1. ¿Imaraykun runakuna sacrificiokunata ruwanku?

LLAPA runakunan imaymana sacrificiokunata ruwanku imachus paykunapaq aswan allinkaqta ruwanankupaq. Tayta mamakunan tukuy tiemponkuwan, kallpankuwan, qolqenkuwan ima wawankuta yanapanku aswan allin kanankupaq. Askha wayna-sipaskunan hatun llallinakuyman rinankurayku, sapa p’unchay askha horata practicanku amigonkunawan q’ochurikunankumantaqa. Jesuspas munaspaqa qhapaq kayta familiayoq kaytan maskhanman karqan. Ichaqa Diospa Gobiernon paypaq aswan allin kasqanraykun sacrificiokunata ruwarqan (Mat. 4:17; Luc. 9:58). Qatikuqninkunapaqpas Diospa Gobiernonmi aswan allinqa karqan, chaymi paykunapas imaymana sacrificiokunata ruwarqanku (Mat. 4:18-22; 19:27). Chaymi ñoqanchispas tapukunanchis: “¿Iman ñoqapaq aswan allinkaq?”, nispa.

2. a) ¿Ima sacrificiokunatan llapa cristianokuna ruwananchis? b) ¿Ima sacrificiokunatan wakin iñiqmasikuna ruwanku?

² Dioswan hukllachasqa kayta munanchis chayqa, llapallanchismi sacrificiokunata ruwananchis. Chaymi kallpanchista tiemponchista t’aqananchis Diosmanta mañakunanchispaq, Bibliata leenapaq, familianchiswan Diosta yupaychanapaq, huñunakuykunaman predicacionmanpas rinapaq (Jos. 1:8; Mat. 28:19, 20; Heb. 10:24, 25). * Kallpachakusqanchiswan, Jehová Diospa yanapayninwan iman predicación aparisqanchis astawan mast’arikushan, aswan askha runakunataqmi ‘Diospa wasin orqoman’ wichashanku (Is. 2:2). Chaymantapas wakin  iñiqmasikunan sacrificiokunata ruwashanku Betelpi llank’aspa, Huñunakuna Wasikunata hinallataq Hatun Huñunakuna Wasikunata ruwaypi yanapakuspa, hatun huñunakuykuna imayna ruwakunanta qhawarispa, terremotokuna, lloqllakuna hukkunapas kaqtin chaykunapi yanapakuspa ima. Diosqa manan chaykunapi yanapakunanchistaraqchu munan wiñay kawsayta qowananchispaq, ichaqa chaykunapin Diospa Gobiernonta yanapakushanchis.

3. a) ¿Imaynapin allinninchispaq kanqa Diospa Gobiernonrayku sacrificiokunata ruwasqanchis? b) ¿Imakunatan tapukunanchis?

³ Kunanmi astawanqa Diospaq llank’ananchis kashan. Chaymi askha iñiqmasikuna sacrificiokunata ruwashanku Diospa Gobiernonrayku (leey Salmo 54:6). Paykuna hina kallpachakusun chayqa, ancha kusisqan Diospa Gobiernonta suyakusun (Deut. 16:15; Hech. 20:35). Sapankanchismi tapukunanchis: “¿Ima sacrificiokunatan astawan ruwayman Diospa Gobiernonrayku? ¿Imatan ruwashani tiempoywan, qolqeywan, kallpaywan, yachasqaywanpas? Ichaqa, ¿ima ruwanaykunatan mana qonqanaychu ima sacrificiotapas ruwaspa?”, nispa. Chaykunamanta yachanapaq ñawpa tiempopi Israel llaqta sacrificiokuna haywasqankumanta yachasun. Chaymi yanapawasun Diosta kusisqa sonqowan servinapaq.

4. ¿Imaraykun ñawpa Israel runakuna Diosman sacrificiokunata haywaqku?

⁴ Ñawpa tiempopi Israel runakunaqa huchanku pampachasqa kananpaq, Dioswan allinpi kanankupaq iman sacrificiokunata haywaqku. Wakintan Dios kamachirqan haywanankupaq, wakintataqmi paykunallamanta tukuy sonqowan haywaqku (Lev. 23:37, 38). Tukuy sonqowan haywasqa wakin sacrificiokunataqa llapantan ruphachiqku Diosman haywanankupaq. Chay hina sacrificiokunatan Israel runakuna haywarqanku Salomonpa tiemponpi Dios yupaychana wasi inaugurakushaqtin (2 Crón. 7:4-6).

