1. ¿Imakunatan wakin wayna-sipaskuna kusikuywan ruwashanku?

MANA hayk’aq rikukusqantan kay tiempopi millonninpi runakuna cheqaq religionman haykumushanku (Apo. 7:9, 10). Askha wayna-sipaskunan runamasinkuta yanapashanku Diosmanta yachaspa qespichisqa kanankupaq (Apo. 22:17). Wakin wayna-sipaskunan Bibliamanta runakunaman yachachispa yanapashanku sumaqta kawsanankupaq, wakintaq huk simikunapi rimaq runakunaman tukuy sonqowan predicashanku (Sal. 110:3, NM; Is. 52:7). Arí, Diospaq llank’ayqa ancha kusikuytan apamun. Wayna-sipaskuna, ¿imaynatan runakunata astawan yanapawaqchis?

2. ¿Imaynapin yachanchis wayna-sipaskunaman Jehová Dios hatun llank’aykuna qoy munasqanta? (Kay paginapi dibujota qhaway.)

² Kunan allinta decidikunki chayqa, qhepamanmi punkukuna hina kicharikunqa Diosta astawan servinaykipaq. Yuyaykusun Listra llaqtamanta Timoteo waynapi. Payqa allin yuyaywanmi decidikurqan, chaychá 20 watanpi hina kashaspa misionero kapurqan (Hech. 16:1-3). Yaqachus hina pisi killakuna qhepallaman, Pablo Timoteota kacharqan Tesalónica llaqtapi iñiq t’aqata kallpachananpaq. Chay mosoq iñiq t’aqatan apóstol Pablo saqepurqan hatun qatiykachay qallariqtin  (Hech. 17:5-15; 1 Tes. 3:1, 2, 6). ¡Maytachá Timoteoqa kusikurqan chay hatun llank’ayta chaskikuspa!

3. a) ¿Imata ruwanaykipaqmi astawanqa decidikunayki? b) ¿Hayk’aqmi chayta decidikuwaq?

³ Wayna-sipas kashaspan imachus ruwananchista decidinanchis. Ichaqa imamantapas astawanqa Jehová Dios serviytan decidikunanchis. Chhaynaqa, ¿hayk’aqmi chayta decidinayki? Diosmi nin: “Wayna-sipasllaraq kashaspa Kamaqniykimanta yuyarikuy”, nispa (Ecl. 12:1). ¿Imaynatan Diosta yuyarikuwaq? Tukuy sonqowan payta servispan (Deut. 10:12). Chayta decidikuymi aswan allinqa, chaymantan kanqa qhepaman imayna kanaykipas (Sal. 71:5).

4. ¿Imakunapi allinta decidisqaykin yanapasunki Diosta tukuy sonqowan servinaykipaq?

⁴ Chaymantapas decidinaykin kanqa casarakuyta munaspaqa piwan casarakuyta, kawsanaykipaq imapi llank’anaykitapas. Ichaqa ñawpaqtan decidikunayki kanqa tukuy sonqowanchus Diosta serviyta munanki icha manachus chayta (Deut. 30:19, 20). ¿Imarayku? Sichus casarakunaykipaq imapi llank’anaykipaqpas allinta decidinki chayqa, tukuy sonqowanmi Diosta servinki. Hinallataq Diosta tukuy sonqowan serviyta munanki chayqa, allintan decidinki piwan casarakuytapas imapi llank’aytapas (tupachiy Lucas 14:16-20). Chayrayku ñawpaqta decidiy aswan allin kaqta (Filip. 1:10).

5, 6. ¿Imaynapin yachanchis allinta decidisqanchis Diosta astawan servinapaq allinpuni kasqanta? (Qhaway “Huch’uyllaraq kashaspaymi huk ruwayta akllarqani” nisqa temata.)

⁵ Diosta servinaykipaq decidikunki chayqa kaytan tapukunayki: “¿Ima ruwanaytan Dios munan?”, nispa. Chay qhepamanmi decidinayki imaynata Diosta servinaykipaq. Japón nacionmanta Yuichiro iñiqmasin nirqan: “14 wataypi kashaqtiymi huk umalliwan predicaq lloqsirqani, hinan payqa repararqan mana tukuy sonqowanchu predicasqayta. Chaymi niwarqan: ‘Yuichiro, aswanpas wasiykiman kutipuy, hinaspa tiyaykuspa yuyaymanay Dios qanpaq tukuyta ruwasqanpi’, nispa. Chaytan ruwarqani. Ichaqa manan chay p’unchayllachu, aswanpas askha p’unchaykunan yuyaymanarqani mañakurqani ima. Hinan pisi-pisimanta yuyaykusqayta cambiaspa Diosta servispa kusikuyta tarirqani. Maytan kusikuq kani misionerokunaq experiencianta leespa, chaymi kallpachawarqan Diosta tukuy tiempoywan serviypi yuyaykunaypaq”, nispa.

