1, 2. a) ¿Imatan Jesús willarqan tukukuy pˈunchaykunamanta? b) ¿Imakunatan kay estudiopi yachasun?

UNAY watakuna ñawpaqtan Jesusqa Olivos orqopi kasharqan Pedrowan, Andreswan, Santiagowan, Juanpiwan. Chaypin willarqan tukukuy pˈunchaykunapi imakunachus sucedenanta, nillarqantaqmi kay pachapi paypa rantinpi ‘allin yuyayniyoq huntˈaq kamachita’ churananmanta. Chay kamachin tukukuy pˈunchaykunapi cristianokunaman Diosmanta yachachinan karqan (Mat. 24:45-47).

² Chaykunata willasqan qhepamanmi Jesusqa 10 sipaskunamantañataq willarqan (leey Mateo 25:1-13). Chay willakuyta entiendenapaq kaykunata tapukusun: ¿Imatan Jesús yachachiyta munarqan 10 sipaskunawan? ¿Imaynatan akllasqa cristianokuna 10 sipaskunamanta  yachasqankuman hina kawsankuman? ¿Imaynapin wak ovejakunaq allinninpaq kanman 10 sipaskunamanta willakuy? Kay estudiopin chaykunamanta yachasun.

3. a) ¿Imaynatan qelqanchiskuna ñawpaqpi willamurqan 10 sipaskunamanta? b) ¿Imatan mana repararqanchischu chay willakuymanta?

³ Ñawpaq kaq estudiopi yachasqanchis hina, huntˈaq kamachiqa manañan nishutachu willamun Bibliamanta willakuykuna imatachus representasqanta. Aswanpas kunanqa imaynatachus chay willakuyman hina kawsananchistan yachachiwanchis. Chaytan ruwan 10 sipaskunamanta willakuywanpas. Ñawpaqpiqa chay willakuypi imatachus representan lamparakuna, botellachakuna, aceite chaykunatan qelqanchiskuna astawan willamurqan. Chaykunata ruwaspaqa yaqapaschá chay willakuypa aswan allin yachachikuyninta mana repararqanchischu. Chaymi kay estudiopi tˈaqwirisun imatachus 10 sipaskunamanta willakuy yachachiwanchis chayta.

4. a) ¿Pin novio, imarayku? b) ¿Pikunan kanku sipaskuna, imarayku?

⁴ ¿Imatan Jesús yachachiyta munarqan chayta willaspa? Chayta yachanapaqqa yachasunraq pichus novio kasqanta. Chay willakuypi novioqa Jesusmi, chaytan ninchis huk kutipi pay kikin noviowan tupachikusqanrayku (Luc. 5:34, 35). Sipaskunataq akllasqa cristianokuna. Jesusmi paykunamanta nirqan kˈanchashaq lamparantin suyashaq kamachikuna kasqankuta, paykunan casarakuymanta patronninkuq kutimpunanta suyasharqanku (Luc. 12:32, 35, 36). Chaytaqmi yuyarichiwanchis 10 sipaskunamanta willakuyta. Paykunaqa kˈanchashaq lamparantinmi listo suyashananku karqan noviota. Pablopas akllasqa cristianokunatan tupachirqan doncella sipaskunawan (2 Cor. 11:2). Chaykunan rikuchiwanchis 10 sipaskunamanta willakuyqa akllasqa cristianokunapaq kasqanta.

5. a) ¿Haykˈaqmi 10 sipaskunamanta willakuy huntˈakunan karqan? b) ¿Imaynapin chayta yachanchis?

⁵ ¿Haykˈaqmi 10 sipaskunamanta willakuy huntˈakunan karqan? Tukukuy pˈunchaykunapi, manchay ñakˈariy tiempopiwan. ¿Imaynapin chayta yachanchis? Jesusmi chay willakuyta tukunanpaq nirqan: ‘Noviotaq chayamurqan’, nispa (Mat. 25:10). Jesuspa chayamusqanmantan 8 kutita Mateo 24, 25 capitulokuna willan, chaytan estudiarqanchis 15 julio 2013 Qhawaq revistapi. Chaypin yacharqanchis Jesusqa manchay ñakˈariy tiempo tukukunanpaqña kashaqtin chayamunanta,  chayamuspataq millay runakunata wañuchinqa. Chayraykun 10 sipaskunamanta willakuyqa huntˈakunqa tukukuy pˈunchaykunapi, manchay ñakˈariy tiempopiwan.

