1. ¿Imaraykun Jehová Dioswan amigontin kasqanchista cuidananchis?

JEHOVÁ DIOSWAN amigontin kasqanchisqa ancha valorniyoqmi, ichaqa Saqraq kamachisqan pachan t’aqawayta munawanchis, huchayoq runa kasqanchispas karunchawasunmanmi. Chaymi anchata cuidananchis Jehová Dioswan amigontin kasqanchista.

2. a) ¿Imataq amigontin kayri? (Willakuyta qhaway.) b) ¿Imatan ruwawaq Jehová Dioswan aswan amigontin kanaykipaq?

² ¿Amigoykichu Jehová Dios? ¿Imatan ruwawaq aswan amigontin kanaykipaq? Biblian nin: “Diosman asuykuychis, hinan payqa asuykamusunkichis”, nispa (Sant. 4:8). Chay textoq nisqan hina, Jehová Dioswan amigontin kayta munaspaqa kallpachakunaykin payman achhuykunaykipaq. * Jehová Diosman astawan achhuykuspaqa aswan amigontinmi kanki. Jesús hinataqmi sientekunki, paymi  nirqan: “Kachamuwaqniyqa cheqaqmi”, ‘ñoqaqa paytan reqsini’, nispa (Juan 7:28, 29). Ichaqa, ¿imatan ruwananchis Jehová Diosman achhuykunanchispaq?

3. ¿Imaynatan Jehová Dioswan parlasunman?

³ Diosman achhuykunanchispaqqa paywanmi parlashanallanchis. Huk amigonchis karupi tiyaqtinqa cartakunata apachinakuspa otaq telefonopin parlanchis. Ichaqa, ¿imaynatan Jehová Dioswan parlasunman? Payman orakuspan (leey Salmo 142:2). Paytaq Bibliawan kutichimuwanchis. Chaymi Bibliata sapa p’unchay leenanchis, leesqanchispitaq piensananchis, chhaynapin Jehová Diosta uyarisun (leey Isaías 30:20, 21). Chaykunata sapa p’unchay ruwaspaqa Jehová Dioswanmi aswan amigontin kasunchis, chaytan kay estudiopi yachasun.

4, 5. ¿Imaynatan Jehová Dios parlapayawanchis Bibliawan? Ejemplota willay.

⁴ Yachanchismi llapa runata Biblia yanapasqanta. Ichaqa sapankanchistan yanapawallanchistaq Diosman achhuykunanchispaq. Chaypaqmi ichaqa leesqanchis ratopi tukuy yuyay kananchis imatachus niwasqanchista entiendenapaq. Hinaspapas piensananchismi leesqanchisman hina imaynata kawsananchispi. Chaykunata ruwaspan Jehová Diospa parlapayawasqanchista uyarisunchis, yanapawasqanchista rikuspataq astawan payman achhuykusunchis amigon kananchispaq (Heb. 4:12; Sant. 1:23-25).

⁵ Ejemplopaq, Jesusmi nirqan: “Ama qhapaq kaykunata kay pachapi huñukuychischu”, nispa (Mat. 6:19, 20). ¿Imatan entiendenchis chay textota leespa? Sichus Jehová Diospaq tukuy atisqanchista ruwashanchis chayqa, ñoqanchiswan kusisqa kasqantan entiendenchis. Sichus reparanchis mana tukuy atisqanchistachu Diospaq llank’asqanchista chayqa, entiendenchismi Jehová Dios astawan ruwananchispaq rikuchiwashasqanchista. Chay hinata huk textota t’aqwisqanchismi Jehová Diosman astawan achhuykachiwasun.

6, 7. a) ¿Imaynan Jehová Dioswan kasun Bibliata astawan estudiaspa? b) ¿Imaraykun Bibliata estudiananchis?

 ⁶ Bibliata estudiaspaqa entiendenchismi imakunatachus ruwananchis kasqanta. Ichaqa Jehová Diostapas aswan allintan reqsinchis, munakuwasqanchisrayku imakunatachus ruwasqankunatapas yachallanchistaqmi. Chaykunata yachaspan astawan payta munakunchis, paypas astawan munakuwallanchistaq. Chay hinapin Jehová Dioswan aswan amigontin kanchis (leey 1 Corintios 8:3).