5. ¿Imaynatan Jehová Dios wakchakunata khuyapayarqan?

⁵ Diosqa yacharqanmi sapanka runa imaynapi tarikusqanta, chaymi imatachus atisqallankuta qonankupaq kamachiq. Sacrificiokuna haywasqankuqa “hamuq  allinkaqkunaq llanthun hinallan” karqan, chaymi Kamachikuy Simi nirqan ima animaltapas sacrificiopi haywaspaqa chay animalpa yawarninta sut’uchina kasqanta (Heb. 10:1-4). Chaywanpas Diosqa yacharqanmi mana llapa runakunachu wakatapas otaq huk uywakunatapas hayway atisqankuta. Chaymi wakchakunata kamachirqan chay animalkunaq rantinta kullkuta haywanankupaq, chhaynapin paykunapas sacrificiokunata haywaqku (Lev. 1:3, 10, 14; 5:7). Chaywanpas Diosqa chay sacrificiokuna qosqankuta chaskinanpaqqa iskay kamachikuytan qorqan.

6. a) ¿Ima iskay kamachikuytan Dios qorqan sacrificiota haywaqkunaman? b) ¿Imapin rikukuqku chay kamachikuykunata mana kasukuqkuna?

⁶ Huk kaq: Allin kaqtan qonanku karqan. Haywasqanku animal onqosqa otaq mana allin kaqtinqa manan Jehová Dios chaskiqchu (Lev. 22:18-20). Iskay kaq: Sacrificio haywaqqa mana huchayoqmi kanan karqan. Imapipas huchallikunman karqan chayqa, ñawpaqtan ofrendata apanan karqan ch’uyanchasqa kananpaq (Lev. 5:5, 6, 15). Huchallikushaspa sumaq kawsay ofrenda aychata mikhuqqa huchachasqan kanan karqan (Lev. 7:20, 21). Diospa ñawpaqenpi ch’uya kaspa, sacrificio haywasqanpas allin kaqtinqa ch’uya concienciayoqmi tarikuq kusisqataqmi kaqpas (leey 1 Crónicas 29:9).

7, 8. a) ¿Imaynan sientekunku iñiqmasikuna Diospa Gobiernonrayku sacrificiokuna ruwasqankumanta? b) ¿Imakunatan llapanchispas Diosman qoyta atisunman?

⁷ Kay tiempopipas askha iñiqmasikunan tukuy sonqowan Diosta servishanku. ¡Maytachá Dios chaywan kusikun! Chay iñiqmasikunaqa ancha kusisqan kanku chayta ruwaspa. Huk iñiqmasin Huñunakuna Wasikunata ruwaypi, terremotokunapi, lloqllakunapi hukkunapipas yanapakusqanmanta nirqan: “Sumaq Huñunakuna Wasiyoq karqospa otaq ñak’ariykunapi kasqankumanta yanapaqtiykun iñiqmasikuna may kusisqa kanku, hinan nini: ‘Allinpaqpunin karqan kallpachakusqayku’”, nispa.

⁸ Diospa llaqtanqa makillan llank’ashan Diospa Gobiernonrayku. 1904 watapin Charles T. Russell nirqan, llapanchispas tiemponchiswan, yachasqanchiswan, qolqenchiswanpas Diosta hatunchay  atisqanchista. Diosta servinapaq sacrificiokuna ruwayqa sasapaschá kanqa, ichaqa saminchaykunatan chaskisun (2 Sam. 24:21-24). Chaymi tapukunanchis: “¿Imaynatan tiempoywan, kaqniykunawan, kallpaywan Diosta astawan serviyman?”, nispa.

9. ¿Imatan yachanchis Lucas 10:2-4 textopi Jesuspa yachachisqanmanta?

