¡Manan imatapas manchakusaqchu!
¡Manan imatapas manchakusaqchu!
“Soldadokunapas phawaykamuwachun, manan kuyurisaqchu [‘ñoqaqa hap’ipakushallasaykin’, NM].” (SAL. 27:3.)
KAY TEXTOKUNAQ NISQAN HINA, ¿IMAN KALLPACHASUNKI?
1. ¿Ima tapuykunatan kutichisun 27 Salmota t’aqwispa?
¿IMARAYKUN astawanraq predicashanchis kay pachapi kawsay mana allin kaqtinpas? Qolqe tariy sasa kaqtinpas, ¿imaraykun tukuy tiemponchiswan kallpanchiswan predicanchis? ¿Imaraykun mana manchakuspa kawsanchis askha runaña hamuq tiempopi imapas kananmanta manchakunku chaypas? 27 Salmopi Davidpa qelqasqanmi chay tapuykunata kutichin.
2. ¿Imaynan runakuna sientekunku imamantapas manchakuspa, ichaqa pimantan hap’ipakunchis?
2 Davidmi khaynata qelqayta qallarin: “Señor Diosmi k’anchaykuwaqniypas qespichiwaqniypas, ¿pitaq manchachiwanman? Señor Diosmi hark’aykuwaqniyqa, ¿pitaq manchachiwanman?”, nispa (Sal. 27:1). Imamantapas manchakuyqa pisikallpayachikunmi. Ichaqa Diosta manchakuyqa manan chhaynachu, aswanpas kallpachawanchismi (1 Ped. 3:14). Hark’aykuqninta hina Diosta qhawaqqa ‘mana imanasqallan tiyanqa, mana imatapas manchakuspallan kawsanqa’ (Pro. 1:33; 3:25). ¿Imarayku?
“DIOSMI K’ANCHAYKUWAQNIYPAS QESPICHIWAQNIYPAS”
3. ¿Imaynapin Dios k’anchayninchis, ichaqa imatan ruwananchis?
3 ¿Imaraykun Biblia nin: ‘Diosmi k’anchaykuwaqninchis’, nispa? Pantasqa laqhayaq yachachikuykunamanta horqomuwasqanchisrayku (Sal. 27:1). K’anchayqa reparachiwanchismi laq’achiwaqninchis kaqkunata, ichaqa manan chayraykuchu chaykunaqa chinkapun, aswanpas rikusqanchisman hinan purinanchis. Diospas chhaynatan willawanchis imarayku imapas sucedesqanmanta, kay pachapi mana allin kaqkunamanta, qowanchismi allinninchispaq kamachikuykunata, chaypaqqa yachasqanchisman hinan kawsananchis. Chhaynapin Salmista hina yachaywan ruwasun, nirqanmi: ‘Kamachikuyniykikunaqa [...] awqaykunamantapas aswan yachayniyoqmanmi tukuchiwan [...], llapa yachachiwaqniykunamantapas astawanmi yachapuni’, nispa (Sal. 119:98, 99, 130).
4. a) ¿Imaraykun David nirqan: ‘Diosmi [...] qespichiwaqniyqa’, nispa? b) ¿Hayk’aqmi Jehová Dios kanqa qespichiqninchis?
4 Davidqa yuyarirqanchá ñawpaqkunapi Jehová Dios yanapasqanta, chaytan reparanchis Salmo 27:1 textota leespa. Kaykunapin yanaparqan: ‘Leonmanta’ ‘ukumarimantan’ librarqan, Goliat-tan atiparqan, rey Saúl lanzanwan wañuchinanmantapas hark’arqanmi (1 Sam. 17:37, 49, 50; 18:11, 12; 19:10). Chayraykuchá Davidqa nirqan: ‘Diosmi [...] qespichiwaqniyqa’, nispa. ‘Manchay ñak’ariy’ p’unchaypin Diosqa pakaykuwasun, chhaynapin Davidpaq hina qespichiqninchis kanqa (Apo. 7:14; 2 Ped. 2:9).
YANAPAWASQANCHISTA YUYARISUN
5, 6. a) ¿Imaynatan yuyarisqanchiskuna kallpachawanchis? b) ¿Imaynatan kallpachawanchis llaqtanta Dios yanapasqanta yachay?
