1, 2. a) ¿Iman suceden munakusqanchis runapi yuyaykuqtinchis paymanta rimaqtinchispas? (Kay paginapi fotota qhaway.) b) ¿Ima tapuykunamantan yachasun?

MUNAKUSQANCHIS runapi yuyaykuqtinchis paymanta rimaqtinchispas astawanmi payman asuykunchis. Chay hinallataqmi suceden Diosninchiswanpas. Rey Davidmi oveja michiq kashaspa, tutapi hanaq pachapi ch’askakunata qhawaspa ancha hatun Kamaqninpi yuyaymanaq. Paymi qelqarqan: “Kamasqayki hanaq pachata qhawarispaymi chaypi churasqayki killatapas ch’askakunatapas rikuspaymi, nini: ¿Imataq runari payta yuyarinaykipaq? ¿Imataq wañuq runari paymanta llakikunaykipaq?”, nispa (Sal. 8:3, 4). Akllasqa cristianokunapaq Jehová Diospa munaynin imayna hunt’akusqanmanta yachaspan, apóstol Pablo nirqan: “¡May hatunpunin Diospa qhapaq-kayninpas, yachayninpas, yuyayninpas!”, nispa (Rom. 11:17-26, 33).

² Predicacionman lloqsispaqa Jehová Diospin yuyaykunchis, paymantataqmi rimanchis, chaymi yanapawanchis Diosman astawan asuykunapaq. Askha precursorkunan reparanku precursor kasqankumantapacha Diosta astawan munakusqankuta. Precursorña kanki otaq kallpachakushanki precursor kanaykipaq chayqa, kay tapuypi yuyaymanay: ¿Imaynatan precursor kay yanapasunkiman Diosman astawan asuykunaykipaq? Sichus precursorña kanki chayqa tapukuy: “¿Iman yanapawanqa precursor kashanallaypaq?”, nispa. Manaraq precursorchu kanki chayqa tapukuy: “¿Imakunatan ruwanay precursor kanaypaq?”, nispa. Qatimuq parrafokunapin yachasun imaynatan precursor kay yanapawasunman Diosman astawan asuykunapaq chaymanta.

3. ¿Imaynatan yanapawanchis Diospa promesanmanta hukkunaman willasqanchis?

³ Diospa promesanmanta willayqa astawanmi payman asuykachiwanchis. ¿Ima textomantan astawan rimanki wasin-wasinta predicaspa? Yaqapaschá rimanki Salmo 37:10, 11; Daniel 2:44; Juan 5:28, 29 otaq Apocalipsis 21:3, 4 textomanta. Chay textokunawan Diospa promesanmanta rimaspaqa kikinchistan yuyarichikunchis ‘tukuy allin kaqkunapas, tukuy chanin kaqkunapas’ Diosmanta hamusqanta, chaytaqmi astawan payman asuykachiwanchis (Sant. 1:17).

4. ¿Imaynapin runakunaman predicasqanchis reparachiwanchis Diospa sumaq kayninta?

⁴ Kay pachapi runakuna espiritualpi yarqasqa kasqankuta rikuspan, cheqaq yachayta aswan chaninpaq qhawarinchis. Kay pachapi runakunataqa manan pipas yanapayta atinchu kusisqa kawsanankupaq allin kanankupaqpas. Paykunaqa llakisqan kashanku hamuq tiempomanta manataqmi ima suyakuyninkupas kanchu. Manan yachankuchu imapaq kawsasqankuta, religionniyoqña kanku chaypas pisillatan Bibliamanta yachanku. Paykunaqa ñawpa Nínive llaqtapi runakuna hinan kanku (leey Jonás 4:11). Diospaq astawan llank’aspaqa reparanchismi Diospa llaqtan espiritualpi allin mikhusqa kasqanta, kay pachapi runakunataq sinchi yarqaypi tarikusqankuta (Is. 65:13). Hinaspapas Diosqa manan llaqtallantachu cuidan. Payqa llapa runakunatan yanapayta munan kallpachasqa kanankupaq suyakuyniyoq kanankupaqpas. Chayta yachaymi reparachiwallanchistaq ancha sumaq Dios kasqanta (Apo. 22:17).

5. ¿Imaynatan sasachakuyninchiskunata qhawarinchis hukkunaman Bibliamanta yachachispa?

