1. ¿Imaynatan yayayku mañakuywan predicanchis?

ASKHA runakunan Bibliapi kaq yayayku mañakuyta yachanku. Ñoqanchisqa sapa kutillanmi chay mañakuywan predicanchis Diospa gobiernonmanta yachachinapaq, sumaq kawsayta apamunanta willanapaqwan. Chaymantapas yayayku mañakuywanmi rikuchinchis Diosqa sutiyoq kasqanta, chay suti ch’uya kasqanrayku respetana kasqanta (Mat. 6:9-13).

2. ¿Munarqanchu Jesús yayayku mañakuyta kuti-kutirispa rezakunanchista?

² Askha runakunan yayayku mañakuyta kuti-kutirispa rezakunku. Ichaqa, ¿chay ruwananchistachu Jesús munarqan? Manan, paymi nirqan: “Mañakushaspaqa ama mana iñiqkuna hina thawtiychischu”, nispa (Mat. 6:7). Huk kutintaqmi imaynatachus mañakunankuta qatikuqninkunaman yachachishaspa yayayku mañakuyta yapamanta nirqan, ichaqa hukniray simikunawan (Luc. 11:1-4). Chaymi yayayku mañakuyqa imakunamantachus mañakunanchista yachachiwanchis.

3. ¿Imakunatan tapukuwaq kay estudiokunapi?

³ Kay estudiopipas qatimuq estudiopipas yayayku mañakuymantan yachasun. Estudiasqaykiman hina tapukuy:  ¿Imaynatan yayayku mañakuy yanapawan Diosman aswan allinta orakunaypaq? ¿Yayayku mañakuyman hinachu kawsashani?

4. a) ¿Imatan rikuchiwanchis “yayayku” nisqa simi? b) ¿Imaraykun kay pachapi tiyanankupaq suyakuqkunapas Jehová Diosta “taytay” ninkuman?

⁴ Jesusmi mañakuspa qallarirqan “yayayku” nispa, chaymi rikuchiwanchis Jehová Diosqa llapa iñiqkunaq taytan kasqanta (1 Ped. 2:17). Jehová Diosqa wakin cristianokunatan akllarqan hanaq pachapi tiyanankupaq. Chay cristianokunaqa Jehová Diospa adoptasqanmi kanku, chaymi paykunaq taytanku kapun (Rom. 8:15-17). Ichaqa kay pachapi tiyanankupaq suyakuqkunapas ninkumanmi “taytay” nispa. ¿Imarayku? Jehová Dios paykunaman kawsayta ima necesitasqankutapas qosqanrayku. Hamuq tiempopin ichaqa paykunapas Diospa wawankuna kapunqaku ch’uya runaman tukupusqankurayku, 1.000 wata qhepaman pruebapi churasqa kaqtinku hunt’aq sonqo kasqanraykupiwan (Rom. 8:21; Apo. 20:7, 8).

5, 6. a) ¿Iman ancha valorniyoq regalo kanman wawakunapaq? b) ¿Imatan sapanka wawakuna ruwananku chay regalowan? (22 paginapi fotota qhaway.)

⁵ Tayta-mamakunaqa wawankutan yanapananku Jehová Diosman orakunankupaq, munasqa taytankuta hina qhawarinankupaqpas. Chayta ruwaspaqa ancha valorniyoq regalotan wawankuman qoshanku. Iskay ususiyoq watukuq umalliqa chaytan ruwarqan. Paymi nin: “Nacesqankumantapachan sapa ch’isin paykunawan mañakuq kani, viajallaqtiymi mana atiqchu kani. Manaña ima nisqaytapas yuyarinkuchu chaypas, paykunaqa kusikuywanmi yuyarinku kuska mañakusqaykuta, chaykunan yanaparqan kusisqa thak sientekunankupaq. Kikillankumanta orakuyta yachasqankuman hinataq kallpacharqani kunkawan orakunankupaq, chhaynapin yacharqani sonqonkupi Diosta imayna qhawarisqankuta, imayna munakusqankutapas. Chaymantapas yayayku mañakuyman hina orakunankupaqmi yanaparqani, chhaynapin yacharqanku imakunata astawan mañakuyta”, nispa.

⁶ Chay iñiqmasinchispa ususinkunaqa wiñasqankuman hinan Jehová Dioswan aswan amigontin kapurqanku, kunanqa qosankuwan kuskan precursor kanku. Chayrayku tayta-mamakuna wawaykichista yanapaychis Jehová Dioswan amigontin kanankupaq, chaymi aswan valorniyoq regaloqa. Ichaqa sapanka wawakunan Jehová Dioswan amigontin kasqankuta anchata cuidananku (Sal. 5:11, 12; 91:14).

7. a) ¿Iman ancha kusikunapaq? b) ¿Imaynatan rikuchisunman Diospa sutinta ch’uyapaq hap’isqanchista?

