1, 2. a) ¿Imaraykun kay pachapi llullakuy q’oñirishan? b) ¿Imakunapin lloqsimun chay llulla willakuykuna? (Kay paginapi fotota qhaway.)

KAY pachapin nishutapuni q’oñirishan llulla runakuna q’otuq runakunapas. Bibliapunin willan kay pachapi kamachikuq Saqraqa runakunata q’otunanpaq kusapuni kasqanta (1 Tim. 2:14; 1 Juan 5:19). Saqraqa yachanmi chinkachisqa kananpaq “tiempoqa pisillaña” kasqanta, chaymi sinchi phiñasqa kashan (Apo. 12:12). Paymi runakunata tanqashan llulla kanankupaq, paykunawantaqmi Dios serviqkunata pantachiyta munan.

² Mayninpin televisionpi, periodicopi otaq Internetpi lloqsimun Jehová Diospa testigonkunamanta llulla willakuykuna. Chayta uyarispan wakin runakunaqa Jehová Diospa testigonkunapaq phiñakunku.

3. ¿Iman yanapawasun llulla yachachikuykunaman mana urmanapaq?

³ Ichaqa Diostan anchata agradecikunchis Biblia qowasqanchismanta. Chaywanmi Saqraq llulla yachachikuyninkunata ‘cheqaq kaqman kutirichisun’ (2 Tim. 3:16, Diosmanta Qhelqasqa). Pablon willarqan Tesalónica llaqtapi wakin iñiqkuna yanqa yuyaykuykunaman urmasqankumanta. Chaymi paykunata nirqan: “Ama yuyayniykichista usqhaylla hukman t’ikraychischu”, otaq Mosoj Testamento Bibliaq nisqan hina: ‘Ama ratolla cambiaychischu’, nispa (2 Tes. 2:1, 2). ¿Imakunatan chaymanta yachanchis? ¿Imakunapin yanapawasunman chaymanta yachasqanchis?

4. a) ¿Imaynatan Pablo iñiq t’aqaman Diospa p’unchayninmanta willakuyta chayachirqan? b) ¿Imaynatan kunanpas makilla kanapaq willakuyta chaskinchis?

⁴ Tesalónica llaqtapi iñiqkunaman ñawpaqkaq carta apachisqanpin, Pablo willarqan ‘Señorpa kutimunan p’unchaymanta [“Jehová Diospa p’unchayninmanta”,  NM]’. Payqa manan munarqanchu qonqaylla hap’isqa kanankuta, ‘laqhayaqpi’ kanankutapas. Chaymi yuyarichirqan “k’anchaypi kawsaq runakuna” hina makilla kashanankupaq. Nirqanmi: “Rikch’ashasunchis, allin yuyayninchispitaq kashasunchispas”, nispa (leey 1 Tesalonicenses 5:1-6). Kunanpas pantasqa religionkunaq chinkachisqa kanantan suyashanchis. Chay sucedeqtinmi Diospa hatun p’unchaynin qallarinqa. Kunanqa yachanchismi imaynata Diospa munaynin hunt’akunanta. Hinaspapas huñunakuykunapin willakuykunata chaskinchis makilla kashanapaq. Chay willakuykunata uyarikuspaqa, ‘allinkaqta mana allinkaqta reparaspan’ Diosta servishallasun (Heb. 5:14).

5, 6. a) ¿Imatan iñiqkunaman Pablo willarqan iskaykaq cartanpi? b) ¿Imatan Jesús ruwanqa Diospa akllasqan p’unchaypi? c) ¿Imakunatan tapukunanchis?

⁵ Qhepamanmi Pabloqa Tesalónica llaqtapi iñiqkunaman iskaykaq cartata apachillarqantaq. Chay cartapin willarqan ‘Diosta mana reqsiqkunata, Señorninchis Jesucristoq allin willakuyninkunata mana kasukuqkunatapas’ Jesuspa muchuchinanmanta (2 Tes. 1:6-8). Iskay capitulopin willan wakin iñiqkuna, ‘Diospa p’unchayninqa chayamushanñan’ nisqa willakuywan q’otuchikusqankumanta (leey 2 Tesalonicenses 2:1, 2). Chay tiempopi cristianokunaqa manan allintachu yacharqanku Diospa munaynin imayna hunt’akunanta. Pablo kikinmi profetakunaq qelqasqanmanta rimaspa nirqan: “Wakillantan yachanchis, wakillantan profetizanchispas. Hunt’asqataña yachaqtinchismi ichaqa, chay wakillan yachasqanchis tukukapunqa”, nispa (1 Cor. 13:9, 10). Chaywanpas Pabloq, Pedroq huk iñiqkunaq qelqasqankupi willakuykunan iñiqkunata yanaparqan iñiyninkupi qaqata sayanankupaq.