⁵ Cheqaq yachaykunata hukkunaman yachachisqanchismi yanapawanchis sasachakuyninchiskunawan ama sinchita ñit’ichikunanchispaq. Trisha sutiyoq precursoran chayta repararqan tayta-maman t’aqanakapuqtin. Paymi nin: “Manan hayk’aqpas chhayna llakikuypi rikukurqanichu”, nispa. Huk kutinmi sinchi llakisqa tarikuspa wasillanpi qhepakuyta munarqan. Ichaqa kallpata hap’ispan sinchi sasachakuypi tarikuq kinsa erqechakunaman estudiachiq rirqan. Paykunataqa tayta-mamankun saqerparipusqa kurakninkutaqmi sinchita ñak’arichisqa. Trisha nillantaq: “Paykunaq sasachakuyninkun aswan hatun karqan sasachakuyniymantaqa. Estudiashaqtiykun ñawichanku k’ancharirqanraq kusikuymanta. Chaytan Diospa regalonta hina qhawarirqani”, nispa.

6, 7. a) ¿Imaynatan Bibliamanta yachachisqanchis iñiyninchista astawan wiñachin? b) Biblia estudiaqkunaq kawsaynin allinyasqanta rikuspa, ¿imaynatan Diospa yachayninta qhawarinchis?

⁶ Bibliamanta yachachiyqa iñiyninchistan astawan wiñachin. Pabloq tiemponpi wakin runakunaqa manan yachachisqankuman hinachu kawsaqku, paykunamantan Pablo nirqan: “Hukkunata qan yachachishaspaykiqa, ¿manachu qan kikiykita yachachikunki?”, nispa (Rom. 2:21). Kay tiemponchispin ichaqa precursorkuna allin ejemplo kanku. Paykunaqa askha runakunamanmi Bibliamanta yachachinku. Ichaqa allinta yachachinankupaqmi sapanka estudiopaq preparakunku, maynintaq sasa tapuykunata kutichinankupaq allinta Bibliata estudianku. Janeen sutiyoq precursoran nin: “Sapanka runaman Bibliamanta yachachisqaymi yuyayniypi sonqoypi astawan qhepan. Chaymi yanapawan iñiyniypi astawan wiñanaypaq”, nispa.

⁷ Biblia estudiasqankuwan runakunaq kawsaynin allinyasqanta rikuspan Diospa yachayninta aswan chaninpaq qhawarinchis (Is. 48:17, 18). Chaymi ñoqanchistapas kallpachawanchis Diospa yachachisqanman hina kawsananchispaq. Adrianna sutiyoq precursoran nin: “Yuyaykusqankuman hinalla kawsaqkunaqa imaymana sasachakuykunamanmi urmanku, Bibliata estudiaspa chayman hina kawsapuqtinkun ichaqa kawsayninku sumaqta t’ikarin”, nispa. Phil sutiyoq precursorpas  anchatan admirakun Diospa yanapayninwan runakunaq kawsaynin allinyapusqanta rikuspa.

8. ¿Imaynatan predicacionpi iñiqmasinchiskunawan kasqanchis kallpachawanchis?

⁸ Predicacionpi iñiqmasinchiskunawan kuska kasqanchismi anchata kallpachawanchis (Prov. 13:20). Precursorkunan astawanqa predicacionman lloqsishallanku, chaytaqmi paykunata yanapan hukkuna-hukkunawan ‘iñiyninkupi kallpachanakunankupaq’ (Rom. 1:12; leey Proverbios 27:17). Huk precursoran nin: “Llank’ananchispi runakunaqa qhawanakushallankun ima ruwasqankutapas, tukuy imatan ruwanku hukkunamanta aswan allin kanankupaq. Hinaspapas qhelli simikunallatan uyarikun, nishutataqmi hukkunamanta rimakunku. Kay pachapi runakunaqa hukkunamanta aswan hatun kayllapin yuyaykunku. Cristianokunataqa mana allinpaqmi qhawariwanchis, asipayawanchistaqmi imayna kawsasqanchismanta. Predicacionman lloqsiqtinchismi ichaqa iñiqmasinchiskunawan kallpachanakunchis. Chay qhepaman sayk’usqaña tarikuni chaypas, ancha kusisqan wasiyman kutipuni”, nispa.

9. ¿Imaynatan casadokunata yanapan precursor kasqanku?

⁹ Warmi-qhari precursor kayqa hukllachanmi casado kawsayta (Ecl. 4:12). Madeline iñiqmasin qosanwan precursor kanku, paymi nin: “Qosaywanqa parlashallaykun predicacionpi imakuna ruwamusqaykumanta, Bibliata estudiaspa predicacionpaq hina yanapaykuna tarisqaykumantapas. Watan-watan precursor kasqaykun astawan hukllachawanku”, nispa. Trisha nillantaq: “Manan mayqenniykupas qolqemanta manu kayta munaykuchu, chaymi mana qolqemantaqa hap’inakuykuchu. Kuskan predicacionman, revisitakunaman, estudiokunamanpas  lloqsiyku, chaymi yanapawanku aswan sumaqta kawsanaykupaq”, nispa.