⁶ Yuichiro nillantaq: “Qhepaman huk nacionpi Diosta servinayraykun decidikurqani inglés, simita estudianaypaq. Colegioyta tukuspaymi, precursor kanaypaq inglés simita yachachispa kuskan tiempollata llank’arqani. 20 wataypi kashaqtiymi mongol simita yacharqani, hinan chay rimaypi huch’uy t’aqata visitarqani. Iskay wata qhepamanmi, 2007 watapi Mongolia nacionta rirqani. Precursorkunawan predicaspan rikurqani askha runakuna Diosmanta yachay munasqankuta, chaymi decidikurqani chayman ripunaypaq. 2008 wata abril killamantapachan Mongolia nacionpi precursor hina Diosta servishani. Chaypi kawsayqa sasan, ichaqa askha runakunan allin willakuykunata sumaqta chaskikunku, paykunatan yanapashani Diosman asuykunankupaq. Manan pesapakunichu chayta ruwanaypaq decidikusqaymantaqa”, nispa.

7. a) ¿Imakunatan ñoqallanchismanta decidikunanchis? b) ¿Imatan yachanchis Moisesmanta?

⁷ Sapanka cristianokunan decidinanku kawsayninkuwan imata ruwanankupaqpas  (Jos. 24:15). Chaymi ñoqaykuqa mana niykikumanchu casarakunaykita, piwan casarakunaykita, imapi llank’anaykitapas. Wakinniykichisqa wakcha llaqtakunapin tiyankichis, wakintaq qhapaq llaqtakunapi. Sapankaykichismi hukniray yuyayniyoq, yachayniyoq, experienciayoq kankichis, manataqmi kaqllatachu ruwayta munankichis. Yaqapaschá Egiptopi hebreo wayna-sipaskuna hina tarikushankichis, Moisesqa qhapaqmi karqan, wakin wayna-sipaskunataq kamachikunalla karqanku (Éx. 1:13, 14; Hech. 7:21, 22). Qankuna hinan paykunapas tarikurqanku (Éx. 19:4-6). Sapankankun decidinanku karqan tukuy sonqowanchus Diosta servinqaku icha manachus chayta. Chaymi Moisesqa Diosta servinanpaq decidikurqan (leey Hebreos 11:24-27).

8. ¿Imakunan wayna-sipaskunata yanapanqa allinta decidinankupaq?

⁸ Jehová Diosmi yanapasunki allin yuyaywan imatapas decidinaykipaq. Payqa Bibliapi sumaq yachachikuykunatan qosunki imaynapichus tarikusqaykiman hina yanapanasuykipaq (Sal. 32:8). Chaymantapas iñiq tayta-mamayki, umallikuna iman yanapasunki chay yachachikuykunaman hina imatapas ruwanaykipaq (Prov. 1:8, 9). Qhawarisun Bibliapi kinsa yachachikuykunamanta, chaykunan yanapasunki allinta imatapas decidinaykipaq.

9. a) ¿Imaynatan Dios hatunchawanchis? b) ¿Imakunatan rikuchinqaku Diospa Gobiernonta ñawpaqta maskhaqkuna?

⁹ Diospa Gobiernonta chanin kaynintawan ñawpaqta maskhay (leey Mateo 6:19-21, 24-26, 31-34). Jehová Diosmi hatunchawanchis akllakuy atiyta qowaspanchis, chaymi mana nisunkichu tukuy tiempoykiwan predicanaykita. Ichaqa Jesusmi yachachiwarqanchis Diospa Gobiernonta ñawpaqta maskhanapaq. Chayta ruwanki chayqa, Dios munakusqaykitan rikuchinki hinallataq hukkunapi interesakusqaykita wiñay kawsay suyakuymanta agradecido kasqaykitapas. Chhaynaqa, ¿Diospa Gobiernonta chanin kaynintawan ñawpaqta maskhasqaykitachu rikuchinki, piwan casarakuyta imapi llank’anaykitapas decidikuspa?

