 483 wata pasaqtin, 29 watapi Nazaret llaqtamanta Jesús santo espirituwan akllasqa karqan, ahinapin Mesías kapurqan. Chhaynapin k’apakta chay profecía hunt’akurqan (Neh. 2:1, 5-8; Dan. 9:24, 25; Luc. 3:1, 2, 21, 22). *

⁹ Kunanqa qhawarisun Reinomanta willaq profeciakunata. Bibliapin profetizakurqan Cristo 1914 watapi kamachikuy qallarinanta. Hanaq pachapi kamachikuyta qallarispa Saqrata qarqomuqtinmi kay pachapi sinchi sasachakuykuna kanan karqan (Mat. 24:3-14; Apo. 12:9, 12). Chaymantapas, huk profeciakunan willarqan 1914 watapi “wak suyu runakunaq kamachikunan tiempo” hunt’akapunanta, hinaspa Diospa Gobiernon hanaq pachapi takyachisqa kananta (Luc. 21:24; Dan. 4:10-17). *

10. ¿Imakunan hamuq tiempopi k’apakta hunt’akunqa?

¹⁰ ¿Iman sucedenqa hamuq tiempopi? Jesusmi willarqan ñawpaqtaqa ‘manchay ñak’ariy’ chayamunanta. Chaymantan Waranqa Wata Gobiernon qallarinqa. Seguron kashanchis chaykuna k’apaktapuni hunt’akunanmanta. Yuyarinanchismi: kay pachapi Jesús kashaqtinqa Jehová Diosqa ñan churasqaña hayk’aq sucedenanpaq “p’unchayta” ‘horatawan’ (Mat. 24:21, 36; Apo. 20:6).

“TIEMPOTAQA AMA USUCHIYCHISCHU”

11. ¿Imatan ruwananchis p’uchukay tiempopi kawsasqanchista yachaspa?

¹¹ Ñataq Reino kamachimushanña ‘p’uchukay tiempopitaq’ kashanchispas chayqa, ¿imatan ruwananchis? (Dan. 12:4.) Askha runakunan rikunku kay pacha aswantaraq mana allinman cambiasqanta, ichaqa manan reparankuchu chaytapuni Biblia p’uchukay tiempopaq profetizasqanta. Wakinqa piensankun kay pacha chinkapunanpaqña  kashasqanta. Hukkunataq piensanku runakuna imaynatapas “thak-kayta” apamunanta (1 Tes. 5:3). ¿Ñoqanchisri? Sichus entiendenchis p’uchukay tiempoq tukupunanpiña kawsashasqanchista chayqa, ¿manachu kallpachakunanchis tiemponchista Dios serviypi utilizananchispaq? ¿Manachu runakunata yanapananchis Tiempomanta Munayniyoq Diosta reqsinankupaq? (2 Tim. 3:1.) Sapankanchismi tiemponchista allinta aprovechananchis, ¿chaytachu ruwashanchis? (Leey Efesios 5:15-17.)

12. Noepa p’unchayninkunamanta Jesuspa willasqan, ¿imaynatan yanapawanchis?

¹² Kay pachapiqa imaymanan distraewasunman, chaymi ‘tiempota mana usuchispa’ kawsayqa sasa kanman. Jesusqa willarqanñan: “Imaynan Noepa p’unchayninkunapi karqan, chay hinallataqmi Runaq Churin hamuqtinpas kanqa”, nispa. ¿Imaynan karqan Noepa p’unchayninkuna? Profetizakurqanmi chay tiempopi millay runakuna unupi heq’epaspa wañunankuta. Noeqa “chanin kawsaymantan willaq”, chaymi runakunaman Diosmanta predicarqan (Mat. 24:37; 2 Ped. 2:5). Paykunan ichaqa, “mikhusharqanku, ukyasharqanku, casarakusharqanku [...], manataq imatapas repararqankuchu millp’uq unu chayamuspa llapanta millp’unankama”. Chaymi Jesús aconsejarqan: “Runaq Churinqa hamunqa mana yachasqaykichis horatan, chayrayku qankunapas makilla kashaychis”, nispa (Mat. 24:38, 39, 44). Ñoqanchisqa Noepa ejemplontan qatikunanchis, manan chay tiempo runakunatachu. ¿Iman yanapawasun listo kashanapaq?

13, 14. Runaq Churin hamunanta suyaspa, ¿imatan Diosmanta yuyarinanchis hunt’aq kanapaq?

¹³ Runaq Churinqa qonqayllaña chayamunqa chaypas, yuyarinanchismi Tiempomanta Munayniyoqqa Jehová kasqanta. Kay pachapi imaña sucedeqtinpas runakuna imataña planeaqtinkupas, payqa munayninta hunt’ananpaqmi controlan imapas hayk’aq sucedenanta imapi tukunantapas (leey Daniel 2:21). Proverbios 21:1 nin: “Yarqha unuta hinan Señor Diosqa reypa yuyayninta pusan, maymanchus munasqanmanmi purichin”.

¹⁴ Arí, Jehová Diosqa tukuy sucedesqantan controlan tiempollanpi munaynin hunt’akunanpaq. Kay pachapi importante kaqkuna sucedesqanqa, favorecerqanmi Bibliapi profeciakuna hunt’akunanpaq, astawanqa pachantinpi Diospa Gobiernonmanta predicación aparikunanpaq. Ejemplopaq, ñawpaqpin askha nacionkunapi karqan dictador, comunista gobiernokuna. Runakunaqa manapaschá yuyaykurqankuchu pisi tiempollapi politicapi hatun cambiokuna kananta. Chay cambiokuna kasqanwanmi kunanqa allin willakuykuna predicakushan ñawpaqpi hark’asqa kaq cheqaskunapi. Chhaynaqa, ancha importanten tiempota mana usuchispa Tiempomanta Munayniyoq Diosta serviy.

