1. ¿Imaynatan runakunata qhawarinanchis predicacionpi? (Kay paginapi fotota qhaway.)

FIYI nacionpin casarasqa iñiqmasikuna Jesuspa Wañupusqanta Yuyarina P’unchaypaq invitacionta rakisharqanku. Huk warmiwan parlashaqtinkun parayta qallarirqan. Hinan iñiqmasiqa paraguanta chay warmiman qorqan. ¡Maytan iñiqmasinchiskuna kusikurqanku chay warmita huñunakuypi rikuspa! Payqa manas yuyarisqachu iñiqmasikuna imamanta rimapayasqankuta. Ichaqa anchatas admirakusqa sumaqta tratasqankumanta, chaysi astawanqa invitasqankuman risqa. Chay iñiqmasikunaqa Jesuspa yuyaychasqanman hinan ruwarqanku.

2. a) ¿Imatan Jesús yuyaycharqan? b) ¿Imaynatan Jesuspa yuyaychasqanman hina ruwasunman?

² ¿Imatan Jesús yuyaycharqan? Paymi nirqan: “Imaynatachus runakunaq ruwanasuykichista munankichis, chhaynallatataq qankunapas paykunata ruwaychis”, nispa (Mat. 7:12). ¿Imaynatan chayman hina ruwasunman? Ñawpaqtaqa tapukunanchismi: “¿Imaynatan munayman runakuna  qhawariwanankuta?”, nispa. Chaymantataq runamasinchispa allinninpaq imatapas ruwananchis (1 Cor. 10:24).

3, 4. a) ¿Imaraykun Jesuspa yuyaychasqanman hina llapa runakunawan kawsana? b) ¿Imatan kay estudiopi yachasun?

³ Cristianokunaqa Jesuspa yuyaychasqanman hinan iñiqmasinchiskunawan kawsanchis. Chaywanpas Jesusqa huk runakunata enemigonchiskunatapas imayna qhawarinanchismantan rimasharqan (leey Lucas 6:27, 28, 31, 35). Jesuspa yuyaychasqanman hinataq enemigonchiskunatapas qhawarinanchis chayqa, astawanraqchá predicacionpi “wiñay kawsaypaq” hina kaq runakuna tarisqanchistaqa (Hech. 13:48).

⁴ Chaymi kay estudiopi kay tawa tapuykunaman kutichisun: ¿Pikunamanmi predicananchis? ¿Maypin predicananchis? ¿Ima ratopin aswan allin kanman predicananchispaq? ¿Imaynatan predicayta qallarisunman? Chaykunan yanapawasun runakunaq imayna sientekusqankuman hina predicanapaq (1 Cor. 9:19-23).

5. ¿Imakunatan tapukunanchis sapanka runawan parlarispa?

⁵ Runakunaqa sapankapas hukniraymi kanku, hukniray sasachakuyniyoq kawsayniyoq ima (2 Crón. 6:29). Chaymi allin willakuykunata runakunaman willaspaqa kaykunata tapukunanchis: “Sichus predicasqay runa kayman chayri, ¿imayna qhawariwanankutan munayman? ¿Munaymanchu mana reqsiwashaspa mana allinkunata ñoqamanta yuyaykunankuta? Icha, ¿allinta reqsiwanankutachu munayman?”, nispa. Kaykunata tapukuymi yuyarichiwasun sapanka runapas hukniray kasqanta.

6, 7. ¿Imatan ruwananchis pipas mana allinta kutichiwaqtinchis?

⁶ Cristianokunaqa yachanchismi llapa runakunatapas ‘ancha sumaqtapuni’ rimapayananchis kasqanta (Col. 4:6). Ichaqa pantaq runa kasqanchisraykun otaq imamantapas phiñasqa kasqanchisraykun mayninpi k’araqta rimarqosunman (Sant. 3:2). Chay kaqtin, ¿munasunmanchu “k’araq simi runa” nispa pipas niwananchista? Manapunichá. Chaymi pipas millayta kutichiwaqtinchisqa, mana ninanchischu “mana respetoyoq runa” nispaqa. Aswanpas entiendenanchismi imaynapi tarikushasqanta.

⁷ Predicashaqtinchis millayta pipas kutichiwaqtinchisqa, entiendenanchismi imarayku chhayna kashasqanta. Yaqapaschá chay runaq llank’ananpi otaq estudiasqanpi sasachakuykuna kashan otaq sinchi onqosqa kashan. Ichaqa llamp’u sonqowan Jehová Diospa testigonkuna kutichisqankuraykun, ñawpaqpi phiñasqa tarikuq runakunaqa allinta uyarikapurqanku (Prov. 15:1; 1 Ped. 3:15).

8. ¿Imaraykun ‘lliw runaman’ allin willakuykunata willananchis?

