1. ¿Imatan runakuna ninku kamachi kaymanta?

ISKAY waranqa phisqa pachaq watakuna ñawpaqtan huk qelqaq griego runa nirqan: “Manan pipas kusikunchu kamachi kasqanwanqa”, nispa. Chayta nisqanqa cheqaqmi. Huk kamachiqa huk runaq atiyninpin kashan, dueñonpaqmi llank’an, mana allin tratasqataqmi kanpas.

2, 3. a) ¿Imaynan Cristoq kamachin kay? b) ¿Ima tapuykunatan kutichisun mayordomo hina llank’ayninchismanta?

² Jesusmi qatikuqninkunamanta nirqan huch’uyaykukuq kanankuta otaq kamachi kanankuta, ichaqa kamachi kasqankuqa manan cristianokunataqa pisichanchu. Aswanpas allinpaq, confianapaq, respetanapaqmi qhawarichin. Kaypi yuyaykusun, manaraq wañupushaspan Jesús willarqanña “allin yuyayniyoq hunt’aq kamachi” kananmanta, paymi huk ruwaykunata aparinan karqan (Mat. 24:45-47).

³ Huk textopin chay kamachita nikun ‘mayordomo’, nispa (leey Lucas 12:42-44). Kunan tiempopi cristianokunaqa manan llapankuchu allin yuyayniyoq hunt’aq kamachi kanku, ichaqa Diosmi llapa serviqninkunaman qowarqanchis mayordomokunaq llank’ananta hina. ¿Ima llank’aytan chaskinchis? ¿Imaynatan chaykunata qhawarinanchis? Chayta yachanapaq qhawarisun ñawpa tiempopi mayordomokunaq ruwayninkuta.

4, 5. ¿Ima ruwaykunatan ñawpa tiempopi mayordomokuna apariqku?

⁴ Ñawpa tiempopiqa huk mayordomoqa karqan confianapaq hina kamachin, paymi patronninpa negocionta otaq wasinmanta encargakuq. Atiyniyoqmi kaqku patronninpa wasinpi kaqkunata, qolqenta, huk  kamachikunatapas qhawarinankupaq. Yachasunchis Eliezermanta, paymanmi Abrahamqa tukuy kaqninkunata confiarqan. Yaqapaschá payta Mesopotamiata kacharqan wawan Isaacpaq huk esposata maskhanpunanpaq (Gén. 13:2; 15:2; 24:2-4).

⁵ Abrahampa bisnieton Josepas Potifarpa wasinpin mayordomo karqan (Gén. 39:1, 4). Qhepamanqa paypapas karqanmi wasinta qhawariq huk mayordomo, paymi encargakurqan huk kutipi Josepa chunka wawqenkunata sumaqta chaskinanpaq. Josepa kamachisqanmi chay mayordomonqa imaymanata ruwarqan qolqemanta copa suwasqa hina rikhurinanpaq. Chaykunan rikuchin mayordomokunaqa confianapaq hina ruwaykuna aparisqankuta (Gén. 43:19-25; 44:1-12).

6. ¿Ima ruwaykunatan umallikuna aparinku mayordomokuna hina?

⁶ Apóstol Pablon nirqan Diospa llaqtanpi umallikuna “Diospa mayordomon” kasqankuta (Tito 1:7). “Diospa ovejankunata” michinankupaqmi akllasqa karqanku, chaymi iñiq t’aqakunata pusarinku, allin ruwayninkuwantaq hukkunata yanapanku (1 Ped. 5:1, 2). Ichaqa manan kaq ruwayllapichu kanku. Yaqa llapankun iñiq t’aqankupi yanapakunku, watukuq umallikunan ichaqa askha iñiq t’aqakunata yanapanku. Sucursalpi Encargakuqkunataq huk nacionpi llapa iñiq t’aqakunata yanapanku. Chaywanpas llapankun ruwayninkutaqa allinta hunt’ananku, paykunaqa Diosmanmi cuentata qonqaku (Heb. 13:17).

7. ¿Imaraykun nisunman llapa cristianokunapas mayordomokuna kasqanchista?

⁷ Chhaynaqa, ¿mana umalli hunt’aq cristianokuna manachu mayordomokuna kanku? Llapa cristianokunamantan apóstol Pedro nirqan: “Sapankaykichismi Diospa qosqan atiy qokuyta chaskirqankichis, chaywan [“mayordomo kaspa”, NM] hukkunata serviychis, Diospa imaymana qokuyninkunawan allinta llank’aspa”, nispa (1 Ped. 1:1; 4:10). Diosmi munayninpi imaymana atiykunata qowarqanchis iñiqmasinchiskunata yanapananchispaq. Chhaynaqa, Diosta llapa serviqkunan mayordomokuna kanchis, chaymi Diosqa munan allinta chaywan hunt’ananchista, payqa ñoqanchispin confian, respetawanchistaq kanpas.