6. ¿Imatan Jesús yachachiyta munarqan 10 sipaskunamanta willaspa?

⁶ Chhaynaqa, ¿imatan Jesús yachachiyta munarqan 10 sipaskunamanta willaspa? Chaypaq yachasun Mateo 24 textopi Jesuspa rimashasqanmanta. Chaypin willarqan huntˈaq kamachinmanta, paykunaqa akllasqa cristianokunamantan kanku, chay kamachin tukukuy pˈunchaykunapi cristianokunata pusarinan karqan. Chay kamachitan Jesús nirqan huntˈaq sonqollapuni kananpaq. Chay hinallatataqmi 10 sipaskunamanta willakuywanpas Jesusqa yachachiyta munarqan tukukuy pˈunchaykunapi kawsaq llapa akllasqa cristianokunata. Chay willakuywanmi paykunata nisharqan hanaq pachaman riyta munaspaqa makilla kashanankuta (Mat. 25:13). ¿Imaynatan chayman hina akllasqa cristianokuna kawsarqanku?

7, 8. a) ¿Imaynatan yuyayniyoq sipaskuna listo kasharqanku? b) ¿Imaynatan akllasqa cristianokuna alistakurqanku?

⁷ Jesusmi nirqan 10 sipaskunamanta willakuypi 5 mana yuyayniyoq kasqankuta. ¿Imarayku? Novioq chayamunanpaq mana listo kasqankurayku. Nillarqantaqmi 5 sipaskuna yuyayniyoq kasqankuta. Paykunaqa liston kasharqanku, ¿imaynata? Ñawpaqtaqa allintan alistakurqanku hinamantaq makilla kasharqanku. Llapallankun makilla kashananku karqan novio chayamuqtin chaskinankupaq, chaymi lamparankuqa tutantin kˈanchashanallan karqan. Yuyayniyoq sipaskunaqa lamparankuman aceiteta yapanankupaqmi sapaqta aparqanku, mana yuyayniyoq sipaskunataq mana apasqakuchu. Chhaynaqa, ¿imaynatan akllasqa cristianokuna alistakurqanku Jesuspa chayamunanpaq?

⁸ Paykunaqa Jesuspa chayamunankaman Jehová Diospa munayninta ruwashanallankupaq alistakurqanku. ¿Imakunatan chaypaq ruwarqanku? Imaymanatan saqerqanku manataqmi chaykunamanta pesapakunkuchu. Hinaspapas manaña kay pacha usqhayllachu tukukunan kaqtinpas, Jehová Diosta Jesustapas munakusqankuraykun huntˈaq sonqollapuni kanku. Chaymantapas manan kay pachaq ruwayninkunapichu afanakunku, imaynan runakunaqa qolqe maskhaypi, qhelli ruwaykunapi kashanku hinatachu. Paykunaqa willakuypi yuyayniyoq sipaskuna hinan listo kashanku novioq chayamunanta suyaspa, manaña usqhaychu novio chayamuqtinpas  pacienciawanmi suyashanku (Filip. 2:15).

9. a) ¿Imatan Jesús nirqan akllasqa cristianokunata? b) ¿Imatan akllasqa cristianokuna ruwarqanku “¡Novion hamushanña!” nisqa willakuyta uyarispa? (Willakuytawan qhaway.)

