CHAY yupaychana wasimantan Jesús nirqan: “Manan kaypiqa rumi patapi huk rumillapas qhepanqachu”, nispa (Mat. 24:2). Chaymi hunt’akurqan 70 watapi; Roma ejerciton Titoq umallisqan chay wasita thunirqan. Pachak-pachak watakuna qhepamanmi Juliano kamachikuq chay wasita sayarichiyta munarqan.

Julianoqa wak’a dioskunata yupaychaq Romapi kamachikuqkunamanta qhepa kamachikuqsi kanman karqan. Payqa Constantino I kamachikuqpa sobrinonmi karqan. Julianoqa cristiano nisqa religionpin uywasqa karqan, ichaqa 361 watapi kamachikuq kapuspan askha runakunaq ñawpaqenpi sut’incharqan mana allin religión kasqanta, chhaynapi wak’a dioskuna yupaychay mast’arikunanpaq. Chaymi librokuna paymanta nin: “Diospa contranpi sayariq”, nispa.

Julianoqa 6 watanpi kashaspan rikusqa taytanta huk familiankunatawan cristianon kayku niq runakuna wañuchisqankuta, chaypaschá payqa cheqnikurqan chay religionta. Chay tiempomanta willaqkuna nisqan hina, payqa judiokunatan kallpacharqan chay wasita yapamanta hatarichinankupaq, chhaynapi Jesusta llulla profetata hina qhawarichinanpaq. *

Julianoqa chay wasitan hatarichiytapuni munarqan. Ichaqa manan sut’itapuniqa yachakunchu hatarichisqankuta mana hatarichisqankutapas. Ichaqa yachakunmi kamachikuy qallarisqanmanta iskay wata qhepallaman wañupusqanta, ruway munasqanpas qollupusqanta.