1-3. a) ¿Imatan rikuchin iskay rikch’anachiymanta Jesuspa rimasqan? b) ¿Ima tapuykunatan kutichisun?

ALLIN reqsisqa runapi yuyaykuy, paymi valekusunki huk importante huñunakuyninman carroykipi apanaykipaq. Ichaqa, lloqsinaykiña kashaqtiykin cuentata qokunki pisi gasolinayoq kasqanta, chaymi usqhaylla rinki rantiq. Chaykamaqa chay runan qhawapaykamushan, “chayñachu kanpas rikhuriramunman”, nispa. Mana rikhuriqtiykin huk runata valekun apachikunanpaq. Chayaqtiykiqa pasapusqañan. ¿Imaynan sientekunki?

² Kunanqa yuyaykuy chay importante runa qan kasqaykipi, hinaspan confianapaq hina kinsa runakunata akllanki huk allin ruwayta aparinankupaq. Allintan willanki imatachus ruwanankuta, hinaspan kinsantinku nisunkiku ruwanankupaq. Ichaqa kutimuspaykin yacharqonki iskaylla ruwanankuwan hunt’asqankuta. Huknin kaqqa manan imallatapas kallpachakusqachu ruwananpaq, astawanraqmi mana ruwasqanmanta imaymanaman tumpan. ¿Imatan ruwawaq?

³ Chhaynaman rikch’akuqta hinan Jesús rimarqan sipaskunamanta, bolsa qolqemantawan rikch’anachiypi. Chaywanmi willarqan imarayku kay tukukuy tiempopi wakin akllasqa cristianokuna hunt’aq allin yuyayniyoq kanankuta, wakintaq mana (Mat. 25:1-30). * Chaymanta rimaspan nillarqantaq: “Makilla kashaychis, manan yachankichischu ima p’unchaytachus ima horatachus Runaq Churin kutimunanta”, nispa. Chaytaqa nirqan Saqraq kamachisqan pachata chinkachinanpaq tiempo chayamunanmantan (Mat. 25:13). Chay rimasqanmanqa allin yuyaytan churananchis. ¿Imapin allinninchispaq Jesusta kasukuy, makilla kaypas? ¿Pikunan rikuchirqanku kawsanankupaq makilla kasqankuta? ¿Imatan ruwananchis makilla kananchispaq?

4. ¿Imaraykun cristianokuna mana “horata qhawaspallachu” kananchis rikch’asqalla kanapaq?

⁴ Wakin ruwaykunaqa horata qhawaspallan ruwakun, chaykunan kanman: fabricapi llank’ay, doctorman riy otaq viajaypas. Ichaqa wakin ruwaykunata relojta qhawaspalla ruwasunman chayqa manapaschá tukuy yuyaywanchu ruwasunman hinaspa hukkunaq kawsayninta sasachakuyman churasunman, chaykunan kanman bomberokunaq ruwaynin, hukkunapas. Chaykunapiqa manan horata qhawaspachu llank’ana, aswanpas tukuy yuyaywanmi. Chay hinatan ñoqanchispas ruwananchis, tukukuy p’unchay qayllaykamusqanman hinaqa astawanmi Jehová Diospa salvakunanchispaq niwasqanchista willananchis. Cristianokunaqa manan “horata qhawaspallachu” kananchis rikch’asqalla kanapaqqa. Hinaspapas ima p’unchaychus ima horachus p’uchukay kananta mana yachayqa phisqa allinkunapin yanapawanchis.

5. ¿Imaynapin hayk’aqchus p’uchukay kasqanta mana yachay yanapawanchis sonqonchispi imachus kasqanta rikuchinapaq?

⁵ Ñawpaqtaqa, p’uchukay chayamunanta mana yachayqa yanapawanchismi sonqonchispi imachus kasqanta rikuchinanchispaq. Jehová Diosqa respetawanchismi, chaymi payta servinanchispaqqa kikinchis decidikunanchista munan. Llapanchispas munanchismi p’uchukaypi salvasqa kayta, ichaqa Diostaqa manan wiñay kawsayta chaskinallanchispaqchu servinchis aswanpas munakusqanchisraykun (leey Salmo 37:4). Munanchismi kamachikuyninkuna kasukuyta, yachanchistaqmi chaykuna allinninchispaq kasqanta (Isa. 48:17). Kamachikuyninkunaqa manan sayk’uchiwanchischu (1 Juan 5:3).

6. ¿Imaynan Dios sientekun munakuywan serviqtinchis, imarayku?

