“Magog hallp’amanta Gog” nisqa sutitan askha watakuna qelqanchiskunapi nimurqanchis “Saqran” nispa. Piensarqanchismi hanaq pachamanta wikch’uchikamusqan qhepaman chay sutiyoq kananpaq. ¿Imaraykun chay hinata nirqanchis? Apocalipsis libropi nisqanraykun, chaypin willan Diospa llaqtanman Saqra phawaykunanmanta (Apo. 12:1-17). Chaymi piensarqanchis Gogqa Saqraq huknin kaq sutin kananpaq.

Ichaqa manan chay hinachu kasqa. ¿Imaraykun chayta ninchis? Biblian willan Jehová Dios Gogta wañuchispa aychankunata imaymana phalaq animalkunaman, salqa animalkunamanwan qaraykunanta (Ezeq. 39:4). Jehová Diosmi nillarqantaq: “Chay p’unchaypin Israelpi huk cheqasta Gogman qosaq p’ampasqa kananpaq”, nispa (Ezeq. 39:11). Ichaqa Saqraqa espiritun, chaymi animalkunaqa mana mikhuyta atinkumanchu nitaq p’ampasqa kaytapas atikunmanchu. Hinaspapas Bibliaqa sut’itan willawanchis Saqraqa chinkay-chinkay ukhupi 1.000 wata wisq’asqa kananta. Chhaynaqa manan Saqraqa animalkunaq mikhusqanchu kanqa nitaqmi p’ampasqachu kanqa (Apo. 20:1, 2).

Chaymantapas Biblian nin: “Chay waranqa wata hunt’akuqtintaqmi saqraqa preso kasqanmanta kacharisqa kanqa. Hinan payqa lloqsimunqa kay pachaq tawantin ladopi kaq llapan suyukunata q’otunanpaq. Chay suyukunaqa Gogwan Magogwanmi. Saqran paykunata q’otuspa huñuykunqa hatun awqa-tinkuyman”, nispa (Apo. 20:8). Sichus Gog kanman Saqra chayqa, manan pay kikintaqa q’otukunmanchu. Chayraykun ninchis “Gogqa manan Saqrachu”, nispa.

Chhaynaqa, ¿pitaq “Magog hallp’amanta Gog” nisqari? Chayta yachanapaq Bibliaq nisqanta allinta entiendesun. Ezequielmi willan Diospa llaqtan contra Gogpa phawaykunanta, Danielpas willallantaqmi “Siria suyu rey” otaq wichay ladomanta rey Diospa llaqtan contra hatarinanta, Juanpas nirqanmi “kay pacha reykuna” Diospa llaqtan contra hatarinankuta (Ezeq. 38:2, 10-13; Dan. 11:40, 44, 45; Apo. 17:14; 19:19). Yaqachus hina paykunaqa hukllamanta rimasharqanku, ichaqa huk sutikunawan. Biblian willan Diospa llaqtan contra huk kutillata llapa nacionkuna hatarinankuta chhaynapitaq Armagedón qallarinanta (Apo. 16:14, 16).

Chay textokunawanmi entiendenchis “Magog hallp’amanta Gog” nispa Bibliaq nisqanqa mana Saqramantachu rimashasqanta, aswanpas askha nacionkunamanta rimashasqanta.  ¿Pin diriginqa chay nacionkunata? Manan yachanchisraqchu, yaqapaschá ‘wichay ladomanta rey’ diriginqa. Jehová Diosmi Gogta nin: “Wichay lado karuy-karu suyuykimantapachan qanqa askha suyukunapiwan hamunki. Mana yupay atiy ejercitokunan qanwan hamunqa, llapankutaq caballopikama”, nispa (Ezeq. 38:6, 15).

Profeta Danielpas wichay lado reymantan chay hinata nillarqantaq: “Inti lloqsimuymanta, wichaymanta chayamuq willakuykunan payta mancharichinqa, hinaqtinmi k’arak phiñasqa puririnqa askhata mast’a pampata wañuchinanpaq. Reyqa tiyanan karpakunatan sayarichinqa lamar-qochawan Dios yupaychana wasiq kasqan ch’uya orqowan tupaypi, ichaqa chaypin payta wañuy hap’inqa, manataq pipas payta yanapaykunqachu”, nispa (Dan. 11:44, 45). Danielpa chay nisqanqa Gogmanta Ezequielpa nisqanmanmi parecikun (Ezeq. 38:8-12, 16).

¿Iman pasanqa Jehová Diospa llaqtan contra hatariqtinku? Daniel 12:1 texton nin: “Chay p’unchaykunapin llaqtaykita amachaq hatun kamachikuq Miguel sayarinqa”, nispa. Nillantaqmi: “Khuyay llaki-phutiy p’unchaykunan kanqa, manan hayk’aqpas hatun suyukunaq kasqanmantapacha chay hinaqa chay p’unchaykama karqanchu”, nispa. Chayqa manchay ñak’ariy tiempon. Chay textopin nillantaq: “Ichaqa chay p’unchaykunapin llaqtayki qespichisqa kanqa, Diospa qelqanpi llapa qelqasqa kaqkuna”, nispa. ¿Imatan chaywan nisharqan? Jesucriston 1914 watamantapacha rey kaspa defiendewananchispaq Armagedonpi maqanakunqa. Apocalipsis 19:11-21 texton chay hinaman parecikuqta willallantaq.

Ichaqa, ¿pitaqri Apocalipsis 20:8 textopi Gogwan Magogpiwanri? 1.000 wata qhepata Diospa contranpi kaq llapa runakunan, paykunan Diospa siervonkunaman phawaykunqaku. Chay runakunaqa Diospa llaqtantan cheqnikunqaku imaynan Magog hallp’amanta Gogpas cheqnikurqan hinata. Ichaqa Diosmi paykunatapas wañuchillanqataq imaynan ñawpa Gogtapas Armagedonpi wañuchirqan hinata (Apo. 19:20, 21; 20:9). Chaychá Bibliaqa 1.000 wata qhepaman Diospa contranpi kaq llapa runakunata nin “Gogwan Magogpiwan” nispa.

Jehová Diospa testigonkunaqa makillan kashanchis pichus wichay ladomanta rey kananpi. Ichaqa piña nacionkunata diriginqa ñoqanchis contra hatarinankupaq chaypas, manan iskayanchischu kaykuna sucedenanmanta: Magog hallp’amanta Gogpas ejercitonkunapas atipasqan kanqaku hinamantaq wañuchisqa, reyninchis Jesucriston salvawasun hinaspa mosoq pachata qowasun sumaq thak nisqa kawsakunanchispaq (Apo. 7:14-17).