1, 2. a) ¿Ima ruwananpaqmi Jehová Dios Moisesta kamachirqan? b) ¿Imatan Jehová Dios Moisesman prometerqan?

SICHUS Diospa llaqtanrayku sinchi autoridadniyoq runawan rimaq rinayki kanman chayri, ¿imaynan sientekuwaq? Yaqapaschá manchasqa, mana rimay atinaykipaq hina qhawarikuwaq. Chhaynapi tarikuspa, ¿imatan ruwawaq mana manchakuspa Diosmanta willanaykipaq?

² Moisesmi chay hinapi tarikurqan. Payqa kay pachantin qharikunamantapas “aswan llamp’u sonqon karqan” (Núm. 12:3). Paytan Jehová Diosqa kacharqan Egipto reywan parlamunanpaq. Chaypin Jehová Diosqa faraonta kamachisharqan Israel llaqtanta kacharinanpaq. Faraonqa sinchi hatunchakuq k’araq sonqon karqan (Éx. 5:1, 2). Chaychá Moisesqa Jehová Diosta tapurqan: “¿Pitaq ñoqari kani rey Faraonman rispa Israel runakunata Egipto suyumanta horqomunaypaq?”, nispa. Payqa manan faraonwan rimayta atinanpaq hinachu qhawarikurqan. Chaymi Diosqa prometerqan: “Qanwanmi ñoqa kasaq”, nispa (Éx. 3:9-12).

3, 4. a) ¿Imamantan Moisés manchakurqan? b) ¿Imapi tarikuspan Moisés hina manchakusunman?

³ ¿Imamantan Moisés manchakurqan? Faraonpa mana  uyarinanmantan, Diospa kachamusqan kasqanta llaqtamasinkuna mana creenankumanta iman. Chaymi Jehová Diosta nirqan: “Paykunari creewankumanchu, simiytapas uyariwankumanchu, aswanpas niwanqakuchá: Manan Señor Diosqa rikhurirqasunkichu”, nispa (Éx. 3:15-18; 4:1).

⁴ Ñoqanchisqa manapaschá sinchi autoridadniyoq runawanchu rimasun. Ichaqa, yaqapaschá Diosmanta gobiernonmantapas runakunaman willayta manchakunchis. Chay hinapi tarikuqtinchis, ¿iman yanapawasunman? Moisesman Jehová Diospa prometesqanmi, chay qhepaman sucedesqankuna iman.

5. a) ¿Imatan Jehová Dios Moisesman qorqan? (9 paginapi dibujota qhaway.) b) ¿Imaynapin Moisés kallpata hap’irqan?

⁵ Moisesmi mana kasunankumanta manchasqa kasharqan, chaytan Jehová Diosman willarqan. Chaymi Jehová Diosqa yanaparqan kamachisqanta hunt’ananpaq. Biblian nin Éxodo 4:2-5 textopi: “Señor Diostaq payta nirqan: ¿Imatan makiykipi hap’ishanki? nispa. Paytaq: Tawnatan, nirqan. Señor Diostaq kamachirqan: Pampaman chayta chanqay, nispa. Hinan Moisesqa chayta pampaman chanqarqan, hinaqtinmi tawnaqa mach’aqwayman tukurqan. Moisestaq mach’aqwaymanta ayqerirqan. Chaymi Señor Diosqa Moisesta nirqan: Chupanmanta hap’iy, nispa. Chupanmanta hap’iqtintaq makinpi tawnaman tukurqan. Nillarqantaq: Chaywanmi creenqaku [...] ñoqa Señor Diosqa qanman rikhurisqayta”, nispa. Diospa atiyninwanmi chay tawnaqa mach’aqwayman tukurqan. Chay milagrowanmi Moisesqa rikuchinan karqan Diospa akllasqan kasqanta, paypa yanapasqan kasqantawan. Diosmi nirqan: “Kay tawnatan apanki, kaywanmi musphanakunata ruwanki”, nispa (Éx. 4:17). Chaymi Moisesqa kallpata hap’irqan faraonwanpas llaqtamasinkunawanpas rimananpaq (Éx. 4:29-31; 7:8-13).

6. a) ¿Imatan predicaspa makinchispi hap’inanchis, imarayku? b) ¿Imaraykun Pablo nirqan “Diospa siminqa kawsaqmi, atiyniyoqmi” nispa?

