1, 2. ¿Ima profeciapin Jesuspa qatikuqninkuna astawan yuyaykunkuman karqan? ¿Imaraykun chaypi yuyaykunkuman karqan?

JESUSMI runakunaman yachachispa willarqan yupaychana wasi thunisqa kananmanta (Mar. 13:1-4). Chaypi yuyaykuspan Pedro, Santiago, Juan, Andrespiwan sapallankupi Jesuswan kashaspa tapurqanku: “Niwayku, ¿hayk’aqtaq chaykunaqa kanqa? Kutimunaykiña kashaqtinqa kay tiempopas p’uchukapunanpaqña kashaqtinqa, ¿imakunatan rikusaqku?” nispa (Mat. 24:1-3). Chaypin Jesús willarqan manaraq Jerusalén thunisqa kashaqtin imakuna sucedenanmanta, tukukuy p’unchaypi Satanaspa kamachisqan pachawan sucedenantapas. Willarqanmi guerrakuna, yarqay, millay runakuna kananmanta. Ichaqa willarqanmi allinkuna kanantapas, nirqanmi: “Qhapaqsuyumanta allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa. Paykunaqa chay profeciapichá astawanqa yuyaykurqanku (Mat. 24:7-14).

² Qatikuqninkunaqa ñawpaqtañan Jesuswan purirqanku “Diospa qhapaqsuyunmanta allin willakuykunata” willaspa (Luc. 8:1; 9:1, 2). Chaypin Jesús paykunata nirqan: “Cosechanaqa askhallañan, llank’aqkunan ichaqa pisilla. Chay hinaqa, chakrayoqta valekuychis cosechanman llank’aqkunata kachananpaq”, nispa (Luc. 10:2). Chayta yuyarispan paykunaqa kaykunata tapukunkuman karqan: ¿imaynatan ‘kay pachantinpi willankuman’ ‘llapa suyukunamanpas yachachinkuman’? ¿Maymantan hamunman llank’aqkuna? ¡Qatikuqninkunaqa manachá yuyaykullarqankupaschu Mateo 24:14 textopi nisqan kay tiempopi imayna hunt’akusqanta!

3. ¿Imaynatan hunt’akushan Lucas 21:34 textopi nisqan? ¿Imatan tapukunanchis?

 ³ Chay profeciaqa kay tiemponchispin hunt’akushan. Arí, waranqanpi warmikuna qharikunan huk hinalla Hallp’antinpi allin willakuykunata willashanku (Is. 60:22). Ichaqa Jesusmi willarqan tukukuy p’unchaykunapi wakin cristianokunapaq predicacionwan hunt’ay sasa kananta, ¿imarayku? Huk ruwaykunawan afanakuspa ‘sonqonku rumiyapusqanrayku’ (leey Lucas 21:34). Chay nisqanpas hunt’akushanmi. Kikinchismi rikushanchis wakin iñiqmasinchiskuna llank’anankupi, aswan allin educacionniyoq kaypi, qhapaq kaypi, pukllaypi, kusirikuykunapi afanasqa kashasqankuta. Hukkunaqa kay kawsaypi sasachakuykunawan llakikuykunawanmi sayk’upushanku. Chaymi sapankanchis tapukunanchis: “¿Imaynan ñoqa kashani? ¿Imatan kawsayniypi ñawpaqman churashani?” nispa.

4. a) ¿Imatan Pablo Diosmanta mañakurqan Filipos llaqtapi iñiqmasinkunapaq? ¿Imaraykun chaykunata mañakurqan? b) ¿Imamantan kay estudiopi qatimuq estudiopipas yachasun?

