¿Imaynatan yachachiwaq iñiq t’aqapi qharikunata?
“Uyariwasqaykita yachachiy confiakuna iñiq runakunaman” (2 TIM. 2:2)
1. a) ¿Imatan Diosta serviqkuna ñawpa tiempomantaraq yacharqanku? b) ¿Imaraykun ancha allinpuni preparasqa kasqanchis? c) ¿Imatan kay estudiopi yachasun?
ÑAWPA tiempomantapachan Jehová Diosta serviqkunaqa yacharqanku allin preparasqa runakunawan imatapas ruwayqa allinpipuni tukusqanta. Chaymi pasarqan Abrahamwan, payqa allin preparasqa qharikunawanmi maqanakuq rirqan, Lot sobrinonta enemigonkunamanta kacharichimuq (Gén. 14:14-16). Davidpa tiemponpipas allin preparasqa qharikunan Jehová Diospaq takiqku (1 Crón. 25:7). Kay tiemponchispi preparasqa kasqanchisqa ancha allinpunin, ¿imarayku? Saqrawan kamachisqan pachawan maqanakusqanchisrayku, Jehová Diosmanta willamunanchis kasqanrayku ima (Efes. 6:11-13; Heb. 13:15, 16). Chaymi ñawpa tiempopi Diosta serviqkuna hina allin preparasqa kananchis. Umallikunamanmi Jehová Diosqa encargarqan iñiq t’aqapi qharikunata yachachinankupaq (2 Tim. 2:2). Kay estudiopin yachasun wakin umallikuna imaynata cristiano qharikunata yachachisqankumanta.
JEHOVÁ DIOSTA ASTAWAN MUNAKUNANPAQ YACHACHIY
2. ¿Imatan umalli ruwanan iñiq t’aqapi qharikunata manaraq yachachishaspa, imarayku?
2 Umalliqa chakra llank’aq hinan. Chakra llank’aqqa manaraq muhuta tarpushaspan abonota allpaman churan, chhaynapi tarpusqan muhu allinta wiñananpaq. Chay hinallatataqmi umallikunapas ruwananku iñiq t’aqapi qharikunata yachachispa, abonowan hinan Bibliapi textokunawan kallpachananku. Chhaynapin yachachisqanman hina ruwanqa (1 Tim. 4:6).
3. a) ¿Imaynatan umalli rimapayanman iñiq t’aqapi cristianota Marcos 12:29, 30 textowan? b) ¿Imatan cristiano qhari ruwanman payrayku umalli mañakuqtin?
3 Ichaqa, ¿tukuy sonqonwanchu Diosta munakushan yachachisqayki cristiano? Chayta yachanaykipaqmi leewaqchis Marcos 12:29, 30 textota (leey). Hinamantaq tapuwaq: “¿Imakunatan ruwarqanki Diosman prometekusqaykimantapacha?”, nispa. Chaykunamanta rimaspan willawaq Jehová Diosta sonqomanta servinanpaq imakuna ruwananta. Chay qhepamanmi paywan kuska Diosman mañakuwaqchis, chaypin paypaq mañakuwaq Jehová Diosmanta santo espiritunta, chhaynapi iñiq t’aqapi ruwaykunata chaskispa hunt’ananpaq. Chaykunata uyarispaqa astawanchá iñiq t’aqapi llank’ayta munanqa.
4. a) ¿Bibliapi ima ejemplokunan yanapanman iñiq t’aqapi qharikunata astawan llank’anankupaq? b) ¿Imatan umallikuna ruwananku Francia nacionmanta umalliq nisqanman hina?
4 Cristiano qharita yachachinaykipaqqa Bibliapi wakin runakunamantan willawaq, chaykunan yanapanqa iñiq t’aqapi llank’aq kananpaq, confianapaq hina kananpaq, humilde kananpaqpas (1 Rey. 19:19-21; Neh. 7:2; 13:13; Hech. 18:24-26). Chaykunan plantapaq abono hina yanapanqa iñiq t’aqapi astawan yanapakunanpaq. Francia nacionmanta umallin nin: “Huk waynata iñiq t’aqapi ruwaykunata aparinanpaq preparaspaqa, ñawpaqtan Bibliaq nisqanman hina ruwananpaq yanapani. Chaymantapas Bibliapi ‘musphanakunata’ astawan entiendenanpaqmi textokunata leepuni, chhaynapin ‘ñawinta kicharinqa’”, nispa (Sal. 119:18). ¿Imakunatawanmi umallikuna ruwankuman iñiq t’aqapi qharikuna Jehová Diosta astawan munakunankupaq?