⁶ Pabloqa yuyaykusqankuta ‘cheqaq kaqman kutirichinanpaqmi’ willarqan, manaraq Diospa p’unchaynin chayamushaqtin iñiq t’aqapi Diospa contranpi sayariqkuna kananta, “millay-millay awqa sonqo runa” rikhurimunantawan. *  Chay qhepamanmi, Diospa akllasqan p’unchaypi Jesús llapa q’otuchikuq runakunata ‘wañuchinan’ karqan. ¿Imarayku? Pablon kutichin: “Cheqaq-kayta pisichaspa mana chaskisqankurayku”, nispa (2 Tes. 2:3, 8-10). Chaymi tapukunanchis: “¿Anchatachu munakuni Diospa cheqaq yachachikuyninkunata? ¿T’aqwirishanichu kay revistapi huk qelqanchiskunapipas chayllaraq lloqsimuq sut’inchasqa yachachikuykunata?”, nispa.

7, 8. a) ¿Ima trampakunapin ñawpaq tiempopi cristianokuna rikukurqanku? b) ¿Ima trampakunamantan kunanpas cuidakunanchis?

⁷ Iñiqkunapaqqa huk trampakunan kallarqantaq. Pablon Timoteota nirqan: “Qolqe sonqo-kaymi tukuy mana allinkunaq saphinqa, chaymi wakinkunapas chayta munapakuspanku iñiyta saqepurqanku, hinaspan imaymana llakikunapi rikukurqanku”, nispa (1 Tim. 6:10). Chaymantapas aychaq ‘millay munasqan ruwaykunatan’ atipananku karqan (Gál. 5:19-21).

⁸ ¿Imaraykun Pablo Tesalónica llaqtapi iñiqkunaman sut’itapuni willarqan ‘llulla apostolkunamanta’ cuidakunankupaq? Chay runakunaqa, waqllisqata rimaspan ‘iñiqkunata q’otuspa aysaqananku’ karqan (2 Cor. 11:4, 13; Hech. 20:30). Qhepa watakunamanmi Jesús allinpaq qhawarirqan Éfeso llaqtapi iñiqkuna, ‘mana allin [runakunata] mana hinallatachu qhawasqankuta’. Paykunaqa chay runakunata probaspan “llulla” kasqankuta hap’irqanku (Apo. 2:2). Tesalónica llaqtapi iñiqkunaman iskaykaq carta apachisqanpin Pablo nirqan: “Wawqe-panaykuna, Señorninchis Jesucristoq sutinpin kamachiykiku, llapa mana llank’ay munaq [‘mana allinta puriq’, Qheshwa Biblia] wawqe-panakunamanta t’aqakuychis”, nispa. Chay qhepamanmi rimarqan ‘mana llank’ayta munaq’ iñiqkunamanta (2 Tes. 3:6, 10). Mana llank’ay munaqkunamantapas t’aqakunankutaq karqan chayqa, ¿manachu Diospa contranpi sayariqkunamantaqa astawanraq t’aqakunanku karqan? Chay hina runakunawan huñukuyqa manapunin allinchu karqan. Chaytan kunanpas ruwananchis (Prov. 13:20).

9. ¿Imaraykun Diospa llaqtanmanta mana allinta rimaq runakunamanta cuidakunanchis?

⁹ Qayllaykamushanñan manchay ñak’ariy p’unchay, kay millay pachaq tukukunan p’unchaypas. Chaymi ñawpaq tiempopi cristianokunaman Diospa willachisqanta ñoqanchispas makilla uyarikunanchis. Sichus ñoqanchiswan huñunakuq runa Bibliaq mana willasqan temakunamanta rimapayawasunman otaq Diospa llaqtanmanta mana allinta rimanman chayri, ¿parlasunmanchu chay runakunawan? Manan, cuidakunanchismi chay hina runakunamantaqa (2 Tes. 3:13-15). Chay hina runakunawan parlata tupachispaqa, ‘Diospa sumaq sonqo-kaynintan’ pisichasunman, wiñay kawsay suyakuyninchistataq chinkachipusunman (2 Cor. 6:1).