⁶ Iskaypiqa, tiempotan qowanchis Diospa sonqonta kusichinapaq. Diostaqa servinchis manan p’uchukay tiempo kananpi yuyaykuspachu nitaq allinkunata chaskinanchisraykuchu aswanpas munakusqanchisraykun, chhaynapin Saqra llulla kasqanta sut’iman horqonchis (Job 2:4, 5; leey Proverbios 27:11). Imaymana nak’ariyta Saqra paqarichisqanraykun astawanraq Dioslla kamachikuq kasqanta defiendenchis, Saqraq millay kamachikuynin contrataq churakunchis.

7. ¿Imaraykun amaña sonqonchispa munapayasqanman hinachu kawsananchis?

⁷ Kinsapiqa, kallpachawanchismi amaña sonqonchispa munapayasqanman hinachu kawsanapaq. Wakin runakunaqa manan Diospi creenkuchu, ichaqa manchasqan kawsanku kay Hallp’a chinkachisqa kananmanta, chayraykun ninku: “Mikhusunchis, ukyasunchis, paqarinmi wañupusunchis”, nispa (1 Cor. 15:32). Ñoqanchismi ichaqa mana manchakunchischu. Manan runakunamantaqa t’aqakunchischu, manataqmi sonqonchispa munapayasqanman hinachu kawsanchis (Pro. 18:1). Aswanpas tiemponchista, kallpanchista, kaqninchistan qonchis Diospa Gobiernonmanta willanapaq (leey Mateo 16:24). Diosta servispan kusikunchis, astawanqa payta reqsinankupaq runakunata yanapaspa.

8. ¿Bibliapi ima willakuymi yachachiwanchis Diospi confianapaq, Bibliaq nisqanman hina kawsanapaqpas?

⁸ Tawapiqa, yanapawanchismi astawan Diospi confianapaq, Bibliaq nisqanman hina kawsanapaqpas. Huchayoq kasqanchisqa aswan sut’itan reparakun ñoqallanchispi confiasqanchispi. Cristianokunatan Pablo nirqan: “Pipas qaqa sayashasqanta yuyaqqa allinta qhawakuchun, paqtataq urmanman”, nispa. Diospa llaqtanta Prometesqa Hallp’aman manaraq Josué pusashaqtinmi 23.000 israelitakuna manaña Diospa allin qhawarisqanchu kapurqanku. Pablon nirqan: “Ñawpa [...] sucedesqankunaqa ñoqanchispa yachaqakunanchispaqmi karqan, ñoqanchisqa  p’uchukay tiempopin kashanchis, chaymi chaykunaqa anyawananchispaq qelqasqa karqan”, nispa (1 Cor. 10:8, 11, 12).

9. ¿Imaynatan pruebakuna yanapawanchis, Diosmanpas asuykachiwanchis?

⁹ Phisqapiqa, yanapawanchismi sasachakuykuna allinninchispaq kananpaq (leey Salmo 119:71). ‘Sasa tiempokunapin’ kawsashanchis (2 Tim. 3:1-5). Saqraq kamachisqan pachapiqa cheqnisqan kanchis, chaymi iñisqanchisrayku qatiykachasqa kasunchis (Juan 15:19; 16:2). Sichus huch’uyaykukuq kasun, maskhasuntaq Diospa yanapaynintapas chayqa, chay pruebakunan yanapawasun iñiyninchispi qaqa kanapaq. Sasachakuypi tarikuspa pisipanamantaqa astawanmi Diosman asuykachiwasun (Sant. 1:2-4; 4:8).

10. ¿Imaraykun mayninpi usqhaylla tiempo pasan?

¹⁰ Tiempoqa usqhayllan pasanman otaq manapas. Sichus intitapas mana qhawarisparaq apuraylla imatapas ruwashanchis chayqa usqhayllan tiempoqa pasan. Chhaynallataqmi Diospa kamachiwasqanchista ruwasqanchispipas, sichus tukuy yuyaywan ruwashanchis chayqa p’uchukay tiempoqa mana reparashallaqtinchismi chayarqamunqa. Chaytan ruwarqanku askha akllasqa cristianokuna. 1914 watapi Jesús Rey churasqa kasqan qhepaman imachus sucedesqanmanta pisillapi yuyarisun. Chaypin reparasun imaynatan wakin rikuchirqanku makilla kasqankuta wakintaq mana.

11. 1914 wata pasayta, ¿imaraykun wakinpa yuyaykusqanman hina mana usqhaychu novio chayamusharqan?

