1. ¿Imaynatan Pablo qhawarirqan allin willakuykunata willaypi kallpachakuqkunata?

APÓSTOL Pabloqa ancha chaninpaqmi qhawariq allin willakuykunata willaypi kallpachakuqkunata. Chaymi nirqan: “Dios Yayanchispa ñawpaqenpin yuyarillaykupuni ancha hatun iñiywan ruwasqaykichismanta, munakuywan llank’asqaykichismanta, Señorninchis Jesucristopi ancha pacienciawan suyakuyniykichismantapas”, nispa (1 Tes. 1:3). Jehová Diospas ancha chaninpaqmi qhawarin tukuy kallpankuwan payta serviqkunata, pisitaña askhataña ruwanku chaypas (Heb. 6:10).

2. ¿Imakunamantan kay estudiopi yachasun?

² Ñawpa tiempopi hinan kunanpas askha iñiqmasinchiskuna kallpachakunku tukuy tiemponkuwan Diosta servinankupaq. Kay estudiopin yachasun ñawpa tiempopi cristianokuna imaynata Diosta servisqankuta. Yachallasuntaq kay tiempopi tukuy tiemponkuwan Diosta  serviqkuna imakunapi llank’asqankumanta, imaynata paykunata yanapanamantapas.

3, 4. a) ¿Imaynatan ñawpa tiempopi cristianokuna Diosta servirqanku? b) ¿Imatan ñawpa tiempopi cristianokuna ruwaqku gastonkupaq?

³ Bautizakusqan qhepallamanmi Jesusqa Diospa gobiernonmanta willayta qallarirqan, chay llank’aytaq pachantinman mast’arikunan karqan (Luc. 3:21-23; 4:14, 15, 43). Chaymi Jesuspa wañupusqan qhepaman apostolkunaqa chay llank’ayta aparishallarqanku (Hech. 5:42; 6:7). Chay tiempopi cristianokunaqa imaymanata saqesparaqmi tukuy tiemponkuwan Diosta servirqanku. Hukninmi karqan Felipe, payqa Palestina llaqtapin tukuyneqpi predicarqan (Hech. 8:5, 40; 21:8). Pablotaq aswan karu llaqtakunapi predicarqan (Hech. 13:2-4; 14:26; 2 Cor. 1:19). Wakintaq Bibliata qelqarqanku otaq Biblia qelqaqkunata yanaparqanku, paykunamantan karqanku Silvano, Marcos Lucas ima (1 Ped. 5:12). Cristianakunataq tukuy atisqankupi yanaparqanku (Hech. 18:26; Rom. 16:1, 2). Bibliapin willakun Diosta tukuy tiemponkuwan serviqkunamanta. Chaymi rikuchin Jehová Diosqa paykunaq ruwasqanta valorniyoqpaq qhawarisqanta yanapasqantapas.

⁴ Paykunaqa manan huk iñiqmasinkunaq yanapanantachu suyarqanku, aswanpas gastonkupaqmi llank’arqanku. Pablopas paywan kuska predicaqkunapas llank’aqkun. Chaywanpas iñiqmasikunaqa yanapaqkun (1 Cor. 9:11-15). Wakinmi wasinkuman mikhuq pusaqku otaq alojaqku. Llapankun imallapipas yanapaqku (leey Hechos 16:14, 15; Filipenses 4:15-18).

5. ¿Ima nirqankun huk casarasqa cristianokuna tukuy tiemponkuwan Diosta servisqankumanta?

⁵ Kay tiempopipas askha cristianokunan tukuy tiemponkuwan Diosta servishanku (qhaway “ Tukuy tiempoykiwan Diosta servinaykipaq” nisqa recuadrota). ¿Ima ninkun chayta ruwanankupaq decidisqankumanta? Chayta yachayqa anchatan kallpachawasun. Huk iñiqmasin precursor regular, precursor especial, misionero ima karqan kunantaq  Betel wasipi llank’ashan. Paymi nin: “Tukuy tiempoywan Diosta servisqaymantaqa manan pesapakunichu. 18 wataypi kashaspaqa decidikunaymi karqan universidadmanchus haykunayta, tukuy tiempoywanchus llank’anayta otaq precursor kanayta. Hinan Jehová Diosta tukuy tiempoywan servinaypaq decidikurqani, chay ruwasqaymantan Jehová Diosqa anchatapuni bendeciwarqan. Ruway atisqaykunaqa Diosta servinaypaqmi anchatapuni yanapawarqan, chaykunata ruwanaypaqqa manan yuyaykurqanichu. Sichus kay pachaq ruwayninkunapi kayman karqan chayqa, manan Diosta chhayna sumaqtachu serviyman karqan”, nispa. Esposanmi nillantaq: “Diospa llaqtanpi sapanka ruwaymi iñiyniypi astawan kallpachawarqan. Tukuy tiempon Jehová Diosqa cuidawashanku pusariwashanku ima. Sichus ima ruwasqallaykuwan contentakuykuman karqan chayqa, manan rikuykumanchu karqan Diospa yanapayninta. ¡Maytan Diosta gracias nini tukuy tiempoykuwan payta servisqaykumanta!”, nispa. ¿Munawaqchu paykuna hina kayta?

