1, 2. ¿Imapin yanapawarqanchis Diospa hatun llaqtanmanta yachasqanchis?

LLAPA cristianokunan ancha kusisqa kashanchis Diospa hatun llaqtanpi kasqanchismanta. Ezequiel 1 capitulopi hinallataq Daniel 7 capitulopin willashan imaynatan Jehová Dios munaynin hunt’akunanpaqña tukuy imatapas ruwasqanta. Jesusmi kay Hallp’api Diospa llaqtanta umallishan allin willakuykuna astawan mast’arikunanpaq, predicaqkuna iñiyninkupi allin takyasqa kanankupaq, Diospa llaqtan astawan wiñarinanpaq ima. Chaymi tukuy sonqowan Diospa llaqtanpiqa confiananchis (Mat. 24:45).

² ¿Tukuy sonqowanchu Diospa llaqtanwan kuska llank’ashanchis? Yaqapaschá sapankanchis chayta tapukuspa reparasun hawa sonqolla Diospaq llank’asqanchista otaq sayk’upushasqanchista. Ñawpaq tiempopi wakin cristianokunapas chhaynapin tarikurqanku. Chaymi apóstol Pablo kallpacharqan Jesuspa ejemplonta yuyarinankupaq, chhaynapi ‘mana sayk’unankupaq, manallataq pisi kallpayanankupaqpas’ (Heb. 12:3). Imaynan Jesuspa ejemplonta yuyarisqanku ñawpa cristianokunata yanaparqan, chay hinatachá ñawpaq estudiopi Diospa hatun llaqtanmanta yachasqanchis kallpachawarqanchis tukuy sonqowan Diosta servinapaq tukuy imata aguantanapaqpas.

3. ¿Imatan ruwananchis Diosta servispa mana pisikallpayanapaq? ¿Imamantan kay estudiopi yachasun?

³ ¿Imatawanmi ruwananchis Diosta servispa mana pisikallpayanapaq? Pabloq nisqan hina kallpachakunanchismi ‘allinkaqta ruwanapaq’ (Gál. 6:9). Chaymi kunan yachasun iñiyninchispi qaqata sayanapaq hinallataq Diospa llaqtanwan kuska llank’ashanallapaq Diospa qowasqanchis phisqa yanapaykunamanta. Chaypin yachasun imakunapin ñoqanchis otaq familianchis astawan kallpachakunanchis kashan chayta.

4. ¿Imaraykun huñunakuykuna ancha chaninpuni?

⁴ Diosta serviqkunaqa ancha chaninpaqmi huñunakuykunata qhawarinku. Jehová Dios kikinpunin hanaq pachapi angelkunawan mayninpi huñukun (1 Rey. 22:19; Job 1:6; 2:1; Dan. 7:10). Ñawpa Israel llaqtapin sapa kutilla huñunakuqku Diospa siminta uyarinankupaq (Deut. 31:10-12). Jesuspa tiemponpi judiokunapas sapa kutillanmi sinagogakunata riqku Diospa Qelqanta leenankupaq (Luc. 4:16; Hech. 15:21). Chay tiempopi iñiq t’aqa qallarisqanmantapachataq sapa kutilla cristianokuna huñunakuqku Diosta yupaychanankupaq. Chaytan kay tiempopi cheqaq cristianokunapas ruwanchis. Ñoqanchisqa ‘aswanta munanakunanchispaq allin ruwaykunatapas ruwananchispaqmi’ huñukunchis. Chaypin hukkuna hukkunawan ‘astawanraq kallpachanakunanchis, Señorpa kutimunan p’unchay qayllaykamushasqanta yachaspa’ (Heb. 10:24, 25).

5. ¿Imaynatan huñunakuykunapi kallpachanakusunman?

⁵ Kallpachanakunapaqqa huñunakuykunapi tapukuykunamanmi kutichinanchis. Chaytaqa ruwasunman estudiasqanchis qelqamanta kutichispa, huk textomanta willaspa otaq huk experienciata pisillapi willaspan, chaypin sut’inchasunman Bibliaq nisqanman hina imatapas ruway allinninchispaq kasqanta (Sal. 22:22; 40:9). Unayña otaq chayllaraq huñunakuykunaman rishanchis chaypas, llapallanchismi yachanchis wayna-sipaskunaq kuraq cristianokunaq kutichisqanpas kallpachawasqanchista.