 ⁶ ¿Imatan ñoqanchispas makinchispi hap’inchis runakunaman predicaspa? Bibliatan, listotaqmi kashanchis chaywan predicananchispaq. Wakinqa allin librota hinallan Bibliata qhawarinku. Ichaqa manan chayllachu aswanpas Diospa siminmi, chaywanmi payqa rimapayawanchis (2 Ped. 1:21). Chaypin tarikun Diospa promesankuna imakunatachus Diospa gobiernon ruwananpas. Chaymi apóstol Pabloqa nirqan: “Diospa siminqa kawsaqmi, atiyniyoqmi”, nispa (leey Hebreos 4:12). ¿Imaraykun nirqan “Diospa siminqa kawsaqmi” nispa? Diospa llapa promesankuna hunt’akusqanraykun (Is. 46:10; 55:11). Sichus runamasinchis entienden Diospa promesankuna hunt’akusqanta chayqa, Bibliapi leesqanmi kawsayninta cambian. Chhaynapin Bibliaqa atiyniyoq.

7. ¿Imaynatan cheqaq-kay simiwan allinta yachachisunman?

⁷ Jehová Diosmi Bibliataqa qowanchis. Chaywanmi rikuchinchis Diosmanta willasqanchisqa cheqaqpuni kasqanta. Chayraykuchá Pabloqa Timoteota nirqan: ‘Cheqaq-kay simita allinta yachachiy’, nispa (2 Tim. 2:15). ¿Imaynatan ñoqanchispas cheqaq-kay simiwan allinta yachachisunman? Textokunata allinta akllaspan. Chaypaq hina ruwasqan kashan 2013 watapi lloqsimuq tratadokuna, chaykunawanmi runakunaq sonqonman chayasun.

8. ¿Ima nirqanmi predicacionta qhawariq umalli mosoq tratadokunamanta?

⁸ 2013 watapi lloqsimuq tratadokunaqa, llapallankun kaqkama ruwasqa kashanku. Chhaynapin hukninwan predicayta yachaspaqa llapanwanpas predicayta atinki. Estados Unidos nacionmanta Hawái llaqtapi predicacionta qhawariq umallin nin: “Chay tratadokunaqa allinpunin wasin-wasinta predicanapaq, runakunaq may kasqanpi predicanapaqpas”, nispa. ¿Imaraykun allinpuni facil-llataq chay tratadokunawan predicay? Chay iñiqmasinchis nisqan hina, chayqa qallariyninpi tapuykuna kutichiykuna kasqanraykun. Chaywanmi runakunaqa mana manchakunkuchu imachus kutichinankuta, chhaynapitaqmi paykunawan sumaqta parlarin.

9, 10. a) ¿Imaynatan tratadokuna Bibliawan predicananchispaq yanapawanchis? b) ¿Ima tratadokunawanmi sumaqta predicarqanki, imarayku?

⁹ Sapanka tratadopin allin akllasqa texto kashan runakunaman leenanchispaq. ¿Tukukunqachu ñak’ariykuna? nisqa tratadopin kashan “arí” ninkichu, “manan” ninkichu, “yaqapaschá” ninkichu nisqa kutichiykuna. Mayqentaña runakuna kutichinkuman chaypas, qatiqnin paginata qhawachispan kayta niwaq: “Kaytan Biblia nin”, nispa. Chaymantaq leewaq Apocalipsis 21:3, 4 textota.

¹⁰ ¿Ima ninkin Bibliamanta? nisqa tratadowanpas chay hinallatataq ruway. Imataña runakuna kutichinkuman chaypas, kayta niy: “Qhawariy Bibliaq nisqanta”, nispa. Chaymantaq tratadopi kay nisqanta leey: “Diospa Simin Qelqakunaqa llapallanmi Diospa yuyaychasqan”,  nispa. Hinamantaq niwaq: “Ichaqa Biblian astawan chaymanta willashan”, nispa. Chaymantaq leey 2 Timoteo 3:16, 17 textota.

11, 12. a) ¿Imamantan kusikuwaq tratadokunawan predicaspa? b) ¿Imaynatan tratadokuna yanapasunkiman runakunaman kutinaykipaq?

¹¹ Runakunaq uyarisqanman hinan chay tratadota astawan t’aqwiriwaqchis. Manaña chay ratopi astawan rimayta munanmanchu chaypas, ñan huk tratadota qospa Bibliamanta huk textollatapas leepurqankiña. Hukpi kutispaykiñan astawan parlariwaqchis.