TIEMPONPIPUNI HUNT’AQ DIOSPI CONFIASUN

15. ¿Imaynatan iñiyniyoq kasqanchista rikuchinchis Diospa llaqtanpi cambiokuna kaqtin?

¹⁵ Kay tukukuy p’unchaykunapi Reinomanta predicashanallapaqqa, convencesqan kananchis Diosqa tiemponpipuni munaynin hunt’ananmanta. Kay pacha mana allinpi tarikusqanraykun yaqapas hukniraykunamanta predicananchis kanqa. Yaqapaschá mayninpiqa Diospa llaqtanpi cambiokuna kanqa predicacionta aswan allinta aparinapaq. ¿Imaynatan rikuchinchis Tiempomanta Munayniyoq Diospi iñisqanchista? Chay cambiokunata kasukuspa, hinallataq iñiq t’aqapi ‘umalliq’ Cristoman hunt’aq kaspa (Efe. 5:23).

16. ¿Imaynapin seguro kanchis Diosqa necesitasqanchis ratopi ‘yanapawananchista’?

¹⁶ Diosqa ‘yanapanmi’ siervonkunata, chaymi munan mana iskayaspa mañakunanchista (Heb. 4:16). ¿Manachu chaypi reparanchis  Diosqa anchata munakuwasqanchista, ñoqanchispi interesakusqantapas? (Mat. 6:8; 10:29-31.) Iñiyniyoq kasqanchista rikuchisun sapa kutilla Diosmanta mañakuspa, hinaspa chayman hina, pusariwasqanchisman hina kawsaspa. Chaymantapas manan qonqananchischu iñiq masinchiskunapaq mañapuyta .

17, 18. a) ¿Imatan Jehová ruwanqa pisi tiempollamanta? b) ¿Imayna yuyaykuymi mana allinchu?

¹⁷ Kunanqa ‘manan iñiyninchispi’ iskayanapaq tiempochu, aswanpas iñiyninchis ch’ila kananpaqmi kallpachakunanchis (Rom. 4:20). Satanaspas paypa makinpi kaqkunapas, hark’aytan munanku Jesuspa kamachiwasqanchis llank’ay hunt’ananchista (Mat. 28:19, 20). Saqraqa wakllichiytan munawanchis, ichaqa “kawsaq Diosmanmi hap’ipakunchis, payqa llapa runakunaq qespichiqninmi, astawanqa paypi iñiqkunapaq”. Chaymantapas, Diosqa “yachanmi payta manchakuqkunata sasachakuymanta qespichiyta” (1 Tim. 4:10; 2 Ped. 2:9).

¹⁸ Pisi tiempollamantan Jehová tukuchinqa kay millay pachata. Criston tukuchinqa Diospa enemigonkunata, Dioslla gobiernananpaq derechoyoq kasqanmanta iskayachiytaq allichakapunqa. Manan yachanchischu hayk’aq imaynata sucedenanta, ichaqa yachanchismi tiemponpipuni aparikunanta. Chhaynaqa, amapuni hinallata kay kawsasqanchis ‘tiempota’ pasachisunchu. Amapuni yuyaykusunchu: “Lliw imaymanapas kaqllapuni kashan, imaynan kamay qallariymantaña karqan [hina]”, nispa (1 Tes. 5:1; 2 Ped. 3:3, 4).

‘DIOSPI SUYAKUQ’ KASUN

19, 20. ¿Imanaqtinmi ‘Diospi suyakunanchis’?

¹⁹ Runakunata Dios kamaspaqa, munarqanmi wiñaypaq paymanta kamasqanmantapas yachanankuta. Eclesiastés 3:11 nin: “Diosqa lliwtan tiemponpi sumaq tupaqta ruwarqan. Runamanqa qoykurqanmi winay-wiñay kaqkunapi yuyariy atiyta, chaypas runaqa manan llapanta entiendeyta atinchu Diospa qallariymanta tukukuykama ruwasqantaqa”, nispa.

²⁰ ¡Maytan kusikunchis runakunapaq Diospa munaynin mana cambiasqanmanta! (Mal. 3:6.) Arí, “payqa manan cambianchu, manataqmi llanthu hinachu kuyuykachanpas” (Sant. 1:17). Llanthuqa Hallp’aq muyusqanman hinan cambian, Jehová Diostan ichaqa mana afectanchu tiempoq pasasqan. Payqa ‘wiñay-wiñay Reymi’ (1 Tim. 1:17). Chhaynaqa ‘qespichiwaqninchis Diospi suyakusun’ (Miq. 7:7). Salmo 31:24 textopi consejota kasukusun: “Señor Diosman llapa hap’ipaykukuqkuna, kallpachakuychis, sonqoykichispas kawsarichun”.

[Uranpi willakuykuna]

[Tapuykuna]

[19 paginapi dibujo]

Danielqa tukuy sonqowanmi confiarqan profeciakunaq hunt’akunanpi

[21 paginapi foto]

¿Allintachu tiempoykita aprovechashanki Dios serviypi?