1-3. ¿Imaraykun Pablo confiarqan Jehová Diospa yanapananpi? (Kay paginapi dibujota qhaway.)

ROMA llaqtapi tiyaq cristianokunaqa sasa tiempokunapin kawsarqanku. Roma llaqtayoqkunan wañuchinankupaq qatiykachaqku. Yanqamantan kay hinata tumpaqku: “Runa cheqnikuqkuna, llaqta kanaykuqkuna”, nispa. Askha cristianokunatan carcelkunapi wisq’aqku, maynintaq leonkunaq mikhunanpaq wikch’uyuqku. Wakintaqa k’aspipin warkuqku, wakintataq kawsashaqta ninawan kanaykuqku llaqtata k’anchananpaq. Chay tiempopi cristianokunaqa yacharqankun mayqenninkupas chay hinapi tarikunankuta.

² Chay sasa tiempokunapin apóstol Pablota presota hap’irqanku. Yaqapaschá payqa piensarqan cristianomasinkuna yanapaq rinankupi. Ñawpa kutipiqa manan pipas yanapaykuq rirqanchu sasachakuypi tarikushaqtin. Paymi ichaqa nirqan Jesuswan Jehová Dios yanapasqanta, kallpachasqantapas. Nirqanmi “leonpa siminmanta” salvasqa kasqanta (2 Tim. 4:16, 17). *

 ³ Pabloqa tukuy sonqonwanmi Jehová Diospi confiarqan, ¿imarayku? Ñawpa kutikunapi Jehová Dios yanapasqanrayku. Payqa manan iskayarqanchu ima sasachakuytapas aguantananpaq Jehová Dios kallpata qonanpi. Chaymi nirqan: “Señormi tukuy mana allinkunamanta qespichiwanqa”, nispa (2 Tim. 4:18). Manaña iñiqmasinkuna yanapayta atinkumanchu karqan chaypas, payqa Jehová Diospa, Jesuspa yanapananpin anchatapuni confiarqan.

4, 5. a) ¿Pin yanapawasun sasachakuykunapi tarikuqtinchis? b) ¿Imaynapin Jehová Diosman astawan achhuykuwaq?

⁴ Yaqapaschá sinchi sasachakuypi tarikuspayki mana piniyoq, mana piqpa yanapasqan tarikurqanki. Chaymi kanman llank’anaykimanta wikch’usuqtiykiku, escuelapi problemakuna kaqtin otaq onqosqa tarikuqtiyki. Sinchi llakisqachá tarikurqanki mana pipas yanapaykusuqtiyki. Ichaqa kallantaqmi runaq mana allichanan sasachakuykuna, ¿imatan ruwawaq chhaynapi tarikuspa? Jehová Diospin confianayki (Prov. 3:5, 6). Ichaqa, ¿imanaqtinmi Jehová Diospi confiawaq? Ñawpa tiempokunamantapacha serviqninkunata yanapasqanraykun, chay willakuykunan Bibliapi tarikun.

⁵ Sichus sasachakuypi tarikushaqtiyki mana pipas yanapaykusunkichu chayqa, ama llakikuychu. Pablo hina Jehová Diospi confiay, payqa sasachakuykuna kaqtinmi astawanraq Diospi confiarqan. Hinaspapas sasachakuykuna kaqtinmi sut’ita rikunki Jehová Diospa cuidasqasuykita. Chaykunan yanapasunki Jehová Diospi astawan confianaykipaq, payman astawan achhuykunaykipaqpas.

6. ¿Imaraykun mana facilchu Jehová Diospi confiay sinchi sasachakuypi tarikuqtinchis?

⁶ Yaqapaschá sinchi sasachakuypi tarikuspa llakisqa kashanki. Sichus tukuy imaymanataña ruwarqanki chay sasachakuymanta lloqsinaykipaq, Jehová Diosmantaq mañakurqanki yanapanasuykipaq chayqa, amaña llakikuyñachu, Jehová Diospi confiay (leey Salmo 62:8; 1 Pedro 5:7). Jehová Diospa amigonpuni kayta munanki chayqa, paypin confianayki. Yaqapaschá chay ruwayqa mana facilchu kanqa, ¿imarayku? Mayninpi mana kaq ratu mañakusqanchisman kutichimusqanrayku (Sal. 13:1, 2; 74:10; 89:46; 90:13; Hab. 1:2).

7. ¿Imaraykun mayninpi Jehová Dios mana kaq ratupunichu mañakusqanchisman kutichimun?

