Diospa gobiernonpaq hina kawsasun

“Allin willakuykunaman hinapuni allinta kawsaychis.” (FILI. 1:27.)

¿KUTICHIWAQCHU?

¿Pikunan Diospa Gobiernonpaq hina kankuman?

¿Imakunatan ruwana Diospa Gobiernonpaq hina kawsanapaq?

¿Imaynatan Diospa Gobiernonpaq hina kawsaq runakuna rikuchinku kamachikuyninkuna munakusqankuta?

1, 2. ¿Imaraykun Filipos iñiq t’aqa ancha allinpaq hap’irqan Pabloq nisqanta?

FILIPOS llaqtapi iñiq t’aqamanmi apóstol Pablo qelqarqan: “Allin willakuykunaman hinapuni allinta kawsaychis”, nispa (leey Filipenses 1:27). Griego simimanta t’ikrakuq “allinta kawsaychis” simiqa nillantaqmi “huk nacionniyoq runakuna hina kawsaychis” nispa. Filipos iñiq t’aqapi cristianokunaqa ancha allinpaqmi hap’irqanku Pabloq chay nisqanta, ¿imarayku? Yaqachus hina Filipos llaqtayoqkunaqa Roma nacionniyoq kallarqankutaq. Chayraykun ancha allinpaq qhawarikuqku, chay nacionmanta runakunapaq hinan chay gobiernoq leyninkunapas paykunaq allinninkupaq karqan.

² Ichaqa, chay llaqtapi iñiq t’aqaqa aswan kusisqaraqmi karqanku, ¿imarayku? Pablon yuyarichirqan akllasqa cristianokuna kasqankurayku ‘hanaq pacha’ llaqtayoq kasqankuta (Fili. 3:20). Paykunaqa Diospa Gobiernonpaq hinan kawsarqanku manan kay pacha gobiernokunapaq hinallachu. Chaymi Diospa kamachikuyninkunapas allinninkupaq karqan, paypa pakaykusqantaq karqankupas (Efe. 2:19-22).

3. a) ¿Pikunan atinku Diospa Gobiernonpaq hina kawsayta? b) ¿Imatan kay estudiopi t’aqwisun?

³ Cristowan kuska kamachimuq cristianokunatan astawanqa Pablo nisharqan huk nacionniyoq runakuna hina kawsanankupaq (Fili. 3:20). Chay nisqanqa kay pachapi kawsayta suyakuq runakunapaqwanmi. ¿Imanaqtin? Llapa bautizasqa cristianokunan Jehová Dios Reyllata servinku, kamachikuyninman hinataq kawsankupas (Efe. 4:4-6). Kay tiempokunapiqa askha runakunan imaymanata ruwanku qhapaq nacionmanta kanankupaq. Chaymi ¡aswan chaninpaqraq hap’inanchis Diospa Gobiernonpaq  kasqanchista! Chaypaq yachasun huk nacionniyoq kanapaq imakunachus hunt’akunan kasqanta, Diospa Gobiernonpaq hina kawsananchispaq imakuna necesitakusqantapas. Chaymantataq t’aqwisun Diospa Gobiernonpaq hina kawsasqanchista ama chinkachinapaq kinsa yanapaykunata.

¿IMAKUNATAN HUNT’ANA HUK NACIONNIYOQ KANAPAQ?

4. ¿Iman ch’uya rimay, imaynatan chayta “rimanchis”?

⁴ Rimasqanku simitan yachana. Wakin gobiernokunaqa nacionninmanta kay munaqkunatan kamachinku rimasqanku simita yachanankuta. Wakinqa chay nacionniyoq kasqan qhepamanpas aswan allinta rimanankupaqmi kallpachakushanallanku. Chhaynallataqmi Diospas Gobiernonmanta kay munaq runakunata kamachin Bibliaq willasqan ‘ch’uya rimay’ yachanankuta (leey Sofonías 3:9 *). ¿Iman chay ch’uya rimay? Jehová Diosmanta, munayninmantawan Bibliapi cheqaq yachachikuykunan. Ch’uyataqa “rimanchis” Diospa kamachikuyninkunaman hina kawsaspan. Diospa Gobiernonta kasukuqkunaqa yaqapaschá Bibliapi allin yachachiykunata pisi tiempollapi yachanku. Ichaqa bautizakusqanku qhepamanpas kallpachakushanallankun ch’uya rimayta aswan allinta “rimanankupaq”. ¿Imaynata? Bibliamanta yachasqankuman hina kawsaspa.