⁸ Testigokunaqa pachantinpi runakunamanmi predicashanchis. Kay qhepa watakunapin Qhawaq revistapi askha kutipi lloqsimurqan “Bibliaq yanapayninwan cambianku” nisqa tema. Chaypin askha runakuna willakushanku Bibliamanta yachaspa cambiapusqankuta. Wakinmi karqanku machaq, suwa, drogakuqkuna. Wakintaq politicapi puriqkuna, religionpi umallikuna, llank’anallaman qokuqkuna, qhelli ruwaykunapi puriqkuna ima. Ichaqa allin willakuykunata uyarispan, huk Testigowan Bibliata estudiayta qallarirqanku. Chaymi yanaparqan ñawpa kawsayninkuta saqepuspa Jehová Diospa testigon  kapunankupaq. Chaymi mana hayk’aqpas yuyaykunanchischu “kay runaqa manan uyarikunmanchu” nispaqa (leey 1 Corintios 6:9-11). Aswanpas yuyaykunanchismi allin willakuykunaqa ‘lliw runakunaq’ sonqonman chayananpaq hina kasqanta (1 Cor. 9:22).

9. ¿Imaraykun hukkunaq wasinta respetananchis?

⁹ Runakunawanqa wasinku punkupin astawanqa Bibliamanta parlarinchis (Mat. 10:11-13). Wasinchispiqa mana manchakuspan thakpi kawsayta munanchis, chaymi hukkunaq respetanankuta munanchis. Chay hinatan predicasqanchis runakunapas wasinku respetananchista munanku. Ichaqa, ¿chaytachu ruwashanchis? (Hech. 5:42.)

10. ¿Imakunamantan cuidakunanchis wasin-wasinta predicashaspa?

¹⁰ Tukukuy p’unchaykunapi kawsasqanchisraykun imaymana millay ruwaykuna kashan, chaymi runakunaqa wasi punkunkupi pitapas rikuspaqa makilla qhawanku (2 Tim. 3:1-5). Chayraykun mana imatapas ruwananchischu wasiyoqpa mana allinta yuyaykunanpaq hinaqa. Yaqapaschá punkuta takaqtiyki mana pipas lloqsimuqtin ventananta qhawayta munawaq otaq wasita muyupayawaq pitapas tariyta munaspa. Ichaqa, ¿ima ninkumanmi runakuna chayta rikuspa? ¿Allinpaqchu qhawarinkuman? Ñoqanchisqa munanchismi kusikunapaq willakuykuna apasqanchista llapa runakuna yachananta. Chaymi tukuy atisqanchista ruwanchis llapa wasiyoqkunaman willananchispaq (Hech. 10:42; Rom. 1:14, 15). Ichaqa manan imatapas ruwananchischu mana allinta ñoqanchismanta yuyaykunankupaq hinaqa. Apóstol Pablon nirqan: “Manan pimanpas ima misk’anatapas churaykuchu, llank’ayniykumanta ama p’enqayta rimanankupaq”, nispa (2 Cor. 6:3). Hukkunaq wasinkuta respetaqtinchisqa yaqapaschá hukkunapas uyarikuyta munanqaku (leey 1 Pedro 2:12).

11. ¿Imaraykun munanchis visitamuwaqninchis runa imarayku hamusqanta usqhaylla niwananchista?

¹¹ Llapanchispas imaymana ruwanayoqmi kanchis, tukuy ruwananchispaqtaq tiemponchista allinta t’aqanchis (Efes. 5:16; Filip. 1:10). Chaymi mayninqa phiñakusunman ruwananchiskunata makilla ruwashaqtinchis pipas qonqaylla tatichiwaqtinchis. Llapanchispas munasunmanmi visitamuwaqninchis runa imarayku hamusqanta usqhaylla niwananchista. Chhaynaqa, ¿imatan ñoqanchispas ruwananchis runakunata visitaspa?

12. ¿Imatan ruwananchis aswan askha runakunaman predicanapaq?

¹² Ñawpaqtaqa qhawarinanchismi ima ratopi visitanapaq aswan allin kasqanta. Chaypaqmi kaykunata tapukunanchis: “¿Ima horatan runakuna wasinkupi tarikunku? ¿Ima ratopin aswan qasi kashanku?”, nispa. Chayta qhawarisqanchisman hinan tiemponchista t’aqananchis chay horapi visitananchispaq. Wakin llaqtakunapiqa tardeyaykuytan astawanqa runakuna wasinkupi tarikunku. Chhayna kaqtinqa, yaqapaschá tiemponchista t’aqasunman tardenkunatapas predicaq lloqsinanchispaq (leey 1 Corintios 10:24). Sichus runakunata yanapananchispaq kallpachakusun chayqa, Jehová Diosmi tukuy ruwasqanchispi yanapawasun.

13. ¿Imatan ruwananchis runakuna respetasqanchista rikuchinapaq?

 ¹³ ¿Imatawanmi ruwasunman? Sichus pipas makilla uyariwasunman chayqa, manan unaychu paywan parlananchis. Yaqapaschá usqhaylla imatapas ruwanan kashan. Sichus “ratollan visitamushayki” nispa nisqanchisrayku uyariwasun chayqa, ratolla rimaspan ripunanchis (Mat. 5:37). Ichaqa manaraq ripushaspan nisunman: “¿Hayk’aqmi kutimuyman?”, nispa. Otaq huk iñiqmasinchiskuna hina nisunman: “Astawanmi qanwan parlariyta munayman. ¿Waqyamuykimanchu telefonopi icha mensajetachu qelqamuykiman manaraq hamushaspa?”, nispa. Pablon nirqan: “Manan ñoqaq allinnillaytachu maskhani, aswanpas askhaq allinnintan maskhani, paykuna qespichisqa kanankupaq”, nispa (1 Cor. 10:33). Pablo hinan ñoqanchispas runakunaq allinninta maskhaspa tiemponkuq kasqanman hina yanapananchis.