10. a) ¿Ima ruwasqanmi Jesusta kusichirqan? b) ¿Ima ruwasqaykin qantapas kusichisunkiman?

¹⁰ Kusikuyta tariy hukkunata servispa (leey Hechos 20:20, 21, 24, 35). Jesusmi chay hatun yachachikuyta munakuywan yachachirqan. Pay kikinmi kusisqa karqan Taytanpa munayninta ruwaspa. Kusikurqanmi willasqanta llamp’u sonqo runakuna sumaqta chaskikusqankumantapas (Luc. 10:21; Juan 4:34). Qanpas kusikurqankichá runamasiykita yanapaspaqa. Sichus Jesuspa yachachisqanman hina decidinki chayqa, kusisqan kanki Jehová Diostapas kusichinkin (Prov. 27:11).

11. a) ¿Imaraykun Baruc mana kusisqachu Diosta servirqan? b) ¿Imanispan Dios Baructa yuyaycharqan?

¹¹ Diosta servispan astawanqa kusikunchis (Prov. 16:20). Jeremiaspa secretarion Barucpi yuyaykusun. Payqa manan kusisqachu Diosta servisharqan, chaymi Jehová Dios nirqan: “¿Qanqa allin kaqkunallatachu munanki? ¡Ama mañakuychu chaytaqa! Ñoqan kachamusaq hatun llakikunata llapa runa pataman, chaywanpas qanqa maytaña rinki chaypas kawsashaqllapunin ayqenki”, nispa (Jer. 45:3, 5). ¿Imata ruwaspan Baruc kusikuyta tarinman? ¿Allin kaqkunallata maskhaspachu icha Diosta servispa qespichisqa kaspachu? (Sant. 1:12.)

12. ¿Ima ruwasqanmantan Ramiro iñiqmasi anchata kusikun?

¹² Ramiro iñiqmasin kusisqa hukkunata yanapashan. Paymi nin: “Ñoqaqa wakcha  familiapin uywasqa karqani, Bolivia nacionpi kaq huch’uy llaqtachapi. Huk kutinmi kurak wawqey munachiwarqan universidadpi estudiachiwananpaq, chaytaqa may allinpaqchá hukkuna qhawarinkuman karqan. Ichaqa huk precursormi munachiwallarqantaq huk huch’uy llaqtachaman predicaq rinaykupaq. Chaymi chayllaraq bautizakurqani chaypas decidikurqani chay llaqtaman ripunaypaq. Chaypin chukchata rutuspa llank’arqani. Chaypiqa askha runakunan Bibliamanta estudiayta munarqanku. Chay qhepamanmi huk simipi iñiq t’aqa qallarirqan, chaypitaq yanapakurqani. 10 watañan tukuy tiempoywan chaypi yanapakushani. Manan imapas kusichiwanmanchu runakunata rimasqanku simipi yanapasqay hinaqa”, nispa.

13. ¿Imaraykun wayna-sipas kaspa tukuy atisqanchista Diosta serviyta atisunman?

¹³ Wayna-sipas kashaspa Diosta servispa kusikuy (leey Eclesiastés 12:1). Diosta astawan servinaykipaqqa manan allin llank’anataraqchu maskhanayki. Kunan wayna-sipas kasqayki tiempopin Diostaqa tukuy atisqaykita servinayki. Familiayoq kapuspa, onqorqospa, pisi kallpayoq kapuspaqa sasañan kanman. ¿Imakunatan Jehová Diospaq ruwawaq wayna-sipasllaraq kashaspa? Yaqapaschá precursor kawaq, huk simikunata yachaspa yanapakuwaq otaq iñiq t’aqaykipi astawan llank’awaq. Imaynataña Diosta serviyta munanki chaypas, huk llank’anatan necesitanki kawsanaykipaq. Chhaynaqa, ¿imapin llank’anki? ¿Imakunatan yachanayki kanqa imapipas llank’anaykipaq?

14. ¿Imamantan wayna-sipaskuna cuidakunanku llank’anata maskhaspa?