⁷ Diospa sutinta reqsiypas, chay sutita apaq llaqtapi kaypas ancha kusikunapaqmi (Hech. 15:14; Is. 43:10). Jesusmi yayayku mañakuypi nirqan: “Sutiyki yupaychasqa [ch’uyanchasqa, NM] kachun”, nispa. Chaywanmi yachachiwarqanchis Diospa sutinta ch’uyata hap’inapaq. ¿Imaynatan chayta rikuchisunman? Ruwayninchiswan rimasqanchiswan sutinta mana qhellichaspan, chaypaqmi Diospa yanapayninta mañakuna. Manapunin ñawpa tiempopi wakin cristianokunaq ruwasqankuta hina ruwananchischu.  Paykunaqa manan yachachisqankuman hinachu kawsaqku, chayta rikuspan runakunaqa Diospa sutinta pisichaqku (Rom. 2:21-24).

8, 9. ¿Imaynatan Jehová Dios huk cristianata yanaparqan?

⁸ Llapa cristianokunan Diospa sutinta mana qhellichanapaq kallpachakunchis. Noruega nacionmanta cristianan viuda kapurqan, huk wawachayoqmi karqanpas. Paymi nin: “Chay tiempopi kawsayniyqa ancha llakikunapaqmi karqan. Sapa raton Diosmanta mañakuq kani kallpata qowananpaq, llakikuywan mana atipachikunaypaq. Manapunin ima mana allin ruwasqaywanpas Diosmanta Saqraq burlakunanta munarqanichu, aswanpas Diospaq hunt’aq sonqo kaytan munarqani, sutinta ch’uyapaq qhawarichiyta. Hinaspapas munarqanin waway paraisopi taytanwan tupananta”, nispa (Prov. 27:11).

⁹ Qhawarimusqanchis hina, chay cristianaqa anchatan Diospa sutinta respetarqan. ¿Imaynatan Jehová Dios yanaparqan? Iñiqmasikunawanmi, paykunaq kallpachasqankuraykun llakikuywan mana atipachikurqanchu, allintataq imatapas decidirqan. Phisqa wata qhepamantaq huk umalliwan casarakurqan. Wawanpas bautizasqa Testigoñan, 20 watanpiñataqmi kashanpas. Chay cristianan nin: “Anchatan qosayta agradecekuni wawayta uywaysiwasqanmanta”, nispa.

10. ¿Imaynatan Jehová Dios hukpaqkama sutinta ch’uyanchanqa?

¹⁰ Jehová Diosqa gobiernonta pisichaqkunata, mana respetaqkunatan wiñaypaq chinkachinqa, chhaynapin sutinta hukpaqkama ch’uyanchanqa (leey Ezequiel 38:22, 23). Chay qhepamanmi llapa runakuna pisi-pisimanta ch’uya kapunqaku, kay pachapi kaqkunapas hanaq pachapi kaqkunapas Jehová Diosllatan servinqaku, sutintapas respetanqaku. Hinan Jehová Dioslla llapa kawsaqkunata wiñay-wiñaypaq kamachinqa (1 Cor. 15:28).

11, 12. ¿Imatan Jehová Dios ruwarqan 1876 watapi?

¹¹ Manaraq hanaq pachaman kutipushaqtinmi qatikuqninkuna Jesusta tapurqanku qallarinqañachus Diospa gobiernon icha manachus chayta. Jesusmi nirqan chayta yachanankupaqqa manaraq tiempochu kasqanta, aswanpas predicacionpi astawan llank’anankuraq kasqanta (leey Hechos 1:6-8). Chaymantapas yachachirqanmi Diospa gobiernon hamunanpaq mañakunankuta, makilla chayta suyakunankutapas. Chaymi ñoqanchispas Diospa gobiernon hamunanpaq mañakushanallanchis.

¹² 1876 watapin cristianokunaqa Diospa yanapayninwan entienderqanku ima watapis Jesús gobiernayta qallarinan karqan chayta. ¿Imaynatan entienderqanku? Chay watapin Russell iñiqmasinchis qelqarqan “wak suyu runakunaq kamachikunan tiempo”, Danielpa willasqan ‘qanchis wata’ tiempowan kaqlla kasqanta (Luc. 21:24; Dan. 4:16). Chay qelqapi nisqanman hinan chay tiempoqa 1914 watapi tukupunan karqan. *

13. a) ¿Iman sucederqan 1914 watapi? b) ¿Imatan rikuchirqan 1914 watapi sucedesqan?