⁴ Ñawpaq tiempopi cristianokunaqa Pablo hinan ‘astawan Señorpi kallpachakuspanku mana manchakuspa Diospa siminta willarqanku’ (Filip. 1:12-14). Ichaqa kallpachakunankun karqan Diostaraq ñawpaqta servinankupaq. Chaymi Pabloqa Diosmanta mañakurqan Filipos llaqtapi iñiqkuna ‘aswan allin kaqtapuni akllakunankupaq’ (leey Filipenses 1:9-11). Kay tiempopipas yaqa llapa iñiqmasikunan mana manchakuspa Diospa Siminta willashanku. Chaywanpas Diospa llaqtan imakunatas ruwasqanmanta yachasqanchismi kallpachawasun predicacionpi astawan yanapakunapaq. Chaymi kay estudiopi yachasun Mateo 24:14 textopi profecía hunt’akunanpaq Diospa tukuy imaymana ruwasqanmanta. ¿Imatan Diospa llaqtan ruwashan? ¿Ima ruwananchispaqmi kallpachawasun chaymanta yachasqanchis? Qatimuq estudiopitaqmi kaymanta yachasun: ¿Iman yanapawasun Diosta servispa aguantanapaq, llaqtanpa nisqanman hina kawsanapaqpas?

5, 6. a) ¿Imaraykun Jehová Dios hanaq pachapi llaqtanmanta qelqachirqan? b) ¿Imatan Ezequiel rikurqan?

⁵ May sumaqchá kanman karqan Jehová Dios ñosqhonninchismanta otaq hanaqpi kaq tukuy imaymanamanta Bibliapi qelqachinman karqan chayqa. Ichaqa imachus ruway munasqanmantan aswanpas qelqachirqan, chaykunata yachaspa chayman hina kawsananchispaq (2 Tim. 3:16, 17). Hinaspapas hanaq pachapi llaqtan imayna kasqanmantan Isaías, Ezequiel, Daniel, Juan profetakunawan qelqachirqan (Is. 6:1-4; Ezeq. 1:4-14, 22-24; Dan. 7:9-14; Apo. 4:1-11). Jehová Diospas cortinata kicharispa hanaq pacha llaqtanta qhawarichiwashasunman hinan chaykunata leespaqa anchata admirakunchis. ¿Imaraykun chaykunata qelqachirqan?

⁶ Chay llaqta ukhupi kasqanchista yuyarinanchispaqmi. Hanaq pachapi Diospa llaqtanqa mana rikusqanchismi makilla llank’ashan Diospa munaynin hunt’akunanpaq. Profeta Ezequielmi rikurqan hanaq pachapi Diospa llaqtanta huk hatunkaray carroman rikch’akuqta. Chay carron sinchitapuni phawaq, ñawi ch’ipiq niyllapitaq huk ladoman muyuriq  (Ezeq. 1:15-21). Ruedankuna hukta kuyurillaqtinmi sinchi karupi rikhuriq. Chay carro Manejaqmantan Ezequiel nirqan: “Chawpi cuerponmanta wichaymantaq rikch’akusqa sinchi parichisqa sansashaq metalman [...]. Chay hina rikch’aypin Señor Diospa lliphllikaynin rikhuriwarqan”, nispa (Ezeq. 1:25-28). Chayta rikuspaqa anchatachá Ezequielqa muspharqan. Chaypin rikurqan Jehová Dios llaqtanta imayna aparisqanta, santo espiritunwan pusarisqantapas. Hanaq pachapi Diospa llaqtan huk carrowan rikch’anachisqa kasqanmi rikuchin llaqtan makilla llank’ashasqanta.

7. ¿Imapin yanapawanchis Danielpa rikusqan?

⁷ Profeta Danielpa rikusqanpas anchatan kallpachawanchis. Payqa Jehová Diostan ‘Yuyaq Runata’ hina, ruedayoq rawrashaq trononpi tiyashaqta rikurqan (Dan. 7:9). Chaytaqa rikuchirqan Diospa munaynin hunt’akunanpaq hanaq pachapi llaqtan makilla llank’ashasqanta yachananpaqmi. Hinaspapas ‘runaq churin’ Jesustan rikurqan, kay Hallp’api kaq Diospa llaqtanpi umalli kananpaq atiy chaskishaqta. Jesuspa “kamachikuyninqa wiñaypaq kamachikuymi, manan hayk’aqpas tukukunqachu, munaychakuyninqa mana qolluchinan kanqa” (Dan. 7:13, 14). Chayta rikusqanmi yanapawanchis Jehová Diospi tukuy ruwasqanpipas confianapaq. Hinaspapas kikin Diosmanta atiyta chaskisqanraykun Jesusta Umalliqninchista hina qhawarinchis.

