Askha kutichá chay hinata nirqanki chayllaraq lloqsimuq revistakunapi sumaq fotokunata dibujokunatapas rikuspa. ¿Imapaqmi revistakunapi lloqsimun? Chaypi yachachikuykuna sonqonchisman chayananpaq, chaykunawan allinta yuyaymanananchispaq ima. Hinaspapas yanapawanchismi Qhawaq revistata preparakunanchispaq, huñunakuypi tapuykunaman kutichinapaq ima. Chaymi fotokunatapas dibujokunatapas allin-allinta akllaspa churakamun.

Ñawpaqta yuyaykuy sapanka estudioq qallariyninpi lloqsimuq dibujopi: ¿Imatan qhawarichiwanchis? ¿Imaynatan tupan chaypi kaq yachachikuywan, qallariypi kaq textowanpas? Wakin dibujokunata fotokunatawan qhawarispa tapukullaytaq: “¿Imaynatan tupan kay estudiopi yachachikuywan? ¿Imaynatan kay yanapawanman?”, nispa.

Qhawaq revistamanta yachachiqmi uyariqkunata tapunqa revistapi lloqsimuq sapanka fotomanta dibujomantawan. Chaypin sut’inchakunqa yachasqankuwan imayna tupasqanta, kawsayninkupi imayna yanapasqanmantawan. Wakin fotokunaq dibujokunaq uranpin willashan ima parrafowan tupasqanta. Wakin dibujotaqa estudiota apariqmi huk parrafowan tupachispa uyariqkunata tapunqa. Chay dibujokunawanmi Diospa Siminpi yachachikuykunata rikushankumanpas hinata qhawarinqaku, chaytaqmi llapa uyariqkunaq allinninpaq kanqa.

Huk iñiqmasin nirqan: “Revistapi huk sumaq temata leesqay qhepaman chaypi dibujokunata otaq fotokunata qhawarispan aswan sumaqpaq chay revistata qhawarini”, nispa.