1. ¿Imaynapin Diospa llaqtanmanta wakin runakuna Dios contra hatarirqanku? (Kay paginapi dibujota qhaway.)

ISRAEL llaqtaq uma sacerdoten Aaronmi, Diosta yupaychana karpa hawapi sayasharqan incienso q’apachinantin. Chayllapitaqmi kasharqanku Corepas 250 qharikunapas incienso q’apachinantinkama (Núm. 16:16-18). Llapankupas Diosta sonqomanta yupaychaq hinapaqmi qhawarikurqanku. Ichaqa Corepas paywan kaq runakunapas hatunchakuspan sacerdote kayta munarqanku (Núm. 16:1-11). Paykunaqa incienso q’apachisqankuta Jehová Dios chaskinanpaqmi yuyaykurqanku. Ichaqa chay ruwasqankuwanmi Dios contra hatarisharqanku. Jehová Diosqa sonqokuna t’aqwiq kasqanraykun rikusharqan iskay uyakuna kasqankuta, hatunchakunankurayku chaykuna ruwasqankutapas (Jer. 17:10).

2. a) ¿Imatan Moisés nirqan? b) ¿Imaynatan Moisespa nisqan hunt’akurqan?

² Ñawpaq p’unchayllatan Moisesqa nirqan: “Paqarin tutamantan Señor Diosqa sut’inchanqa pichus paypa akllakusqanpas paypaq t’aqasqa kaqpas kasqanta”, nispa (Núm. 16:5). ¿Imaynatan chayta Dios sut’incharqan? Coreta  paywan huñukuq 250 qharikunatawan wañuchispan, chaytan ruwarqan hanaq pachamanta ninata kachaykamuspa (Núm. 16:35; 26:10). Aarontan ichaqa Jehová Dios mana wañuchirqanchu, paypa churasqan uma sacerdote kasqanrayku, sonqomanta payta yupaychaq kasqanrayku ima (leey 1 Corintios 8:3).

3. a) ¿Iman pasasharqan Pabloq tiemponpi iñiq t’aqakunapi? b) ¿Imatan yachasunman Moisespa tiemponpi pasasqanmanta?

³ 1.500 watakuna qhepatan, Pabloq tiemponpi chhaynallapitaq iñiq t’aqakuna tarikurqan. Wakin cristianokunan pantasqa yachachikuykunata yachachisharqanku, chaywanpas kaqllan iñiqkunawan huñukusharqanku. Paykunaqa oveja hinan qhawarikurqanku ichaqa yarqasqa lobokuna hinan karqanku, ‘chay hinapin wakinkunaq iñiynintapas waqllichirqanku’ (2 Tim. 2:16-18). Jehová Diosmi ichaqa chaykunata rikusharqan. Chaytan Pabloqa allinta yacharqan ñawpa qelqakunapi leesqanrayku, chaypichá leerqan imaynata Jehová Dios Coreta qatikuqninkunatapas wañuchisqanta. Chaykunatan Timoteoman qelqarqan. ¿Imatan chaykunamanta yachasunman?

4. a) ¿Imatan Pablo sut’ita yacharqan? b) ¿Ima nirqanmi Pablo Timoteota?

⁴ Jehová Diosqa reqsinmi tukuy sonqowan yupaychaqninkunata, reqsillantaqmi pikunachus payta mana yupaychaqkunatapas. Chaytan Pabloqa sut’ita yacharqan. Chaychá Timoteomanqa chaykunata qelqarqan. Dios contra hatariqkuna iñiqkunata waqllichishasqanta qelqasqan qhepamanmi Timoteota nirqan: “Diospa teqsi churasqanmi ichaqa mana kuyuriq sayashan, chay teqsipin kay hina qelqasqa kashan: ‘Señorqa reqsinmi paypa kaqkunataqa’, nispa. Kashallantaqmi: ‘Señortaqa reqsinin’ niqkuna mana chanin-kaymanta t’aqakuchun, nisqapas”, nispa (2 Tim. 2:19).

5, 6. a) ¿Hayk’a kutitan Bibliapi rikhurin “Diospa teqsi churasqanmi ichaqa mana kuyuriq sayashan” nisqa? b) ¿Imaynatan Timoteota yanaparqan chaykunata Pabloq nisqan?

⁵ Bibliapi “teqsi” nispaqa kaykunamantan  mayninpi nin: Jerusalén llaqta Israel nacionpa hatun llaqtan kasqanmanta, Jesús rey kaspa imakuna ruwananmanta ima (Sal. 87:1, 2; 1 Cor. 3:11; 1 Ped. 2:6). Ichaqa huk kutillatan Bibliapi nikun “Diospa teqsi churasqanmi ichaqa mana kuyuriq sayashan” nispa. ¿Imakunamantan Pablo rimasharqan chay simikunata qelqaspa?