5 Salmo 27:2, 3 (leey) textopin tarikun mana manchakuq kanapaq huk yanapay. Davidqa yuyarirqanmi ñawpaqkunapi Diospa yanapasqanta (1 Sam. 17:34-37). Chaykunan yanaparqan mana manchakuspa sasachakuykunata atipananpaq. ¿Imakunapin ñawpaqpi Dios yanaparasunki? ¿Kallpachasunkichu chay yuyarisqaykikuna? ¿Sasachakuypi tarikuspachu Diosmanta mañakurqanki hinaspa yachayta kallpatawan qorqasunki? Yaqapaschá ima sasachakuypas hark’arqasunki Diosta kusisqa servinaykipaq, otaq astawan Diosta serviyta munarqanki, ¿yuyarinkichu imaynata Dios chay kutipi yanapasqasuykita? (1 Cor. 16:9.) ¿Imaynan sientekunki chaykunata yuyarispa? Manachá iskayankichu Jehová Diosqa ima sasachakuyta atipanaykipaqpas yanapaqniyki kasqanpi (Rom. 5:3-5).
6 ¿Sichus Jehová Diospa testigonkunata ima gobiernopas chinkachiyta munanman chayri? Kay p’unchaykunapipas askha runakunan Diospa llaqtanta chinkachiyta munarqanku, ichaqa manan atirqankuchu. Ñawpa tiempopi llaqtanta Dios yanapasqanpi yuyaymanaspaqa, manan manchakusunchu hamuq tiempopi imapas kananmanta (Dan. 3:28).
CHANINPAQ HAP’IY CHEQAQ YUPAYCHAYTA
7, 8. a) Salmo 27:4 textoq nisqan hina, ¿imatan David Diosmanta mañakurqan? b) ¿Iman espiritual Dios yupaychana wasi, imaynatan chaypi yupaychanchis?
7 Cheqaq yupaychayta munakuypas yanapawanchismi kallpachasqa kanapaq (leey Salmo 27:4). Davidpa tiemponpiqa yupaychana karpan ‘Diospa wasin’ karqan. David kikinmi alistarqan qhepaman churin Salomón Jerusalén templota perqananpaq. Ichaqa askha watakuna qhepamanmi Jesús willarqan manaña chhayna sumaq templopiraqchu Diosta yupaychana kasqanta (Juan 4:21-23). Hebreos qelqapi 8–10 capitulokunapin Pablo willarqan huk espiritual Dios yupaychana wasi 29 watapi paqarisqanta, chayqa karqan maypachachus Jesús bautizakuspa Diospa munayninta ruwananpaq kawsayninta qoqtinmi (Heb. 10:10). Chay espiritual Dios yupaychana wasiqa, Jesucristoq sacrificakusqanpi iñisqanchisrayku Diosman asuykunapaq yanapay qowasqanchismi. ¿Imaynatan chaypi Diosta yupaychanchis? “Cheqaq sonqowan, mana kuyuriq hunt’asqa iñiywan” Diosmanta mañakuspa, mana manchakuspa iñiyninchismanta willaspa, huñunakuyninchiskunapi hukkunata kallpachaspa, familiantin Diosta yupaychaspapas (Heb. 10:22-25). Cheqaq yupaychayta ancha chaninpaq hap’iyqa kallpachawanchismi kay p’uchukay p’unchaykunapi.
8 Pachantinpi Diosta serviqkunan astawan predicanankupaq kallpachakunku, chaypaqmi huk rimaykunata yachanku, huk llaqtakunaman astakunku. Salmista mañakusqan hinan paykunapas ruwasqankuwan rikuchinku Dios kusichiy munasqankuta, imaña hayk’aña kaqtinpas Diosllata serviyta (leey Salmo 27:6).
DIOSQA YANAPAWASUNPUNIN
9, 10. ¿Imatan yachanchis Salmo 27:10 textomanta?
9 Davidqa yacharqanmi Jehová Dios yanapananta, chaymi nirqan: “Taytayña mamayña wikch’upuwanqa chaypas, qan Señor Diosmi uywakapuwanki”, nispa (Sal. 27:10). 1 Samuel libropi 22 capitulota leespan yachanchis tayta-maman Davidta mana saqesqanta. Ichaqa, kay tiempopiqa rikukunmi askha Dios serviqkunata familian saqerparisqanta, chaywanpas Diospa llaqtanpin munakuyta yanapayta chaskirqanku.