⁷ Bibliata estudiaspaqa imaymana allinkunatan yachanchis. Ichaqa, ¿chayraykullachu Bibliata estudiananchis? Manan. Aswanpas Jehová Diosta aswan allinta reqsinanchispaqmi estudiananchis. Jesuspunin nirqan wiñay kawsayta chaskinapaqqa Jehová Diosta allinta reqsinanchis kasqanta (leey Éxodo 33:13; Sal. 25:4; Juan 17:3). Chay hinapin Diosman astawan achhuykusunchis.

8. a) ¿Imatan wakin runakuna ninkuman Azariasta Diospa castigasqanmanta? b) ¿Imamantan mana iskayanchischu Jehová Diosta allinta reqsisqanchisrayku?

⁸ Sichus Jehová Diosta amigonchista hina qhawarinchis chayqa, manan iskayasunchu imaraykus imatapas ruwasqanmanta Biblia mana willaqtin. Yachasun rey Azariasmanta, payqa Judá llaqtamanta reymi karqan. Chay tiempokunapin pantasqa Dioskunata llaqtantin adorasharqanku paymi ichaqa mana, aswanpas Bibliaq nisqan hina “Diospa munayninman hinan chaninta ruwarqan” (2 Rey. 15:1-5). Chaywanpas Jehová Diosmi lepra onqoywan castigarqan, ¿imarayku? Chay textokunaqa manan willanchu. Wakinqa ninkumanpaschá mana chaninta Jehová Dios ruwasqanta. Ñoqanchismi ichaqa Jehová Diosta allinta reqsisqanchisrayku mana iskayanchischu ruwasqanmanta, payqa chanintapunin imatapas ruwan (Jer. 30:11). Manaña yachasunmanchu imaraykus Azariasta castigarqan chaypas, confianchismi Jehová Diospa chanin ruwasqanpi.

9. ¿Imaraykun Jehová Dios Azariasta castigarqan?

⁹ Huk textopin Biblia Azariasmanta astawan willawanchis, payqa Uzías sutiyoqmi kallarqantaq (2 Rey. 15:7, 32). Bibliapi 2 Crónicas libroq nisqan hina, Azariasqa Jehová “Diospa munayninman hinan ruwarqan”. Ichaqa willallantaqmi qhepamanqa hatunchakuqman tukupusqanta. Huk kutinmi sacerdotekunaq ruwanankuta ruwayta munarqan, hinan 81 sacerdotekuna hark’arqanku ama chayta ruwananpaq, ichaqa hatunchakuq kasqanraykun sinchita phiñakuspa mana kasurqanchu (2 Crón. 26:3-5, 16-21). Chaykunan allinta entiendechiwanchis imarayku Jehová Dios Azariasta castigasqanta.

10. a) ¿Imanaqtinmi mana llapantaraqchu yachananchis Jehová Diospa ruwasqanmanta? b) ¿Imaynapin confiasunman Jehová Diosqa chanin kaqtapuni ruwasqanpi?

¹⁰ Azariasmanta Bibliaq willasqanmi rikuchiwanchis imarayku Jehová Dios castigasqanta. Ichaqa manan Bibliapi llapa willakuykunachu willan imarayku imapas sucedesqanta. Chay kaqtin, ¿iskayanchischu Jehová Diospa chanin ruwasqanmanta icha confianchischu?  (Deut. 32:4.) Bibliaqa imatachus necesitanchis Jehová Diosta allinta reqsinanchispaq chaytan willawanchis, chay hinapi paypi confiananchispaq. Sichus allinta reqsisun munakusuntaq chayqa, manan llapantaraqchu yachananchis imarayku imatapas ruwasqanmanta. Ichaqa, ¿imaynapin confiasunman chanin kaqtapuni ruwasqanpi? Bibliata estudiaspan, chay hinapin Jehová Diospa amigonpuni kasunchis (Sal. 77:12, 13).

11-13. ¿Imaraykun confianchis Jehová Dios orakusqanchista uyarimusqanpi? (15 paginapi dibujota qhaway.)

¹¹ Jehová Diosman orakuspaqa paytan alabanchis, graciasta qonchis yanapaynintapas mañakunchis. Chhaynapin astawan payman achhuykunchis (Sal. 32:8). Cheqaq amigon kananchispaqmi ichaqa confiananchis orakuqtinchis pay uyarimuwasqanchispi.