⁹ Hinaspapas yuyayniyoq sipaskunaqa makilla kasqankuraykun listo kasharqanku. Ichaqa Jesuspa nisqan hina, novio mana usqhamuqtinmi chunkantinku puñurqapusqaku. ¿Imatan chaywan Jesús nisharqan akllasqa cristianokunata? Maytaña munashankuman rikchˈasqalla kayta chaypas, puñurqonkumanmi. Yaqapaschá suyaspanku saykˈunkuman otaq mana tukuy yuyaychu kankuman. Chaymi akllasqa cristianokunaqa anchata kallpachakurqanku makilla kashanankupaq. ¿Imaynatan chayta ruwarqanku? Jesuspa willasqan hina, chunkantin sipaskunan rikchˈarirqanku “¡Novion hamushanña!” nisqa willakuyta uyarispa, ichaqa allin yuyayniyoq sipaskunallan makilla kasharqanku (Mat. 25:5, 6; 26:41). Chay hinallataqmi akllasqa cristianokunawanpas pasarqan. Llapankun uyarirqanku “¡Novion hamushanña!” nisqa willakuyta. ¿Imatan ruwarqanku chayta uyarispa? Jesuspa hamunanpaqña kashasqanta reparaspan makilla kasharqanku. * ¿Imapin 10 sipaskunamanta willakuy tukurqan?

10. ¿Imatan tapukusunman sipaskunaq rimanakusqankumanta?

¹⁰ Manaraq novio chayamushaqtinmi mana yuyayniyoq sipaskuna yuyayniyoq sipaskunawan rimanku, chaypin lamparankupaq aceiteta mañakunku, yuyayniyoq sipaskunan ichaqa mana qoyta munankuchu (leey Mateo 25:8, 9). Chay hinan pasanqa mana huntˈaq sonqo akllasqa cristianokunawanpas. ¿Haykˈaqmi chay pasanqa? Manchay ñakˈariy tiempopi manaraq Jesús juzgaq hamushaqtin. Chhaynaqa, ¿manachu huntˈaq sonqoyoq akllasqa cristianokuna paykunata yanapanqaku? Chay tiempopaqqa akllasqa cristianokunaqa sellasqañan kanqaku, chaymi manaña yanapayta atinqakuchu.

11. a) ¿Iman pasanqa manchay ñakˈariy chayamunanpaq kashaqtin? b) ¿Imatan yuyayniyoq sipaskuna mana yuyayniyoqkunata nirqanku, ima ninanmi chay?

¹¹ Manchay ñakˈariy chayamunanpaq kashaqtinmi llapa akllasqa cristianokuna hukpaqkama sellasqa kanqaku hanaq pachaman rinankupaq (Apo. 7:1-4). Ichaqa, ¿iman pasanqa mana huntˈaq sonqo akllasqa cristianokunawan? Manan sellasqachu kanqaku. Manchay ñakˈariy chayamuqtin pantasqa religionkuna thunisqa kaqtinmi admirakunqaku. Yaqapaschá chayraq reparanqaku Jesuspa chayamunanpaq mana listochu kashasqankuta. Chay ratopi yanapayta mañakuqtinku, ¿iman pasanqa? Chaypaq yuyarisun 10 sipaskunaq rimasqankuta. Mana yuyayniyoq sipaskunan aceiteta mañakurqanku yuyayniyoq  sipaskunamanta, ichaqa manan qoyta munarqankuchu aswanpas nirqankun rantiq rinankupaq. Chaywanqa nisharqanku mana yanapay atisqankutan.

12. a) ¿Imapin tarikunqaku mana sellasqa kaq akllasqa cristianokuna manchay ñakˈariy tiempopi? b) ¿Iman pasanqa mana yuyayniyoq sipaskuna hina kaq akllasqa cristianokunawan?

¹² ¿Imapin tarikunqaku mana sellasqa kaq akllasqa cristianokuna manchay ñakˈariy tiempopi? Manañan yanapayta chaskiyta atinqakuchu. Chhaynaqa, ¿iman pasanqa paykunawan? Chaypaq yuyarisun mana yuyayniyoq sipaskunata, aceite rantiq rinankukaman novio chayamurqan, “hinan listo kashaq sipaskunaqa casarakuyman haykurqanku. Punkutaq wisqˈakapurqan”. Chay hinan sucedenqa manchay ñakˈariy tukunanpaqña kashaqtinpas. Jesús chayamuspan huntˈaq sonqo akllasqa cristianokunata hanaq pachapi huñunqa (Mat. 24:31; 25:10; Juan 14:1-3; 1 Tes. 4:17). Chay qhepamanqa mana yuyayniyoq sipaskuna hina kaq akllasqa cristianokunaqa manañan hanaq pachaman haykunqakuchu. Yaqapaschá Jesusta rogakunqaku: “¡Wiraqocháy, wiraqocháy, kicharimuwayku!”, nispa. Paytaq ninqa: “Cheqaqtan niykichis, manan reqsiykichischu”, nispa (Mat. 7:21-23; 25:11, 12).