6. ¿Imaynatan Dios qhawarin ruwasqanchista?

⁶ Ichaqa manan llapanchischu tukuy tiemponchiswan Diosta serviyta atinchis, yaqapaschá imapas hark’awasqanchisrayku. Jehová Diosmi ichaqa valorniyoqpaq qhawarin tukuy kallpanchiswan ruwasqanchista. Pablon Colosas iñiq t’aqaman napaykuyta apachisqanpi wakin iñiqkunaq sutintaraq qelqarqan (leey Filemón 1-3). Chaywanmi rikuchisharqan ruwasqankuta valorniyoqpaq qhawarisqanta imaynan Jehová Diospas qhawarin hinata. Kunanpas Jehová Diosqa ancha valorniyoqpaqmi ruwasqanchista qhawarin. Sichus mana tukuy tiempoykiwanchu Diosta servishanki chayqa, tukuy tiemponkuwan Diosta serviqkunatan yanapawaq, ¿imaynatan chayta ruwawaq?

7, 8. a) ¿Imatan precursorkuna ruwanku? b) ¿Imaynatan precursorkunata yanapasunman?

⁷ Ñawpa tiempo cristianokuna hinan precursorkunaqa iñiq t’aqakunata kallpachanku. Paykunaqa sapa killanmi 70 horasta predicanku. ¿Imaynatan paykunata yanapasunman?

⁸ Shari precursoran nin: “Sapa p’unchaytaq predicaq lloqsiyku chayqa, allin kashanaykupaqchá wakinqa yuyaykunku. Ichaqa kallpachanatan ñoqaykupas necesitayku”, nispa (Rom. 1:11, 12). Unay tiempoña kaq precursoran iñiq t’aqanpi precursorkunamanta willarqan mana sayk’uspa Diospaq llank’asqankuta. Chaysi paykunaqa agradecekunku mikhunata invitaqtinku, pasajenkupaq otaq huk gastokupaqpas qolqeta qoqtinku.

9, 10. ¿Imaynatan wakin hermanokuna yanaparqanku precursorkunata?

⁹ ¿Imaynatan precursorkunata yanapallasunmantaq? Paykunawan predicaq rispan. Bobbi precursoran nirqan: “Astawanqa predicacionpi ñoqaykuwan lloqsinankutan munayku”, nispa. Huk precursoran nillantaq: “Tardenkunata predicaq rinaykupaqmi mana pipas kanchu”,  nispa. Brooklyn Betelpi llank’aq iñiqmasin precursora kasqanmanta yuyarispa nin: “Carroyoq iñiqmasin niwaq: ‘Predicaq rinaykipaq mana pipas kanchu chayqa willawanki, ñoqan compañasayki’, nispa. Chaymi yanapawarqan precursora kashanallaypaq, mana chayqa saqepuymanmi karqan”, nispa. Chaymantapas Sharin nin: “Predicación qhepatan wakin soltero precursorkunaqa sapallanku qhepakapunku. Chhaynaqa, paykunatapas invitasunmanmi familiantin Diosta yupaychananchis ch’isiman. Huk ruwaykunamanpas invitasun chayqa kusisqan kanqaku”, nispa.

¹⁰ Huk iñiqmasinchismi 50 wataña precursora kashan. Huk soltera precursorakunawan predicasqanmanta yuyarispa nin: “Umallikunaqa precursorkunatan visitaqku iskay killakunamanta hina. Chaypin tapuqku imayna kashasqankuta, llank’anankupi imayna tarikusqankuta, imakuna necesitasqankutapas. Wasiykumanpas hamuqkun imayna kashasqaykuta yachanankupaq”, nispa. Chay umallikunaqa Onesíforo hinan iñiqkunata yanapanku. Onesiforoqa familiayoqmi karqan chaywanpas Pablotan necesitasqanpi yanaparqan (2 Tim. 1:18).

