María Isabelqa tukuy sonqowan predicaq sipasmi, payqa Chile nacionpi San Bernardo llaqtapin tiyan. Paypas familianpas mapuche comunidadmantan kanku, chaypin tukuy sonqo yanapakurqanku mapudungún rimaypi huk iñiq t’aqata hatarichiypi.

Jesuspa Wañupusqan P’unchayta yuyarinapaq huñunakuy Mapudungún rimaypi ruwakunanta willakuyta uyarispan tapukurqan: “¿Imaynatan chay invitacionkuna rakiypi yanapakuyman?” nispa. Chaypaqqa 2.000 invitacionkunañan mapudungún rimaypi ruwakamusqa. Chaymi María Isabelqa yuyarirqan imaynatas huk wayna-sipas Testigokunapas compañeronkuman hinallataq profesorninkunamanpas predicasqankumanta. Chayta ruwananpaqmi tayta-mamanwan rimarqan, chaymi nirqanku: “Qan allinta yuyaykuy imaynata rakimunaykipaq”, nispa. Chhaynaqa, ¿imapin yuyaykurqan?

Escuelan punkupi huk invitacionta k’askachinanpaqmi permisota mañakurqan. Hinan escuelapi encargadokunaqa permisota qorqanku, nirqankutaqmi: “Chay yuyaykusqaykiqa allinpunin”, nispa. Chaymantapas lista waqyay horastan huk tutamantanta chay escuelpi director parlantepi willakamurqan chay invitacionmanta.

Chaymantapas María Isabelqa sapanka clasekunaman haykunanpaqmi profesorkunata permisota mañakurqan. Clasekunaman haykuspataq tapurqan pikunas mapuche comunidadmanta kasqankuta. Paymi nin: “Chunka hinalla kanallanpaqmi yuyaykurqani, ichaqa aswan askhan kasqaku chaymi, ¡150 invitacionkunata rakirqani!” nispa.

Huk señoran escuela punkupi k’askachisqa invitacionta rikuspa astawan yachayta munarqan. Chaymi chunka watachayoq sipaschata waqyachirqanku, payta rikuspataq chay señoraqa muspharqanraq. Chaytan María Isabelqa asirikuspa nirqan: “Payqa kuraq runa kanaypaqmi yuyaykusqa”, nispa. Chay invitacionmanta pisillapi willarispan María Isabelqa tapurqan maypi tiyasqanta chay hinapi tayta-mamanwan kuska visitaspa Diospa Gobiernomanta willamunankupaq. Jesuspa Wañupusqan P’unchayta yuyarinapaq huñunakuymanmi chay señoraqa rirqan pusarqantaqmi 26 mapuche runakunatawan. Imaynataraqchá mapudungún rimaypi 20 iñiqmasinchiskunaqa kusikurqanku chay runakunata rikuspa. ¡Kunanqa hatun iñiq t’aqañan kapunku!

Hayk’a watayoqña kanchis chaypas, invitasunmanmi estudiaqmasinchiskunata, llank’aqmasinchiskunatapas, Jesuspa Wañupusqan P’unchayta yuyarinapaq huñunakuyman, huk discursokunaman, hatun huñunakuykunamanpas. Chaykunata ruwanapaqqa qelqanchiskunapi experienciakunatan t’aqwinanchis, chaymi yanapawasun yuyaykusqanchiskuna allinpi tukunanpaq. Chaymantapas Jehová Diospa santo espirituntan mañakunanchis mana manchakuspa runamasinchiskunaman paymanta willamunapaq (Luc. 11:13). Sichus ñoqanchispas allinta yuyaykuspa ruwasun chayqa, yaqapaschá musphasunraq chay ruwasqanchiskuna allinpipuni tukusqanmanta, hinaspapas anchatan kallpachawasun.