1, 2. ¿Imaynatan Jesús kawsarimpuspa qatikuqninkunata kallpacharqan?

JESUSPA iskay qatikuqninkunan 11 kilómetro karuta Jerusalenmanta huk llaqtaman risharqanku. Jesuspa wañupusqanwanmi llakisqa tarikusharqanku, chayllamanmi Jesusqa paykunaman rikhurispa puriysikurqan. Purishaqtinkun “Moisespa qelqasqankunamanta llapallan profetakunaq qelqasqankama paymanta lliw qelqasqata sut’incharqan” (Luc. 24:13-15, 27). Chaymi paykunaqa kallpata hap’irqanku, sonqonkutaq kusikuymanta kawsarirqan ‘Diospa Simin Qelqaq nisqanta willasqanmanta’ (Luc. 24:32).

² Chay kikin tutan Jesusta qatikuqkunaqa Jerusalenman kutirqanku hinaspa apostolkunaman willarqanku imachus sucedesqanta. Chay raton Jesusqa paykunaman rikhurirqan, chaymi mancharikurqanku iskayarqankutaq Jesuspunichus kasqanmanta. Hinan “yuyayninkuta kicharirqan Diospa Simin Qelqata entiendenankupaq”, chhaynapin paykunata kallpacharqan (Luc. 24:45).

3. a) ¿Imaraykun Jehová Diospaq llank’asqanchispi pisikallpayasunman? b) ¿Iman yanapawasun Jehová Diosta kusisqalla servinapaq?

³ Ñoqanchispas ñawpa tiempopi Jesuspa qatikuqninkuna hinan llakisqa tarikusunman. Anchataña Jehová Diospaq llank’ashasunman chaypas, pisikallpayasunmanmi  runakunaq mana uyariwasqanchiswan, Bibliata ñoqanchiswan estudiaqkuna Diosta servinankupaq mana decidikusqankuwan otaq Jehová Diosta saqepusqankuwan (1 Cor. 15:58). ¿Iman yanapawasun chhayna kaqtinpas Jehová Diosta kusisqalla servinapaq? Jesuspa rikch’anachiykuna willasqanta allinta entiendeymi. Kay estudiopin yachasun kinsa rikch’anachiyninkunamanta imakunatachus chaykuna yachachiwasqanchismantapas.

4. ¿Imatan Jesús muhu t’akaq runamanta rikch’anachiypi willarqan?

⁴ (Leey Marcos 4:26-29.) ¿Imatan Jesús chay rikch’anachiypi willarqan? Muhu t’akaq runan rikch’akun predicaqkunaman, muhutaq Diospa gobiernonmanta willakuykunaman. Muhu t’akaq runaqa lliw runakuna hinan “tuta puñun p’unchaytaq sayarin”. Muhu t’akakusqanmanta cosechakamaqa tiempon pasanan. Chay tiempopin muhuqa lloqsimuspa pisi-pisimanta wiñan. Chay hinallataqmi Diosmanta yachashaq runawanpas, pisi-pisimantan iñiyninqa yapakun. Chaymantataq Diosta servinanpaq decidikun, chaymi Diosman prometekun payllapaqña kawsananpaq hinamantaq bautizakun.

5. ¿Imaraykun Jesús muhu t’akaq runamanta rikch’anachiyta willarqan?

⁵ ¿Imaraykun Jesús chay rikch’anachiyta willarqan? Chaytaqa nirqan Dioslla allin willakuykunata runakunaq sonqonpi wiñachiy atisqanta rikuchinanpaqmi (Hech. 13:48; 1 Cor. 3:7). Ñoqanchisqa tarpunchis qarpanchis iman, ichaqa manan obligasunmanchu wiñananpaqqa. Rikch’anachiypi runa hinan imaynachus wiñasqantaqa mana yachanchischu. Manan reparasunmanpaschu imaynachus wiñashasqanta. Tiempowanmi ichaqa rurunqa, chay hinapin mosoq iñiqmasiqa ñoqanchiswan kuska cosechaypi llank’anqa (Juan 4:36-38).

6. ¿Imatan mana ruwananchischu estudiantekunawan?

