“¡MANAN wasin-wasintaqa predicaymanchu!” nispan wakin Biblia estudiaqkuna niwarqanchis. Ichaqa chhaynatan nillarqantaq Bibliamanta yachachiq kusa rimaq watukuqpas.

Zion’s Watch Tower (Sionmanta Qhawaqpa Torren) revistata leeqkunan iglesiankuta saqepurqanku, munarqankutaqmi paykuna hina Bibliamanta yachay munaqkunawan kuska kayta. Chay revistapin kallpacharqan kaq iñiyniyoqkunata maskhaspa huñunakunankupaq chhaynapi Bibliata estudianankupaq. 1894 watakunapin Sociedad Watch Tower Bibliamanta yachachiqkunata kamachirqan visitanata munaq t’aqakunaman rinankupaq. Kay allin yachayniyoq allin llank’aq iñiqkunaqa, qhepamanmi reqsikurqan watukuqkuna nispa, paykunatan akllakurqan huch’uyaykukuq, Bibliamanta yachayniyoq, kusa rimaq, allin yachachiq Jesucristopipas iñisqankurayku. Visitakunaqa huk otaq iskay p’unchayllan karqan ichaqa ch’isiyaqmi imaymanata ruwarqanku. Askha Biblia estudiaqkunan predicayta qallarirqanku watukuqkunaq discurso qonanpaq invitacionta rakispa. Discursota qosqan qhepamanmi Hugo Riemer kuskan tuta pasaykama tapukusqankuta kutichirqan, paymi qhepaman karqan Umalliq T’aqamanta. Sayk’usqaña chay ruway karqan chaypas payqa nirqanmi chay huñunakuy “ancha munay kasqanta”.

Zion’s Watch Tower (Qhawaq) revistan nirqan watukuqkuna visitasqan hermanokunapaq “ancha allin kasqanta”, chaytan ruwakurqan huñunakuykunawan. Chay qayllallapi tiyaq Biblia estudiaqkunaqa discursokunamanmi riq kanku tapuykunata kutichiykunatawan ruwakuq huñunakuymanpas. Chaymantataq watukuqkunata qorpachaqku. Maude Abbott wawallaraq kashaspan chay huñukuyman rirqan, chaymi karqan tutallamanta, paymi yuyarin: “Chay qhepamanmi llapayku hatun mesapi patiopi mikhurqayku, askha mikhunan karqan sumaqllañataq kanpas, karqanmi jamón, wallpa theqte, imaymana clase t’anta pastelkunapas. Saksatan llapayku mikhurqayku iskay horas tardeta hinatataq yapamanta huñukurqayku huk discursota uyarinaykupaq. ¡Ichaqa puñuywanmi aysachikurqayku!” nispa. Benjamin Barton watukuqmi nirqan: “Sichus chay mikhunakuna qowasqankuta llapallanta mikhuyman karqan chayqa, ñachá saqepuymanña karqan watukuq kasqayta”, nispa. Qhepamanmi Brooklyn oficinakunamantapacha huk cartata apachikurqan qoykukuq hermanakuna watukuqkunaman ama nishuta mikhuchinankupaq, chhaynapi allinta puñunankupaq.

Watukuqkunaqa allin yachachiqmi karqanku, dibujokunawan, cosaskunawan otaq ima tarisqankuwanmi yachachiqku chhaynapi discursonku uyarinapaq hina kananpaq. R. H. Barber iñiqqa sumaqtapunin discursonta ruwaq ima rikch’anachiyllatapas churayoqpunin. W. J. Thorn iñiqqa ancha munakuqmi karqan, chaymi niqku “ñawpa tiempopi taytakuna” hina kasqanta. Huk kutinsi carropi rishaqtinku Shield Toutjian iñiq qonqaylla qaparisqa: “¡Carrota sayachiy!” nispa. Chaysi phawaylla uraykuspa t’ikakunata p’itimurqan hinaspa Diospa kamasqankunamanta yachachiyta qallarisqa.

Watukuqkunaqa imaymanapin tarikuqku, astawanqa kurakña kaspanku. Ichaqa wakinpaqmi sasa  karqan hukniraymantañataq Diosmanta yachachinanku kaqtin. Chaymi karqan wasin-wasinta predicayta aparinankupaq umallinanku kaqtin. Inglespi 15 de marzo 1924 watapin La Torre del Vigía nisqa revistapi lloqsimurqan: “[Cheqaq cristianokunapaqqa] aswan importanteqa Diospa Gobiernonmanta willaymi. Watukuqkunaqa chaypaqmi akllasqa kanku”, nispa.

Wakin watukuqkunaqa phiñakapurqankun chaywan, chaymi yachachiq kanankuta saqepuspa huk religionta paqarichirqanku. Robie D. Adkins willakun huk allin discursokuna ruwaqmanta llakisqa rimapakuspalla kasqanta, nirqansi: “Ñawpaqmanta rimamuyllatan yachani. ¡Manan wasin-wasintaqa predicaymanchu!” nispa. Adkins iñiqmi yuyarin: “Qhepataqa rikurqani 1924 watapi Columbus (Ohio) llaqtapi hatun asambleapin. Chaypin sapallan usphullaña huk sach’aq llanthunpi sayasharqan. Askha iñiqkunan kusisqallaña kasharkanku paytaq phiñasqallaña. Chaymantaqa manan rikupurqanichu, chay qhepamanqa Diospa llaqtanmantan lloqsipurqan”, nispa. Ichaqa askha iñiqkunan ladonta kusisqallaña pasaqku carronkuman librokunata apaykuspa, paykunaqa anchatapunin wasin-wasinta predicayta munasharqanku (Hech. 20:20, 21).

Manchasqaña kasharqanku yachachisqanku iñiqkuna hina chaypas, watukuqkunaqa tukuy sonqowanmi predicayta qallarirqanku. Alemania nacionmanta Maxwell G. Friend (Freschel) cristianon, wasin-wasinta predicasqankumanta qelqarqan: “Predicayqa visitasqaymantapas huk bendicionpiwanmi kapuwan”, nispa. John A. Bohnet watukuqmi nillarqantaq hermanokuna “tukuy sonqonkuwan” predicay munasqankumanta.

Chay watukuqkunaqa kay watakunaq pasasqanpin yanapawarqanchis. Askha watakunaña kaq Testigo Norman Larson cristianon nin: “Huch’uychaymanpachan yacharqani watukuqkunaq visitasqanqa ancha chaniyoq kasqanta. [...] Paykunan yanapawarqanku allin ñanninta purinaypaq”, nispa. Kunanpas hunt’aq sonqo kasqankuwanmi watukuq umalliqkunaqa yanapawashanchis “¡ñoqaqa atinin wasin-wasinta predicayta!” ninapaq.

[32 paginapi willakuy]

Watukuq hamuqtinqa ancha kusikunapaqmi karqan

[31 paginapi dibujo]

1905 watapi Benjamin Barton iñiqqa 170 t’aqakunata watukurqan

[32 paginapi foto]

Walter J. Thorn iñiqqa sinchi munakuqmi karqan chaymi iñiqkunaqa Papá niqku

[32 paginapi foto]

J. A. Browne iñiqqa Jamaica naciontan rirqan 1902 watapi watukuq hina chhaynapi 14 t’aqakunata kallpachamunanpaq

[32 paginapi foto]

Watukuqkunaqa hermanokunaq iñiynintan kallpachaq, Diospa llaqtanmantaq astawan asuykachiq