APÓSTOL Pablon qelqarqan: “Diospa siminqa kawsaqmi, atiyniyoqmi”, nispa (Heb. 4:12). ¿Imatan chaywan nisharqan? Nisharqanmi Bibliaqa runakunaq sonqonman chayananpaq atiyniyoq kasqanta, kawsayninkuta cambiay atisqantapas.

Ichaqa apostolkunaq wañupusqan qhepamanmi chay textota huknirayta yachachiyta qallarirqanku, chayqa karqan iñiymanta wakin cristianokuna t’aqakuqtinkun (2 Ped. 2:1-3). Watakuna qhepamanmi curakuna Bibliata hukniray atiyniyoqta hina qhawarirqanku. Harry Y. Gamble profesormi Cristiana Qelqakunata hukniray atiyniyoqta hina qhawarisqankumanta willarqan. 200 watakunapi Iglesiaq Taytan Orígenes nisqa runas kayta nisqa: “Atiyniyoq simikuna imayna t’oqyasqanqa allinkunatan ruwan: chhayna simikuna atiyniyoqtaq chayqa, Diospa Qelqanpi simikunaqa aswan atiyniyoqraqchá”, nispa. Chaymantapas 300 watakunapi kawsaq Juan Crisóstomo, religionpi allin reqsisqa runan willarqan wakin runakuna Bibliapi Evangelio textokunata atiyniyoq amuletota hina kunkankupi walqakusqankuta. Huknin libronpin nisqa: “Evangelio qelqakuna wasipi kaqtinqa manan supayqa asuykunqachu”, nispa. Católica religionpi Agustín de Hipona runamantan nillantaq: “Payqa allinpaqmi qhawarirqan uma nanaymanta onqoq runaqa sawnanpi Juan Evangelio qelqa churakunanta”, nispa. Chhaynapin runakunaqa amuletota hina Bibliata hap’iqku. Ichaqa, ¿allinchu kanman Bibliata amuletota hina hap’iy?

Kay tiempopipas huk creencian kallantaq, Bibliatan watuq librota hina hap’inku, chaypaqmi wakin runakunaqa qonqaylla Bibliata kichanku chaypi ñawpaqta ñawinkuq rikusqantataq leenku, chaypi nisqantataq qhawarinku huk yanapayta hina. Profesor Gamble willallantaq: Agustín de Hipona runas huk kutin huk wawaq kunkanta huk wasimanta uyarisqa: “Hap’ispa leey, hap’ispa leey”, nispa nishaqta. Chay uyarisqantan qhawarirqan Bibliata kichaspa qallariypi rikusqan capitulota leenanpaq Diospas kamachishanman hinata.

Yaqapaschá qanpas rikurqanki huk runa sasachakuypi tarikuspa Diosmanta mañakusqanta, chay qhepaman Bibliata kichaspa ñawinpa ñawpaq rikusqanta Diospa yanapayninta hina qhawarisqanta. Allin yuyaywanña chayta ruwanku chaypas, cristianokunaqa manan chhaynatachu Diospa yanapayninta maskhananku.

Jesusmi qatikuqninkunaman prometerqan ‘kallpachaq santo espirituta’ kachamunanpaq. Nirqantaqmi: “Paymi tukuy imaymanata yachachisunkichis, yuyarichisunkichistaqmi tukuy imakunatachus qankunaman nisqaytapas”, nispa (Juan 14:26). Chay yanapayta chaskikunapaqqa Bibliaq nisqantan yachananchis, Bibliata kichaspa ñawinkuq rikusqallanta leeqkunaqa manan Bibliaq nisqanta yachankumanchu.

Askha runakunaña Bibliawan chay hinakunata ruwanku chaypas, Bibliaqa huchachanmi chhayna creenciakunata (Lev. 19:26; Deu. 18:9-12; Hech. 19:19). Yachasqanchis hina “Diospa siminqa kawsaqmi, atiyniyoqmi”, ichaqa manan creenciakunawan tupachinachu. Bibliapi tarikuq yachachikuykunan kawsayninchispi yanapawasun manan creenciakuna qatikuychu. Chay yachachikuykunan runakunata yanapan allin kawsayniyoq kanankupaq, mana allin ñanta saqenankupaq, familiapi hukllachasqa kawsanankupaq, Bibliata Yuyaychaqwanpuni allinpi kanankupaqpas.