5. ¿Imanaqtinmi Diospa llaqtanmanta tukuy atisqanchista yachananchis?

⁵ Chay nacionmantan yachana. Huk nacionniyoq kay munaqkunaqa yaqapaschá chay nacionpi imakuna ñawpaqpi sucedesqanta yachananku kanqa. Chay hinallataqmi Diospa Gobiernonpaq hina kawsaq runakunapas tukuy atisqanchista chay Gobiernomanta yachananchis. Corepa miraynin ruwasqanmi chayta yachachiwanchis. Paykunaqa Jerusalén llaqtatan munakuqku chaypi templotapas, chaymi runakunaman chay llaqta ñawpaqpi imayna kasqanmanta willaqku. Aswan allinpaqqa qhawariqku Jerusalén llaqta templopas imamanchus rikch’akusqantan, manan imayna perqasqa kasqantachu. Jerusalenqa ‘Hatun Rey’ Jehová Diospa llaqtanmi karqan, chaypin Diosta yupaychakurqan kamachikuyninkunatapas yachachikurqan. Chay llaqtaq reynin hinan Jehová Diosqa munakuyninta rikuchirqan (leey Salmo 48:1, 2, 9, 12, 13). ¿Paykuna hinachu qanpas kallpachakushanki kay tiempopi Diospa llaqtanmanta yachanaykipaq chayta  hukkunaman willanaykipaqpas? Llaqtanta imaynata Jehová Dios yanapasqanta yachaspaqa aswan cheqaqpaqmi Diospa Gobiernonta qhawarinki, astawanmi munanki chay Gobiernomanta runakunaman willaytapas (Jer. 9:24; Luc. 4:43).

6. ¿Imaraykun Dios munan Gobiernonpa kamachikuyninkunata yachananchista kasukunanchistapas?

⁶ Kamachikuyninkunatan yachana. Kay pachapi gobiernokunaqa munankun churasqanku leykunata runakuna yachanankuta kasukunankutapas. Chhaynallatataqmi Diospas munan Gobiernonpa kamachikuyninkunata yachananchista kasukunanchistapas (Isa. 2:3; Juan 15:10; 1 Juan 5:3). Runakunaq churasqan leykunaqa manan llapanchu chaninkama, Diospa kamachikuyninkunan ichaqa ‘chaninpuni’ (Sal. 19:7). ¿Kusikunkichu chaykunata kasukuspa, Bibliata sapa p’unchay leespapas? (Sal. 1:1, 2.) Diospa kamachikuyninkunata yachanapaqqa sapankan kallpachakuna.

DIOSPA KAMACHIKUYNINKUNATAN KASUKUNKU

7. ¿Ima kamachikuykunatan Diospa Gobiernonpaq hina kawsay munaqkuna kasukunchis?

⁷ Diospa Gobiernonpaq hina kawsashanallapaqqa yachananchismi kamachikuyninkunata, munakunanchistaq kanpas. Askha runakunan ninku nacionninkuq kamachikuyninkunata allinpaq hap’isqankuta, ichaqa mana paykunapaq hina kaqtinqa mana piqpa rikusqallanmi p’akinku. Paykunaqa kasukunku ‘runakunata kusichinallankupaqmi’ (Col. 3:22). Diospa Gobiernonpaq hina kawsaqkunan ichaqa mana chhaynachu kanchis. Kusikuywanmi Diospa kamachikuyninkunata kasukunchis manaña pipas rikuwanchischu chaypas. ¿Imarayku? Chay kamachikuykuna qoq Diosta munakusqanchisrayku (Isa. 33:22; leey Lucas 10:27).

8, 9. ¿Imaynapin yachawaq cheqaqtachus Diospa kamachikuyninkuna munakusqaykita?