10. ¿Imamanmi tanqariwanchis Diospaq ñawpaqta llank’asqanchisrayku yanapayninta chaskisqanchis?

¹⁰ Diospaq ñawpaqta llank’aspaqa astawanmi reparanchis mañakusqanchisman kutichimusqanta, chaytaqmi tanqariwanchis payman astawan hap’ipakunanchispaq. Chaytaqa llapallanchismi reparanchis, tukuy tiemponkuwan Diosta serviqkunan ichaqa astawan chay yanapayta reparanku, chaytaqmi yanapan precursor kashanallankupaq (leey Mateo 6:30-34). Curt sutiyoq iñiqmasin esposanwan kuska precursor kanku, mayninpitaq iñiq t’aqakunata watukuq umalli hina yanapakun. Huk kutinmi huk llaqtapi iñiq t’aqata watukamunanpaq nirqanku. Chaymanqa iskay hora kuskantan viajananku karqan, rinallankupaqtaqmi carronkupi gasolina karqan. Hinaspapas iskay semanamantaraqmi sueldonta chaskinan karqan. Paymi nin: “Iskayasharqanin rinaymanta”, nispa. Ichaqa Diosmanta mañakusqanku qhepamanmi, paypi confiaspa decidirqanku rinankupaq. Viajanankupaq wasimanta lloqsinankuña kashaqtinmi, huk iñiqmasi waqyamurqan huk regalota qonanpaq. Chay regaloqa karqan viajanankupaq hayk’achus necesitasqanku qolqen. Curt iñiqmasin nin: “Chhayna sasachakuykunapi tarikuspan astawanqa reparanchis Diospa yanapayninta”, nispa.

11. ¿Imaynapin precursorkuna saminchaykunata chaskinku?

¹¹ Precursorkunaqa Diosman astawan asuykuspanku, paypaq astawan llank’aspanku iman, reparanku aswan askha saminchaykuna chaskikusqankuta (Deut. 28:2). Chaywanpas precursorkunapaqqa kanmi imaymana sasachakuykuna. Llapallanchis huchallikuq runakuna kasqanchisrayku, millay pachapi kasqanchisrayku iman sasachakuykunapi tarikunchis. Wakin precursorkunapas mayninqa sasachakuypi tarikuspan precursor kasqankuta saqepunku. Ichaqa yaqa llapa sasachakuyninkutan allichayta atinkuman. ¿Iman precursorkunata yanapanman chay sumaq llank’ayninkuta mana saqenankupaq?

12, 13. a) ¿Imatan allinta qhawarinan precursor kasqanta mana hunt’ayta atiq cristiano? b) ¿Imatan ruwanan precursor kasqanta mana saqeyta munaq cristiano?

¹² Yaqa llapa precursorkunan imaymana ruwanayoq kanku. Chaymi tukuy ruway munasqankuta ruwanankupaqqa allinta tiemponkuta t’aqananku (1 Cor. 14:40). Sichus huk precursor mana hunt’ashanchu hayk’a horatachus ruwananta chayqa, imakunachus ruwananpaq tiempo t’aqasqantan allinta qhawarinan kanqa (Efes. 5:15, 16). Chaypaqqa kaykunatan tapukunan: “¿Hayk’a tiempon kusirikuykunapi kashani? ¿Cambiaymanchu llank’anay horata? ¿Yanqa ruwaykunapichu tiempoyta usuchishani?”, nispa. Chaykunatan precursorkuna sapa kutilla tapurikunanku, chayman hinataqmi ima ruwasqankutapas allichananku.

¹³ Precursorkunaqa tiempotan t’aqanallankutaq Bibliata leenankupaq, estudianankupaq, yuyaymananankupaq ima. Chayta hunt’anankupaqmi kallpachakunanku, chay hinapin mana yanqa ruwaykunapichu t’aqasqanku tiempota usuchinqaku (Filip. 1:10). Kaypi yuyaykusun: Huk precursormi ch’isiyaq predicacionpi kasqanmanta wasinman kutipushan. Payqa, wasinman chayaspa huñunakuypaq preparakuytan yuyaykushan. Wasinman chayaspan ichaqa computadoranta hap’ichispa mensajekuna apachimusqankuta leen, hinaspa chayman hina paypas mensajeta apachillantaq. Chay qhepamanmi Internetman haykuspa imatachus rantiy munasqanpa precionta qhawan. Chaykamaqa manan reparakunchu iskay horaña computadorapi kasqanta, manataqmi preparakuyta qallarinpaschu. Carrerapi  phawaq runa allinta phawayta munan chayqa, sapa kutillanmi allinta mikhunan. Precursor kasqanta mana saqeyta munaqpas, sapa kutillanmi Diospa siminta estudianan (1 Tim. 4:16).