⁷ ¿Imaraykun mayninpi Jehová Dios mana kaq ratuchu mañakusqanchisman kutichimun? Chayta entiendenapaq yuyarisun Jehová Diosqa huk tayta hina kasqanta, ñoqanchistaq wawankuna hina kanchis (Sal. 103:13). Taytakunaqa manan lliw mañakusqankutachu wawankuman qonku, qoyta piensaspataq  mayninpi mana kaq ratupunichu qonku. ¿Imanaqtin? Wawakunaqa huk ratullan imatapas munanku hinamantaq manaña munankuchu. Chaymantapas taytakunaqa yachankun imachus wawankupaq allin, imataqchus mana chayta. Sichus wawankuman kaq ratu qonkuman lliw mañakusqankuta chayqa, wawankuq esclavonmi kankuman. Hinaspapas taytakunaqa yachankun imatachus wawanku necesitasqanta, ima ratupichus qonankutapas. Jehová Diospas kaqllataqmi. Payqa anchatan munakuwanchis, chaymi yachan imachus necesitasqanchista, yachantaqmi ima ratupichus chay qowasqanchis allinninchispaq kasqantapas. Chaymi pacienciawan suyakunanchis (tupachiy Isaías 29:16; 45:9).

8. ¿Imatan Jehová Dios prometewanchis?

⁸ Hinaspapas Jehová Diosqa yachanmi maykama aguantay atisqanchista (Sal. 103:14). Payqa kallpachawasunpunin. Yaqapaschá ima sasachakuytapas manaña aguantayta atisunmanchu, chay hinapi tarikuqtinchisqa Jehová Diosmi kallpata qowasun aguantananchispaq, chaytan payqa prometewanchis (leey 1 Corintios 10:13). Chaymi paypi confiananchis chay hinapin thak kasunchis.

9. ¿Imatan ruwananchis Jehová Dios mañakusqanchisman mana kaq ratu kutichimuqtin?

⁹ Sichus Jehová Dios mañakusqaykita mana kaq ratuchu kutichimun chayqa, pacienciawanmi suyakunayki. Payqa liston kashan yanapawananchispaq, ichaqa ima ratupis aswan allin kanman kutichimunanpaq, chaytan suyan. Biblian niwanchis Jehová Diosqa chanintapuni ruwaq Dios kasqanrayku khuyapayawananchispaq, yanapawananchispaq pacienciawan suyasqanta. Nillantaqmi paypi confiaqkunaqa ancha kusisqa kasqankuta (Is. 30:18).

10-12. a) ¿Imaraykun mana facilchu onqosqa familiata cuiday? b) ¿Imaynan tarikunki sasachakuy tiempokunapi Jehová Diospi confiasqaykirayku? Juana cristianamanta willay.

¹⁰ Yaqapaschá sinchi sasachakuypi tarikuspa Pablo hina “leonpa siminmanta” salvasqa kanaykipaq mañakushanki (2 Tim. 4:17). ¿Imatan ruwawaq? Jehová Diospin confianayki. Yaqapaschá onqosqa familiaykita cuidashanki, chay hinapi tarikuspaqa Jehová Diosta mañakuy kallpachanasuykipaq, imatapas allinta decidinaykipaq. * Chayta ruwaspataq thak kanayki, Jehová Diosqa entiendenmi imaynapichus tarikusqaykita. Payqa yanapasunkipunin aguantanaykipaq, hunt’aq sonqolla kanaykipaqpas (Sal. 32:8).

 ¹¹ Onqosqa familiata cuidayqa manan facilchu. Yaqapaschá astawan sasachakuypi tarikuspa niwaq: “Manan Jehová Dios yanapawanchu”, nispa. Manapaschá medicokuna decidikunkuchu imaynata familiaykita hampinankupaq. Otaq familiaykikunaq llakipayananta suyasharqanki ichaqa aswantaraq ch’aqwata sayarichirqanku. Chay hinapi tarikuspaqa, Jehová Diosmanta kallpata mañakushallay aguantanaykipaq, astawantaq payman achhuykuy (leey 1 Samuel 30:3, 6). Chay qhepaman Jehová Diospa yanapasqasuykita rikuspaqa, astawanmi paywan amigontin kanki.

¹² Chaypaq yachasun Juana cristianamanta. * Paymi tayta-mamanta wañukapunankukama cuidarqan. Paymi willakun paypas, qosanpas, turanpas imayna tarikusqankumanta, ninmi: “Manan ima ruwaytapas atiqchu kayku. Manañan ima kaqtinpas aguantayta atirqaykuchu. Tiempoq pasasqanmanmi ichaqa sut’ita rikurqayku Jehová Diospa yanapawasqankuta, paymi kallpachawarqanku pisipanaykuña kashaqtin”, nispa.

13. ¿Imaynatan Rosata yanaparqan Jehová Diospi confiasqan?