10 Diosqa yanapanqataq hunt’aq serviqninkunata familian saqerpariqtin chayqa, ¿manachu huk sasachakuykunapipas yanapanqa? Sichus familiaykita uywanaykipaq mana qolqeyki kanchu chayqa, manan iskayanaykichu Jehová Dios yanapanasuykipi (Heb. 13:5, 6). Payqa yachanmi hunt’aq serviqninkuna imaynapi tarikusqanta imakuna necesitasqankutapas.
11. ¿Diospi hap’ipakusqanchisrayku honrado kasqanchista rikuspa, imatan runakuna ninku? Huk ejemplota willay.
11 Liberia nacionpi tiyaq Victoriamanta yachasun. Payqa bautizakuyta munaspan Bibliata allinta estudiasharqan, hinan kinsa wawankunaq taytan payta saqerparipurqan. Manaña wasinpas llank’ananpas karqanchu chaypas manan pisiparqanchu, hinan bautizakurqan. Chay qhepallamanmi 13 watayoq wawan askha qolqeta tarikurqan. Sonqonkuq mana munapayananpaqmi mana yuparqankupaschu, aswanpas usqhayllan chay qolqeq dueñon soldadota maskharqanku. Paymi nirqan: “Llapa runa Testigokuna hina kaqtinqa thak kawsaymi kay pachapi kanman”, nispa. Victoriaqa Bibliawanmi yachachirqan sumaq kawsay Dios prometesqanta. Honrada kasqanta rikuspan chay soldadoqa qolqeta qoykurqan. Testigokunaqa iñinchismi tukuy necesitasqanchista Dios qowananchista, chayraykun honrado kanchis, chaytaqa askha runakunan yachan.
12. ¿Imatan rikuchinchis ima kaqninchistaña chinkachispapas Diosta servishallasqanchiswan? Huk ejemplota willay.
12 Sierra Leona nacionmanta manaraq bautizasqa publicador Thomasta imachus sucedesqanpi yuyaykuy. Payqa huk colegiopin yachachirqan, ichaqa huk wata hinan mana pagarqankuchu, Thomasqa chay colegiopi umalliq curawanmi ñawpaqta rimanan karqan pagapunankupaq. Thomastan nirqan Testigokunaq yuyaykusqan chay colegiopi yachachisqankuwan mana tupasqanta, hinan nirqan llank’ananta otaq Bibliapi creesqankunata saqenanpaq. Thomasqa saqepurqanmi llank’ananta, yaqa huk wata pagontapas, chay qhepamanmi payqa radiota telefonokunata allichaspa llank’arqan. Chaykunan rikuchiwanchis ñoqanchisqa tukuyta Kamaq, llaqtantapas pakaykuq Diospi hap’ipakusqanchista, manataqmi pisikallpayanchischu runakunaq manchakusqan kaqkunawan.
13. ¿Imaynatan predicanku wakcha nacionkunapi?
13 Wakcha kay kasqan nacionkunapi iñiqmasinchiskunaqa tukuy sonqonkuwanmi Diospa Reinonmanta willanku, ¿imarayku? Huk sucursalmi nin: “Bibliata askha estudiay munaqkunaqa mana llank’anayoq kasqankuraykun aswan tiempoyoq kanku. Iñiqmasikunapas aswan tiempoyoqmi kanku predicanankupaq. Wakcha runakunaqa imaymana mana allinkunatan kawsayninkupi rikunku, chhaynapin yachanku tukukuy p’unchaypiña kawsasqanchista”, nispa. Huk nacionpin sapanka Testigo kinsa estudio masta qon. Chunka iskayniyoq wata masña chay nacionpi kaq misioneron willakun: “Askha iñiqmasinchiskunan pisillawan kawsayta yachanku, manan yanqa kaqkunapichu tiemponkuta usuchinku, chhaynapin astawan predicanku estudiokunatapas qonku”, nispa.
14. ¿Imaynatan askha runakunata Dios pakaykun?
14 Jehová Diosmi prometerqan llaqtan chinkachisqa kananmanta pakaykunanta, qespichinanta, iñiyninchispi mana pisipanapaqpas, chaymi paymanta hap’ipakunchis (Sal. 37:28; 91:1-3). Askha runakunan ‘manchay ñak’ariypi’ kawsanqaku (Apo. 7:9, 14). Chhaynapin yachanchis kay tiempopi chay askha runakuna mana chinkachisqa kanankuta. Yanapaytan chaskinqaku imaymana sasachakuykunata atipanankupaq, Diospaq hunt’aq sonqo kanankupaqpas. Manchay ñak’ariy p’unchaypiqa Diosmi llaqtanta pakaykunqa.