8. ¿Imatan mayordomokuna hina ruwayninchismanta yachananchis?

⁸ Kunanqa mayordomo hina ruwayninchismanta yachasun. Ñawpaqtaqa: llapanchispaqpas Diosmi dueñonchis, paymanmi cuentata qosunchis. Pablon nirqan: “Qankunaqa manan cuerpoykichispa dueñonchu kankichis. Diosmi preciowan rantirqasunkichis”, nispa. Chay precioqa karqan Cristoq yawarninmi (1 Cor. 6:19, 20). Jehová Diosmi dueñonchisqa, chaymi kamachikusqantaqa kasukunanchispuni, chaykunaqa manan sasa hunt’aychu (Rom. 14:8; 1 Juan 5:3). Chaymantapas Cristoq kamachinmi kanchis. Ñawpa tiempopi mayordomokunaman hinan atiyta qowanchis, ichaqa manan munasqanchista ruwananchispaqchu, kamachiwasqanchisman hinan ruwananchis. Ima llank’aytaña iñiq t’aqapi chaskirqanchis chaypas kamachikunallan kanchis, Jehová Diospa Cristoq kamachinkuna.

9. ¿Imaynatan Jesús entiendechiwarqanchis patronwan kamachiwan imayna kawsasqankuta?

⁹ Huk rikch’anachiywanmi Jesús entiendechiwanchis kamachiwan patronwan imayna kawsasqankuta. Qatikuqninkunamanmi willarqan huk kamachimanta. Ch’isiyaq llank’amusqanmanta kutimpuqtinmi patronninqa mana nirqanchu: “Asuykamuy, tiyaykuy, mikhunaykipaq”, nispa. Aswanpas nirqanmi: “Cenayta wayk’umuy, p’achaykita allichakuspataq servimuway, mikhuyta ukyayta, tukunaykama,  chaymantaña qanqa mikhunkipas ukyankipas”, nispa. Chay qhepamanmi Jesusqa nirqan imachus yachachiy munasqanmanta: “Chay hinallataq qankunapas tukuy kamachisqakunata ruwaspaykichisqa, ninkichis: Kay hina kamachiykikunallan kayku, ima ruwanallaykutan ruwapuykiku”, nispa (Luc. 17:7-10).

10. ¿Imaynapin yachanchis Jehová Diosqa servinanchispaq kallpachakusqanchista ancha chaninpaq qhawarisqanta?

¹⁰ Jehová Diosqa ancha chaninpaqmi qhawarin servinanchispaq kallpachakusqanchista. Biblian niwanchis: “Diosqa chaninpunin, payqa manan qonqanchu ruwasqaykichiskunataqa, [...] payta munakusqaykichistapas”, nispa (Heb. 6:10). Jehová Diospa kamachikuyninkunaqa allinninchispaqmi, manan mana atinanchistachu mañawanchis, manataqmi sayk’uchiwanchischu. Chaywanpas Jesusqa chay rikch’anachisqanwanmi yachachiwanchis huk kamachiqa mana paypa munaynintachu ruwasqanta, nitaq paypa allinnintachu maskhasqanta. Diosmanqa qokurqanchis ima ruwasqanchismantapas paytaraq ñawpaqta servinapaqmi.

11, 12. ¿Imatan rikuchinanchis mayordomo kasqanchispi, imatan mana ruwananchischu?

¹¹ Iskay kaqqa kaymi: mayordomo kasqanchispiqa, llapanchispas kaq kamachikuykunallatan kasukunchis. Diospa llaqtanpi wakin ruwaykunataqa manan llapa iñiqkunamanchu qokun, chaywanpas yaqa llapa ruwaykunan iñiq t’aqapi llapa cristianokunapaq. Yachanapaq, ñoqanchisqa Cristotan qatikunchis, Jehová Diospa testigonkunan kanchis chaymi llapanchispas munanakunanchispuni. Jesusmi willarqan cheqaq cristianokuna munanakusqankupi reqsichikunanku kasqankuta (Juan 13:35). Ichaqa manan iñiqmasinchiskunallatachu munakunanchis, huk runakunatapas munakunchismi, chay munakuytaqa llapa cristianokunan rikuchinanchis.