13. a) ¿Nisharqanchu Jesús askha akllasqa cristianokuna mana huntˈaq sonqo kapunankuta? b) ¿Imaynapin rikuchirqan Jesús akllasqa cristianokunapi confiasqanta? (9 paginapi dibujota qhaway.)

¹³ Chhaynaqa, ¿askha akllasqa cristianokunachu waqllipunqaku? ¿Chaytachu Jesús nisharqan? Manan. Chaypaq piensasun Mateo 24 textoq nisqanpi. Chaypin Jesusqa huntˈaq kamachita nirqan ama millay kamachiman tukupunanpaq. Chaywanqa manan nisharqanchu imachus huntˈaq kamachiwan pasananta, aswanpas anyashallarqanmi ama waqllipunanpaq. 10 sipaskunamanta willakuypipas chay hinatan nishallarqantaq. Jesusqa llapa akllasqa cristianokunatan anyasharqan. Imaynan 5 sipaskuna yuyayniyoq karqanku 5 sipaskunataq mana yuyayniyoq, chay hinatan akllasqa cristianokunapas decidinanku listochus, makillachus kanqaku icha manachus chayta. Apóstol Pablopas akllasqa cristianokunatan huntˈaq sonqolla kanankupaq anyallarqantaq (leey Hebreos 10:29, 39; tupachiy Deuteronomio 30:19). Chaywanpas Pabloqa confiarqanmi akllasqa cristianokuna huntˈaq sonqo kanankupi. Jesuspas confianmi akllasqa cristianokuna huntˈaq sonqo kanankupi, premionkuta chaskinankupipas; chaytan rikuchirqan 10 sipaskunamanta willaspa.

14. ¿Imaynapin wak ovejakunaq allinninpaq 10 sipaskunamanta willakuy?

¹⁴ Akllasqa cristianokuna makilla kanankupaqmi Jesusqa 10 sipaskunamanta willarqan. Chaywanpas wak  ovejakunaq allinninpaqwanmi (Juan 10:16). ¿Imaynapi? Jesusmi nirqan: “Qankunaman nisqaykunataqa, llapanmanmi nini: ¡Makilla kashaychis!”, nispa (Mar. 13:37). Jesusqa llapallanchis listo, makilla kashananchistan munan. Chaymi akllasqa cristianokuna hina ima ruwaymantapas predicacionta ñawpaqman churananchis. Manan haykˈaqpas mana yuyayniyoq sipaskuna hinaqa kananchischu, paykunaqa manan listochu kasharqanku, chaymi hukkunamanta aceiteta mañakurqanku. ¿Imatan chaymanta yachanchis? Manan ñoqanchisraykuqa pipas huntˈaq sonqoqa kanmanchu, nitaq rantinchispiqa listo makillaqa pipas kanmanchu; sapankanchismi chaykunataqa ruwananchis. Kay pachata Jesús juzgananpaq hamuspaqa, sapankanchismantan cuentata mañawasun. Chaymi listollapuni, makilla kashananchis.

15. ¿Imaraykun Cristo novianwan casarakusqan llapanchispa allinninchispaq?

¹⁵ Armagedón tukuytan akllasqa cristianokunaqa Cristoq novianman tukupunqaku, ¡maytachá chaywanqa kusikunqaku! (Apo. 19:7-9.) Ichaqa, kay pachapi tiyaqkunaq allinninkupaqwanmi. ¿Imaynapi? Cristo novianwan hanaq pachapi casarakuqtinmi kay pachapi tiyaqkunaqa ancha allin gobiernoyoq kapunqaku. Chayrayku, akllasqa cristianoña otaq wak ovejakunamantaña kanchis chaypas makilla kashasun. Chay hinapin Jehová Diospa bendicionninkunawan kusikusun.