IMARAYKU YANAPAKUNANTA WILLAY
5. a) ¿Imaraykun parlarina qharikunaq iñiq t’aqapi imachus ruway munasqankumanta? b) ¿Imanaqtinmi wayna kasqankumantapacha iñiq t’aqapi qharikunata preparananku? (Willakuyta qhaway.)
5 Qharikunata tapuy iñiq t’aqapi imakunapi yanapakuy munasqankuta. Sichus mana piensarqankuchu imapi yanapakuyta chayqa, chaykunapi piensanankupaq yanapay. Willay imaynatas qan iñiq t’aqapi yanapakurqanki chayta, chaykunata ruwaspa kusikusqaykimantapas. Payqa reparananmi kusisqa chayta willasqaykita. África nacionmanta umallin nin: “Waynallaraq kashaqtiymi umalliy tapuwarqan imakuna ruway munasqayta. Chaymi yanapawarqan Jehová Diosta tukuy yuyaywan servinaypaq”, nispa. Askha umallikunan iñiq t’aqapi qharikunata wayna kasqankumantapacha prepararqanku, qanpas iñiq t’aqaykipi waynakunamanmi ruway atisqankuman hina llank’aykunata qowaq. ¿Imapin chay yanapanqa? Chay ruwaykunapi yuyayninkuta churaspankuqa wiñaspankun manaña huk ruwaykunapi kanqakuchu (leey Salmo 71:5, 17). *
Yachachisqayki iñiqmasita niy imachus ruwananta, imarayku ruwananta hinamantaq ruwasqanmanta “kusa” niy (5-8 parrafokunata qhaway)
6. ¿Imatan Jesús ruwarqan apostolninkunata yachachinanpaq?
6 Iñiq t’aqapi qharikuna astawan llank’anankupaqqa manan imachus ruwanallankutachu ninayki, aswanpas ninaykin imarayku ruwanankuta. Chay hinatan Jesuspas ruwarqan. Apostolninkunata predicanankupaq kamachispan ñawpaqta nirqan imarayku chayta ruwanankuta. Nirqanmi: “Diosmi qowarqan tukuy atiyta hanaq pachapipas kay pachapipas. Chayrayku, rispa llapa suyu runakunata yachachimuychis”, nispa (Mat. 28:18, 19). ¿Imaynatan Jesuspa ruwasqanta hina ruwawaq?
7, 8. a) ¿Imaynatan umallikuna qharikunata Jesús hina yachachinkuman? b) ¿Imaraykun “kusa” nispa ninanku? c) ¿Imakunapiwanmi umallikunata yanapanman qharikunata yachachinankupaq? (Qhaway “ Qharikunata yachachinapaq” nisqa recuadrota.)
7 Qharikunata iñiq t’aqapi imatachus ruwanankupaq nispaqa, Bibliawanmi willanayki imarayku chay ruway importante kasqanta. Chhaynapin yachachinki Bibliaq nisqanman hina imatapas ruwananpaq, manataq nisqaykiraykullachu. Sichus huk waynata huñunakuna wasiq punkunta pichananpaq ninki chayqa, entiendechinaykin imarayku chay ruway allin kasqanta. Chaypaqmi kuska leewaqchis Tito 2:10 textota, chaymantan niwaq: “Huñunakuna wasi limpio kaqtinqa allin willakuykunatan sumaqta qhawarichinki. Hinaspapas huñunakuna wasiq punkunpi unuta pichanki chayqa, kurak iniqmasikunaq allinninpaqmi kanqa”, nispa. Chaykunata nisqaykin yanapanqa hukkunaq allinninpi astawan piensananpaq. Iñiq t’aqapi ruwaysikusqan hukkunaq allinninpaq kasqanta qhawarispan anchata kusikunqa.
8 Chaymantapas nisqaykita ruwasqanmanta “kusa” niy. Chay nisqaykiqa plantamanpas unuta hich’aykuwaq hinan. Chaymi yanapanqa iñiq t’aqapi astawan ruwaysikunanpaq (tupachiy Mateo 3: 17).
SASA YACHACHINA KAQTIN
9. a) ¿Iman wakin qhapaq nacionkunapi sasa? b) ¿Imaraykun wakin iñiqmasikunapaq mana importantechu Diosta serviy?
9 Wakin qhapaq nacionkunapiqa sasan iñiq t’aqapi ruwaykunata aparinankupaq qharikunata kallpachayqa, astawanqa 20 watayoqmanta 30 watayoqkama kaqkunata. 20 nacionkunamanta umallikunan ninku imarayku mana ruwaysikuy munasqankuta. Paykunataqa waynachallaraq kashaqtinkus tayta-mamanku mana kallpachasqakuchu Diosta astawan servinankupaq, astawan serviyta munaqtinkutaq hark’akusqaku. Aswansi kallpachasqaku universidadpi estudiaspa allin llank’anayoq kanankupaq. Chaysi chay iñiqmasikunaqa mana importantepaqchu Dios serviyta qhawarisqaku (Mat. 10:24).