10. ¿Ima yachachikuypi allintapuni sayanankupaqmi Pablo iñiqkunata kallpacharqan?

¹⁰ Pablon iñiqmasinkunata kallpacharqan yachasqankupi ‘allintapuni sayanankupaq’ (leey 2 Tesalonicenses 2:15). ¿Ima yachachikuykunamantan rimasharqan? Pabloqa manan pantasqa religionkunapi yachachikuykunamantachu rimasharqan. Payqa Jesuspa yachachisqanmanta, paykunawan Diospa qelqachisqan yachachikuykunamantawanmi rimasharqan. Pablon Corinto llaqtapi cristianokunaq allin  ruwasqankumanta nirqan: “Anchatan agradecekuykichis tukuy imapi ñoqata yuyarikuwasqaykichismanta, tukuy yachachisqaykunatapas hap’ikusqaykichismantawan”, nispa (1 Cor. 11:2). Arí, chay yachachikuykunaqa Diospa yachachikuyninmi karqan hap’ipakunapaq hinataqmi karqanpas.

11. ¿Imaynatan hukkunawan q’otuchikuqkuna Diosmanta karunchakunkuman?

¹¹ Hebreo rimaq cristianokunaman carta apachisqanpin, Pablo willarqan imakunan iñiyninchista pisiyachispa urmachiwasunman chaymanta (leey Hebreos 2:1; 3:12). Chaypin rimarqan ‘karunchakuymanta’, Diosmanta ‘t’aqakuymantawan’. Kaywan rikch’anachisun, sichus pipas huk boteman seqanman manataq yachanmanchu maymanchus risqanta chayqa, pisi-pisimantan mana reparakusqallan karunchakunman. Ichaqa boteta mayuman tanqaykuspa mayuwan apachikunman chayqa, pay kikinmantan t’aqakapushanman. Chay hinapin tarikurqanku hukkunawan q’otuchikuqkuna, iñiyninkupi chiriyapuqkunapas.

12. ¿Ima ruwaykunan iñiyninchispi pisipachiwasunman?

¹² Tesalónica llaqtapi wakin cristianokunaqa yaqapaschá yuyaypi q’otuchikurqanku. ¿Yaqachu ñoqanchispas chhaynapi tarikusunman? Kay tiempopi runakunaqa nishutan tiemponkuta usuchinku Internetpi mensajekunata apachinakuspa, pukllaykunata qhawaspa ima. Sichus ñoqanchispas chaykunapi tiemponchista usuchisunman chayqa, pisi-pisimantan Dios servisqanchispi pisipapusunman. Yaqapaschá kaqllata sapa kuti Diosmanta mañakusunman, manaña allintachu Bibliata estudiasunman, otaq huñunakuykunata, predicaciontapas pisipaq qhawarisunman. ¿Imatan ruwasunman chaykunawan mana aysachikunapaq?

13. a) ¿Imayna runakuna kananmantan Pablo willarqan? b) ¿Iman yanapawasun iñiyninchispi qaqata sayanapaq?

¹³ ¿Iman yanapawasun iñiyninchispi qaqata sayanapaq? Chaypaqqa yuyarinanchismi Saqraq kamachisqan millay pacha tukukunanpiña kashasqanta, mana iñiq runakunawan huñunakuy mana allin kasqantapas. Kay tiemponchismanta rimaspan Pedro nirqan: “Qhepa p’unchaykunapin millay asipayakuqkuna hamunqaku, kikinkuq millay munayninkuman hinataq kawsanqaku. Paykunan asikuspa ninqaku: Criston hamunanpaq prometewarqanchis, ¿maytaq hamunchu? Kurak taytakunaq wañukapusqanmantapachan lliw imaymanapas kaqllapuni kashan, imaynan kamay qallariymantaña karqan chay hinallapunin kashan”, nispa (2 Ped. 3:3, 4). Tukukuy tiempopi kashasqanchista mana qonqanapaqqa, Bibliatan sapa p’unchay leenanchis estudiananchis ima. Diospa contranpi sayariqkunaqa kunanpas kashallanmi, ‘millay-millay awqa sonqo runataqmi’ Dios serviqkunata ñak’arichishallan. Chaymi cristianokunaqa manapuni qonqananchischu Diospa p’unchaynin qayllaykamushasqanta (Sof. 1:7).