¹¹ Jesuspa rikch’anachisqanmanta rimasun. Sichus chay sipaskuna, kamachikunapas yachankuman karqan hayk’aqchus novio otaq patronninku chayamunanta chayqa, manan necesitankumanchu karqan makilla kayta. Ichaqa mana yachasqankuraykun makilla kananku karqan. Askha watakuna ñawpaqtan akllasqa cristianokuna yacharqanku 1914 watapi imapas sucedenanta. Chay watapin ichaqa mana hunt’akurqanchu imachus suyakushasqanku, chaymi wakinpa yuyaykusqanman hinaqa mana usqhaychu novio chayamusharqan. Chay wata qhepakunamanmi huk iñiqmasi nirqan: “Wakinqa suyakusharqaykupunin [1914 watapi] octubre killa qallariypi hanaq pachaman ripunaykupaq”, nispa.

12. ¿Imaynatan akllasqa cristianokuna rikuchirqanku allin yuyayniyoq hunt’aq kasqankuta?

¹² Imaynataraqchá llakikurqanku p’uchukay tiempo chayamunanta suyakusqanku mana hunt’akuqtin. Primera guerra mundial chayamuqtinqa astawanraqmi atipananku karqan qatiykachaykunata. Chaykunaq kasqanwanmi huk tiempo puñuypi karqanku, chaymi ruwayninkuta saqerqanku. Ichaqa, 1919 watapin rikch’arirqanku. Chay watapin Jesús hamurqan espiritual Dios yupaychana wasita qhawaq. Wakinqa manan allinchu kasharqanku, chaymi manaña Reypa llank’aqninchu kapurqanku (Mat. 25:16). Rikch’anachiypi mana yuyayniyoq sipaskuna hinan espiritual aceitenkuwan pisichikurqanku, qella kamachi hinataqmi mana munarqankuchu Diospa Gobiernonpaq llank’ayta. Ichaqa, chhayna sasa tiempopi tarikuspapas, askha akllasqa cristianokunan rikuchirqanku hunt’aq sonqo kasqankuta sonqomanta patronninkuta serviy munasqankutapas.

13. ¿Imatan hunt’aq kamachi rikuchirqan 1914 wata qhepata, imatan kay tiempopi rikuchishan?

¹³ 1916 watapin kay revista nirqan: “Wawqe-panaykuna, Diospa yuyaykusqankunata allinta qhawariqkunaqa manan llakikuykuchu ruwasqankunawan. Manan munasqaykuman hinachu ruwayta munarqayku, chayraykun 1914 watapi octubre killapi imachus suyakusqanchispi pantasqaykuta reparaspaqa kusikurqayku chay hawa Señorninchis yuyaykusqanta mana cambiasqanmanta.  Manan Señorninchis yuyaykusqanta cambianantachu munarqayku, aswanpas yuyaykusqanta munasqantan entiendeyta munayku”, nispa. Kunanpas akllasqa cristianokunaqa rikuchinkun huch’uyaykukuq hunt’aq sonqo kasqankuta. Manan Diospa yuyaychasqanpaqchu qhawarikunku, ichaqa decidisqan kashanku Señorpa kay pachapi kaqninkunata qhawarinankupaq. Chaymantapas, kay pachapi kawsanankupaq suyakuyniyoq kaqkunan qatikushanku chhayna tukuy sonqowan serviq kasqankuta makilla kasqankutapas, paykunan ‘wak ovejakunamanta’ ‘ancha askha runakuna’ kanku (Apo. 7:9; Juan 10:16).

14. ¿Imaynatan pakaykuwanchis hunt’aq kamachita makilla uyariy?

¹⁴ Akllasqa cristianokuna hinan ancha askha runakunamanta kaqkunapas makilla kashanku hunt’aq kamachi imatachus nisqanman, paykunatan Jehová Dios kamachirqan espiritual mikhunata qowananchispaq. Chhaynapin ancha askha runakunapas Bibliapi, Diospa santo espiritunpi tarikuq espiritual aceitenkuta hunt’asqata hap’inku (leey Salmo 119:130; Juan 16:13). Chaymi allin preparasqa kashanku Cristoq kutimunanpaq, manataqmi pisipankuchu iñiyninkupi sasa pruebakunapiña tarikunku chaypas. Yachanapaq, Nazi partidoq ruwasqan carcelkunapi tarikuq iñiqmasikunan qallariypiqa huk Bibliallayoq karqanku, hinan Diosmanta mañakurqanku astawan espiritual mikhunata qonanpaq. Chay qhepallamanmi yacharqorqanku chayllaraq carcelman haykumuq huk iñiqmasi k’aspimanta ruwasqa chakinpi chayllaraq lloqsimuq La Atalaya nisqa askha revistakuna apaymusqanta. Chay carcelmanta lloqsimuq Ernst Wauer akllasqa cristianon qhepa watakunaman nirqan: “Jehová Diosmi yanapawarqanku chay revistapi kallpachakuq yachachikuykunata umaykupi allinta hap’inaykupaq”, nispa. Nillarqantaqmi: “Kunanqa manan sasachu espiritual mikhuna tariyqa, ichaqa ¿chaninpaqchu hap’inchis? Jehová Diosqa paypi confiaqkunata, hunt’aq sonqo kaqkunata, mesanmanta mikhuqkunatapas bendecinqapunin”, nispa.