⁶ Chay simikunatan Pablo qelqarqan paypa tiemponpi pasashasqanta Moisespa tiemponpi pasasqanwan tupanachispa (Núm. 16:5). Chay hinapin Pabloqa Timoteota yuyarichisharqan imatachus Jehová Dios pay contra sayariqkunawan ruwananta. Diosqa manan hinallatachu chay hina runakunataqa qhawanqa. Manataqmi chay runakunaqa Diospa yuyaykusqantaqa qolluchinkumanchu. Chaykunachá Timoteotaqa yanaparqan Jehová Diospi confiananpaq.

7. ¿Imanaqtinmi mana iskayananchischu Jehová Diosqa chanintapuni imatapas ruwananmanta?

⁷ Diospa kamachikuyninkunaqa manan hayk’aqpas cambianchu. Salmo 33:11 texton nin: “Señor Diospa yuyaykusqankunan ichaqa wiñay-wiñaypaq kashallanqapuni, sonqonpi yuyaykusqankunan sayashallanqapuni”, nispa. Huk textokunan nillantaq Diospa gobiernon, munakuynin, chanin kaynin, hunt’aq kayninpas mana tukukuq kasqanta (Éx. 15:18; Sal. 106:1; 112:9; 117:2). Malaquías 3:6 texton nin: “Ñoqaqa Señor Diosmi kani, kaqllapunin kashani”, nispa. Santiago 1:17 texton nillantaq: “Payqa manan cambianchu, manataqmi llanthu hinachu”, nispa.

8, 9. ¿Imatan Pabloq nisqanmanta yachanchis?

⁸ Ñawpa tiempopiqa wasiq teqsinpin qelqaqku dueñonpa sutinta otaq wasi ruwaqpa sutinta. Chayta qhawarispachá Pabloqa qelqarqan 2 Timoteo 2:19 textopi simikunata. * ‘Diospa teqsi churasqanpin’ iskay willakuykuna qelqasqa karqan. Hukninmi nirqan: “Señorqa reqsinmi paypa kaqkunataqa”, nispa. Huk kaqtaq nirqan: “‘Señortaqa reqsinin’ niqkuna mana chanin-kaymanta t’aqakuchun”, nispa. Chaykunan yuyarichiwanchis Números 16:5 (leey) textopi leesqanchista.

⁹ ¿Imatan Pabloq nisqanmanta yachanchis? Kaykunatan: 1) Jehová Diosqa hunt’aq sonqokunatan munakun, 2) Jehová Diosqa mana chanin kaqkunatan cheqnikun. Chay iskay willakuykunapin Jehová Diospa kamachikuyninkuna saphichasqa kashan. Ichaqa, ¿imaynatan chaykuna tupan Dios contra hatariqkunawan?

10. ¿Imatan wakin cristianokuna ninkuman karqan Dios contra hatariqkunaq ruwasqanta rikuspa?

¹⁰ Timoteopas huk hunt’aq sonqo cristianokunapas llakisqachá kasharqanku Dios contra hatariqkunaq ruwasqankuwan. Chaymi wakin cristianokunaqa  ninkuman karqan: “¿Imanaqtinmi Dios contra hatariqkuna Diospa llaqtanpi kashallanku? ¿Manachu Dios sut’ita reparan pikuna hunt’aq sonqo kasqanta pikunataq mana chayta?”, nispa (Hech. 20:29, 30).

11, 12. ¿Imaynatan Pabloq cartan Timoteota kallpacharqan?

¹¹ Timoteotaqa kallpacharqanchá Pabloq cartankuna. Chaywanchá payqa yuyarirqan imaynata Diosqa Coretapas qatikuqninkunatapas wañuchisqanta, Aaronta ichaqa allinpaq qhawarisqanta. Chaywanmi Pabloqa Timoteota nisharqan Jehová Diosqa munakuqninkunata reqsisqanta, imayna ñawpa tiempopipas ruwarqan hinata.

¹² Jehová Diosqa manan hayk’aqpas cambianchu, chaymi payqa confianapaq hinapuni. Hinaspapas Diosqa mana chanin kaqtan cheqnikun, tiempollanpitaqmi pay contra hatariqkunata cuentata mañanqa. Pablon Timoteota kallpacharqan mana chanin kaqkunamanta t’aqakunanpaq. Chaytan Timoteoqa ruwanan karqan Diospa sutinta apasqanrayku. *

13. ¿Imapin llapanchispas confiananchis?