10, 11. a) ¿Imaynatan umallikuna yanapankuman iñiq t’aqapi mana llank’ay munaq cristiano qharikunata? b) ¿Bibliapi ima textokunawanmi cristiano qharikunata kallpachankuman iñiq t’aqapi astawan yanapakunankupaq? (Willakuyta qhaway.)
10 Iñiq t’aqapi mana llank’ayta munaq cristianota llank’aysikunanpaq yachachiyqa sasan, ichaqa pacienciawanmi chay cristianota yanapasunman. Chakrata llank’aqqa yachanmi huk planta rectota wiñananpaq yanapanan kasqanta, ichaqa pisi-pisimantan chayta ruwan. Chay hinallatataqmi umallipas ruwanan, pisi-pisimantan chay cristianota yanapanan iñiq t’aqapi llank’ananpaq. Umallikuna, ¿imaynatan chayta ruwawaqchis?
11 Chaypaqqa tiempota hap’ispan amigon kanayki. Niwaqmi iñiq t’aqapi yanapayninta necesitasqaykita, Bibliapi textokunatan leepuwaq chay hinapi Diosman prometekusqanta yuyarinanpaq (Ecl. 5:4; Is. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5). Hinaspapas sonqonman chayanaykipaqmi kaykunata tapuwaq: “¿Imatan Jehová Diosman prometerqanki bautizakunaykipaq? ¿Imaynan Jehová Dios sientekurqan bautizakusqaykiwan? (Prov. 27:11.) ¿Imaynan Saqra sientekurqan bautizakusqaykiwan?”, nispa (1 Ped. 5:8). Chay hina textokunata leespan cristiano qharikunata kallpachanki iñiq t’aqapi astawan yanapakunankupaq (leey Hebreos 4:12). *
WAYNAKUNA HUNT’AQ SONQO KAYCHIS
12, 13. a) ¿Imaynan Eliseo karqan Eliaspa yachachisqan tiempopi? b) ¿Imaynatan Jehová Dios Eliseota bendecirqan hunt’aq sonqo kasqanmanta?
12 Qankunari waynakuna, ¿imatan ruwawaqchis Diosta astawan servinaykichispaq? Qankunataqa anchatapunin iñiq t’aqaykichis necesitasunkichis, chayrayku yachasun ñawpa tiempopi Diosta serviq Eliseomanta.
13 Eliseo waynatan profeta Elías nirqan yanapaqnin kananpaq. Eliseotaq mana iskayaspa aceptarqan, hinaspan Eliasta yanaparqan imachus necesitasqanpi, tukuy tiempotaq hunt’aq sonqo karqan (2 Rey. 3:11). Eliseoqa 6 watan Eliaspa yachachisqan karqan. Israel llaqtapi llank’ayninta tukunanpaqña kashaspan Eliasqa Eliseota nirqan ripunanpaq libre kasqanta, paymi ichaqa 3 kutipi nirqan mana ripuy munasqanta. Eliseoqa decidisqan kasharqan Eliasta yanapashanallanpaq, chaymi Jehová Dios bendecirqan. ¿Imaynata? Rikurqanmi Eliasta “muyuq wayrapi” Dios hoqaripusqanta (2 Rey. 2:1-12).
14. a) ¿Imaynatan waynakuna Eliseoq ruwasqanta hina ruwankuman? b) ¿Imaraykun waynakuna hunt’ananku ruwaykuna chaskisqankuwan?
14 Qanpas wayna, Eliseo hina llank’aykuna chaskisqaykiwan hunt’ay manaña sinchi importante llank’aychu kaqtinpas. Yachachiqniyki umalliqa amigoykin, chaymi mana manchakunaykichu aswanpas paypin confianayki. Hinaspapas agradecekuy yachachisqasuykimanta, willaytaq astawan yachay munasqaykita. Astawanqa hunt’aq sonqon kanayki, ruwaykuna qosqasuykitataq ruwanayki. Chay hinapin umallikunaqa rikunqaku iñiq t’aqapi ruwaykunata aparinaykipaq Jehová Dios munasqanta (Sal. 101:6; leey 2 Timoteo 2:2).
UMALLIKUNATA RESPETAY
15, 16. a) ¿Imaynatan Eliseo yachachiqninta respetarqan? (9 paginapi dibujota qhaway.) b) ¿Imaraykun wakin profetakuna Eliseopi confiarqanku?
