TUKUKUY p’unchaykunapi kawsasqanchisraykun Jehová Diosta serviyqa sasa (2 Tim. 3:1-5). Chaymi Jesusqa qatikuqninkunaman prometerqan yanapayta qonanpaq, chhaynapi tukukuykama aguantanankupaq (Mat. 24:3, 13; 28:20). Chayraykun hunt’aq kamachinta churarqan ‘tiempollanpi kamachinkunaman mikhunata qonanpaq’ (Mat. 24:45, 46).

1919 watapin hunt’aq kamachita churakurqan, chaymantapachan hunt’aq kamachiqa askha simikunapi Diospa llaqtanman espiritual mikhunata qoshan (Mat. 24:14; Apo. 22:17). Ichaqa manan llapa simikunapichu qelqanchiskunaqa kashan. Hinaspapas manan llapa runachu internetpi qelqanchiskunata leeyta atinku. Askhan internetpi kaq videokunata qelqakunatapas mana qhawayta atinkuchu. Ichaqa, ¿chayraykuchu iñiyninkupi pisikallpayankuman? Chayta entiendenanchispaq tawa tapuykunamanta yachasun.

Jesustan Saqra tentarqan rumikunata t’antaman tukuchinanpaq, chaymi Jesusqa Saqraman kutichirqan: “Manan t’antallawanchu runaqa kawsanqa, aswanpas Diospa llapa siminwanmi”, nispa (Mat. 4:3, 4). Ichaqa, ¿maypin Diospa llapa siminkuna tarikun? Bibliapin (2 Ped. 1:20, 21). Chayraykun espiritual mikhunapi aswan importante kaqqa: Biblia (2 Tim. 3:16, 17).

Hunt’aq kamachin Bibliata qowanchis 120 simikunapi, sapa watantaqmi aswan askha simikunaman t’ikrakushan, chay Biblian sutichakun Traducción del Nuevo Mundo de las Santas Escrituras nisqa. Hinaspapas hukkunaq t’ikrasqan Bibliakunapas waranqa-waranqanpin kan askha simikunapi. Chayqa Jehová Diospa munasqanman hinan kashan, “payqa munanmi llapan runakuna qespichisqa kanankuta, cheqaq-kayta reqsinankutapas” (1 Tim. 2:3, 4). Hinaspapas “Diospa ima kamasqanpas qayllanpiqa manan pakasqachu” kashan, chaymi ‘huch’uyyaykukuspa’ payta ‘maskhaqkunataqa’ llaqtanman pusamunqapuni, manataqmi espiritual mikhunankuta faltachinqachu (Heb. 4:13; Mat. 5:3, 6; Juan 6:44; 10:14).

Iñiyninchispi qaqata sayananchispaqqa Bibliatan leenanchis ichaqa manan leeyllachu-leenanchis, aswanpas entiendenanchismi chayman hinataq kawsananchis (Sant. 1:22-25). Ñawpa tiempopi Etiopía llaqtamanta kamachikuqpas leesqantan entiendeyta munarqan. Chaymi Felipe tapurqan: “¿Entiendenkichu leesqaykita?”, nispa. Chay kamachikuqtaq nirqan: “¿Imaynatan entiendeyman mana pipas yachachishawaqtin?”, nispa (Hech. 8:26-31). Chaymi Felipeqa yanaparqan Diospa siminta entiendenanpaq, hinan bautizakapurqan (Hech. 8:32-38). Ñoqanchistapas qelqanchiskunan yanapawarqanchis Bibliata entiendenapaq. Sonqonchisman chayaspataq Diospa munasqanman hina kawsananchispaq yanapawanchis (Col. 1:9, 10).

Qelqanchiskunapin askha espiritual mikhunata chaskinchis (Is. 65:13). Hukninmi Qhawaq revista, chayqa 210 simikunapin ruwakun. Chay revistan profeciakunata sut’inchan, Bibliapi sasa entiendena yachachikuykunatataq entiendechiwanchis chayman hina kawsananchispaq. Rikch’ariy revistataqmi 100 simikunapi ruwakun, chaypin yachachiwanchis Diospa kamasqankunamanta, kamachikuyninkunaman hina kawsananchispaqpas (Prov. 3:21-23; Rom. 1:20). Hunt’aq kamachiqa Bibliamanta qelqakunatan 680 simikunapi ruwashan. Chhaynaqa, ¿leeshanchischu rimasqanchis simipi lloqsimuq qelqakunata? ¿Sapa p’unchaychu Bibliatapas leeshanchis?