¹³ Pabloq qelqasqanqa ñoqanchistapas kallpachawanchismi. ¿Imaynapi? Hunt’aq sonqo kasqanchista Dios allinpaq qhawarisqanmi kallpachawanchis. Biblian nin: “Señor Diosqa kay pachantintan qhawashan tukuy sonqo payta serviqkunarayku atiyninta rikuchinanpaq”, nispa (2 Crón. 16:9). Diosqa manan qonqanqachu hunt’aq sonqo kananchispaq kallpachakusqanchistaqa, chaypin llapanchispas confiananchis (1 Cor. 15:58; 1 Tim. 1:5).

14. ¿Imayna runakunatan Dios cheqnikun?

¹⁴ Hinaspapas Diosqa iskay uyakunatan cheqnikun, chayta yachaymi kallpachawallanchistaq. Sonqokunata t’aqwiq kasqanraykun yachan pikunas hunt’aq sonqo kanku pikunas mana chayta. Chaymi cheqnikun pakallapi huchata ruwashaspa Diosta yupaychaq hina qhawarichikuqkunata (Prov. 3:32). Chay runakunaqa engañankumanmi runamasinkuta, Diostan ichaqa mana engañayta atinkumanchu. Biblian nin: “Huchankunata pakaykuqqa manan allinyanqachu, huchankunata willakuspa saqepuqmi ichaqa khuyapayasqa kanqa”, nispa (Prov. 28:13; leey 1 Timoteo 5:24; Hebreos 4:13).

15. ¿Imaraykun iñiqmasinchiskunamanta mana iskayashanachu?

¹⁵ Diospa llaqtanpi kaqkunaqa Diostan tukuy sonqonkuwan munakunku. Chaymi mana yuyaykullanchispaschu yanqalla pipas Diosta yupaychashasqanta. Ichaqa kanmanmi chay hina  runakuna, imaynan karqan Moisespa tiemponpipas Pabloq tiemponpipas hina (2 Tim. 3:1, 5). Ichaqa manan chayraykuchu sapanka iñiqmasimanta iskayashananchis (leey Romanos 14:10-12; 1 Corintios 13:7). Ima hawallapas iñiqmasinchiskunamanta iskayasunman chayqa, manan allinchu iñiyninchispaq kanman.

16. a) ¿Imatan ruwananchis imayna kawsashasqanchista yachanapaq? b) ¿Imatan yachanchis “ Qankuna kikiykichista t’aqwikuychis” nisqa recuadromanta?

¹⁶ Pantaq runakunataq kanchis chayqa mayninpin mana reparakusunmanchu hawa sonqolla Diosta yupaychashasqanchista (Heb. 3:12, 13). Chaymi sapankanchis allinta t’aqwikunanchis imayna kawsashasqanchista (Gál. 6:4). Chaypaqmi kaykunata tapukusunman: “¿Imaraykun Diosta yupaychashani? ¿Munakusqayraykuchu, icha paraisopi sumaq kawsayta chaskinayraykullachu?”, nispa (Apo. 4:11). Diostaqa manapunin hawa sonqollaqa yupaychasunmanchu, sichus chayta sonqonchispi reparakusun chayqa, usqhayllan cambiananchis.

17, 18. ¿Imaraykun hunt’aq sonqowan Diosta yupaychananchis?

¹⁷ Hunt’aq sonqowan Diosta yupaychaspaqa imaymana bendicionkunatan chaskinchis. Salmo 32:2 texton nin: “Kusisamiyoqmi Señor Diospa mana huchachasqan runaqa, kusisamiyoqmi mana q’otuq runaqa”, nispa. Arí, sonqonchismanta tukuy mana allinkunata horqonchis chayqa kusisqan kanchis, hinaspapas wiñaypaqmi kusisqa kasun.

¹⁸ Tiempollanpin Jehová Diosqa mana allin ruwaqkunata iskay uyakunatapas  sut’iman horqonqa. Chhaynapin sut’ita reparakunqa “allin runaq millay runaq imaynachus kasqanta, pichus [Diosta] serviq, pitaqchus [Diosta] mana serviq kasqantapas” (Mal. 3:18). Chaykamaqa kusisqan kashananchis 1 Pedro 3:12 textoq nisqanta yachaspa. Chaypin nin: “Señorqa chanin runakunatan qhawashan, mañakusqankutapas makillan uyarishan”, nispa.