Kacharichiq Diosta servisun

“Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu.” (1 JUAN 5:3.)

¿IMA NISPAN KUTICHIWAQ?

¿Imaynatan Saqra creechiyta munawanchis Diospa kamachikuyninkuna nishu hark’akuq kasqanta?

¿Imaraykun allinta qhawarinanchis pikunawan huñunakusqanchista?

¿Iman yanapawasun kacharichiwaqninchis Diosman hunt’aq kanapaq?

1. ¿Imaynatan Jehová Dios utilizan tukuy ruwananpaqpas derechoyoq kasqanta? ¿Imatan Adanpas Evapas ruwayta atirqanku?

JEHOVÁ DIOSQA imata ruwananpaqpas derechoyoqmi. Ichaqa, manan chayraykuchu dueñochakun serviqninkunaq ima ruway munasqankuta. Aswanpas paykunatan kamarqan ima ruway munasqankutapas kikillankumanta decidinankupaq. Adanta Evatapas ‘allinkaqta mana allinkaqta reqsichiq sach’aq rurunta’ mikhunallankutan hark’arqan (Gén. 2:17). Chhaynapin paykunaqa kikillankumanta imatapas decidispa kusisqa kawsayta atirqanku, Diospa munaynintapas hunt’aspa.

2. ¿Imaynatan Adanpas Evapas mana chaninpaqchu hap’irqanku kikillankumanta decidinankupaq Diospa qosqanta?

² ¿Imaraykun Dios kamarqan Adán Evata kikillankumanta imatapas decidinankupaq? Diospa rikch’ayninman hina kamasqa kasqankurayku, chaymantapas concienciayoqtan kamarqan. Diosqa munarqanmi payta munakusqankurayku allin kawsanankuta (Gén. 1:27; Rom. 2:15). Ichaqa, chhayna kamasqa kasqankumantan mana agradecikurqankuchu, aswanpas Saqrata kasukuspan munarqanku allinkaqta mana allinkaqta paykunallamanta decidiyta. Paykunaqa yuyaykurqankun chhaynapi munasqankuman hina kawsanankupi, ichaqa mana chhaynachu karqan. Aswanpas chay ruwasqankuwanmi paykunapas mirayninpas, huchaman wataykusqa karqanku (Rom. 5:12).

3, 4. ¿Imatan Saqra creechiyta munawanchis?

³ Saqraqa atirqanmi iskay mana huchayoq runakunata askha angelkunatapas Diospa kamachikuynin contra kanankuta, chaymi ñoqanchistapas q’otuyta atiwasunman. Saqraqa creechiytan munawanchis Diospa kamachikuyninkuna sasa hunt’ana nishu hark’akuq  kasqanta (1 Juan 5:3). Chhayna yuyaykuqkunawan huñukuyqa mana allinninchispaqmi kanman. 24 watayoq cristianan qhelli huchaman urmasqanmanta nin: “Mana allin amigokunawan huñukuspaqa, mana p’enqaypi qhepayta munaspan paykuna hina ruwaq kani”, nispa. Askha cristianokunan chhayna mana allinta ruwanapaq mat’ipayasqa karqanchis.

⁴ Diospa llaqtan ukhupipas chayqa kanmi. Huk cristiano waynan nin: “Wakin iñiqmasi amigoykunaqa mana Testigokunawanmi huñunakuqku. Qhepamanqa repararqanin paykunawan astawan kaspay paykuna hina kawsasqayta. Iñiyniypin pisiparqani, manañan huñunakuykunapi kusikuqchu kani, predicaqpas manañan lloqsiyta munaqchu kani. Hinan huk amigokunata maskharqani”, nispa. Huñukusqanchis runakunaqa allinninchispaqpas mana allinninchispaqpas kanmanmi. Chaypaq yachasun Bibliapi huk runamanta (Rom. 15:4).

“RUNAKUNAQ SONQONTA SUWARQAN”

5, 6. a) ¿Imaynatan askha israelitakunata Absalón q’oturqan? b) ¿Absalonpa munasqanman hinachu ruwakurqan?

⁵ Biblian willan mana allin runakunawan mana huñunakunamanta. Hukninmi rey Davidpa churin Absalón. Payqa allin rikch’ayniyoqmi karqan. Imaynan Saqrapas hukpa kaqninta munapayarqan, chhaynatan paypas taytanpa kamachikuyninta munapayarqan. * Israelitakunatan yanapaq tukurqan, nirqantaqmi rey Davidqa paykunapi mana interesakusqanta, chhaynapin taytanpa kamachikuyninta qechuyta munarqan. Edén huertapi Satanaspa ruwasqanta hinan Absalonpas ruwarqan, allin runa hinan reqsichikurqan, taytantataqmi tumparqan mana kaqmanta (2 Sam. 15:1-5).