⁶ ¿Imatan yachachiwanchis chay rikch’anachiy? Ñoqanchisqa manan imatapas ruwayta atisunmanchu Bibliata estudiaq runa usqhaylla Diosta servinanpaqqa. Anchataña kallpachakusun estudiantekunata yanapanapaq chaypas, manan tanqananchischu bautizakunankupaqqa. Paykunallan chaytaqa decidinanku. Jehová Diosqa munan sonqomanta payta munakusqanchisrayku servinanchistan,  chay hinallapin payman prometekusqanchista chaskiwasun (Sal. 51:12; 54:6; 110:3).

7, 8. a) ¿Imakunatawanmi yachasunman muhu t’akaqmanta Jesuspa rikch’anachiy willasqanpi? b) ¿Imatan chay rikch’anachiy yachachiwanchis Jehová Diosmanta Jesusmantapas?

⁷ Hinaspapas chay rikch’anachiyqa yachachiwallanchistaqmi pacienciakuq kanapaq (Sant. 5:7, 8). Yaqapaschá estudiantenchiskuna unayña estudiashallanku manataq decidikunkuchu Diosta servinankupaq, chay kaqtinmi pisikallpayasunman. Sichus tukuy imata ruwarqanchis yanapananchispaq manataq sonqonpi Diosmanta yachasqan wiñanchu chayqa, manan chayraykuchu mana allin yachachiq kanchis. Jehová Diosqa huch’uyyaykukuqpa sonqollanpin wiñachin pay munakuytaqa, cambiayta munaq runallatan iñiyninpi yanapan (Mat. 13:23). Manan askha runata bautizakunankama yachachisqanchisraykullachu allin yachachiqqa kanchis. Aswanpas Diosqa qhawarin runakunata yachachinanchispaq tukuy kallpachakusqanchistan (leey Lucas 10:17-20; 1 Corintios 3:8).

⁸ Chaymantapas manan yachasunmanchu estudiantekuna sonqonkupi imayna cambiasqankuta. Chaypaq yachasun huk misionerowan estudiaq warmi-qhari runakunamanta. Paykunaqa predicaytañan munarqanku, chaymi misioneroqa nirqan cigarro pitasqankutaraq saqenankuta. Paykunan willarqanku iskay kinsa killaña saqepusqankuta. ¿Imaynapin saqepusqaku? Entienderqankun Jehová Diosqa iskay uya runakunata cheqnikusqanta, pakapiña pitaqtinkupas rikumushasqanta. Chaymi decidikurqanku manaña hayk’aqpas pitanankupaq. Misionerotaq chay cambiasqankumanta mana yachasqachu. Jehová Diosta munakusqankun sonqonkupi wiñasharqan, chaymi paykunallamanta pitasqankuta saqepusqaku.

9. ¿Imatan Jesús challwa hap’ina mallamanta rikch’anachiypi willarqan?

⁹ (Leey Mateo 13:47-50.) ¿Imatan Jesús chay rikch’anachiypi willarqan? Chaypin willarqan predicacionqa challwa hap’ina malla hina kasqanta. Imaynan challwa hap’inaqa “tukuy imaymana rikch’aq challwakunata hap’in” chay hinatan predicacionpas imaymana clase runakunata askhanpi huñumun (Is. 60:5). Chaymi rikukun asambleanchiskunapi, Jesuspa wañusqanta yuyarinapaq p’unchayman hamusqankupipas. Paykunamantan wakinqa “allin” challwakunaman rikch’akunku hinaspa Diospa llaqtanmanta kapunku. Wakintaq ichaqa ‘mana allin’ challwakunaman rikch’akunku chaymi Jehová Diosqa mana chaskinchu.

10. ¿Imaraykun Jesús challwa hap’ina mallamanta rikch’anachiyta willarqan?

