Ángela sutiyoq * soltera iñiqmasin 30 watanpi hina kashan, paymi umallikunaq visitananta manchasqa suyashan. Sonqonpin yuyaykushan: “Imaniwanqakuchá umallikunaqa”, nispa. Payqa llank’ananpi kurak runakunata cuidaspan sayk’usqa wasinman kutipun, chaymi mayninqa mana wakin huñunakuykunaman rinchu. Hinaspapas imaymana llakikuykunan paypaq kashan, llakisqataqmi kashan maman onqosqanmanta.

Sichus qanman tupasunkiman Angelata visitanaykipaq chayri, ¿imaynatan kallpachawaq? (Jer. 31:25.) ¿Imaynatan preparakuwaq ‘sayk’usqa kaqkunata’ visitaspa kallpachanaykipaq?

Llapallanchistan mayninqa llank’ananchis otaq Diospa llaqtanpi llank’aykuna sayk’uchiwanchis. Profeta Danielpas ‘pisi kallpayarqanmi’ rikhuriypi rikusqanta mana entiendesqanwan (Dan. 8:27). Chaymi ángel Gabriel hamuspa payta yanaparqan. Chay angelmi mana entiendesqanta sut’incharqan, willarqanmi mañakusqanta Dios uyarishasqanta, ‘Dios anchata munakusqantapas’ (Dan. 9:21-23). Huk kutipi chhayna sayk’usqa kashaqtinmi huk ángel kallpachallarqantaq (Dan. 10:19).

Chay hinatan qanpas ruwawaq iñiq t’aqapi sayk’usqa otaq pisi kallpayaq iñiqmasita visitaspa. Ichaqa manaraq visitashaspa yuyaykuy imaynapi tarikushasqanta.  Tapukuy: “¿Ima sasachakuykunapin tarikushan? ¿Imaynatan chay sasachakuykuna afectashan? ¿Imayna cristianon pay?”, nispa. Richard iñiqmasin 20 wata hinaña umalli kashan, paymi nin: “Manaraq huk iñiqmasita visitashaspan yuyaykuni allinkuna ruwasqanpi. Chaymi yanapawan necesitasqanman hina yanapanaypaq”, nispa. Sichus huk umalliwan pitapas visitankichis chayqa, ñawpaqta rimaychis imaynapi chay iñiqmasita yanapanaykichismanta.

Wakin iñiqmasikunaqa p’enqakunkun otaq manchapakunku sonqonkupi ima kasqantapas umallikunaman willakuyta. Chhaynaqa, ¿imaynatan yanapawaq mana manchapakunanpaq? Kusisqa uyawan sumaq simikunawan rimaykusqaykin yanapanman. Michael iñiqmasin 40 wata hinaña umalli kashan, paymi sapa kutilla iñiqmasikunata visitaspa nin: “Tukuy imaymana ruwanaykumantaqa iñiqmasikunata wasinkupi visitaymi astawanqa kusichiwanku. Chaymi makillaña suyasharqani kay p’unchayta”, nispa.

Huk iñiqmasita visitaspaqa ñawpaqtan paywan kuska Diosmanta mañakuwaq. Rimawaqmi iñiyninmanta, munakuyninmanta, sasachaykuna aguantasqanmanta. Chay hinatan apóstol Pablopas iñiqmasinkunapaq Diosmanta mañakuq (1 Tes. 1:2, 3). Chay hinata mañakusqaykin paypa sonqonta qanpa sonqoykitawan kicharinqa sumaqta parlarinaykichispaq. Hinaspapas sumaqta rimaykusqaykin sonqonta “thak” niyachinqa. Allin experienciayoq Raúl umallin nin: “Mayninqa qonqanchismi Diospaq allinkuna ruwasqanchista, hukkuna chayta yuyarichiwasqanchistaqmi kallpachawanchis”, nispa.

Apóstol Pablo hinan qanpas iñiqmasikunata kallpachawaq ‘iñiypi qaqatapuni sayanankupaq’. Chaytaqa ruwawaq Bibliamanta huk textollatapas leespan (Rom. 1:11). Yaqapaschá huk iñiqmasi mana imapaq valeq  hina qhawarikushan. Paymanmi willawaq ‘qhechinchakama [ch’aki] qarapas’ kanman hina sientekuq salmistamanta. Chhaynapi tarikushaqtinpas payqa nirqanmi: “Manan unanchasqa simiykikunata qonqapunichu”, nispa (Sal. 119:83, 176). Chay textokunata pisillapi willasqayki qhepamanmi niwaq: “Qanpas pay hinachá Diospa kamachikuyninta sonqoykipi hap’ikushallanki”, nispa.

¿Imaynatan sonqonman chayaqta rimapayawaq Dios serviyninpi pisikallpayaq otaq iñiq t’aqamanta karunchakuq iñiqmasita? Chaypaqqa huk warmiq qolqe chinkachisqanmanta rikch’anachiytan willawaq (Luc. 15:8-10). Chay qolqeqa ancha valorniyoq collarpa huknin sumaqchaq qolqenpaschá karqan. Chay rikch’anachiyta willaspan iñiqmasita niwaq paypas chay qolqe hina Diospa llaqtanpi ancha valorniyoq kasqanta. Hinaspapas willawaqmi Jehová Dios paypi interesakusqanta huk ovejachan kasqanrayku.

Askha iñiqmasikunan Bibliapi textokuna leesqankumanta rimayta munanku. Chayrayku ama qanllachu rimay. Payta yanapananpaq hina huk textota leesqaykichis qhepaman, sumaqllata tapuriy. Kay hinatan ruwawaq: 2 Corintios 4:16 textota leespan tapuwaq: “¿Repararqankichu hayk’aqllapas Jehová Diosmanta kallpa chaskisqaykita?”, nispa. Chay hina tapuykunawanmi ‘iñiyninpi kallpachawaq’ (Rom. 1:12).

Chaymantapas Bibliapin maskhawaq chay iñiqmasiq sasachakuyninpi hina tarikuq runakunamanta. Yaqapaschá pipas Ana hina otaq Epafrodito hina sinchita llakiwan ñit’ichikushan. Paykunamanta willaspan niwaq: “Chhaynakunapiña tarikurqanku chaypas, ancha chaninpaqmi Dios paykunata qhawarirqan”, nispa (1 Sam. 1:9-11, 20; Filip. 2:25-30). Chay hina willakuykunatan qanpas Bibliapi maskhawaq iñiqmasikunata kallpachanaykipaq.

Visitasqayki qhepamanpas yanapashanallaykin, chaypin rikuchinki paykunapi interesakusqaykita (Hech. 15:36). Visitasqayki qhepamanmi invitawaq predicaq lloqsinaykichispaq. Unay experienciayoq Eduardo iñiqmasiq ruwasqanmanta yachasun. Chayllaraq visitasqan iñiqmasiwan tuparuspan payqa sumaqllata tapurin: “¿Allicharikushanñachu sasachakuykuna?”, nispa. Chaykunata ruwaspan rikuchinki iñiqmasikunapi interesakusqaykita, hinaspapas necesitasqanman hinan hukkunatapas ruwawaq.

Sasa tiempokunapi tiyasqanchisraykun astawanqa iñiqmasikuna necesitanku yanapanata, sonqochanata, munakunatapas (1 Tes. 5:11). Chayrayku manaraq visitashaspa yuyaykuy imaynapi tarikusqanta. Jehová Diospa yanapayninta mañakuy, yanapanaykipaq hinataq textokunatapas akllay. Chay hinapin ‘sayk’usqa kaqkunata’ sumaq simikunawan kallpachanki.