¹² Jehová Diosqa allin kawsayniyoq kananchistan munan. Manan munanchischu Simin Qelqapi cheqnisqan ruwaykunaman hina kawsayta. Pablon nirqan: “Qhelli huchapi puriqkunapas, ídolo yupaychaqkunapas, wasanchaqkunapas, warmiman tukuqkunapas, qharipura t’inkikuqkunapas, suwakunapas, payllapaq kananta munaqkunapas, machaqkunapas, yanqa tunpaqkunapas, ch’achukunapas, Diospa qhapaqsuyunmanqa manan haykunqakuchu”, nispa (1 Cor. 6:9, 10). Diospa chanin kamachikuyninkunaman hina kawsanapaqqa kallpachakunanchismi. Ichaqa manan yanqapaqchu kanqa, aswanpas allinninchispaqmi. Yanapawanchismi aswan qhalilla kawsanapaq, hukkunawanmi allinta kawsanchis, Dioswan allinpi kasqanchistaqmi kusichiwanchis (leey Isaías 48:17, 18).

13, 14. ¿Ima ruwaytan llapa cristianopas aparinan, imaynatan chayta qhawarinanchis?

¹³ Chaymantapas manan qonqananchischu mayordomokuna hina ima ruwaychus hunt’ananchista. Jehová Diosmi qowarqanchis cheqaq kaqmanta yachayta, chayqa ancha chaniyoqmi. Chaymi Diosqa munan chay yachayta huk runakunaman apananchista (Mat. 28:19, 20). Pablon nirqan: “Cristoq yanapaqninkunata hinallan ñoqaykutaqa qhawawanaykiku, Diospa pakasqa yachayninkunata sut’inchaq mayordomokunata hinalla”, nispa (1 Cor. 4:1). Pabloqa chaywanmi nisharqan mayordomokunaqa “Diospa pakasqa yachayninkunata” cuidananchista, chayqa Bibliapi cheqaq yachachikuykunan, hinallataq Jesucristo patronninchis nisqan hina sut’illanta willananchistawan (1 Cor. 9:16).

¹⁴ Munakuq kasqanchisraykun cheqaq kaqtaqa yachachinchis. Ichaqa sapanka cristianopas hukniray kawsayniyoqmi kanchis.  Chaymi mana llapanchischu predicaspaqa kaqllata ruwasunman, Diosqa chaytaqa entiendenmi. Aswan allinqa atisqanchisman hina tukuyta sapankanchispas ruwasqanchismi. Chhaynapin rikuchinchis Jehová Diosta runakunatapas munakusqanchista.

15-17. a) ¿Imaraykun huk mayordomo hunt’aqpuni kanan? b) ¿Imaynatan Jesús rikch’anachirqan mana hunt’aq kay mana allin kasqanta?

¹⁵ Kinsa kaq ruwayqa ñawpaq kaq ruwaykunawanmi allinta tupan, chayqa kaymi: huntaqmi kananchis, confianapaq hina. Huk mayordomoqa sumaq sonqoyoq, imaymana ruwaytapaschá yachanman, ichaqa yanqapaqmi chaykunaqa kanqa patronninpaq mana hunt’aq kaqtinqa. Kamachisqanta allinta ruwananpaqqa hunt’aqmi kanan. Pabloq kay nisqantan yuyarinanchis: “Mayordomopaq churasqa runaqa allin hunt’aq kasqantan rikuchikunan”, nispa (1 Cor. 4:2).

¹⁶ Sichus hunt’aq kasun chayqa Diosmi bendeciwasun, chaymantaqa manan iskayananchischu. Ichaqa sichus mana hunt’aq kasun chayqa mana allinkunapin rikukusun. Jesusmi chayta yachachirqan qolqemanta rikch’anachiy willasqanpi. Patronmi kamachinkunata ruwasqankumanta “kusa” nirqan, paykunan hunt’aq karqanku, qolqe qosqantapas llank’achirqanku. Ichaqa mana chay ruwaqtan nirqan: “Mana allin qella kamachi”, ‘mana serviq kamachi’, nispa. Qolqe qosqantan qechupurqan, qarqonankupaqtaq kamachirqan (leey Mateo 25:14-18, 23, 26, 28-30).