¹² Chay tratadokunaq tukuyninpin nishan “Tapukuy” nispa. Uranpitaqmi huk tapuy kashan Bibliamanta textokunapiwan, chaytan kutispayki t’aqwiriwaqchis. ¿Imaynan kawsay kanqa qhepa tiempokunaman? nisqa tratadoq tukuyninpin nin: “¿Imaynatan Jehová Dios kay pachata paraisoman tukuchinqa?”, nispa; chayta kutichinapaqtaq kashan Mateo 6:9, 10; Daniel 2:44 textokuna. ¿Kanqachu kawsarimpuy wañupuqkunapaq? nisqa tratadoq tukuyninpin nin: “¿Imaraykun machuyanchis wañunchispas?”, nispa; chayta kutichinapaqtaq kashan Génesis 3:17-19; Romanos 5:12 textokuna.

13. ¿Imaynatan estudiokunata qallarisunman tratadokunawan?

¹³ Chay tratadokunaqa allinpunin estudiokunata qallarinapaq. Chay tratadokunaq tukuyninpin kan huk ch’eqchi cuadro scáner nisqata pasachinapaq. Chayta scáner nisqayoq celularwan pasachikuqtinmi, internetpi direccionninchisman apan. Chaypitaqmi huk video rikukunqa, chay videopin runakunata invitakushan Bibliata estudianankupaq. Hinaspapas tratadokunaqa ¡Diosmanta hamuq allin willakuykuna! nisqa folletota leeynapaqmi willashan. ¿Pin kay pachata kamachishan? nisqa tratadon ¡Diosmanta hamuq allin willakuykuna! nisqa folletopi 5 kaq yachachikuyta leenapaq willashan. ¿Iman kanan familiayki kusisqa kananpaq? nisqa tratadotaq chay folletopi 9 kaq yachachikuyta leenapaq willashan. Chay hinata chay tratadokunawan predicasun chayqa, Bibliatan allinta utilizasun chayllaraq runakunawan rimaspa, paykunaman kutispapas. Chhaynapitaq askha estudiokunayoq kasun. ¿Imakunatawanmi ruwasunman Bibliawan allinta yachachinapaq?

14, 15. ¿Imaynatan Pablo hina predicasunman?

¹⁴ Pabloqa runakunaq imayna yuyaykusqanta entiendenanpaqmi kallpachakuq (leey 1 Corintios 9:19-23). ¿Imarayku? “Lliw” runakunaq salvakunanta munasqanrayku (Hech. 20:21). Chaymi predicacionpaq preparakuspaqa runakunapi Pablo hina yuyaykunanchis (1 Tim. 2:3, 4).

¹⁵ Sapa killanmi Diosmanta Willasunchis nisqa hojanchispi lloqsimun predicanapaq yanapaykuna. Chaywan predicanaykipaq kallpachakuy. Sichus runakuna huk temamanta rimayta munanku chayqa, yuyaykuy imaynata paykunata yanapanaykipaq. Tapukuwaqmi: “¿Imakunapin  predicasqay runakuna tarikushanku? ¿Iman astawan llakichin?”, nispa. Hinamantaq yuyaykuy ima textokunawan yanapanaykipaq. Huk watukuq umallin nin: “Yaqa llapa runakunan Bibliamanta huk textollata leeqtiykuqa uyarikunku. Chaymi Bibliata kicharisqallataña hap’iyku, chhaynapin napaykusqayku qhepaman huk textota leepuykupacha”, nispa. Chayrayku qhawarisun wakin temakuna, tapuykuna, Bibliamanta textokuna predicanapaq allinpuni kasqanta. Chaykunawanmi qanpas predicawaq.

16. ¿Imaynatan Isaías 14:7 textowan predicawaq?

¹⁶ Sichus llaqtaykipi nishu suwakuna, maqanakuykuna kan chayqa, kaytan tapuwaq: “¿Hayk’aqllapas noticiakunapi uyarisunmanchu suwakuykuna maqanakuykuna manaña kasqanta, runakunapas kusisqa kashasqankuta? Chhayna kanantan Biblia willan Isaías 14:7 textopi. Chay promesakunan Bibliapi tarikun, pisi tiempollamantan pachantinpi thak-kay kanqa”, nispa. Hinamantaq chay promesakunamanta huk textota qhawachiy.

17. ¿Imaynatan Mateo 5:3 textowan predicawaq?

¹⁷ Yaqapaschá llaqtaykipiqa qolqe ganay sasa kanman. Chhayna kaqtinqa kaytan tapuwaq: “¿Hayk’a qolqetan gananayki familiayki kusisqa kananpaq?”, nispa. Kutichisqan qhepamantaq niwaq: “Wakinqa askhatan gananku, chaywanpas familiankuqa manan kusisqachu. Chhaynaqa, ¿imapunitaq runakunatari kusichin?”, nispa. Chaymantataq Mateo 5:3 textota leewaq, hinamantaq Bibliata estudiananpaq niwaq.