⁸ ¿Imaynapin yachawaq Diospa kamachikuyninkunata cheqaqtachus munakusqaykita? Wakinpiqa sapankan akllakunchis imatapas, kaypi yuyaykuy: ¿imaynatan qhawarinki pipas imayna p’achakusqaykimanta imatapas nisuqtiyki? Manaraq Diospa Gobiernonpaq hina kawsashaspaqa yaqapaschá t’eqe otaq nishu huch’uy p’achawan churakurqanki. Ichaqa, astawan Diosta munakusqaykiraykun paypa sutinta hatunchanaykipaq hina p’achakurqanki (1 Tim. 2:9, 10; 1 Ped. 3:3, 4). Kunanqa allintapaschá p’achakushanki. Ichaqa, huk umalli nisunkiman p’achakusqayki iñiq t’aqapi kaqkunata misk’achisqanta chayri, ¿imatan ruwawaq? ¿Kutipakuwaqchu? ¿Phiñakapuwaqchu, k’ulluchakuwaqchu cambianaykipaq? Diospa Gobiernonpaq hina kawsanapaqqa Cristotan qatikunanchis (1 Ped. 2:21). Pablon nirqan: “Sapankanchismi runamasinchispa sonqonman chayaqta ruwananchis paypa allinninpaq, ahinapi payta iñiyninpi wiñachinanchispaq. Cristopas manan pay kikinpa allinnintachu maskharqan”, nispa (Rom. 15:2, 3). Allin iñiyniyoq cristianoqa iñiq t’aqapi thak kawsay kananraykun hukpa conciencianta respetananpaq kallpachakun (Rom. 14:19-21).

⁹ Rimallasuntaq ch’uya kawsaymanta casarakuymantapas. Diosta mana reqsiqkunaqa yaqapaschá allinpaq qhawarinku qharipura otaq warmipura puñuyta, pornografía qhawayta, wasanchay huchapi puriyta, divorcianakuytapas. Diospa Gobiernonpaq hina kawsaqkunan ichaqa chay ruwaykunata manapuni  allintachu qhawarinku. Manaraq cristiano kashaspa askhaña mana allin ñanpi purirqanku chaypas, kunanqa entiendenkun warmi-qhari puñuypas casarakuypas Diospa regalon kasqanta. Chaninpaqmi hap’inku Diospa kamachikuyninkunata, sut’itataqmi yachanku qhelli huchapi puriqkunaqa mana Diospa Gobiernonpaq hinachu kasqankuta (1 Cor. 6:9-11). Chaymantapas reparankun runaq sonqon q’otukuq kasqanta (Jer. 17:9). Chayraykun agradecekunku ch’uyata kawsanankupaq yanapaq kamachikuykunata chaskispa.

WILLAKUYKUNATA KASUKUNKU

10, 11. ¿Imakunamantan Diospa Gobiernon willawanchis, imaynatan chaykunata qhawarinki?

¹⁰ Ima mikhuypas otaq hampipas runakunata dañota ruwanman chayqa, gobiernokunan willanku chaykunamanta cuidakunankupaq. Mana chayta ruwaspaqa huchayoqmi kankuman. Ichaqa manan llapa mikhuychu, hampikunachu mana allin. Diospa Gobiernonpas chay hinatan willawanchis iñiyninchista, ch’uya kawsayninchista waqllichiq kaqkunamanta cuidakunapaq. Allin yuyayniyoq hunt’aq kamachin askha watakunaña Diospa Gobiernonpaq hina kawsaqkunata willawashanchis Internetpi pornografía qhaway iñiyninchista waqllichisqanta. ¡Anchatan agradecekunchis chaykunata willawasqanchismanta!

¹¹ Kay tiempokunapiqa askhan Internetpi redes sociales nisqaman haykunku. Chayta mana allinta utilizayqa waqllichiwasunmanmi, chaypin wakinqa mana allin runakunawan reqsinakunku (1 Cor. 15:33). Chayraykun Diospa llaqtanqa chaykunamanta cuidakunapaq allin willakuykunata qowanchis. Hunt’aq kamachin qaynakunalla horqomurqan redes sociales nisqamanta willaq revistakunata. * Chaykunata mana leespa redes sociales nisqaman haykusunman chayqa rikch’akunmanmi huk hampi imapaq kasqanta mana yachaspa tomaywan.

12. ¿Imaraykun mana yuyayniyoq kasunman willakuykunata mana kasukuspa?

¹² Hunt’aq kamachiq willawasqanchista mana kasukuqkunaqa kikinkutan dañota ruwakunku. Wakinqa kikinkutan q’otukunku Diospa mana rikunanpaq yuyaykuspa, chaymi pornografía qhawayman qokunku otaq qhelli ruwaykunaman urmanku. Mana yuyayniyoq kaymi ruwasqanchista Diosmanta pakayqa (Pro. 15:3; leey Hebreos 4:13). Imaynan wakin gobiernoqa leykuna mana kasukuqkunata qarqonku, chay hinatan Jehová Diospas kamachikuyninkunata mana kasukuspa mana pesapakuqkunata Gobiernonmanta qarqon (1 Cor. 5:11-13). * Ichaqa ancha khuyapayakuyninpin chay runakunata yanapayta munan, chaypaqmi kay pachapi serviqninkunata utilizan (Gál. 6:1). Huchankumanta pesapakuspa kawsayninkuta cambiaqkunaqa Diospa allin qhawarisqanmi kapullankumantaq, hinaspa wakmanta Diospa Gobiernonpaq hina kapunkuman (2 Cor. 2:5-8). ¡May allinmi ancha munakuq Reyta serviyqa!