14, 15. a) ¿Imaraykun imachus kapuqnillankuwan precursorkuna kawsananku? b) ¿Imatan ruwanan sasachakuypi tarikuq precursor?

¹⁴ Unayña precursor kaqkunaqa kallpachakunkun imachus necesitasqallankuwan kawsanankupaq. Jesuspunin chay hinata kawsanankupaq qatikuqninkunata kallpacharqan (Mat. 6:22). Chay hinatan paypas kawsarqan kay pachapi predicashaspa. Chaymi nirqan: “Atoqkunapas t’oqoyoqmi, phalaq animalkunapas q’esayoqmi, Runaq Churinpan ichaqa mana kanchu maypi puñuykunallanpas”, nispa (Mat. 8:20). Jesusta qatikuyta munaq precursorkunaqa, yuyarinankun askha kaqniyoq kayqa askha tiempopaq, askha qolqepaq kasqanta.

¹⁵ Precursor kayqa ancha sumaq llank’aymi. Chaywanpas precursorkunaqa manan hukkunamanta aswan allinpaqchu qhawarikunku. Paykunaqa Diospa regalonta hinan precursor kasqankuta qhawarinku. Chaymi precursor kashanallankupaqqa Diospi hap’ipakunanku (Is. 12:2). Sasachakuykunaqa kashallanqan (Sal. 34:19). Chaywanpas precursorkunaqa Diospa yanapaynintan maskhananku, paypa makinpin imatapas saqenanku manataqmi precursor kasqankuta saqeypipachachu yuyaykunanku (leey Salmo 37:5). Sasachakuyninku pisi-pisimanta allichakusqanman hinan reparanqaku munakuq Diospa yanapayninta, chaytaqmi yanapanqa payman astawan asuykunankupaq (Is. 41:10).

16. Precursor kayta munanki chayqa, ¿imatan ruwanayki?

¹⁶ Tukuy tiemponkuwan Diosta serviq precursorkuna hina askha saminchaykunata chaskiyta munanki chayqa, Diosman willakuy (1 Juan 5:14, 15). Precursorkunawan parlariy, tukuy atisqaykitataq ruway precursor kanaykipaq. Chaytan ruwarqanku Erika, Keith iñiqmasikunapas. Paykunaqa ch’isiyaqmi llank’arqanku, huk runakuna hinataqmi casarakusqanku qhepallaman wasita carrota ima rantikurqanku. Paykunan ninku: “Ñoqaykuqa nirqaykun: ‘Imaymanayoq kaspaqa kusisqan kasun’, nispa, ichaqa manan chhaynachu karqan”, nispa. Keith iñiqmasita llank’ananmanta wikch’upuqtinkun precursor auxiliar karqan. Paymi nin: “Precursor kasqaymi rikuchiwarqan predicayqa kusikunapaq kasqanta”, nispa. Huk casarasqa precursorkunan qhawarichirqanku precursor kaypas pisillawan kawsaypas kusikuyta apamusqanta. ¿Imatan Erika, Keith iñiqmasikuna ruwarqanku? Paykunan ninku: “Imakunamanchus aypay munasqaykuta qelqaruspan refrigeradoraman k’askachirqayku, aypasqaykuman hinataq marcaq kayku”, nispa. Chay qhepamanmi paykunaqa precursor kapurqanku.

17. ¿Imaraykun allin kanman precursor kaypi yuyaykuy?

¹⁷ ¿Kallpachakuwaqchu precursor kanaykipaq? Mana atinaykipaq hina kunan qhawarishanki chayqa, tukuy atisqaykita ruway astawan predicanaykipaq, chay hinapin Diosman astawan asuykunki. Diosmanta mañakusqayki qhepamanqa yaqapaschá reparanki ruwanaykikunata cambiaspaqa precursor kay atisqaykita. Precursor kanki chayqa ancha kusisqan kanki, manataqmi pesapakunkichu precursor kanaykipaq tukuy ruwasqaykimanta. Kusikunkin hukkunata yanapaspa, Diospa munayninta ñawpaqta ruwasqaykimantapas (Mat. 6:33). Chaykunamanta astawanqa Jehová Diosllapin yuyaykunki, paymanta rimanki, chaytaqmi yanapasunki payta astawan munakunaykipaq kusichinaykipaqpas.