¹³ Sichus tukuy sonqonchiswan Jehová Diospi confiasun chayqa, paymi yanapawasun sinchi sasachakuykuna kaqtin aguantananchispaq. Chaymi pasarqan Rosa sutiyoq cristianawan. Paypa qosanqa manan Testigochu hinaspan t’aqanakusharqanku. Chayllamanmi turan yacharurqan mana hampiy atina onqoywan kashasqanta, pisi killakunallamantaq cuñadan wañupurqan. Sinchi llakisqan Rosaqa kasharqan chaywanpas aswan allinña tarikuspan precursora karqan, ichaqa mamanñataqmi wañupurqan. ¿Iman yanaparqan aguantananpaq? Sapa p’unchay Jehová Diosman orakusqanmi, imachallapaqpas Dioswanqa parlariqpunin. Paymi willakun Jehová Diosqa cheqaq amigonman tukupusqanta, hinaspapas Jehová Diospin confiarqan manan pay kikinpichu nitaq runakunapichu. Rosaqa sut’itan rikurqan Jehová Diospa yanapayninta, manan imanpas faltarqanchu. Jehová Dioswanpas kuska llank’ashankuman hinan sientekurqan.

14. ¿Imaynatan Jehová Dios yanapasunkiman iñiq t’aqamanta familiayki qarqosqa kaqtin?

¹⁴ Kallantaqmi huk mana aguantanapaq hina sasachakuypas. Chaymi familianchis iñiq t’aqamanta qarqosqa kaqtin. Biblian kamachiwanchis qarqosqakunawan ama rimananchispaq (1 Cor. 5:11; 2 Juan 10). Ichaqa anchatan familianchistaqa munakunchis, chaypaschá sinchi sasa kanman Diospa kamachisqanta kasukuy. ¿Imaynatan Jehová Dios yanapasunkiman? Kallpatan qosunki hunt’aq sonqolla kanaykipaq, kasukunaykipaqpas. Chhaynaqa Jehová Diospi  confiaspa astawan payman achhuykuy.

15. ¿Imaraykun Adán mana kasukurqanchu Jehová Diosta?

¹⁵ Chay sasachakuytan comparasunman Adanpa ruwasqanwan. Adanqa yacharqanmi hark’asqa frutata mikhuspaqa wañunanta, paytaqa manan Saqraqa engañarqanchu. Biblian nin: “Manataqmi Adanchu q’otusqa karqan”, nispa (1 Tim. 2:14). Chhaynaqa, ¿imanaqtinmi mikhurqan? Evata munakusqanraykun. Jehová Diosmantaqa astawanraqmi esposanta munakurqan (Gén. 3:6, 17). ¿Imatan chaymanta yachasunman?

16. ¿Pitan astawanqa munakunanchis, imarayku?

¹⁶ Adanta sucedesqanmi rikuchiwanchis pimantapas astawanqa Jehová Diosta munakunanchis kasqanta (leey Mateo 22:37, 38). ¿Imarayku? Familianchispaq allin kasqanrayku, Jehová Diostaña servinkuman icha manaña chaypas. Chayrayku anchatapuni kallpachakuy Jehová Diosta munakunaykipaq, sapa p’unchay paypi confianaykipaqpas. Sichus familiaykiq iñiq t’aqamanta qarqosqa kasqan llakichishasunki chayqa, Jehová Diosman willakuy * (Rom. 12:12; Filip. 4:6, 7). Sonqo nanayña kanman familiaykiq chay hinapi tarikusqan chaypas, Jehová Diosman astawan achhuykuy. Chay hinapin paypi astawan confianki, kasukusqaykiraykutaq aswan allin imapas kasunki.

17. ¿Imatan Jehová Dios ruwanqa predicacionpi tukuy tiempo llank’aqtinchis?

¹⁷ ¿Imanaqtinmi Jehová Dios Pablota salvarqan “leonpa siminmanta”? Predicashanallanpaq, ruway qosqanta hunt’ananpaqwan (2 Tim. 4:17). Ñoqanchismanpas Jehová Diosqa predicación llank’aytan qowarqanchis, payqa llank’aysiqmasinkunata hinan qhawariwanchis (1 Cor. 3:9; 1 Tes. 2:4). Sichus predicacionpi tukuy tiempo llank’asun chayqa, Jehová Diosmi lliw necesitasqanchista qowasun (Mat. 6:33). Hinaspapas pacienciawanmi suyakusun mañakusqanchisman kutichimunanta.

18. ¿Imakunatan ruwananchis Jehová Diospi confiananchispaq, aswan amigontin kananchispaqpas?

¹⁸ Jehová Dioswan aswan amigontin kanaykipaq kallpachakuy. Sasachakuykunapi tarikuspataq Jehová Diosman astawan achhuykuy. Sapa p’unchay Bibliata leey, leesqaykipi piensanaykipaqtaq tiempota t’aqay. Jehová Diosman orakushallay, tukuy tiempotaq predicashallay. Sichus chaykunata ruwanki chayqa, Jehová Diosmi yanapasunki sasachakuykunata aguantanaykipaq, kunanpas hamuq tiempopipas.