¹³ 1914 watapin Europa ladopi huk hatun guerra qallarirqan, pisi-pisimantataq pachantinman mast’arikurqan. Chay guerrapin  askha runakuna yarqaywan wañurqanku. 1918 watapitaq guerrapi wañusqankumantaqa gripe española onqoywan aswan askha runaraq wañurqan. Jesuspa nisqanman hinan chaykunaqa tukukuy p’unchaykunapi sucedenan karqan (Mat. 24:3-8; Luc. 21:10, 11). Chaykuna sucedesqantaqmi sut’ita rikuchirqan 1914 watapi Jesús hanaq pachamanta gobiernay qallarisqanta. Chay watapin Jesusqa “atipaspa lloqsirqan astawan atipananpaq” (Apo. 6:2). Chaymi Saqrata supayninkunatawan kay pachaman wikch’uyamurqan. Chay qhepamanmi kay simikuna hunt’akurqan: “¡Ay, imaynaraqmi kankichis kay pachapi lamar-qochapi tiyaqkuna! Saqran qankunaman uraykamun, sinchi phiñasqan kashan, tiempoqa pisillaña kananta yachaspa”, nispa (Apo. 12:7-12).

14. a) ¿Imaraykun mañakushanallanchis Diospa gobiernon hamunanpaq? b) ¿Ima ruwaypin astawan llank’ananchis?

¹⁴ Apocalipsis 12 capitulon entiendechiwanchis imaraykus 1914 watamanta millay kawsay kay pachapi q’oñirishan chayta. Hanaq pachapiña Jesús gobiernashan chaypas kay pachataqa Saqran kamachishan. Ichaqa pisi tiempomantan Jesusqa kay pachantinpi millay kawsayta wiñaypaq tukuchinqa. Chayraykun mañakushanallanchis Diospa gobiernon hamunanpaq, llapa runakunamantaq willamunanchis. Chhaynapin Jesuspa nisqan hunt’akunqa: “Qhapaqsuyumanta allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa (Mat. 24:14).

15, 16. ¿Imaraykun mana mañakuyllachu-mañakunanchis Diospa munaynin kay pachapi ruwakunanpaq?

¹⁵ Qallariypiqa Diospa munayninmi kay pachapi ruwakusharqan. Chaymi Jehová Dios ‘rikurqan lliw ruwasqankuna ancha allin kasqanta’ (Gén. 1:31). Ichaqa Saqran Dios contra hatarirqan,  chaymantapachan askha runakuna Diospa munayninta mana ruwankuchu. Chaywanpas pusaq millón más Testigokunañan Diosta servishanku. Paykunaqa manan mañakuyllachu-mañakunku Diospa munaynin kay pachapi ruwakunanpaq, aswanpas kallpachakunkun Diospa munayninta ruwanankupaq. Chaymi llapa runakunaman willamunku Diospa gobiernonmanta yachanankupaq.

¹⁶ Huk cristianan África ladopi misionera karqan, payqa 1948 watapin bautizakurqan, 80 watanpitaqmi kashan. Ninmi: “Sapa kutillanmi mañakuni allin sonqoyoq runakuna Diosta reqsinankupaq, manaraq phiñakuynin hamushaqtin. Predicaspapas Diosmantan mañakuni sonqoman chayaqta rimanaypaq. Bibliamanta chayllaraq yachaqkunatapas sumaqta cuidanaykupaqmi Diosmanta mañakuni”, nispa. Chay cristianaqa askha runakunatan yanaparqan Diosta servinankupaq. Pay hinan askha kuraq cristianokunapas tukuy sonqonkuwan Diospa munayninta ruwashanku (leey Filipenses 2:17).

17. ¿Ima niwaqmi paraisopi Diospa lliw ruway munasqanmanta?

¹⁷ Pisillamantan Jehová Diosqa enemigonkunata chinkachinqa, chaykaman mañakushallasun kay pachapi munaynin ruwakunanpaq. Hinan kay pachaqa sumaq paraíso kapunqa, waranqa-waranqa wañupuq runakunapas kawsarimpunqakun. Jesusmi nirqan: “Aya p’ampanakunapi lliw kaqkunaq Runaq Churinpa kunkanta uyarinanku tiempon chayamunqa. Hinan [...] kawsarimpunqaku”, nispa (Juan 5:28, 29). ¡May kusikunapaqchá kanqa wañupuq familianchiskunata hukmanta rikuyqa! Diosmi ‘ñawinchismanta tukuy weqeta pichanqa’ (Apo. 21:4). Wakin kawsarimpuqkunamantan Biblia nin “mana chaninkuna” nispa, ¿imarayku? Diosmanta Jesusmanta mana yachaspa wañupusqankurayku. Paykunatan yachachisunchis Diospa munayninta ruwanankupaq, wiñay kawsayniyoq kanankupaqpas (Hech. 24:15; Juan 17:3).

18. ¿Imakuna hunt’akunantan runakuna astawan necesitanku?

¹⁸ Pisi tiempollamantan Jehová Diosqa sutinta ch’uyanchanqa, gobiernon hamunqa, kay pachapitaq munaynin ruwakunqa. Chhaynapin Jehová Diosqa llapa runakunaman imachus astawan necesitasqankuta qonqa. Qatimuq estudiopi yachasun yayayku mañakuypi Jesús yachachiwasqanchisman hina imakunatawan mañakunanchista.