¿Leerqankichu kay killakunapi chayamuq Qhawaq revistakunata? Chhayna kaqtinqa, ¿kutichiwaqchu kay tapuykunata?

14 nisán p’unchaypi, ¿ima horasta hinan uywa nak’akunan karqan?

Éx. 12:6 textopi nisqan hina, ovejataqa “rasphiyaykuyta” hinan nak’ananku karqan, inti haykuy qhepallata (15/12, 18, 19 paginakuna).

¿Ima yachachikuykunan wayna-sipaskunata yanapanqa allinta decidinankupaq?

1) Diospa Gobiernonta chanin kaynintawan ñawpaqta maskhay (Mat. 6:19-34). 2) Hukkunata servispa kusikuyta tariy (Hech. 20:35). 3) Wayna-sipas kashaspa Diosta servispa kusikuy (Ecl. 12:1) (15/1, 19, 20 paginakuna).

¿Hayk’aqmi ‘Cordero casarakunqa’? (Apo. 19:7.)

Llapa pantasqa religionkunata chinkachispa, Saqraq kamachisqan millay pachatapas Armagedonpi chinkachisqan qhepamanmi casarakunqa (15/2, 10 página).

¿Imaraykun Jesuspa tiemponpi judío runakuna ‘makillaña suyasharqanku’ Mesiaspa chayamunanta? (Luc. 3:15.)

Jesuspa tiemponpi judío runakunaqa manan allintachu entienderqanku Mesiaspa chayamunanmanta Danielpa willasqan profeciata (Dan. 9:24-27). Ichaqa uyarirqankuchá campopi uywankuta michiqkunaman Jesuspa nacesqanmanta angelpa willasqanta. Hinallataq uyarirqankuchá yupaychana wasiman Jesusta apaqtinku, profetiza Ana Jesusta rikuspa nisqanta. Chaymantapas Jerusalén llaqtamanmi chayamurqanku ch’aska qhawaypi yachaysapa runakuna, ‘judío runakunaq reynin naceqta’ maskhaspa (Mat. 2:1, 2). Qhepamantaq Bautizaq Juan willarqan pisi tiempollamanta Mesías chayamunanta (15/2, 26, 27 paginakuna).

¿Hunt’ashankichu arí nisqaykiwan? (2 Cor. 1:18.)

Mayninpiqa yaqapaschá qonqaylla imapas kaqtin compromiso ruwasqanchista mana hunt’ayta atisunchu. Chaywanpas imapaqpas comprometekuspa otaq piwanpas compromisota ruwaspaqa, kallpachakunanchismi chayta hunt’ananchispaq (15/3, 32 página).

¿Imatan ruwananchis qhelli ruwaykuna qhawaymanta karunchakunanchispaq?

Kaykunata: 1) Qhelli ruwaykuna rikhurimuqtinqa huk ladomanmi qhawarina. 2) Allin kaqkunapin yuyaymanananchis, Diosmantataq mañakunanchis. 3) Manan qhawanachu peliculapi otaq internetpi qhelli ruwaykuna kaqtinqa (1/5, 10-12 paginakuna).

¿Ima sasachakuykunan kan qosapas otaq esposapas qolqe ganananrayku karupi kaqtin?

Qosapas otaq esposapas huk nacionman llank’aq riqtinqa, wawakunan sinchi llakisqa kanku, tayta-mamankupaqpas phiñakunku. Hinaspapas qosapas esposapas qhelli huchakunapin urmankuman (15/4, 19, 20 paginakuna).

¿Ima tawa tapuykunapin yuyaymanananchis predicananchispaq?

¿Pikunamanmi predicananchis? ¿Maypin predicananchis? ¿Ima ratopin aswan allin kanman predicanapaq? ¿Imaynatan predicayta qallarisunman? (15/5, 12-15 paginakuna.)