8. ¿Imaynan Ezequielpas Isaiaspas sientekurqanku rikusqankuwan? ¿Ñoqanchisri imaynan sientekunchis?

 ⁸ ¿Imaynan sientekunchis hanaq pachapi Diospa llaqtanmanta yachaspa? Ezequiel hinachá Diospa tukuy ruwasqanmanta yachaspa anchata admirakunchis (Ezeq. 1:28). Isaiaspas rikurqanmi hanaq pachapi sucedesqanta. Chaymi chaykunata runakunaman willananpaq invitacionta uyarispa nirqan: “Ñoqan kaypi kashani, ñoqata kachaway”, nispa (leey Isaías 6:5, 8). Payqa yacharqanmi Jehová Diospa yanapayninwanqa profeta kayta allin hunt’ananta. Isaiasta hinan ñoqanchistapas chaykunata yachay kallpachawasun predicaypi astawan yanapakunapaq. Hanaq pachapi Diospa llaqtanqa makillan llank’ashan Diospa munaynin hunt’akunanpaq, chaymi ancha kusisqa kashanchis chay llaqta ukhupi kasqanchismanta.

9, 10. ¿Imaraykun necesitakurqan kay Hallp’api Diospa llaqtan?

⁹ Jehová Diosmi Churinwan kay Hallp’api huk llaqtata qallarichirqan hanaq pachapi llaqtanwan kuska llank’ananpaq. Chaytaqa ruwarqan Mateo 24:14 textopi profecía hunt’akunanpaqmi. Kinsamanta yachasun.

¹⁰ Ñawpaqpi, Jesusmi willarqan payta qatikuqkuna “kay pachaq k’uchunkunakamaraq” predicanankuta (Hech. 1:8). Iskaypi, allin willakuykuna predicaqkunamanmi espiritual mikhunatapas kallpachaytapas qokunan karqan (Juan 21:15-17). Kinsapi, predicaqkunan huñunakunanku karqan Diosta yupaychanankupaq imayna predicayta yachanankupaqwan (Heb. 10:24, 25). Tukuy chaykunata ruwakunanpaqmi huk llaqta necesitakurqan, chay llaqtapi tukuy imapas ordenpi ruwakunanpaq.

11. ¿Imaynatan kay Hallp’api kaq Diospa llaqtanpi yanapakusunman?

¹¹ ¿Imaynatan Diospa llaqtanpi yanapakusunman? Imamantapas astawanqa predicación aparikunanpaq Jehová Diospa Jesuspa churasqan runakunapi confiaspan. Paykunaqa kay pachapi imaymana sasachakuykuna allichaypi afanakunankumantaqa huk allin ruwaypin kashanku. ¿Ima ruwaypi?

12, 13. ¿Imaynatan umallikuna Diospa llaqtanpi llank’anankuta hunt’anku? ¿Imapin yanapasunki chayta yachasqayki?

¹² Teqsimuyuntinpi kaq iñiq t’aqakunapin umallikunata churakun llaqtankupi predicacionta umallinankupaq. Chaymi imatapas decidinankupaqqa ñawpaqta Bibliata t’aqwirinku, Diospa ‘siminta purinankupaq lamparata, [...] ñanninkupaq k’anchayta’ hina qhawarisqankurayku (Sal. 119:105). Hinaspapas tukuy sonqowanmi Diospa yanapayninta mañakunku (Mat. 7:7, 8).

¹³ Umallikunaqa ñawpa tiempopi predicacionta umalliq cristianokuna hinan Diospa ‘siminta willaypi kashanku’ (Hech. 6:4). Anchatan kusikunku llaqtankupi hinallataq teqsimuyuntinpi allin willakuykuna astawan yapakusqanta yachaspa (Hech. 21:19, 20). Paykunaqa manan yuyaykusqankuman hinachu imatapas kamachikunku imatapas ruwanku. Aswanmi predicación aparikunanpaq imatapas ruwayta munaspaqa Bibliata t’aqwirinku Diospa santo espirituntataq  mañakunkupas (leey Hechos 15:28). Chayta ruwasqankupin llapa iñiqkunapaq allin ejemplo kanku (Efes. 4:11, 12).