¹² Wakin runakunan ninku: “Diosqa manan oracionkunata uyarinchu, aswanpas oracionqa sonqonchis thak kanallanpaqmi”, nispa. Nillankutaqmi: “Orakuyqa sasachakuyninchiskunapi allinta piensananchispaqmi yanapawanchis, chay hinapi ñoqanchis kikinchismanta chay sasachakuymanta lloqsinanchispaq”, nispa. Yaqapaschá oracionkunaqa chay hinata yanapawasunman, ichaqa Jehová Diosqa cheqaqpaqpunin  orakusqanchista uyarin. ¿Imaynapin chayta yachanchis?

¹³ Manaraq kay pachaman Jesús hamushaspan rikurqan, Jehová Dios runakunaq orakusqanman kutichimusqanta. Chaymi kay pachaman Jesús hamuspaqa, Jehová Diosman orakuspa willakuq imachus piensasqanta, imaynachus tarikusqantapas. Huk kutinmi tutantin orakurqan (Luc. 6:12; 22:40-46). Hinaspapas qatikuqninkunatan yachachirqan imaynata orakunankupaq. ¿Yanqachu Jesús tukuy chaykunata ruwanman karqan oracionkunata Dios mana uyarimushaqtin? ¿Manan riki? Chaymi rikuchiwanchis Jehová Diosqa orakusqanchista uyarimusqanta. Chaymi Jesusqa nirqan: “Yayáy, graciastan qoyki uyariwasqaykimanta. Ñoqaqa yachanin uyariwaqpuni kasqaykita”, nispa (Juan 11:41, 42). Ñoqanchispas confianchismi orakusqanchista Jehová Dios uyarimusqanpi (Sal. 65:2).

14, 15. a) ¿Imaraykun Jehová Diosman imatapunichus munasqanchismanta sut’ita mañakunanchis? b) ¿Imaynatan Carmen cristianata oracionkuna yanaparqan?

¹⁴ Yaqapaschá mana sut’itapunichu rikusunman orakusqanchisman Jehová Dios kutichimusqanta. Ichaqa imatapunichus munasqanchismanta sut’ita Jehová Diosman mañakusun chayqa, rikusunmi kutichimuwasqanchista. Chay hinapitaqmi amigonchista hinapuni qhawarisun. Sichus lliw llakikuyninchiskunata Jehová Diosman  sut’itapuni willakusun chayqa, astawanmi ñoqanchisman achhuykamuwasun.

¹⁵ Yachasun Carmen sutiyoq cristianamanta. * Paymi willakun llank’anayoq kashasparaq predicaq lloqsisqanta, ichaqa manapunis predicayqa gustaqchu. Jubilakusqan qhepamantaq precursora kapurqan umallin nisqanrayku. Ichaqa sapa p’unchaymi Jehová Diosman orakuq predicayta gustananpaq, ¿uyarirqanchu Jehová Dios? Arí. 3 watañan precursora kashan, predicaytaq anchata gustan. Tukuy tiempo predicacionpi kasqanrayku, cristianamasinkuna yanapasqankurayku imas kunanqa aswan allinta predican. Astawanqa Jehová Dioswanmi aswan amigontin kapun. Rikusqanchis hina, oracionkunan chay cristianata yanaparqan Jehová Dioswan aswan allin amigontin kapunanpaq.

16, 17. a) ¿Imatan ruwananchis sapa p’unchay aswan-aswanta Diospa amigon kananchispaq? b) ¿Imatan qatimuq estudiopi yachasun?

¹⁶ Atisunmanmi Jehová Diosman wiñaypaq achhuykuyta. Chaypaqmi ichaqa sapa p’unchay Bibliata estudiaspa payta uyarinanchis, sapa p’unchay orakuspataq paywan parlashanallanchis. Chayta ruwaspan, sapa p’unchay aswan-aswanta Dioswan amigontin kasunchis, yanapayninwantaq sasachakuykunata aguantasunchis.

¹⁷ Ichaqa, tukuy tiempo Diosman orakushaqtinchispas yaqapaschá sasachakuykunapiraq tarikushanchis. Chayraykupaschá Jehová Diospi manaña confiasunmanchu, yaqapaschá piensasunman orakusqanchista mana uyarimunanpaq. Tapukunchispaschá: “¿Amigonpaq hinaraqchu qhawariwashan icha manañachu?”, nispa. Chay hinata piensaspa, ¿imatan ruwasunman? Qatimuq estudiopi yachasun.