⁶ ¿Absalonpa munasqanman hinachu ruwakurqan? Yaqa chhaynan karqan, Biblian willan Absalón ‘runakunaq sonqon suwasqanta’ (2 Sam. 15:6). Ichaqa, sinchi hatunchakuq kasqanraykun paypas, q’otuchikuq runakunapas wañurqanku (2 Sam. 18:7, 14-17).

7. ¿Imatan yachanchis Absalonmanta? (Qhaway 14 paginapi dibujota.)

⁷ ¿Imaynapin ratulla israelitakuna q’otuchikurqanku? Yaqapaschá Absalonpa prometesqanta munapayarqanku, otaq allin sayayninta rikuspa yanaparqanku. Imaynaña kaqtinpas, manan Diospaq paypa churasqan reypaqpas hunt’aq sonqochu karqanku. Kunanpas Absalón hina runakunawanmi Saqraqa Jehová Dios serviqkunaq sonqonta suwashan. Wakinqa ninkun: “Diospa kamachikuyninkunaqa sasa hunt’anan, otaq Diosta mana serviqkunaqa vidatan pasanku”, nispa. ¿Reparanchischu llulla kasqankuta? ¿Hunt’aq sonqochu Diospaq kasun? ¿Creenchischu ‘Diospa hunt’asqa kamachikuyllan’ otaq Cristoq kamachikuyllan cheqaq kacharichiy qowasqanchista? (Sant. 1:25.) Rikuchisun chay kamachikuykuna ancha chaninpaq hap’isqanchista, amataq Diospa llaqtanpi kacharichisqa kasqanchista mana allinta utilizasunchu (leey 1 Pedro 2:16).

8. ¿Ima experienciakunan rikuchin Diosta mana kasukuy llakikunapaq kasqanta?

⁸ Wayna-sipaskunatan astawanqa Saqraqa q’otuyta munan. 30 watayoq cristianon nin: “Wayna kaspaqa Diospa kamachikuyninkunatan hark’awanmanpas hinata qhawariq kani, manan allinniypaq hinatachu”, nispa. Chayraykun payqa qhelli huchaman urmarqan. ¿Aswan kusisqachu kawsarqan? Manan, paymi nin: “Askha watakunan huchachakurqani, concienciaypas kiska hina  takapayawaq. 19 watañan pasarqon, chaywanpas mana allin ruwasqayqa umallaypin kashan”, nispa. Huk cristianan nillantaq: “Mana allin ruwasqaywanqa munakusqay runakunaq sonqontan k’irirqani, chayta reparaspan Dios serviyniypi kawsayniypipas sinchi nanaypi tarikurqani. Diospa mana allin qhawarisqan kawsayqa sinchi sonqo nanaymi”, nispa. Wayna-sipas ama Saqrawan q’otuchikuychu: manaraq ruwashaspa yuyaykuy imapi tarikunaykita.

9. a) ¿Imakunatan Diosmanta, kamachikuyninkunamantapas tapukunanchis? b) ¿Imaraykun Diosta allinta reqsinanchis?

⁹ Askha wayna-sipaskuna, hukkunapas, mana allinpi tarikusparaqmi yacharqanku Diosta mana kasukuy sinchi pesapakunapaq kasqanta (Gál. 6:7, 8). Tapukunanchismi: “¿Allintachu reparani imakunawanchus Saqra q’otuway munasqanta? ¿Amigoychu Jehová Dios, confianichu imapas nisqan cheqaqpuni kasqanpi, allinniypaq kasqantapas? ¿Segurochu kashani imachus kusikunaypaq kaqkunata manapuni hayk’aqpas Diosqa pakawasqanpi?”, nispa (leey Isaías 48:17, 18). Chay tapuykunaman “arí”, nispa kutichinapaqqa manan hawan ukhullantachu Diosta reqsinanchis, allintan reqsinanchis. Munakuwasqanchisraykun kamachikuykunatapas qowanchis, manan watasqa hina kawsananchispaqchu (Sal. 25:14).

YACHAYTA, KASUKUQ KAYTA DIOSMANTA MAÑAKUSUN

10. ¿Imaraykun kallpachakunanchis waynallaraq kasqanpi rey Salomón hina kanapaq?