¹⁴ Ñawpaqkaq kinsa yachachikuykunan yanapasunkiman allin llank’anata  akllanaykipaq. Colegioykipi yuyaychaqkunan otaq gobiernoq churasqa oficinakunapin willasunkikuman ima llank’anakunan kan tiyasqayki llaqtapi otaq astakuy munasqayki llaqtapi. Chaykunapi yanapay chaskisqaykiqa allinpunin kanman, ichaqa cuidakunaykin. Diosta mana reqsiqkunaqa kay pachata munapayanaykipaq hinan imatapas munachisunkikuman (1 Juan 2:15-17). Sichus chaykunallapi yuyaykuwaq chayqa sonqoykin q’otusunkiman (leey Proverbios 14:15; Jer. 17:9).

15, 16. ¿Pikunan allinta yuyaychasunkikuman imapi llank’anaykipaqpas?

¹⁵ Imakunapichus llank’ay atisqaykita qhawarisqayki qhepamanqa, hukkunaq yuyaychaynintan necesitanki (Prov. 1:5). ¿Pikunan Bibliaq nisqanman hina yanapasunkikuman? Jehová Diostapas qantapas munakuq runakunan, paykunan kanman iñiq tayta-mamayki otaq iñiq t’aqapi umallikuna. Paykunan astawanqa yachanku imaynapi tarikusqaykita, ima ruway atisqaykita, sonqoykipi ima kasqantapas. Yaqapaschá paykunata uyarisqayki qhepaman huk hinata imatapas ruwanayki kanqa. Hinaspapas parlariwaqmi precursorkunawan watukuq umallikunawanpas, paykunatan tapuriwaq: “¿Imaraykun decidikurqanki tukuy tiempoykiwan Diosta servinaykipaq? ¿Imaraykun precursor kapurqanki? ¿Imaynatan qolqeta tarinki yanapachikunaykipaq? ¿Ima saminchaykunatan chaskirqanki?”, nispa (Prov. 15:22).

¹⁶ Kaypi yuyaykuy, precursor kayta munaspan estudioykita saqeyta munashanki chaypi manaña kallpaykita usuchinaykipaq. ¿Pin chhaynapi tarikuqtiyki allin yuyaywan yuyaychasunkiman? Qanta allinta reqsiqmi. Paymi sonqoykipi kasqanta yachaspa munakuywan reparachisunkiman colegiota tukuy allinniykipaq kasqanta. Chaymi yachachisunkiman qhepaman Diosta servispa ima sasachaykupi tarikuspapas mana pisipanaykipaq (Sal. 141:5; Prov. 6:6-10).

17. ¿Ima llank’aykunatan mana akllakunanchischu?

¹⁷ Llapa cristianokunapaqmi imaymana pruebakuna kan, chaykunan Diosmanta karunchawasunman (1 Cor. 15:33; Col. 2:8). Wakin llank’anakunan mayninqa imamanpas urmachiwasunman. Yaqapaschá reqsishanki mana allin llank’ana akllakusqanrayku ‘iñiyninpi waqllipuq’ cristianota (1 Tim. 1:19). Chayrayku allintapuni akllakuy imapi llank’anaykitapas, mana chayqa Diosmantan karunchasunkiman (Prov. 22:3).

18, 19. ¿Imatan huk wayna-sipas ruwanman Diosta manaraq serviyta munaqtin?

¹⁸ Sichus tukuy sonqoykiwan Diosta serviyta munashanki chayqa, kunanmantapachan tukuy atisqaykita ruwanayki. Diosta allinta servinaykipaq hinapuni imatapas decidiy (Sal. 148:12, 13).

¹⁹ Ichaqa, ¿imatan ruwawaq manaraq tukuy tiempoykiwanchu Diosta serviyta munashanki chay? Chhayna kaqtinqa ama pisi kallpayaspa kallpachakushallay iñiyniykipi wiñashanaykipaq. Apóstol Pablon Diospa saminchayninta chaskikunanpaq kallpachakusqanmanta rimasqan qhepaman nirqan: “Huk-hinataña yuyankichis chaypas, Diosmi chaytaqa sut’inchasunkichis. Chaywanpas, maykamañachus chayanchis chayman hinapuni purisunchis”, nispa (Filip. 3:15, 16). Ama hayk’aqpas qonqaychu Jehová Dios munakusqasuykita, yuyaymanaytaq yachaywan yuyaychasqasuykipi. Payqa yanapasunkimanmi wayna-sipas kasqayki tiempopi allintapuni decidinaykipaq.