18. ¿Imaynatan Jeremías 29:11 textowan runakunata kallpachawaq?

¹⁸ Sichus llaqtaykipi runakuna mana allinpi tarikushanku chayqa, kaytan niwaq: “Kallpachaqniykin hamushani”, nispa. Chayta nispataq leey Jeremías 29:11 textota. Niwaqtaq: “Chay textopi leesqanchis hina, Diosqa kusisqa kawsananchistan munan kunanpas hamuq tiempopipas. Ichaqa, ¿atisunmanchu kusisqa kayta?”, nispa. Hinamantaq qhawachiwaq ¡Diosmanta hamuq allin willakuykuna! nisqa folletopi chaypaq hina yachachikuyta.

19. ¿Imaynatan Apocalipsis 14:6, 7 textowan religioso runakunawan parlariwaq?

 ¹⁹ Sichus llaqtaykipi religioso runakuna kan chayqa, kaytan niwaq: “Huk ángel rimapayasuqtiyki, ¿uyariwaqchu?”, nispa. Chayta nispataq leey Apocalipsis 14:6, 7 textota. Hinamantaq niwaq: “¿Ima nirqanmi chay ángel? Paymi nirqan hanaq pachatapas kay pachatapas kamaqta manchakuychis nispa. Ichaqa, ¿imatan ruwasunman Dios manchakusqanchista rikuchinapaq?”, nispa. Kutichisqanta uyarispataq leewaq Deuteronomio 6:2 textota, chaypin nin: “Tukuy kawsasqaykichis p’unchaymi qankunapas, wawaykichiskunapas, nietoykichiskunapas Diosninchis Señor Diosta yupaychanaykichis, tukuy kunan kamachisqay kamachikuyninta yachachikuynintapas hunt’anaykichis, ahinapin unayta kawsankichis”, nispa. Hinamantaq niwaq: “Chay textoq nisqan hina, Diosta manchakuyqa paypa kamachikuyninkunata kasukuymi. Ichaqa askha runan mana yachanchu Diospa aswan chaniyoq kamachikuyninta, chay kamachikuymi nin: ‘Diosniykitan munakunki tukuy sonqoykiwan’, nispa. Ichaqa, ¿imaynatan chayta ruwasunman?”, nispa. Chay tapuyta hukpi kutichinaykipaqtaq niwaq.

20. a) ¿Imaynatan Proverbios 30:4 textowan Diosmanta yachachisunman? b) ¿Ima textowanmi sumaqta predicarqanki?

²⁰ Wayna-sipaswan parlarispaqa kaytan niwaq: “Bibliapi kay simikunatan leepuyta munarqayki”, nispa. Hinamantaq leey Proverbios 30:4 textota, hinaspa tapuy: “¿Pimantan kaypi rimashan? Manan pi runapas kaypi nisqan hinaqa kanmanchu, ¿riki? Chhaynaqa Diosmantan kaypiqa rimashan. * Ichaqa, ¿imakunatawanmi Diosmanta yachasunman? Chaypaq Bibliata qhawasun”, nispa.

21, 22. a) ¿Imaynapin allin akllasqa texto runaq kawsayninta cambianman? b) ¿Imatan predicaspa kunanmanta ruwanki?

²¹ Bibliamanta allin akllasqa textota runakunaman leesqanchisqa allinpunin. Australia nacionpin iskay testigokuna huk sipasman predicaspa tapurqanku: “¿Yachankichu Diospa sutinta?”, nispa. Hinan Salmo 83:18 (NM) textota leerqanku. Chay sipasmi nin: “¡Admirakurqanin! Chaymi huk libreriaman carroypi rirqanipacha 56 kilómetro karuta. Chaypin Diospa sutinta maskharqani huk Bibliakunapipas diccionariopipas. Cheqaqpuni Diospa sutin Jehová kasqanta yachaspaytaq yuyaykurqani: ‘¿Imakunatawantaq manari yachanichu?’”, nispa. Qhepamanmi paypas novionpas Bibliata estudiarqanku, hinamantaq bautizakurqanku.

²² Diospa siminqa atiyniyoqmi runakunaq kawsayninta cambiananpaq. Bibliata leespan Jehová Diospa promesankunapi confianku, chayraykun Diospa kamachikuyninkunaman hina kawsanankupaq kallpachakunku (leey 1 Tesalonicenses 2:13). Bibliamanta leesqanchismi runakunaq sonqonmanqa chayanqa, manan ñoqanchispa nisqanchischu. Chaymi Diospa siminwanpuni runakunaman predicana.