11. ¿Imatan ruwanku precursor especialkuna?

¹¹ Wakin iñiq t’aqakunapiqa precursor especialkunan kan. Paykunan 130 horasta sapa killa predicanku, chaymantapas iñiq t’aqankupin imaymanapi yanapakunku. Chaymi mana tiemponku kanchu llank’anankupaq. Chayraykun sucursalqa sapa killa wakin gastonkuwan yanapan, chhaynapi predicashanallankupaq.

12. ¿Imaynatan umallikuna huk iñiqkunapas precursor especialkunata yanapankuman?

¹² ¿Imaynatan precursor especialkunata yanapasunman? Betelpi llank’aq umallin nin: “Precursor especialkunaqa wakin gastonkupaqmi qolqeta chaskinku, chaymi wakin iñiqmasinchiskunaqa manaña yanapayta munankumanchu. Ichaqa imaymanapin yanapasunman. Chaymi umallikunapas rimanankupuni paykunawan, chhaynapin yachanqaku imayna kashasqankuta imapi yanapana necesitasqankutapas”, nispa. Chaymantapas precursor regularkuna hinan paykunapas agradecesqa kanku predicacionpi compañaqtinchis. Chayta ruwananchispaqmi ñoqanchispas kallpachakusunman.

13, 14. a) ¿Imaraykun watukuq umallikunata esposankutapas yanapanapuni? b) ¿Imaynatan watukuq umallikunata yanapasunman?

¹³ Watukuq umallikunapas esposankupas iñiyninkupi allin takyasqa iñiqkunan kanku. Chaywanpas necesitankun kallpachanata, predicaypi yanapanatapas. Chaymantapas paykunaqa maytan munanku iñiqmasikunawan kuska kayta otaq amigontin kayta. Mayninpitaq onqorunku otaq hospitalman apana kanqaku, chhaynapi kashaqtinkuqa astawanraqmi visitananchis yanapananchispas. Hechos librota qelqaq “munasqa médico” Lucaspas chhaynatan yanaparqan apóstol Pablota paywan kaq iñiqkunatapas (Col. 4:14; Hech. 20:5-21:18).

¹⁴ Watukuq umallikunapas esposankupas allin amigokunayoq kaytan munanku. Huk watukuq umallin nin: “Yanapanata necesitasqaytapas yachankuman hinan amigoykunaqa necesitasqayku ratupi tapuriwanku. Hinan sumaqta uyariwanku, chaymi anchata kallpachawan”, nispa. Arí, chay iñiqmasinchiskunaqa  anchatan agradecekunku yanapasqanchismanta.

15, 16. a) ¿Imatan ruwanku Betelpi asamblea wasipi llank’aqkuna? b) ¿Imaynatan chay iñiqmasikunata yanapasunman?

¹⁵ Betelpi llank’aqkunapas, asamblea wasipi llank’aqkunapas predicación allin aparikunanpaqmi yanapakunku. Sichus iñiq t’aqanchispi kan betelitakuna chayqa, ¿imaynatan paykunata yanapasunman?

¹⁶ Betelitakunaqa familiankuta amigonkuta saqespan Betel wasiman llank’aq rinku. Chaymi paykunaqa necesitanku kallpachanata amigokunayoq kaytapas. Chaypaqmi Betelpi unayña kaqkunapas iñiq t’aqapi kaqkunapas kallpachakunanku paykunata yanapanankupaq (Mar. 10:29, 30). Betelitakunaqa sapa semananmi huñunakuykunaman predicacionmanpas rinku, ichaqa mayninpin mana riyta atinqakuchu Betelpi askha llank’anayoq kasqankurayku. Chaymi iñiq t’aqapi kaqkunaqa chaykunata entiendenanku, anchatataq valorananku paykunatapas llank’asqankutapas (leey 1 Tesalonicenses 2:9).

17, 18. ¿Imapin yanapakunku huk nacionkunapi tukuy tiemponkuwan Diosta serviqkuna?

