JULIANMI nin: “Kurak waway iñiq t’aqamanta qarqosqa kasqanta uyarispaymi mana imanakuytapas atirqanichu, sinchi llakin ñit’irqowarqan. Esposaypas sinchitan waqaykuq ñoqataqmi mana imayna yanapayta atirqanichu. Wawayqa ancha allin waynan karqan, imatapas kuskan ruwaq kayku, ichaqa qonqayllamantan millayman tukupurqan. Chaymi mana entienderqaykuchu imaynapi chay hinaman wawayku tukupusqanta”, nispa.

Rikusqanchis hina pipas Diospa llaqtanmanta qarqochikuqtinqa, sinchitan llakikunchis. Chhaynaqa, ¿imaraykun nisunman “wanachiyqa munakuymi” nispa? ¿Imaraykun Biblia kamachin huchapakuqta qarqonankupaq?

Sichus bautizasqa Testigo hatun huchapi urmaspa mana pesapakunchu chayqa, Diospa llaqtanmantan qarqosqa kapun.

Jehová Diosqa yachanmi pantaq runa kasqanchista, chaywanpas kamachikuyninkunata hunt’ananchistan munan. Payqa manan munanchu qhelli huchapi purinanchista, suwakunanchista, idolokunata adorananchista, engañananchista, wañuchinanchista, layqakuykunapi purinanchistapas (1 Cor. 6:9, 10; Apo. 21:8).

Jehová Diospa kamachikuyninkunaqa allinninchispaqmi manataqmi sasa hunt’anachu. Kusisqan kanchis allin runakuna ukhupi kasqanchismanta, iñiqmasinchiskunaqa manan p’enqaypichu purinku aswanpas honradon kanku. ¿Imaraykun chhayna kanchis? Jehová Diospa kamachikuyninkunata kasukunanchispaq prometekusqanchisraykun. Chaytan ruwarqanchis bautizakusqanchis p’unchaypi.

Ichaqa, ¿iman pasanman bautizasqa Testigo hatun huchapi urmaqtin? Ñawpa tiempopin Diosta serviq wakin runakuna hatun huchakunapi urmarqanku,  chaywanpas Jehová Diosqa manan mana valeqpaq hinachu qhawaripurqan. Hukninmi karqan rey David, paymi wasanchay huchapi urmarqan runatataq wañuchirqan, Jehová Diosmi ichaqa perdonarqan (2 Sam. 12:13).

¿Imarayku? Tukuy sonqonwan huchanmanta pesapakusqanrayku (Sal. 32:1-5). Kunanpas sichus Jehová Diospa testigon hatun huchapi urman, hinaspa sinchitapuni pesapakuspa huchanta saqepun chayqa, manan qarqochikunchu (Hech. 3:19; 26:20). Ichaqa mana tukuy sonqomantachu pesapakun chayqa, juzgaq umallikunan Diospa llaqtanmanta qarqonanku.

Familianchista otaq amigonchista qarqoqtinkuqa, manan facilchu kanman umallikunaq decidisqankuta entiendeyqa. Piensasunmanpaschá nishupuni kananpaq, mana khuyapayakuq kanankupaq ima. Biblian ichaqa niwanchis Diospa llaqtanmanta qarqoyqa, munakuyta rikuchisqanta. ¿Imaynapi?

Jesusmi nirqan imapas decidisqa allinchus icha mana allinchus kasqanqa imaynapi tukusqanwan rikukusqanta (Mat. 11:19). ¿Imanaqtinmi allin mana pesapakuq runata qarqoy? Chaykunamanta yachasun.

Jehová Diospa sutin mana qhellichasqa kananpaqmi. Sichus huk wawa allinkunata ruwan chayqa, runakunan tayta-mamanmanta allinta rimanqaku, mana allinkunata ruwaqtintaq mana allinta rimanqaku. Chay hinallataqmi Jehová Dioswanpas pasan. Ezequielpa tiemponpin judío runakunata reqsiqku Jehová Diosta adoraqkunata hina (Ezeq. 36:19-23). Kay tiempopipas runakunaqa reqsiwanchis Jehová Diospa testigonkunata hinan (Is. 43:10). Chaymi Jehová Diostaqa kasukunanchis, chay hinapin runakunaqa allinta paymanta rimanqaku. Mana kasukuqtinchisqa millaytan paymanta rimanqaku.