¹⁷ Huk rikch’anachiy willasqanpin Jesusqa willallarqantaq mana hunt’aq kay mana allin kasqanta rikuchinanpaq. Nirqanmi: “Huk qhapaq runaqmi mayordomon karqan, paymi  patronninpa kaqninkunata q’arushasqanmanta huchachasqa karqan. Chaymi payta waqyaspa nirqan: Mana allin rimaykunatan qanmanta uyarishani. Mayordomo-kayniykimanta cuentata qoway, manañan mayordomoyqa kawaqchu”, nispa (Luc. 16:1, 2). Chay mayordomoqa patronninpa kaqninkunata tukusqanmantan qarqosqa karqan. ¡Kusatan chaymantaqa yachasunman! Amapuni hayk’aqpas Jehová Diospa kamachiwasqanchistaqa saqerparisunchu.

18. ¿Imaraykun hukkunaq ruwasqanwan ruwasqanchista mana tupanachinanchischu?

¹⁸ Sapankanchismi qhawarikunanchis mayordomo hina llank’ayninchispi imayna hunt’asqanchista, ichaqa manan hukkunaq ruwasqanwan tupanachispachu. Biblian niwanchis: “Sapanka pay kikinpa kawsasqanta allinta qhawakuchun, hinaspa allin kawsasqanta reparakun chayqa, chayllawan kusikuchun, amataq hukpa kawsasqanwan tupanachispachu”, nispa (Gál. 6:4). Hukkunaq ruwasqanwan ruwasqanchista tupanachishanamantaqa, aswanpas imachus ruway atisqanchispin kallpachakunanchis. Chhaynapin mana hatunchakusunchu nitaq pisikallpayasunchu. Imaynapi tarikusqanchista qhawarikuspaqa reparananchismi imapas cambiasqanta. Yaqapaschá ima onqoypas, machuyaypas payayaypas otaq huk ruwaykuna kasqanrayku mana ñawpaqpi hinachu Diosta servisun. Otaq ruwasqanchismantaqa astawanraq ruwayta atisunman, chhayna kaqtinqa astawanmi Diosninchista servisunman.

19. ¿Imaraykun mana pisikallpayananchischu ima ruwaymanpas mana aypayta atispa?

¹⁹ Hinaspapas manan tupanachikunanchischu ruwaykunata chaskiq iñiqkunawan. Yachanapaq, yaqapaschá huk iñiq umalli kayta munanman otaq hatun huñunakuykunapi discurso qoyta munanman. Allinmi chaykunata aypayta munayqa ichaqa manan pisikallpayanachu mana usqhaylla aypayta atispaqa. Yaqapaschá mana entiendesunchu imarayku askha watakuna suyakusqanchista. Moisespas Egiptomanta israelitakunata horqonanpaq hinan qhawarikurqan ichaqa 40 wataraqmi suyakurqan chayta ruwananpaq. Chay watakunapin payqa yacharqan mana kasukuq k’ullu runakunata pusananpaq imayna runa kayta (Hech. 7:22-25, 30-34).

20. ¿Imatan Jonatanmanta yachanchis?

²⁰ Yaqapaschá iñiq t’aqapi ruway munasqanchisman mana hayk’aqpas aypayta atisunchu. Chaymi sucederqan Jonatanwan. Payqa Saulpa churinmi karqan chaymi Israelmanta rey kanman karqan, ichaqa Diosmi David waynata akllarqan. ¿Imaynatan Jonatán chaywan sientekurqan? Kusikurqanmi, paypi mana yuyaykusparaqmi yanaparqan. Nirqanmi: “Qanpunin Israelpi reyqa kanki, ñoqataq qanman qatiq kamachikuq kasaq”, nispa (1 Sam. 23:17). Jonatanqa manan phiñasqachu karqan nitaqmi taytan hinachu envidiakurqan. ¿Imatan chaymanta yachanchis? Manan hukkunaq ruway chaskisqantaqa envidiananchischu, aswanpas imachus ruway chaskisqanchistan tukuy yuyaywan hunt’ananchis. Mosoq pachapiqa Jehová Diosmi imaymana munasqanchista qowasun.

21. ¿Imaynatan qhawarinanchis mayordomo llank’ayninchista?

²¹ Mayordomo ruwayninchispiqa manan millay patrontachu servinchis. Aswanpas, kay millay pachaq tukukuy p’unchayninkunapi allin willakuykunata willananchispaqmi Diosqa confiawarqanchis, chhaynataqa manañan hayk’aqpas aparikunqañachu, manataqmi chay ruwayqa pisichawanchischu. Chaymantapas, ñoqallanchismanta chay ruwaykunata hunt’ananchispaqmi atiyta qowanchis. Chhaynaqa hunt’aq mayordomo kasun, ancha hatun Dueñonchis serviytataq chaninpaq hap’isun.