¹⁷ Tukuy tiemponkuwan Diosta serviq wakin iñiqmasikunaqa huk nacionkunamanmi astakurqanku. Chaypin huk simi rimayta yachananku, hukniray mikhunakunata mikhunanku, chay llaqtapi tiyasqankumantaq yachakunanku. Ichaqa, ¿iman paykunata kallpacharqan huk nacionkunaman rinankupaq? ¿Ima ruwaykunapin chaypi yanapakushanku?

¹⁸ Wakinqa misioneron kanku. Paykunan tukuy tiemponkuwan predicanku, hinaspapas allin preparasqa allin experienciayoq kasqankuraykun iñiq t’aqankupi allinta yanapakunku. Paykunataqa sucursalmi yanapan wasiwan gastonkuwanpas. Wakin iñiqmasikunataq  huk nacionkunaman rinku Betel wasipi llank’anankupaq. Wakintaq rinku sucursal wasikunata, qelqakunata t’ikranapaq oficinakunata, asamblea wasikunata, huñunakuna wasikunatapas hatarichiypi yanapakunankupaq. Paykunamanpas chay nacionpi llank’asqanku sucursalmi otaq iñiq t’aqan qon mikhunankuta, alojakunanku wasita hukkunatapas. Chay iñiqmasikunaqa betelitakuna hinan sapa semana huñunakuykunamanpas predicacionmanpas rinku, chaymi paykunaqa munasqa kanku.

19. ¿Imaynatan yanapasunman nacionninchisman hamuq iñiqmasikunata?

¹⁹ Chhaynaqa, ¿imaynatan yanapasunman chay iñiqmasikunata? Paykunaqa yaqapaschá mana costumbrasqachu kashanku llaqtanchispi mikhunaman. Chaymi invitaspaqa tapurisunman ima mikhuna munashasqankuta otaq imakunata mana munasqankuta. Hinaspapas rimasqanchis simita rimanankupaqtaq kallpachakushanku chayqa, manapaschá allintachu entiendewasun ima nisqanchistapas. Chayraykun pacienciawan yanapananchis rimasqanchis simita allinta yachanankupaq. ¡Paykunaqa yachaytan munanku!

20. ¿Imaynatan yanapasunman tukuy tiemponkuwan Diosta serviq iñiqkunata tayta-mamankutapas?

²⁰ Tukuy tiemponkuwan Diosta serviqkunaqa yaqapaschá yuyaykunanku kanqa imaynata kurak tayta-mamankuta yanapanankupaq. Tayta-mamanku Jehová Diospa testigonkuna kanku chayqa, manapaschá munanqakuchu wawanku Jehová Diospaq llank’ashasqankuta saqenankuta (3 Juan 4). Chaywanpas kallpachakunankun atisqankuman hina tayta-mamankuta visitanankupaq yanapanankupaqpas. Tayta-mamankuq iñiq t’aqankupi kaq iñiqmasikunapas yanapakunkumanmi. Tukuy tiemponkuwan Diosta serviq iñiqmasikunaqa ancha valorniyoq llank’aypin yanapakushanku (Mat. 28:19, 20). Chayraykun iñiq t’aqapas sapankanchispas kallpachakunanchis chay iñiqmasikunaq kurak tayta-mamankuta yanapananchispaq.

21. ¿Ima ninkun yanapasqanchismanta tukuy tiemponkuwan Diosta serviqkuna?

²¹ Tukuy tiemponkuwan Diosta serviqkunaqa, Jehová Diosta aswan allinta servinankuraykun chay llank’ayta akllakurqanku manan qolqeraykuchu. Chaymi imallapipas yanapasqanchista agradecekunku. Huk nacionpi yanapakuq iñiqmasin nin: “Iñiqmasikuna qelqamuwasqankupin rikuni anchata munakuwasqankuta, llank’asqaytapas valorasqankuta”, nispa.

22. ¿Imaynatan qhawarinki tukuy tiempowan Dios serviyta?

²² Tukuy tiemponkuwan Diosta serviqkunaqa allin llank’aytan akllakurqanku. Chay llank’aymi paykunata yanapan Diospa gobiernon hamuqtin sumaqta kawsanankupaq, chaypiqa llapanchismi sapa p’unchay Diosta kusisqa servisun. Chhaynaqa tukuy tiemponkuwan Diosta serviqkunata yanapasun, hinaspapas ‘ancha hatun iñiywan ruwasqankuta, munakuywan llank’asqankutapas’ valorniyoqpaq qhawarisun (1 Tes. 1:3).