⁹Tiemponchista qosun. Tiempopaqmi, kallpapaqmi qelqakunata ruway, Dios yupaychana wasikunata hatarichiy, hatun huñunakuykunata apariy, hatun sasachakuypi tarikuq iñiqkunata yanapay huk ruwaykunapas. P’unchaykunaqa usqhayllan pasarqoshan. Ichaqa Jesusmi yanapawanchis tiemponchista allinta t’aqanapaq. Qatikuqninkunata predicanankupaq kachashaspan nirqan: ‘Ama ñanpiqa pitapas napaykunkichischu’, nispa (Luc. 10:2-4). ¿Imaraykun Jesús chayta kamachirqan? Jesuspa tiemponpi runakunaqa piwanpas tuparuspaqa manan makillankutachu haywarinakuqku. Aswanmi askha kutita marq’arinakuqku, pampakamataq k’umuykuqku napaykunakuspa, tukuy chaykunaqa unay tiempopaqmi karqan. Jesusqa manan mana respetoyoq kanankutachu yachachisharqan, aswanmi rikuchisharqan pisi tiempolla kasqanrayku, tiemponkuta mana usuchispa aswan allin kaqkunata ruwanankupaq (Efes. 5:16). Ñoqanchisri, ¿kallpachakusunmanchu tiemponchiswan Diospa Gobiernonrayku astawan llank’anapaq?

10, 11. a) ¿Imakunatan ruwakun donacionkuna qosqanchiswan? b) ¿Imaynatan yanapawanchis 1 Corintios 16:1, 2 textopi nisqan?

¹⁰Qolqenchista qosun. Diospa Gobiernonrayku llank’ay aparikunanpaqqa askha qolqen necesitakun. Sapa watanmi waranqa-waranqa dólares gastakun watukuq umallikunaq, misionerokunaq, precursor especial iñiqkunaq gastonpi. Hinaspapas 1999 watamantapachan wakcha llaqtakunapi 24.500 más Huñunakuna Wasikunata hatarichikurqan. Chaywanpas 6.400 wasikunaraqmi ruwana kashan. Chaymantapas sapa killan 100 millón Qhawaq, ¡Rikch’ariy! revistakunata ruwakun. Chay gastokunataqa donacionkuna qosqanchiswanmi pagakun.

¹¹ Jehová Diosmi Pablota yuyaycharqan imaynatachus donacionninchista churasunman chayta qelqananpaq (leey 1 Corintios 16:1, 2). Semana tukuyta puchusqallantaña mana churanankuraykun, Corinto llaqtapi iñiqkunata Pablo kallpacharqan sapa semana qallariy p’unchaypi sapankanku atisqankuman hina qolqeta t’aqanankupaq. Chay hinatan kunanpas qhawarinchis kapuqninchisman hina hayk’atachus churananchispaq (Luc. 21:1-4; Hech. 4:32-35). Jehová Diosqa ancha chaninpaqmi qhawarin qoykukuq sonqo kasqanchista.

12, 13. a) ¿Iman hark’awasunman yachasqanchiswanpas kallpanchiswanpas Dios servinanchista? b) ¿Imaynatan Dios yanapawasunman?

¹²Yachasqanchista kallpanchistawan qosun. Jehová Diosqa manan saqerpariwasunchu yachasqanchiswan kallpanchiswan ima payta serviqtinchisqa. Payqa prometewanchismi pisi kallpata rikuwaspanchisqa kallpachawananchispaq (Is. 40:29-31). Yaqapaschá pisipaq qhawarikuspa nisunman: “Ñoqaqa manan atiymanchu, chayqa allin yachayniyoqkunallapaqmi”, nispa. Ichaqa yuyarisun kayta: Diosmi ñawpa tiempopi Bezaleel, Aholiab runakunata hina, mana yachasqanchista yachachiwasunman (Éx. 31:1-6; 11 paginapi dibujota qhaway).

¹³ Jehová Diosmi kallpachawanchis allin kaqta payman qonanchispaq (Prov. 3:27). Yupaychana wasita judío runakuna yapamanta hatarichishaqtinkun paykunata nirqan: “Imaynatachus kawsashasqaykichista  allinta qhawarikuychis”, nispa (Hag. 1:2-5). ¿Imaraykun chayta nirqan? Paykunaqa huk ruwaykunapi afanakuspan Diospaq llank’ayta qhepanchapusqaku. Ñoqanchispas kaykunatan tapukunanchis: “¿Diospa munaynintachu ñawpaqta ruwashani? ¿Kallpachakuymanchu kay tukukuy p’unchaykunapi tiempoyta t’aqaspa Diospa Gobiernonrayku astawan llank’anaypaq?”, nispa.