 CHANINPAQMI QHAWARINKU YACHACHISQA KASQANKUTA

13. ¿Imaynatan Diospa Gobiernonpaq hina kawsaq runakuna ancha chaninpaq hap’inku yachachisqa kasqankuta?

¹³ Askha gobiernokunan kallpachakunku kamachisqanku runakunata yachachinankupaq. Chayraykun escuelakunata ruwanku leeyta qelqayta yachachinankupaq, wiñaspanku mantenekunankupaq. Cristianokunaqa allinpaqmi qhawarinku chay escuelakunata chaykunapi yachanankupaqtaq kallpachakunku. Ichaqa Diospa yachachisqantan aswan chaninpaqqa qhawarinku. Iñiq t’aqawanmi Diosqa leenankupaq kallpachan, chaymi tayta-mamakunata kallpachan huch’uy wawankuman leenankupaq. Allin yuyayniyoq hunt’aq kamachiqa askha paginakunapin Bibliamanta yachachikuykunata horqomun, chaymi lloqsimun predicanapaq Qhawaq revistapi, hinallataq huñunakuypi estudianapaq revistapi. Sapa p’unchay huk otaq iskay paginata leenki chayqa, hunt’aq kamachinwan Diospa yachachiwasqanchismi allinninchispaq kanqa.

14. a) ¿Ima yachachikuytan chaskinchis? b) ¿Ima qelqakunawanmi yanapachikurqanki familiantin Dios yupaychasqaykipi?

¹⁴ Diospa Gobiernonpaq hina kawsaqkunatan sapa semanan iñiq t’aqapi yachachikun. Allin Yachachiq Kanapaq Escuelapipas 60 watakuna masñan yachachikushan predicacionta aswan allinta aparinankupaq. ¿Chay escuelapichu kashanki? Qhepa watakunapin hunt’aq kamachi yuyarichirqan familiapi Dios yupaychayta sapa semana aparinapaq. Chayqa familiakunatan hukllachan. ¿Yanapachikurqankichu qelqakunapi lloqsimuq yuyaychaykunawan? *

15. ¿Imatan ancha allinpaq qhawarinchis?

¹⁵ Askha runakunan politicapi partidokunata yanapanku, wakinqa wasin-wasinta rispan votota mañakunku. Diosta kasukuqkunaqa astawanraqmi Diospa Gobiernonta yanapanku. Chaytan ruwanku callekunapipas wasin-wasintapas rispa. Ñawpaq estudiopi qhawarisqanchis hina, Jehová Diospa Gobiernonmanta willaq Qhawaq revistaqa pachantinmanta aswan askha rakikuq qelqan. Ñoqanchisqa ancha allinpaqmi qhawarinchis chay Gobiernomanta willayta. ¿Tukuy sonqowanchu chay willaypi yanapakushanki? (Mat. 28:19, 20.)

16. ¿Imaynatan rikuchisunman Diospa Gobiernonpaq hina kawsasqanchista?

¹⁶ Pisi tiempomantaqa Diospa Gobiernollanñan kay pachapi kamachikunqa. Kawsayninchispin pusariwasun, iñiyninchispipas. ¿Diospa Gobiernonpaq hinachu chay tiempopi kawsasun? Chaytaqa kunanmantapachan rikuchishananchis. Chayrayku, Diosta hatunchanapaq hina sapa p’unchay decidisun, Gobiernonpaq hina kawsanapaqpas (1 Cor. 10:31).

[Uranpi willakuykuna]

[Tapuykuna]

[14 paginapi willakuy]

¿Kasukunkichu Bibliaq willasqanta Internetman haykuspa?

[12 paginapi dibujo]

¿Corepa miraynin hinachu cheqaq yupaychayta, Diospa llaqtantapas munakunki?

[15 paginapi foto]

Familiapi Diosta yupaychaymi yanapasunkichis Diospa Gobiernonpaq hina kawsanaykichispaq