Sichus huk Testigo qhelli huchapi purinman chayqa, runakunan Jehová Diosmanta millayta rimanqaku. Kasukuq kasun chaytaq sumaqta paymanta rimanqaku. Apóstol Pedron nirqan millay munapayaykunaman hina ama kawsananchista, aswanpas Diospa ch’uya kayninman hina ch’uyata kawsananchista (1 Ped. 1:14-16).

Sichus Jehová Diospa testigon mana allinkunata ruwan chayqa, huk runakunan rikunqaku. Qarqosqa kasqanta yachaspankun ichaqa rikunqaku Testigokunaqa Bibliaq nisqanman hinapuni kawsasqanchista, Diospa llaqtan ch’uya kasqantapas. Huk runan huñunakuna wasiman hamurqan Testigo kayta munaspa, paypa pananmi Testigo kasqa ichaqa qhelli huchata ruwasqanmantan qarqochikusqa, chaymi anchatapuni chay runaqa admirakurqan Testigokuna mana hinallatachu huchallikuq runakunata qhawasqankumanta.

Iñiq t’aqa limpio kananpaqmi. Apóstol Pablon Corinto llaqtapi iñiqmasikunata nirqan iñiq t’aqankupi hucha ruwaq runata amapuni hinallata qhawanankuta. ¿Imarayku? Chay runata qhawarispan wakin cristianokunapas mana allinkunata ruwankuman. Pablon chay hucha ruwaq runata compararqan t’antaq masanta poqochiq chhikan levadurawan. Chaymi cristianokunata kamachirqan chay runata iñiq t’aqamanta qarqonankupaq (1 Cor. 5:6, 11-13).

Chay runaqa mana p’enqarikuspan qhelli huchapi purisharqan, chayta rikuq wakin cristianokunataq allinpaq chay ruwasqanta qhawarisharqanku (1 Cor. 5:1, 2). Chay hawan wakin cristianokunaqa mana iñiq runakuna hina huchakunapi purinkuman  karqan. Kay tiempopipas chay hinan sucedenman sichus huchanmanta mana pesapakuq runata mana qarqokuqtinqa, wakin cristianokunan piensankuman Jehová Diospa kamachikuyninkunaqa mana sinchi importantechu kananpaq (Ecl. 8:11). Huchanmanta mana pesapakuq runakunaqa, barcokunata t’ikraq mayu ukhupi hatun rumikuna hinan kanku. Bibliaq nisqan hina, chay huchapakuqkunaqa cristianokunaq iñiynintan chiriyachinkuman (Jud. 4, 12).

Huchapakuq runa pesapakunanpaqmi. Jesusmi willarqan qhelli huchakunapi purispa llapa herencianta gastaq waynamanta. Tiempoq pasasqanmanmi chay waynaqa repararqan familianmanta karupi kawsayqa llakikunapaq kasqanta, chaymi pesapakuspa wasinman kutimpunanpaq decidikurqan. Cambiasqanta yachaspan taytanqa anchata kusikurqan, hinan yapamanta chaskipurqan (Luc. 15:11-24). Chaymi rikuchiwanchis pipas huchanmanta pesapakuqtinqa Jehová Dios kusikusqanta. Diosqa manan munanchu millay runakunaq wañunanta, aswanpas munan cambianankutan chhaynapi kawsanankupaq (Ezeq. 33:11).

Iñiq t’aqaqa huk familia hinan, chaymi pipas qarqosqa kaspaqa manaña chay familiamantachu kapun. Yaqapaschá yuyarinqa chay familiamanta kashaspaqa kusisqa kasqanta, Dioswan amigontin kasqantapas. Kunantaq ichaqa huchanrayku sapan tarikun, chaymi yuyayninta hap’ikuspa huchanmanta pesapakuspa Diospa llaqtanman kutimpunman.

