Paykunaqa hanaq pachapi tiyaq angelkunan karqanku. ¿Imaynapin chayta yachanchis?

Génesis 6:2 texton nin: “Hinan Diospa wawankunaqa runakunaq ususinkunata sumaq rikch’ayniyoq kasqanta qhawarispa, lliwmanta akllarikuspa pi munasqankuwan casarakurqanku”, nispa.

Hebreo Qelqakunapin rikhurin ‘cheqaq Diospa wawankuna’, ‘Diospa wawankuna’ nisqa simikuna. Kikin hebreo simi qelqapitaq Génesis 6:2, 4; Job 1:6; 2:1; 38:7; Salmo 89:6 textokunapi chay simikuna rikhurin. Diospa Simin Qelqapitaq Génesis 6:2, 4 textopi chay hinata nishallantaq. ¿Imaninmi chay textokuna ‘Diospa wawankunamanta’?

Job 1:6 textopi ‘cheqaq Diospa wawankunamanta’ rimaspaqa hanaq pachapi Diospa ñawpaqenpi kaq angelkunamantan rimasharqan. Chaypin Satanás rikhurillarqantaq kay pachaq k’uchun-k’uchunta purimusqanmanta (Job 1:7; 2:1, 2). Job 38:4-7 textopin willallantaq Jehová Dios kay Hallp’api “esquina rumita” churashaqtin ‘Diospa wawankuna kusisqa q’ochukusqankumanta’. Chay tiempopaqqa manaraqmi runakuna kamasqachu karqan, chaymi ‘wawankuna’ nispaqa angelkunamanta rimasharqan. Diospa Simin Qelqa Bibliapin Salmo 89:6 textopi nishan “dioskunaq wawankuna” nispa, chaytapas nishan Diospa ñawpaqenpi kaq angelkunamantan, manan aychayoq tulluyoq runakunamantachu.

Chhaynaqa, ¿pikunan karqanku Génesis 6:2, 4 textoq willasqan ‘Diospa wawankuna’? Ñawpaqpi textokunata t’aqwisqanchisman hinaqa, hanaq pachamanta uraykamuq angelkunan karqanku.

Mateo 22:30 textopin Jesús willarqan hanaq pachapiqa mana pipas casarakusqanta nitaq warmi-qhari hina puñusqankutapas. Chayta yachaspan wakin runakuna mana creenkuchu angelkuna warmikunawan qhelli hucha ruwasqankuta. Ichaqa kayta yuyarisun, ñawpa tiempopiqa runaman tukuspan wakin angelkuna runakunawan mikhurqanku ukyarqanku ima (Gén. 18:1-8; 19:1-3). Chaymi wakin angelkuna kay Hallp’aman uraykamuspa warmikunawan puñusqankupas creenapaq hinapuni.

Biblian sut’inchan chay hinapuni kasqanta. Judas 6, 7 textopin tupanachishan Sodoma llaqtapi “aychaq sinchi millay munasqankunata” ruwaq runakunata ‘hanaq pacha tiyanankuta saqepuspa’ ‘munayniyoq kasqankuwan mana contentakuq angelkunawan’. ¿Imaynapin angelkuna Sodoma llaqtapi runakuna hina karqanku? ‘Qhelli huchapi purispa, aychaq sinchi millay munasqankunata ruwasqankupin’. 1 Pedro 3:19, 20 texton Noepa tiemponmanta rimaspa mana kasukuq angelkunamantawan rimashan (2 Ped. 2:4, 5). Chaymi Noepa tiemponpi mana kasukuq angelkunaq ruwasqanta tupanachikun Sodoma, Gomorra llaqtakunapi runakunaq hucha ruwasqankuwan.

Tukuy chaykunan rikuchin Génesis 6:2, 4 textoq willasqan “Diospa wawankunaqa” runaman tukuspa warmikunawan qhelli huchata ruwaq angelkuna kasqanta.

Pedroqa rimasharqan ‘arcata Noé wakichishaqtin Dios pacienciawan suyashasqan’ tiempopi ‘mana kasukuq’ espiritukunamantan (1 Ped. 3:20). Chay espiritukunaqa Satanasta qatikuspa Diospa contranpi hatariq angelkunan karqanku. Paykunamantan Judas qelqallarqantaq: “Hinallataq qallariypi munayniyoq kasqankuwan mana contentakuq angelkunatapas wiñaypaq watasqata laqhayaq ukhupi hatun taripay p’unchaypaq Diosqa waqaychashan, hanaq pacha tiyanankuta saqepusqankurayku”, nispa (Jud. 6).

¿Ima huchapin urmarqanku chay angelkuna Noepa tiemponpi? Runaman tukuspan kay Hallp’aman uraykamurqanku hinan munasqanku warmikunata akllakuspa paykunawan qhelli huchapi kawsarqanku. Diosqa manan chay ruwanankutaqa munarqanchu (Gén. 5:2; 6:2, 4). Chay millay mana kasukuq angelkunatan Diosqa paypa churakusqan p’unchaypi wañuchinqa. Chaykaman kunan, Judaspa nisqan hina “laqhayaq ukhupi” hina kashanku.

¿Hayk’aqmi Jesús ‘preso kashaq espiritukunaman’ predicarqan? Pedroq nisqan hina, chayqa karqan Jesús ‘espiritupi kawsarichimpusqa’ kasqan qhepamanmi (1 Ped. 3:18, 19). Chay tiempopaqqa manaraqmi apóstol Pedro ñawpaq kaq cartanta qelqasqaraqchu. ¿Imaynapin paykunaman predicarqan? Jesusqa kawsarimpusqan qhepamanmi millay espiritukunaman predicarqan otaq willarqan castigasqa kanankuta. Espiritukunaman predicaspaqa manan allin willakuytachu willarqan, aswanmi willarqan huchachasqa kanankumanta (Jon. 1:1, 2). Jesusqa allin iñiyniyoq kasqanwan, wañupunankama hunt’aq kasqanwan, kawsarimpusqanwan iman rikuchirqan Saqrata atipasqanta, chaymi pay chay espiritukunaman chay willakuyta aparqan (Juan 14:30; 16:8-11).

Jesusqa hamuq tiempopin Satanasta mana kasukuq angelkunatawan cadenawan wataspa chinkay-chinkay ukhuman wikch’uykunqa (Luc. 8:30, 31; Apo. 20:1-3). Chay p’unchay chayamunankaman chay espiritukunaqa laqhayaq ukhupi hina kanqaku. Chay qhepamantaqmi llapallanku wañuchisqa kanqaku (Apo. 20:7-10).