15, 16. ¿Imaynatan huk casarasqa cristiano bendecisqa karqan tukuy sonqowan Dios servisqankumanta? ¿Imatan chaymanta yachanchis?

¹⁵ Wak ovejakunaqa Patronpa kamachisqanta tukuy sonqowan kasukuspan yanapanku Cristoq wawqenkunata (Mat. 25:40). Paykunaqa manan rikch’anachiypi “qella kamachi”  hinachu kanku, aswanpas kusikuywanmi tukuy atisqankuta ruwanku kawsayninkupi Diospa Gobiernonta ñawpaqman churanankupaq. Yachanapaq, Jon, Masako casarasqa cristianokunan Kenia nacionpi chino rimaq runakunata predicamunankupaq invitacionta chaskirqanku. Qallariypiqa iskayarqankun, ichaqa Diosmantan mañakurqanku, imaynapi tarikusqankutapas qhawarirqankun, hinan decidikurqanku chay nacionman rinankupaq.

¹⁶ Chay kallpachakusqankutaqa Diosmi bendecirqan. Paykunan ninku: “¡Kusikunapaqmi kaypi predicayqa!”, nispa. Qanchis estudiotan tarirqanku, ancha munaytan pasarqankupas. Imayna sientekusqankumantan ninku: “Sapa p’unchaymi Diosta agradecekuyku kaypi predicasqaykumanta”, nispa. Hayk’aqña p’uchukay p’unchay chayamunqa chaypas, askha cristianokunan Diospa kamachisqanta tukuy yuyaywan ruwashanku. Yuyaykusun Galaad Escuelamanta askha cristianokuna lloqsispa misionero kasqankupi. Sichus yachayta munanki misionerokunaq kawsaynin imayna kasqanta chayqa, qhaway “Hacemos todo lo que podemos”, nisqa yachachiyta, 15 de octubre 2001 La Atalaya revistata. Chayta leespayki yuyaykuy imaynatan Diosta hatunchanaykipaq astawan kusikunaykipaqpas Dios serviyniykita yapawaq chayta.

17. ¿Imaynapin allinninchispaq chay p’unchayta chay horata mana yachasqanchis?

¹⁷ Chhaynaqa, ima p’unchaytachus ima horatachus Diospa p’unchaynin chayamunanta mana yachayqa imaymanapin yanapawanchis. Llakisqa khuyay kashanamantaqa, yuyayninchisqa kashan Diospa munayninta ruwanapaqmi, chhaynapin astawan munakuq Taytanchisman asuykunchis. Tukuy yuyaywan mana kacharispa ‘yapunata hap’ispaqa’, astawanmi kusikunchis Patronninchista servispa (Luc. 9:62).

18. ¿Imaraykun iñiyninchis mana chiriyananchu?

¹⁸ Diospa juicionqa usqhayllan asuykamushan, manan munanchischu Jehová Diosta Jesustapas llakichiyta. Iskayninkupas sumaq llank’aykunatan qowarqanchis. ¡Ancha chaninpaqmi hap’inchis chay confiawasqanchistaqa! (Leey 1 Timoteo 1:12.)

19. ¿Imaynatan rikuchinchis makilla kasqanchista?

¹⁹ Hanaq pachaman rinapaq otaq kay pachapi kawsanapaqña suyakuyninchis chaypas, tukuy sonqowan hunt’asun predicayninchista, runakunata yachachinapaq Diospa kamachiwasqanchistapas. Manan yachanchischu ima p’unchaytachus ima horatachus p’uchukay chayamunanta, manataqmi chay yachaytaqa necesitanchischu. Rikuchishanallanchismi makilla kasqanchista (Mat. 24:36, 44). Sichus Jehová Diospi confiasun, Gobiernontataq ñawpaqman churasun chayqa manan hayk’aqpas khuyayta saqewasunchu (Rom. 10:11).