14, 15. a) ¿Ima llank’aykunan Diospa llaqtanpi ruwakushan predicación astawan mast’arikunanpaq? b) ¿Imaynatan qan allin willakuykuna willaypi yanapakushanki?

¹⁴ Askha iñiqmasinchiskunan sapa p’unchay qelqakuna ruwaypi llank’ashanku, chaykunata huñunakuykunapi hatun huñunakuykunapipas chaskikunanchispaq. Waranqanpi iñiqmasikunan mana sayaspa qelqakunata t’ikrashanku 600 simikunapi, chaykunawan runakuna ‘Diospa musphana ruwasqankunata rimasqaku’ simipi yachanankupaq (Hech. 2:7-11). Hinaspapas askha wayna-sipas iñiqmasinchiskunan ancha hatun maquinakunapi llank’anku qelqanchiskunata ruwaspa. Chay qhepamanmi chay qelqakunata kay pachaq k’uchunkunakamaraq apachikun.

¹⁵ Kikin iñiq t’aqanchispi predicayta astawan mast’arinanchispaqmi imaymana ruwakushan. Waranqanpi iñiqmasikunan yanapakushanku Huñunakuna Wasikunata, Hatun Huñunakuna Wasikunata ruwaypi. Wakinqa iñiqmasikuna onqoqtin, pacha chhaphchiy otaq lloqllakuna kaqtinmi yanapakushanku. Hukkunataq hatun huñunakuykuna hinallataq Bibliamanta escuelakuna aparikunanpaq yanapakushanku. ¿Imapaqmi tukuy chaykuna ruwakun? Allin willakuykuna astawan mast’arikunanpaq, predicaqkuna iñiyninkupi allin takyasqa kanankupaq, Diospa llaqtan astawan wiñarinanpaq ima. Diospa llaqtanqa chay allin kaqkuna ruwaypin astawanqa kallpachakushan.

16. ¿Imamanta yachaymi yanapawasunman ñoqanchistapas familianchistapas?

¹⁶ ¿Yuyaymanarqanchischu hayk’aqllapas Diospa llaqtanpi tukuy imaymana ruwakusqanpi? Wakin iñiqmasikunaqa familiankuwan otaq sapallankupi estudiaspan chaykunata t’aqwirinku chay yachasqankupitaq yuyaymananku. Isaías, Ezequiel, Daniel, Juanpa qelqasqankumanta yachayqa anchatan yanapawasun. Los testigos de Jehová, proclamadores del Reino de Dios nisqa libro, DVD nisqakuna, huk qelqakuna iman yanapawasunman Diospa llaqtanmanta astawan yachanapaq.

17, 18. a) ¿Imapin kay estudio yanaparqasunki? b) ¿Ima tapukuykunatan tapukunanchis?

¹⁷ Jehová Dios llaqtanpi tukuy imaymana ruwasqanpi yuyaymanayqa anchatan yanapawasun. Ñoqanchispas Diospa llaqtan hinan allin kaqkuna ruwayta ñawpaqman churananchis. Chayta ruwaspan Pablota qatikusun, paymi nirqan: “Diosmi khuyapayawaspanku kay llank’anata qowarqanku, chayraykun mana hayk’aqpas pisi kallpayaykuchu”, nispa (2 Cor. 4:1). Llank’aqmasinkunatan nirqan: “Chay hinaqa, amayá allinkaqta ruwaspaqa sayk’usunchu, manachus pisi kallpayasun chayqa, tiemponpin cosechasunchis”, nispa (Gál. 6:9).

¹⁸ ¿Yaqachu qanpas otaq familiaykipas kallpachakunaykichis kashan aswan allin kaqkunata ñawpaqman churanaykichispaq? ¿Kallpachakusunmanchu predicacionpi astawan yanapakunanchisrayku ima kaqninchistapas otaq kusirikuykunatapas pisiyachinapaq? Qatimuq estudiopin yachasun phisqa yanapaykunamanta, chaykunan yanapawasun Diospa llaqtanwan kuska llank’anapaq.