14, 15. a) ¿Imaynatan kallpachawanchis wakcha iñiqmasikunaq sacrificiokuna qosqanku? b) ¿Imatan ñoqanchispas ruwananchis?

¹⁴ Askha iñiqmasinchiskunan wakcha nacionkunapi tiyanku, imaymana sasachakuykunataqmi kanpas. Chay iñiqmasikunatan Diospa llaqtan necesitasqankuman hina yanapaykun (2 Cor. 8:14). Chaywanpas paykunaqa kallpachakunkun donacionninkuta qonankupaq. ¡Maytachá Diosqa kusikun wakchaña kashaspankupas tukuy sonqowan qosqankumanta! (2 Cor. 9:7.)

¹⁵ Haqay África ladopin wakin iñiqmasikuna nishu wakcha kanku. Chaywanpas huertankupi llank’asqankutan wakinta t’aqanku, chaywan Diospa Gobiernonpaq llank’ayta yanapakunankupaq. Chay iñiqmasikunaq tiyasqanku nacionllapitaqmi huk iñiqmasikuna yanapakuyta munarqanku Huñunakuna Wasi hatarichiypi. Ichaqa chay p’unchaykunallapitaqmi chakrankupi tarpunanku tupamurqan. ¿Imatan ruwarqanku? Paykunaqa yanapakuytapunin munarqanku, chaymi p’unchayta Huñunakuna Wasi ruwaypi yanapakuqku tutatataq chakrankupi tarpuqku. ¡May allinpunin chay sacrificiokuna qosqankuqa! Chaymi yuyarichiwanchis ñawpa Macedonia llaqtapi iñiqkunata. ‘Khuyay wakchaña’ kashaspapas, paykunapunin valekusparaq nirqanku hukkunata yanapay munasqankuta (2 Cor. 8:1-4). Ñoqanchispas ‘Diospa saminchawasqanchisman hinan’ tukuy sonqowan qonanchis (leey Deuteronomio 16:17).

16. ¿Imatan ruwananchis sacrificio qosqanchista Dios chaskiwananchispaq?

¹⁶ Ichaqa Diospaq llank’ananchisrayku sacrificiokunata qospaqa manan qonqananchischu familianchista. Ñawpa Israel runakuna hinan allinta qhawarikunanchis sacrificiokuna ruwasqanchis Diospa sonqonman chayaq kananpaq. Sichus hukkunata yanapananchisrayku familianchiswan Dios yupaychayta saqepusunman otaq paykunata mana uywasunmanchu chayqa, mana ‘kapuqninchistan’ Diosman qoshasunman (leey 2 Corintios 8:12). Hinaspapas kallpachakushanallanchismi Dioswan allinpi kanapaq (1 Cor. 9:26, 27). Diospa kamachikusqanman hina ima sacrificiotapas qosun chayqa, chaskiwasunmi kusisqataqmi kasunpas.

17, 18. a) ¿Imaynatan qhawarinchis Diospa Gobiernonrayku ancha chaniyoq sacrificiokuna ruwaq iñiqmasikunata? b) ¿Imapaqmi sapankanchis kallpachakunanchis?

¹⁷ Askha iñiqmasikunan tukuy kaqninkuwan Diospaq llank’ashanku, chay hinapin ‘hich’ana ofrenda’ hina kanku (Filip. 2:17, NM). ¡Chay ruwasqankutaqa ancha chaninpaqmi qhawarinchis! Hinaspapas anchatan agradecekunchis Diospa llaqtanpi llank’aykunata umalliqkunaq esposanta wawankunatapas sacrificiokuna ruwasqankumanta.

¹⁸ Imaymana ruwanan kashan Diospa Gobiernonrayku. Chayrayku Diospa yanapayninta mañakusun, kallpachakusuntaq astawan yanapakunanchispaq. Chayta ruwasun chayqa Diosmi saminchawasun, “qhepa tiempomantaq” aswan hatun saminchaykunata chaskisun (Mar. 10:28-30).