DIOSNIY “ÑANNIYKITA REQSICHIWAY”
15, 16. ¿Imaynapin allinninchispaq Diospa yachachiwasqanchista kasukuy? Huk ejemplota willay.
15 Mana pisipanapaqqa, David hinan Dioswan pusachikushanallanchis otaq yachachikushanallanchis , nirqanmi: “Diosníy, awqaykunan qhawapayawanku, ñanniykita reqsichiway, allin ñanninta pusaway”, nispa (Sal. 27:11). Chay nisqanman hina ruwananpaqqa allintan reparananchis Diospa llaqtanpi imakunachus niwasqanchista, hinaspataq kasukunanchis. Kay tiempopiqa qolqepas sasatan tarikun, ichaqa askha iñiqmasikunan allinta kawsashanku kapuqnillanchiswan kawsanapaq Bibliaq nisqanta kasukuspa, chhaynapin mana yanqachu manukunku. Imankupas pisilla kaqtinmi aswan tiempoyoq kanku predicanankupaq. Chayraykun sapanka tapukunanchis: “¿Bibliapi yachasqayman hinachu kawsani? ¿Allin yuyayniyoq hunt’aq kamachi qelqakunapi niwasqan sasa ruwayña kaqtinpas kasukunichu?”, nispa (Mat. 24:45).
16 Sichus Jehová Dioswan yachachikuspa allin ñanninta pusachikusun chayqa, manan imamantapas manchakusunchu. Estados Unidosmanta huk precursor regularmi huk llank’anapi kayta munarqan llapa familianpas tukuy tiempowan Diosta servinanrayku, ichaqa jefenmi nirqan mana profesional kasqanrayku mana hayk’aqpas chay llank’anapi kananta. Chhaynapi tarikuspa, ¿pesapakuwaqchu karqan tukuy tiempoykiwan Dios servinaykirayku mana profesional kasqaykimanta? Iskay semana qhepatan jefenta wikch’upurqanku, hinan mosoq jefen iñiqmasinchista tapurqan imachus munasqanta. Payqa willarqanmi Testigo kaspa esposanwan kuska tukuy tiemponkuwan predicaq kasqankuta, nirqantaqmi mana saqey munasqankuta. Manaraq rimayta tukushaqtinmi mosoq jefenqa nirqan: “¡Ñoqaqa repararqanin hukniray kasqaykita! Taytay wañukapunanpaqña kashaqtinmi iskay Testigokuna sapa p’unchay hamuqku Bibliata leepunankupaq. Chaymi ñoqaqa yuyaykurqani hayk’aqllapas huk Testigota yanapayta atispaqa chayta ruwanaypaq”, nispa. Qhepan p’unchaymi chay iñiqmasimanqa chay llank’ay munasqanta qorqanku. Sichus Diospa Reinonta ñawpaqman churasun chayqa, hunt’anqapunin necesitasqanchista qowananchispaq prometewasqanchista (Mat. 6:33).
IÑIYPAS SUYAKUYNINCHISPAS YANAPAWANCHISMI
17. ¿Iman yanapawasun hamuq tiempomanta mana manchakunapaq?
17 Iñiypas suyakuyninchispas yanapawasqanchismantan David nirqan: “Ichaqa allintan yachani: kay kawsay pachapin Señor Diospa sumaq sonqo-kayninta rikusaq”, nispa (Sal. 27:13). Kaypi yuyaykuy: ¿iman kanman ñoqanchismanta sichus Salmo 27 textopi Diospa niwasqanchispi mana suyakuyninchis kaqtin? Chhaynaqa, ama iskayaspa Diosmanta mañakushallasun yanapayninta, k’arak phiñakuynin p’unchaypi pakaykuwananchispaqpas (leey Salmo 27:14).
[Tapuykuna]
[23 paginapi dibujo]
Ñawpa tiempopi Diospa yanapasqanta yuyarispan Davidqa kallpachakurqan
[25 paginapi foto]
Wakcha kanchis chayqa, ¿astawan predicananchispaqchu chayta allinpaq qhawarinchis?