6. ¿Imakunapin huñunakuykuna yanapawanchis?

⁶ ¿Imakunapin huñunakuykuna hatun huñunakuykunapas yanapawallanchistaq? Chay huñunakuykunapi yachasqanchismi yanapawanchis qatiykachaykuna kaqtin otaq runakuna mana uyariyta munawaqtinchis mana manchakuspa predicashanallapaq (Hech. 4:23, 31). Huñunakuykunapi Bibliamanta willakuykunata sut’inchakusqanmi iñiyninchispi kallpachawanchis (Hech. 15:32; Rom. 1:11, 12). Chaypi sumaq yachachikuykunata uyarispa iñiqmasikunaq kallpachayninta chaskispa iman kusisqa kanchis, ‘llakikuy p’unchaykuna chayamuqtinpas [...] samakunchis’ (Sal. 94:12, 13). Teqsimuyuntinpi iñiqmasikunapaq tukuy yachachikuykuna ruwakusqantan Umalliq T’aqa qhawarin Yachachikuymanta Encargakuqkunawan. ¡Anchatan agradecekunchis huñunakuykunapi sapa semana sumaq yachaykuna chaskisqanchismanta!

7, 8. a) ¿Imaraykun astawanqa huñunakuykunaman rinchis? b) ¿Imakunapin huñunakuykuna yanapawanchis?

⁷ Ichaqa manan chaykunata chaskinanchisraykullachu huñunakuymanqa rinchis. ¿Imaraykun astawanqa huñunakunchis? Jehová Diosta yupaychananchisraykun (leey Salmo 95:6). ¡May sumaqmi Jehová Diosninchista takikunawan hatunchay, huñunakuykunapi tapuykunaman kutichispa hatunchaypas! (Col. 3:16.) Payllapunin tukuy hatunchayta chaskinanpaq hinaqa (Apo. 4:11). Chaymi kallpachakunanchis ‘ama huñunakuyninchista saqenapaq, imaynan wakinkuna saqenku hinata’ (Heb. 10:25).

⁸ Jehová Diosqa huñunakuykunatan huk regalota hina qowanchis kay pachaq tukukuynin chayamunankama aguantanapaq. ¿Chhaynatachu huñunakuyninchista qhawarinchis? Chhayna kaqtinqa kallpachakusunchá ima ruwananchisña kashaqtinpas llapa huñunakuykunaman rinapaq (Filip. 1:10). Ima sinchi sasachakuypas kanman chayllañachá mana atisunmanchu.

9. ¿Imaraykun predicación aparikusqan ancha chaniyoq?

⁹ Diospa llaqtanwan kuska llank’anapaqqa tukuy kallpanchiswanmi predicacionpi yanapakunanchis. Jesusmi chay llank’aytaqa qallarichirqan (Mat. 28:19, 20). Chaymantapachan Diospa llaqtanqa ima ruwaymantapas astawanqa Diospa Gobiernonmanta predicashan runakunatapas yanapashan Jesuspa qatikuqnin kanankupaq. Chay llank’aypin angelkuna yanapawashanchis, paykunan ‘llapallan wiñay kawsaypaq akllasqa kaqkunaman’ pusawashanchis (Hech. 13:48; Apo. 14:6, 7). Chay hatun llank’aytan Diospa llaqtan kay Hallp’api makilla aparishan. Qanri, ¿ñawpaqmanchu churashanki chay llank’anata?

10. a) ¿Iman huk iñiqmasita yanaparqan iñiyninpi qaqata sayananpaq? b) ¿Imaynatan qantapas predicay yanaparqasunki mana pisikallpayanaykipaq?