15 Eliseoq ruwasqankunan rikuchin umallikunata respetanayki kasqanta, paykunaqa ancha experienciayoqmi kanku. Jericó llaqtapi profetakunata visitasqanku qhepamanmi, Eliaswan Eliseowan Jordán mayuman rirqanku. Chaypin Eliasqa “capanta k’uyurqan, hinaspa chaywan mayuta waqtaykurqan, chaymi unuqa iskay ladoman t’aqakurqan, iskayninkutaq ch’akinta chimparqanku”. Hinamantaq iskayninku purirqanku, chaypin Eliseoqa Eliaspa llapa nisqanta tukuy yuyay uyarispa umanman churasharqan, payqa manan hatunchakuspachu yachaqman tukurqan. Chaymantataq Eliasta “muyuq wayrapi” Dios hoqaripurqan, chaymi Eliseoqa Jordán mayuman kutimuspa Eliaspa p’achanwan mayuta waqtarqan Jehová Diosmantataq waqyakurqan, hinan mayuqa yapamanta iskayman t’aqarikurqan (2 Rey. 2:8-14).
16 Eliseoq primer milagro ruwasqanqa kaqllan Eliaspa milagro ruwasqanwan karqan. ¿Imatan chaymanta yachasunman? Eliseoqa manan kay hinatachu piensarqan: “Kunanqa autoridadniyoqñataq kani chayqa huk hinamantañataq kay milagrota ruwasaq”, nispachu. Aswanpas Eliaspa ruwasqanta hinan ruwarqan, chaywanmi rikuchirqan yachachiqnin respetasqanta. Chayraykun wakin profetakunapas Eliseopi confiarqanku (2 Rey. 2:15). Eliseoqa Diospa qosqan atiywanmi Eliasmanta aswan askha milagrokunata ruwarqan 60 wata profeta kayninpi. ¿Imatan waynakuna chaykunamanta yachawaqchis?
17. a) ¿Imaynatan waynakuna Eliseoq ruwasqanta hina ruwankuman? b) ¿Imatan waynakuna tiempowan ruwankuman?
17 Manan iñiq t’aqapi ruwaykunata chaskispayki hinachu cambiokunata ruwanayki, aswanpas yachachiqniykiq ruwasqanta hinan ruwanayki, paykunaqa Bibliaq nisqanman hinan imatapas ruwanku. Hinaspapas cambiokunaqa manan munasqanchisraykullachu kanan, aswanpas iñiq t’aqaq necesitasqanman hinan otaq hunt’aq kamachiq nimusqanman hina. Eliseoqa yachachiqninpa ruwasqanman hinan ruwarqan, chaymi profetamasinkuna paypi confiarqanku. Qanpas wayna, yachachiqniyki umalliq ruwasqanman hina ruway, chay hinapin chay umallita respetashanki iñiqmasikunataq qanpi confianqaku (leey 1 Corintios 4:17). Tiempowanqa aswan allintan iñiq t’aqapi ruwaykunata aparinki aswan allintataq yachanki ima cambiokunachus iñiq t’aqaq allinninpaq ruwakunan kasqanta, chhaynapin hunt’aq kamachiq nisqanman hina iñiq t’aqayki ñawparinqa. Tiempowanqa yaqapaschá yachachiqniyki umalliq ruwasqankunamantaqa ‘aswantaraq’ ruwanki, imaynan Eliseopas ruwarqan hinata (Juan 14:12).
18. ¿Imaraykun cristiano qharikunata iñiq t’aqapi ruwaykunata aparinankupaq usqhaylla yachachina kashan?
18 Kay revistapi yachachikuykunaqa maytachá umallikunata yanapanqa, chay hinapi tiemponkuta horqospa cristiano qharikunata yachachinankupaq. Diostataqmi mañakuyku cristiano qharikunapas iñiq t’aqapi ruwaykunata aparinankupaq kallpachakunankuta. Chaykunan pachantinpi iñiq t’aqakunata iñiyninkupi qaqata sayachinqa. Hinaspapas sapankanchistan yanapawasun kay tukukuy p’unchaykunapi hunt’aq sonqolla Diospaq kananchispaq.
^ par. 5 Sichus iñiq t’aqapi wayna allin yuyayniyoq, humilde, iñiq t’aqapi yanapakunanpaq hina chayqa, manaña 20 watanpiraqchu kanman chaypas atinmanmi yanapakuq qhari kayta (1 Tim. 3:8-10, 12; qhaway 1 julio 1989 La Atalaya revistata, 29 paginata).