¹⁰ ¿Imaraykun Jesús chay rikch’anachiyta willarqan? Chaytaqa willarqan Diospa siminta uyariq runakunamanta mana llapankuchu Diosta serviy  munasqankuta rikuchinanpaqmi. Askha runakunan huñunakuyninchiskunaman hamunku otaq ñoqanchiswan Bibliata estudianku, ichaqa manan munankuchu Dios serviyta (1 Rey. 18:21). Wakinqa manañan huñunakuymanpas hamunkuchu. Wakin wayna-sipaskunapas huch’uychankumantapachan Diosta reqsirqanku cristiano tayta-mamayoq kasqankurayku, ichaqa manan paykuna kikinkuqa Diosta munakunkuchu. Jesusmi nirqan Diosta servinapaqqa sapankanchis decidinanchis kasqanta. Sichus Diosta servinapaq decidikusun chayqa, “llapa nacionkunamanta valorniyoq kaqkunan” paypaqqa kasun (Hag. 2:7, NM). Chay rikch’anachiypi challwakunaq akllakusqanqa manan manchay ñak’ariy p’unchaykunapichu kanan karqan, aswanpas tukukuy qaylla p’unchaykunapin kanan karqan; chay tiempopitaqmi kawsashanchis.

11, 12. a) ¿Imatan yachachiwanchis challwa hap’ina mallamanta Jesuspa rikch’anachiy willasqan? b) ¿Imatan chay rikch’anachiy yachachiwanchis Jehová Diosmanta Jesusmantapas?

¹¹ ¿Imatan yachachiwanchis chay rikch’anachiy? Chay rikch’anachiymi yanapawanchis estudiantekuna otaq wawakunapas Diosta mana serviyta munaqtinku ama llakisqalla kanapaq. Bibliataña estudiarqanku chaypas manan chayraykuchu Jehová Diospa amigonña kapunku, wawa kasqanmantapachaña Diosmanta yachachirqanchis chaypas, manan chayraykuchu Diostaqa munakunqakuña. Paykuna kikinkun Diosta qhawarinanku kamachiqninkuta hina, mana chayqa manan Diosta servinqakuchu.

¹² Chhaynaqa, ¿manañachu Diosman kutimpuyta atinkuman Diosta saqepuqkuna? ¿Manañachu bautizakunkuman Diosta manaraq serviq runakuna? Manan chaytachu nishan. Aswanpas manaraq manchay ñak’ariy tiempo chayamushaqtinqa atinkumanraqmi Jehová Diospa amigon kayta. Jehová Diosmi nin: “Kutirikamuwaychis, ñoqapas kutirimullasqaykichistaqmi”, nispa (Mal. 3:7). Chaymi rikukun chinkasqa churimanta Jesuspa rikch’anachiy willasqanpi (leey Lucas 15:11-32).

13. ¿Imatan Jesús willarqan chinkasqa churimanta rikch’anachiypi?

¹³ ¿Imatan Jesús chay rikch’anachiypi  willarqan? Chay rikch’anachiypi khuyapayakuq taytaqa munakuq Jehová Dios taytanchismi. Chaniyoq kaqninkunata tukuq waynataq Diospa llaqtanta saqepuq runakuna. Paykunaqa Saqraq kamachisqan pachamantan kapunku chaymi ‘karu llaqtamanpas ripunkuman’ hina kanku (Efes. 4:18; Col. 1:21). Qhepamanmi wakinqa reparakunku mana allin ruwasqankuta chaymi Jehová Diosman kutimpunku. Chayta ruwanankupaqqa huch’uyyaykukuqchá karqanku, anchatataqchá huchankumanta pesapakurqanku chay hinallapin Jehová Diosqa huchankuta pampachaspa yapamanta chaskiykapurqan (Is. 44:22; 1 Ped. 2:25).

14. ¿Imaraykun Jesús chinkasqa churimanta rikch’anachiyta willarqan?

¹⁴ ¿Imaraykun Jesús chay rikch’anachiyta willarqan? Diospa llaqtanta saqepuqkuna kutimpunankupaqmi. Jehová Diosqa munanmi payta saqepuqkuna payman kutimpunankuta. Chinkasqa churimanta rikch’anachiypi taytaqa suyashallarqanmi churinpa kutimunanta. Karullamantaraq kutimpushasqanta rikuspataq taytaqa aypaq phawarirqan. Ancha kusisqan kasharqan churinpa kutimpusqanmanta. Chay rikch’anachiymi yanapanan Diospa llaqtanta saqeqkuna Diosman usqhaylla kutimpunankupaq. Yaqapaschá mana allinchu iñiyninkupi kashanku, sinchi p’enqasqa kashanku chayrayku sasa kanman kutimpunankupaq. Chaywanpas kutimpusqankuqa allinninkupaqmi kanqa. Chayta ruwaqtinkuqa Jehová Diospas, Jesuspas, angelkunapas anchatan kusikunqaku (Luc. 15:7).