¹⁰ Salomonmi huch’uyaykukuspa Diosta  nirqan: “Waynallaraqmi kani, manan imatapas yachanichu”, nispa. Chaymantan mañakurqan yachayta kasukuq kaytawan (1 Rey. 3:7-9, 12). Diosqa uyarirqanmi chay mañakusqanta. Kaqllatataqmi ñoqanchiswanpas ruwanqa hayk’a watayoqña kanchis chaypas. Manan huk milagrotachu ruwanqa. Ichaqa yachaytan qowasun sichus Bibliata allinta estudiasun, santo espiritunta mañakusun, huñunakuykunapi yachachikuytapas mana usuchisunchu chayqa (Sant. 1:5). Jehová Diosqa chaykunawanmi yanapan wayna-sipaskunata, chhaynapin aswan yachayniyoq kanku Diospa yuyaychasqankunata mana kasukuq runakunamanta, kay pachapi ‘yuyayniyoqkunamantapas’ (Luc. 10:21; leey Salmo 119:98-100).

11-13. a) ¿Ima allin yachachikuykunatan tarinchis Salmo 26:4, Proverbios 13:20, 1 Corintios 15:33 textokunapi? b) ¿Imaynatan chay textokuna yanapawanchis?

¹¹ Yachasqanchis hina, Diosta allinta reqsinapaqqa Bibliatan estudiananchis, chaypitaq yuyaymanananchis. Chaypaq t’aqwirisun askha textokunata, chaypin rimashan pikunawan huñunakuymanta. Salmo 26:4 texton nin: “Manan ch’achu runawan tiyanichu, manan iskay uyakunawanpas huñunakunichu”, nispa. Proverbios 13:20 texton nin: “Yachayniyoqkunawan puriqqa yachayniyoqmi kapunqa, mana yuyayniyoqkunawan puriqmi ichaqa waqllipunqa”, nispa. 1 Corintios 15:33 texton nillantaq: “Mana allin runakunawan huñukuspaqa samaykachikunkun”, nispa.

¹² Kay textokunaqa allintan yachachiwanchis. Diosqa munanmi allin amigokunayoq kananchista, chaykunawanmi yanapawanchis kawsayninchispi, Dios serviyninchispipas allin kananchispaq. Chaymantapas, huñunakusqanchis runakunaqa allinninchispaqpas otaq mana allinninchispaqpas kanmanmi. Kay textokunanwanmi Diosqa sonqonchisman chayayta munan. ¿Imaynata? Chay textokunapiqa manan nishanchu, “ama kayta, haqayta ruwaychu” nispachu, aswanpas imapipas tarikunanchismantan sut’ita willashan. Kaytapas Dios niwashasunman hinan: “Kayta ruwaqtiykiqa kay hinapin tarikunki. ¿Kunanri imatataq ruwanki? ¿Ima nishanmi sonqoyki?”, nispa.

¹³ Chaymantapas, chay textokunaqa imachus kaqllatan willashan, chayraykun llapa runakunata tukuy tiempopas yanapan. Tapukusunchis: “¿Imatan ruwayman ‘iskay uyakunawan’ ama huñukunaypaq? ¿Imakunan yaqapas chay runakunawan huñunachiwanman? (Pro. 3:32; 6:12.) ¿Pikunan chay ‘yachayniyoq’ runakuna, pikunataqmi ‘mana yuyayniyoqkuna’? (Sal. 111:10; 112:1; Pro. 1:7.) ¿Ima mana allinkunatan ‘samaykachikuyman’ mana allin runakunawan huñunakuspa? ¿Diospa llaqtanpipas kanmanchu mana allin amigokuna? (2 Ped. 2:1-3.)”, nispa. Chay tapuykunaq kutichiyninpi yuyaymanayqa allinmi kanman.

14. ¿Imatan ruwasunman familiantin Dios yupaychayta aswan sumaqta aparinapaq?

¹⁴ Huk textokunapas willanmi imatachus Jehová Dios yuyaykusqanta, chaykunapi familianchiswan yuyaymanayqa allinmi kanman. * Tayta-mamakunaqa Familiantin Diosta Yupaychana Ch’isipin chaykunata ruwankuman, chayta ruwaspaqa familiankumanmi entiendechinanku Diosqa munakuwasqanchisrayku kamachikuyninkunata qowasqanchista (Sal. 119:72). Chhaynapin llapa familia  hukllachasqa kanqa, astawantaq Diosmanpas asuykunqa.

15. ¿Imaynapin yachasunman allin yachayniyoq kasukuq kashasqanchista?