Ichaqa, ¿imaynatan yanapasunman qarqosqa runa Diospa llaqtanman kutimpunanpaq? Chaypaqqa respetananchismi qarqosqa kananpaq umallikunaq decidisqankuta, kasukunanchistaqmi qarqosqakunamanta Bibliaq kamachisqanta. Chhaynapin munakusqanchista rikuchisun. Chayta entiendenapaq kay ejemplopi piensay: Iskay runakunan rit’i orqopi paseasqankumanta mana kutimpuyta atinkuchu, yanapayta suyanankukamataq hukninqa puñuywan aysachikapun. Compañeronqa yachanmi rit’i patapi amigon puñuqtinqa wañunanta, chaymi ch’aqlashaspalla rikch’achin. Chay ch’aqlasqanqa nananchá ichaqa wañuymantan salvanman. Davidpas allintan yacharqan wanachiyqa sonqo nanay kasqanta, ichaqa vidantan salvan. Chaychá nirqan: ‘Allinniypaqmi chanin runaq wanachiwasqanqa’, nispa (Sal. 141:5).

Qarqosqa kayqa rit’i patapi puñuq runata ch’aqlashaspalla rikch’achiy hinan. Huchallikuqta qarqosqankuqa huchanmanta pesapakuspa Jehová Diosman kutimpunanpaqmi yanapanqa. Chay hinatan Julianpa wawantapas yanaparqan. Paymi huchanta saqespa 10 watamanta Diospa llaqtanman kutimpurqan, kunantaq iñiq t’aqapi umalli kashan. Paymi nin: “Necesitarqanipunin wanachisqa kayta, chaymi yanapawarqan Diospa llaqtanmanta karunchakuyqa sinchi sonqo nanay kasqanta entiendenaypaq”, nispa (Heb. 12:7-11).

Sinchi llakikunapaqmi Diospa llaqtanmanta pipas qarqochikuqtinqa. Ichaqa atinmanmi Diosman kutimpuyta, chaypaqmi llapallanchis kasukunanchis qarqosqakunamanta Bibliaq nisqanta. ¿Imatan ruwasunman?

Umallikunaqa Jehová Dios hina munakuyniyoqmi kananku, astawanqa qarqosqa kananta huchallikuqman willananku kaqtin. Allintan entiendechinanku imatas ruwanman Diospa llaqtanman  kutimpunanpaq chayta. Sichus umallikuna reparanku tiempowan cambiasqanta chayqa, mayninpin visitananku imatachus ruwanman yapamanta Testigo kapunanpaq chayta yuyarichinankupaq. *

Familiakunaqa respetanankun umallikunaq decidisqankuta. Chay hinapin qarqochikuqtapas, iñiq t’aqatapas munakusqankuta rikuchinqaku. Julianmi nin: “Wawaytaqa munakushallarqanin, mana allin ruwasqankunan ichaqa hatun perqa hina paymanta t’aqawarqan”, nispa.

Iñiq t’aqamanta cristianokunapas respetanankun Jehová Diospa wanachisqanta. Chay hinapin rikuchinqaku qarqochikuqta munakusqankuta. Chaymi mana rimaynankuchu nitaq yanqa qasiqa kuska kanankuchu (1 Cor. 5:11; 2 Juan 10, 11). Qarqochikuqpa familianqa sinchi llakisqan kashanku, chaymi iñiqmasikunaqa munakuywan qhawarinanku, manan qarqosqata hinachu paykunataqa tratananku (Rom. 12:13, 15).

Julianmi nin: “Huchanmanta mana pesapakuqta Diospa llaqtanmanta qarqoyqa allinpunin, chaymi yanapawanchis Jehová Diospa kamachikuyninkunata respetanapaq. Sinchi sonqo nanayña chaypas qhepamanqa allinninchispaqmi. Sichus wawayta rimayshallayman karqan chayqa, manan hayk’aqpas kutimunmanchu karqan”, nispa.