15, 16. a) ¿Imakunatan yachachiwanchis chinkasqa churimanta rikch’anachiy? b) ¿Imatan chay rikch’anachiy yachachiwanchis Jehová Diosmanta Jesusmantapas?

¹⁵ ¿Imatan yachachiwanchis chay rikch’anachiy? Jehová Dios hina munakuq  kananchispaqmi yachachiwanchis. Pipas Diospa llaqtanman kutimpuqtinqa sumaqtan chaskinanchis, manan “sinchi chaninpaq” qhawarikuspanchischu pisichananchis, chayta ruwasunman chayqa Jehová Diosmi mana allinpaqchu qhawariwasunman (Ecl. 7:16). Hinaspapas chay rikch’anachiymi yanapawasun Diospa llaqtanta saqeqkunata ‘chinkasqa ovejata’ hina qhawarinanchispaq. Paykunaqa atinkumanmi Diosman kutimpuyta (Sal. 119:176). Chhaynaqa, ¿imatan ruwasun iñiq t’aqamanta karunchakuqwan tupaspa? ¿Usqhayllachu kutimpunanpaq yanapasun? ¿Usqhayllachu umallikunaman yanapanankupaq willasun? Sichus chay rikch’anachiyta allinta entienderqanchis chayqa, chaytapunin ruwasun.

¹⁶ Diospa llaqtanman kutimpuqkunaqa kusisqan kashanku Diospa khuyapayasqanrayku, iñiqmasikunaq munakuyninrayku yanapasqankuraykupiwan. 25 watamanta Diospa llaqtanman kutimpuq iñiqmasin nin: “Anchatan kusikurqani Jehová Dios yapamanta llaqtanpi chaskiwasqanmanta. Ichaqa astawanraqmi kusikurqani ‘sumaq kawsaypi samarichiwasqanmanta’ (Hech. 3:19). Lliw iñiqmasikunan yanapawanku munakuwanku ima. Kunanqa hatun espiritual familiayoqmi kani”, nispa. Phisqa watamanta Diospa llaqtanman kutimpuq sipasmi nin: “Anchatan kusikurqani Jesuspa nisqanman hina munakuywan iñiqmasikunaq chaskiwasqankumanta. Jehová Diospa llaqtanmanta kayqa manan imawanpas tupanmanchu”, nispa.

17, 18. a) ¿Imakunatan yacharqonchis kinsantin rikch’anachiykunamanta? b) ¿Imatan ruwashanallanchis?

¹⁷ ¿Imakunatan yacharqonchis kinsantin rikch’anachiykunamanta? Manan imatapas ruwayta atisunmanchu Bibliata estudiaq runa usqhaylla Diosta servinanpaqqa. Chaytaqa Jehová Diosñan qhawarinqa. Hinaspapas manan ñoqanchiswan Bibliata lliw estudiaqkunachu nitaq huñunakuyninchisman lliw hamuqkunachu Diosta servinqaku. Chaymantapas Diospa llaqtanta saqepuqkunaqa atinkumanmi Diosman kutimpuyta. Chayta ruwaqtinkun Jehová Diospa chaskisqanta hina sumaqta chaskinanchis.

¹⁸ Chhaynaqa maskhashallasun yachayta, entiendeyta yachayniyoq kaytawan. Jesuspa rikch’anachiykuna willasqanta leespan kaykunata tapukunanchis: “¿Imatan Jesús chay rikch’anachiypi willarqan? ¿Imaraykun Jesús chay rikch’anachiyta willarqan? ¿Imatan yachachiwanchis chay rikch’anachiy? ¿Imatan chay rikch’anachiy yachachiwanchis Jehová Diosmanta Jesusmantapas?”, nispa. Chaykunata ruwaspan Jesuspa imapunichus yachachisqanta entiendesun.