¹⁵ ¿Imaynapin yachasunman allin yachayniyoq kasukuq kashasqanchista? Imayna yuyaykusqanchistan tupachinanchis ñawpa tiempopi Diosta serviqkunaq imayna yuyaykusqankuwan. Rey Davidmi nirqan: “Diosníy, munayniykitapunin ruwayta munani, yachachikuy simiykitan sonqoy ukhupi hap’ini”, nispa (Sal. 40:8). Salmo 119 qelqaqpas nirqanmi: “¡Maytapunin yachachikuy simiykitaqa munakuni! P’unchay-ch’isiyaqmi chayllapiña yuyaymanani”, nispa (Sal. 119:97). Chhaynata Diospa Siminta munakunapaqqa; Bibliatan estudiananchis, yuyaymanananchis, Diosmanta mañakunanchis ima. Chaymantapas, kasukusqanchisrayku saminchaykuna chaskisqanchista reparaspaqa, astawanmi Diospa Siminta munakusun (Sal. 34:8).

KACHARICHISQA KASQANCHISTA AMA CHINKACHISUNCHU

16. ¿Imatan yuyarinanchis cristiano kaspa kacharichisqa kasqanchista ama chinkachinapaq?

¹⁶ Runakunaqa maqanakuykunapiraqmi karqanku libre kanankupaq. Chayraykun cristianokunaqa, ¡astawanraq kallpachakunanchis kacharichisqa kasqanchista ama chinkachinapaq! Manan Saqrawan, kay pachaq imaymana kaqninkunallawanchu maqanakunchis, aswanpas huchanchiswan traicionakuq sonqonchiswan iman (Jer. 17:9; Efe. 2:3). Ichaqa, Diospa yanapayninwanqa atipasunmi. Huch’uy otaq hatun sasachakuytaña atipasun chaypas Diostan kusichinchis (Pro. 27:11). Chaymantapas, ‘Diospa hunt’asqa kamachikuynin’ kacharichiwasqanchista reparaspaqa, astawanmi munasun wiñay kawsayman apaq k’illku ñannin puriyta. Qhepamanqa hunt’aq serviqninkunapaq Diospa kacharichiynintan chaskikusunchis (Sant. 1:25; Mat. 7:13, 14).

17. ¿Imaraykun mana pisipananchischu ima huchamanpas urmaspa? ¿Ima yanapaykunatan Dios qowanchis?

¹⁷ Ichaqa, imapipas pantashallanchismi (Ecl. 7:20). Chhaynapi tarikuspaqa manan pisipananchischu nitaqmi mana valeqpaq hinapas qhawarikunachu. Imaman urmaspapas sayarinanchismi, chaypaqqa umallikunamantan yanapayta mañakunanchis. Santiagon nirqan: “Iñiywan Diosmanta mañakuyqa onqosqatan qhaliyachinqa, hinan Señorqa payta sayarichinqa, huchallikunmanña karqan chaypas pampachasqan kanqa”, nispa (Sant. 5:15). Amapuni qonqasunchu; Diosqa khuyapayakuqmi, paymi sonqonchispi allinkunata tarirqan chaymi llaqtanman pusamuwarqanchis (leey  Salmo 103:8, 9). Hunt’aq sonqo kanapaq kallpachakuqtinchisqa manapunin Diosqa saqerpariwasunchu (1 Cró. 28:9).

18. Juan 17:15 textopi Jesuspa mañakusqanman hina, ¿imatan ruwananchis Dios pakaykuwananchispaq?

¹⁸ Manaraq wañuchisqanku ñawpaq tutatan apostolninkunapaq Diosmanta Jesús mañakurqan: ‘Saqramanta paykunata waqaychaykuy’, nispa (Juan 17:15). Kunanpas Cristoqa qatikuqninkunapiqa llakikunmi. Chayraykun mana iskayanchischu Jesuspa mañakusqanta Dios uyarispa yanapawananchista. Biblian niwanchis: “Chanin kawsaqkunatan amachaykun [...], payman sonqollikuqkunatapas hark’aykun”, nispa (Pro. 2:7, 8). Sasan Diospaq hunt’aq kayqa, ichaqa chhayna kaspallan wiñay kawsayta tarisunchis, cheqaq kacharichiytapas tarisun (Rom. 8:21). ¡Amapuni pipas horqowasunchu cristiano kaspa kacharichisqa kasqanchismanta!

[Uranpi willakuykuna]

[Tapuykuna]

[14 paginapi dibujokuna]

¿Pikunan Absalón hina kanku, imaynatan paykunamanta karunchakusunman?