¹⁰ Tukuy sonqowan predicasqanchismi yanapawasun mana pisikallpayanapaq. Mitchel iñiqmasinchismi umalli kashan precursortaqmi kanpas, paymi nin: “Kusikunin Diospa siminmanta runakunaman willaspa. Qhawaq, ¡Rikch’ariy! revistakunata leespan rikuni ancha sumaqpuni ruwasqa kasqanta. Chaykunamanta runakunawan parlarispan kallpachakuni chaykunawan runakunaq sonqonman chayanaypaq”, nispa. Paytaqa predicacionman lloqsisqansi yanapan aswan allin kaqkunata  ñawpaqman churananpaq. Imaña ruwanan kaqtinpas predicacionman lloqsisqan qhepamanñas chaykunata ruwan. Ñoqanchispas Diospaq llank’ayta ñawpaqman churasun chayqa, qaqatan iñiyninchispi sayasun (leey 1 Corintios 15:58).

11. ¿Imaraykun Diospa apachimuwasqanchis qelqakunata leenanchis?

¹¹ Jehová Diosqa iñiyninchispi qaqata sayananchispaqmi askha espiritual mikhunata qelqakunapi apachimuwanchis. Yaqapaschá hayk’aqllapas huk qelqata leeruspa nirqanchis: “¡Kaytapunin necesitasharqani! ¡Ñoqapaqpas Jehová Dios qelqachinman hinamá kayqa!” nispa. Chaykunataqa ñoqanchispaqpunin ruwachin. Diosqa chay qelqakunawanmi yachachiwanchis pusawanchispas. Paymi nirqan: “Qantan qhawashayki. Ñoqan yachachisqayki, ñoqan yuyaychasqayki, ñoqan maynin purinayki ñanta yachachisqayki”, nispa (Sal. 32:8). ¿Llapa chaskisqanchis qelqakunatachu leeshanchis? ¿Yuyaymanashanchischu chaykunapi? Chayta ruwashanchis chayqa rurushallasunmi manataqmi iñiyninchispi pisipasunchu kay millay p’unchaykunapi (leey Salmo 1:1-3; 35:28; 119:97).

12. ¿Iman yanapawasun qelqakuna chaskisqanchista aswan chaninta qhawarinapaq?

¹² Chay qelqakuna imayna ruwakusqanpi yuyaymanaymi yanapawasun aswan chaninta qhawarinapaq. Chay qelqakuna ruwakunanpaqmi Bibliata allinta t’aqwispa chayta qelqanku. Chay qelqakunatan astawan allichanku, rikch’anachiykunata churanku, huk simikunamantaq t’ikranku, chaytataq papelpi horqokun otaq Internetman churakun. Tukuy chay llank’aytan Yachachikuykuna Qelqaymanta Encargakuqkuna qhawarinku. Chaykunatan sucursalkunapi askhanpi ruwakun hinaspa llapa iñiq t’aqakunaman apachinku may karupiña kaqtinpas. ¿Imapaqmi kay hatun llank’ay aparikun? Diospa llaqtan allin mikhusqa kananpaq (Is. 65:13). Chayrayku llapallanchis kallpachakusun tukuy chaskisqanchis qelqakunata leenapaq (Sal. 119:27).

13, 14. ¿Pikunan hanaq pachapi yanapashanku Diospa llaqtanta? ¿Imaynatan ñoqanchispas yanapakusunman?

¹³ Apóstol Juanmi Jesusta yuraq caballopi lloqsimuqta rikurqan Jehová Diospa contranpi kaqkunata atipananpaq (Apo. 19:11-15). Paytawan kuskan rikullarqantaq hanaq pachapaq akllasqa cristianokunata Dios sonqo angelkunatawan. Chaypin yachanchis akllasqa cristianokunapas angelkunapas Jesusta umallinkuta hina qhawarispa yanapakusqankuta (Apo. 2:26, 27). Paykuna hinan ñoqanchispas Diospa llaqtanpi yanapakunanchis.