14-16. a) ¿Imaraykun runakunaman willananchis imarayku visitasqanchista? b) ¿Imaynatan huk iñiqmasi runakunawan rimayta qallarin?

¹⁴ Kaypi yuyaykusun. Huk runan punkuykita takaykamuspa nisunkipacha: “¿Ima mikhunatan munawaq?”, nispa. Sonqoykipiqa ninkichá: “¿Pitaq kay runari? ¿Imatataq munanri?”, nispa. Hinan chay runawan pisita parlarispa wasiykiman haykupunki. Kunanqa kaypiñataq  yuyaykusun. Wasiykita takaykamuq runan willasunki pi kasqanta, imapi llank’asqanta. Chayman hinan payqa willasunki qhali kanapaq ima mikhuykuna allin kasqanta. Chay runataqa makillachá uyarinki. Arí, llapallanchismi munanchis mana reqsisqanchis runakuna respetowan rimapayawananchista imarayku hamusqanta willawananchistapas. Ñoqanchispas chaytan ruwananchis runakunaman predicaspa.

¹⁵ Wakin llaqtakunapi runakunaqa ñawpaqtan yachayta munanku imarayku visitashasqanchista. Ichaqa, wasiyoqman imatapas willayta munasqanchisraykun pi kasqanchista mana willaspa tapusunmanpacha: “Kay pachapi tukuy sasachakuykuna kasqanmanta, ¿mayqentan chinkananta munawaq?”, nispa. Chayta qonqaylla tapusunman chayqa, yaqapaschá sonqonpi ninqa: “¿Pitaq kay runari? ¿Imatataq munanri chaytaq kaykunata tapuwashan?”, nispa. Chaykuna mana kananpaqmi allinta yuyaykuspa rimayta qallarinanchis (Filip. 2:3, 4). ¿Imaynatan chayta ruwasunman?

¹⁶ Qhawarisun imaynatan iñiq t’aqakunata watukuq umalli runakunawan rimayta qallarin chayta. Payqa napaykusqan qhepamansi willan pi kasqanta, chaymanñas ¿Hayk’aqllapas kaykunata tapukurankichu? nisqa tratadota qospa nin: “Kay qelqatan llapa runakunaman saqemushayku. Kaypin soqta tapuykunata kutichishan. Qanmanpas saqesqayki”, nispa. Chay hinata niqtinsi yaqa llapa runakuna uyarikunku. Chay qhepamansi tapun: “Kaykunamanta, ¿mayqenkaqtan tapukurqanki?”, nispa. Chaysi akllakusqanman hina, Bibliaq yachachisqanta chay qelqapi rikuchin. Pitapas manchapakuqta hina qhawarin chayqa, pay kikinsi huk tapuyta akllaspa chaymanta parlarin. Ñoqanchispas chay iñiqmasi hinan predicayta qallarisunman otaq hukniraymantapas. Wakin llaqtakunapi runakunaqa costumbrenkuman hinan rimapayanata munanqaku. Imaynaña kaqtinpas, Diosmanta willasqanchista runakuna uyarikunankupaqqa paykunaq allinninta qhawarispan rimananchis.

17. ¿Imaynatan runakunata qhawarinanchis?

¹⁷ Kay estudiopi yachasqanchis hina, Jesuspa yuyaychasqanman hina predicanapaqqa sapanka runatan imayna kasqanman hina qhawarinanchis. Respetowanmi paykunatapas wasinkutapas qhawarinanchis. Wasinkupi kasqanku ratopin predicananchis, tiemponkuq kasqanman hinataq. Hinaspapas rimayta qallarinapaqqa costumbrenkuman hinan ruwananchis.

18. ¿Imaraykun Jesuspa yuyaychasqanman hina allin willakuykunata willashanallanchis?

¹⁸ Arí, Jesuspa yuyaychasqanman hinan runakunapi interesakunanchis sumaq sonqowantaq qhawarinanchis. Chayta ruwaspan hanaq pacha Taytanchista hatunchasun (Mat. 5:16). Sichus chhaynata runakunata qhawarisun chayqa, aswan askha runakunan allin willakuykunata uyarikunqaku (1 Tim. 4:16). Chaywanpas manaña wakin runakuna uyariwasunmanchu chaypas, kusisqan kasun Diospa kamachiwasqanchista hunt’aspa (2 Tim. 4:5). Apóstol Pablon nirqan: “Tukuy chaykunataqa Cristomanta allin willakuykunaraykun ruwani, chay willakuypa saminchanwan saminchasqa kanaypaq”, nispa (1 Cor. 9:23). Ñoqanchispas Jesuspa yuyaychasqanman hinan allin willakuykunata willashanallanchis.