14. ¿Imaynatan pakaykuwanchis allin willakuykunata willay?

¹⁴ Hinaspapas hukkunawan mana q’otuchikunapaqqa allin willakuykunatan willashanallanchis. Jesusmi qatikuqninkunata kamachirqan chay willakuykunata hukkunaman yachachinankupaq, chay hinapi payta qatikunankupaq. Payqa yacharqanmi chay llank’ayta aparispaqa qatikuqninkuna allin pakaykusqa kanankuta (Mat. 28:19, 20). Ichaqa, ¿imayna  sonqowanmi chay llank’ayta aparinanchis? Rawrashaq sonqowanmi. Chay hinatapunichá Tesalónica llaqtapi cristianokunapas predicarqanku. Pablon paykunata nirqan: “Santo Espiritutaqa ama ninata hina chiriyachiychischu. Diospa yuyaychasqan profetizaykunataqa ama pisipaq hap’iychischu”, nispa (1 Tes. 5:19, 20). Hinaspapas profeciakuna willasqanchisqa anchatan kallpachawanchis.

15. ¿Imakunatan familiawan estudiasqanchispi yachasunman?

¹⁵ Llapallanchismi familianchista yanapayta munanchis Diospa Siminta aswan allinta willanankupaq. Chaymi askha iñiqmasikuna familiantin estudiananku p’unchaypi preparakunku predicanankupaq. Yaqapaschá preparakusunman yachay munaqkunaman kutispa yanapanapaq. ¿Imamantan kutispa rimapayasunman? ¿Imakunamantan astawan chay runakuna yachayta munankuman? ¿Ima horan aswan allin kanman visitanapaq? Chay p’unchaypin wakin familiakuna huñunakuykunapaqñataq preparakunku. ¿Manachu qankunapas chayta ruwawaqchis? Huñunakuykunapi kutichinapaq kallpachakusqanchismi yanapawasun iñiyninchispi allin takyasqa kanapaq, manataqmi hukkunawan q’otuchikusunchu (Sal. 35:18). Arí, familianchiswan Bibliata estudiasqanchismi hark’aykuwasun iskayaymanta pantasqa yachachikuykunamantapas.

16. ¿Iman akllasqa cristianokunata yanapan ama imawanpas q’otuchikunankupaq?

¹⁶ Jehová Diosqa ñawpaqmantañan llaqtanta yanapashan Bibliapi profeciakunata allinta entiendenankupaq. Chaypi yuyaymanaymi kallpachawanchis Diospa prometesqanta suyakushanallapaq. Akllasqa cristianokunan suyakushanku hanaq pachapi Jesuswan kuska kayta. Paykunataqa chay suyakuyninkun yanapan ama imawanpas q’otuchikunankupaq. Tesalónica llaqtapi iñiqkunaman Pabloq qelqasqanqa paykunapaq hinapunin, nirqanmi: “Señorpa munakusqan wawqe-panaykuna, ñoqaykuqa qankunamanta Diosman graciasta qonaykupunin [...] Santo Espíritu paypaq t’aqasqasuykichisrayku, cheqaq-kaypipas iñisqaykichisraykupiwan”, nispa (2 Tes. 2:13).

17. ¿Imaynatan 2 Tesalonicenses 3:1-5 textopi willakuy yanapawanchis?

¹⁷ Kay Hallp’api kawsayta suyakuqkunapas anchatapunin cuidakunanchis ama q’otuchikunapaq. Chay kawsay suyakuqkunatan anchatapuni kallpachanqa, Tesalónica llaqtapi akllasqa cristianokunaman Pabloq qelqasqan (leey 2 Tesalonicenses 3:1-5). Tesalónica llaqtapi iñiqkunaman Pabloq qelqasqanqa yanapawanchismi llulla yachachikuykunamanta cuidakunapaq. Ñoqanchisqa tukukuy tiempopiñan kashanchis, chaymi anchatapuni agradecekunanchis chay willakuykunamanta.