¹⁴ Chay hinatan ancha askha runakunapas kay Hallp’api qhepaq akllasqa cristianokunaq llank’ay aparisqankuta tukuy sonqowan yanapakushanku (leey Zacarías 8:23). ¿Imaynatan sapankanchis Diospa llaqtanpi yanapakusunman? Umalliq runakunata kasukuspan (Heb. 13:7, 17). ¿Kallpachankichu hukkunata iñiq t’aqapi umallikunata respetanankupaq tukuy ruwasqankuta chaninpaq qhawarinankupaqpas? ¿Kallpachankichu wawaykikunata umallikunata respetanankupaq sasachaykunapi kaspa paykunaman asuykunankupaqpas? Hinaspapas huk niraykunamantan Diospa llaqtanpi yanapakusunman. Yaqapaschá familianchiswan parlasunman teqsimuyuntinpi predicación aparikunanpaq qolqewan yanapakunapaq (Prov. 3:9; 1 Cor. 16:2; 2 Cor. 8:12). Hinaspapas Huñunakuna Wasi allichaypi pichaypi iman yanapakullasunmantaq. Tukuy  chaykunapi yanapakusun chayqa Jehová Diosmi santo espiritunta qowasun, chay espirituntaqmi yanapawasun kay millay p’unchaykunapi mana pisikallpayanapaq (Is. 40:29-31).

15. ¿Imaraykun sapa p’unchay kallpachakunanchis Diospaq hina kawsanapaq?

¹⁵ Hinaspapas Diospa llaqtanpi yanapakunapaq iñiyninchispi qaqata sayanapaqpas Diospa sonqonta kusichinapaq hinan kawsananchis (Efes. 5:10, 11). Kay pachapi Satanás kamachikusqanrayku, huchayoq runakuna kasqanchisrayku, kay pachapi millay runakuna kasqanraykun sasachakunchis allin kaqta ruwanapaq. Wawqe-panay, Jehová Diosqa anchatan munakusunki paymanta mana t’aqakunaykirayku sapa p’unchay kallpachakusqaykita qhawarispa. ¡Amapuni pisipaychu! Diospaq hina kawsasun chayqa, kusisqan kasun manataqmi Dios yupaychasqanchispas yanqapaqchu kanqa (1 Cor. 9:24-27).

16, 17. a) ¿Imatan ruwananchis hatun huchapi urmaspa? b) ¿Imatan Anamanta yachanchis?

¹⁶ ¿Ima hatun huchamanpas urmasunman chayri? Chay huchanchista willakuspan yanapayta mañakuna. Ima huchatapas pakasunman chayqa David hinachá sientekusunman, paymi nirqan: “Huchayta mana willaykukushaqtiyqa, p’unchay-ch’isiyaq anchisqaypin cuerpoy qawiyaykurqan”, nispa (Sal. 32:3). Arí, huchata pakasunman chayqa llakin ñit’iwasunman Jehová Diostaq ñoqanchismanta t’aqakunman. “Huchankunata willakuspa saqepuqmi ichaqa khuyapayasqa kanqa” (Prov. 28:13).

¹⁷ Ana cristianamanta yachasun. * Payqa sipasllaraq kashaspan precursora karqan, ichaqa hukkunaq mana yachasqallanmi huchapi kawsarqan, hinan sasachakuykunapi tarikurqan. Paymi nin: “Concienciaymi sapa kutilla huchachawaq, chaymi llakisqalla kaq kani”, nispa. ¿Iman payta yanaparqan? Huk huñunakuypi Santiago 5:14, 15 textomanta willakuyta uyarispan umallikunaman asuykurqan yanapanankupaq. Chayta ruwayqa manas paypaq facilchu kasqa. Ichaqa onqosqa kasqanmanta qhaliyananpaq Jehová Dios huk hampita qoshanman hinatas chayta qhawarisqa. Paymi nin: “Chay hampita chaskikuyqa sasan ichaqa qhaliyachikunmi”, nispa. Kunanqa ch’uya concienciawan tukuy sonqowantaqmi Anaqa Diosta servishan.

18. ¿Imata ruwanapaqmi decidikunanchis?

¹⁸ Diospa llaqtan ukhupi kayqa ancha sumaqpunin, chaytan mana hayk’aqpas qonqanachu. Chaymi huk familia hinalla kallpachakunanchis huñunakuykunaman rinapaq, allin sonqoyoq runakunata maskhamunapaq, Diospa apachimuwasqanchis qelqakunata leenapaqpas. Hinaspapas umallikunatan kasukunanchis Diospaq hinataq kawsananchis. Chayta ruwasun chayqa Diospa llaqtanwan kuskan llank’asun, manataqmi pisikallpayasunchu allin kaqkunata ruwaspa.