Hinaspapas hunt’aq kamachiqa discurso qonapaq qelqakunatan ruwamun, chaykunawanmi asambleakunapi, huñunakuykunapi discursokunata qokun. Chay huñunakuykunapin discursokunata uyarikun, Bibliamanta actuacionkunata rikukun qhawarichiykunatapas, hinallataq wakin iñiqmasinchiskuna kawsayninkumanta willakunku. Chaykunata chaskikuspaqa, ¡anchatachá kusikunki! ¡Chhaynatan Jehová Diosqa llimp’arishaqta espiritual mikhunata qowanchis! (Is. 25:6.)

Wakin iñiqmasinchiskunaqa aswan askha espiritual mikhunayoqmi kanku. Jesusmi apostolninkunaman imaymanata yachachirqan, wakin qatikuqninkunan ichaqa mana chaykunata uyarirqankuchu (Mar. 4:10; 9:35-37). ¿Chayraykuchu paykuna espiritual mikhunawan pisichikurqanku? Manan, aswanpas tukuy necesitasqankun karqan (Efes. 4:20-24; 1 Ped. 1:8).

Hinaspapas Jesuspa wakin ruwasqankunaqa manan Bibliapi tarikunchu. Chaymi apóstol Juan nirqan: “Askharaqmi kashan Jesuspa tukuy imaymana ruwasqankunaqa, sapankachus qelqasqa kanman chayqa [...] manan kay pachantinpas aypanmanchu chay qelqakunata churanapaq”, nispa (Juan 21:25). Ñawpa tiempopi cristianokunaqa imaymanatan Jesusmanta yacharqanku. Ichaqa Jehová Diosmi churinmanta llapa necesitasqanchista Bibliapi qelqachirqan (1 Ped. 2:21).

Chaymantapas apostolkunaqa cartakunatan iñiq t’aqakunaman qelqaqku, chaykunamantan Pabloq qelqasqan huknin carta Bibliapi mana kanchu (Col. 4:16). Ichaqa manan chayraykuchu espiritual mikhuna pisiwanchis. Jehová Diosqa yachanmi iñiyninchispi qaqa sayananchispaq imakuna necesitasqanchista, chayman hinataqmi qowanchis (Mat. 6:8).

Yaqapaschá rimasqayki simipiqa pisilla qelqakuna kan, chaywanpas manan llakikunaykichu, Jehová Diosqa allintan cuidashasunki. Chay qelqakunata estudiay hinaspa entiendesqayki simipi huñunakuykunaman riy. Chhaynapin Jehová Diosqa iñiyniykipi qaqata sayanaykipaq yanapasunki (Sal. 1:2; Heb. 10:24, 25).

Internetpin leesunman revistanchiskunata Bibliata estudianapaq wakin qelqanchiskunatapas. Chaypin tarikullantaq yanapaykuna casarasqakunapaq, tayta-mamakunapaq, wawakunapaq, wayna-sipaskunapaqpas. Kallantaqmi Galaad escuelapi graduakusqanku otaq umalliq t’aqaq sapa watan huñunakuyninpas. Willakullantaqmi pacha chhaphchiy otaq ima sasachakuykuna kasqanpas, Diospa llaqtan juiciopi tarikusqankunapas (1 Ped. 5:8, 9). Hinamanpas internetqa yanapawanchismi hukkunata predicanapaq, chhaynapin predicacionninchista hark’asqanku nacionkunapipas runakunaqa Diosmanta yachanku.

Manaña internetman haykuyta atiwaqchu chaypas, iñiyniykipiqa allillanmi kanki. Hunt’aq kamachiqa askha qelqakunatan ruwan llapa cristianokunaq necesitasqanman hina, chhaynapi iñiyninkupi qaqa sayanankupaq. Chaymi qelqakunata leenaykipaqqa mana internet-taraqchu churachikunayki. Yaqapaschá wakin iñiqkunaqa, internetpi kaq yachachikuykunata horqomunku mana internetniyoq kaqkunaman qonankupaq. Iñiq t’aqan ichaqa mana obligasqachu kashan chaykunata horqospa iñiqmasikunaman qonanpaq.

Maytan Jesusta agradecekunchis iñiyninchispi qaqa kanapaq espiritual mikhuna qowasqanchismanta. Arí, Jehová Diosqa kay pachaq tukukunankaman “tiempollanpi kamachinkunaman mikhunata” qonqa.