1-3. ¿Imaynatan Jehová Dios kutichirqan huk cristianaq mañakusqanman?

LANA sutiyoq precursoran mana hayk’aqpas qonqanchu 2012 watapi Alemania nacionmanta kutipushaqtin Jehová Diospa yanapasqanta. Payqa aeropuertoman rishaspan Diosmanta mañakurqan pillatapas predicananpaq. Chayaqtintaq willarqanku paqaristinña viajananta. Payqa pisi qolqellayoqmi kasharqan chaymi mana maypi alojakuyta atisharqanchu, hinan wakmanta Diospa yanapayninta mañakurqan.

² Mañakusqan qhepallamanmi huk runa payta tapurqan: “Lana, ¿imatataq kaypiri ruwashanki?”, nispa. Chay runaqa colegionmanta compañeronmi kasqa. Payqa Sudáfrica ladomanmi viajashasqa, mamanpas abuelanpas despidikunankupaqmi paywan risqaku. Lana cristianaqa sasachakuynintan willakurqan, chaymi paykunaqa wasinkupi qhepakunanpaq invitarqanku. Chaymantataq unayta parlarirqanku Testigokunaq imakunapi creesqankumanta, precursora kasqanmantapas.

³ Paqaristinpas astawanmi Bibliamanta parlarirqanku.  Chaymantapas sutinkuta direccionninkutawanmi anotarqan huk iñiqmasi paykunaman visitananpaq. Chay cristianaqa kunankamapas precursoran kashan, manataqmi qonqanchu mañakusqanman Jehová Diospa kutichimusqanta (Sal. 65:2).

4. ¿Imatan kay estudiopi yachasun?

⁴ Sasachakuypi tarikuspaqa kaq ratopachan Diosmanta mañakunchis, paytaq uyarispa yanapawanchis (Sal. 34:15; Prov. 15:8). Ichaqa Jesusmi yachachiwarqanchis imakunata astawan mañakunanchista. Kay estudiopin yachasun yayayku mañakuypi wakin simikunamanta, imaynatan chayman hina kawsasunman chaytapas (leey Mateo 6:11-13).

5, 6. ¿Imaraykun “t’antaykuta qowayku” nispa mañakushanallanchis manaña mikhunanchis faltawasunmanchu chaypas?

⁵ Jesusqa manan “t’antata qoway” nispa mañakunanchistachu munarqan, aswanpas munarqan “t’antaykuta qowayku” nispa mañakunanchistan. África ladomanta watukuq umallin chayta ruwan. Paymi nin: “Ñoqapas esposaypas manan wasiykumanta imachus mikhunaykumantapas llakikuykuchu. Chaykunataqa iñiqmasikunan qowanku. Ichaqa paykunaraykun mañakuyku ima pisichikuypiña tarikunkuman chaypas Jehová Diosta servishanallankupaq”, nispa.

⁶ Yaqapaschá mikhunanchis mana faltanmanchu, chaywanpas mañakushanallanchispunin iñiqmasinchiskunaman mana faltananpaq. Wakinqa pisichikuypin tarikunku, wakintaq huk llakikuykunapi. Chaymantapas yanapasunmanmi imachus necesitasqankupi, wasinchismanpas invitasunmanmi. Hinaspapas predicación mast’arikunanpaqmi donacionkunata churasunman. Chay qolqe churasqanchisqa hukkunata yanapanapaqmi utilizakun (1 Juan 3:17).

7. ¿Ima nirqanmi Jesús imachus necesitasqanchismanta ama nishuta llakikunapaq?

⁷ Yayayku mañakuyta yachachisqan qhepallamanmi Jesusqa yachachirqan imachus necesitasqanchismanta ama nishuta llakikunapaq. Paymi nirqan campopi t’ikakunaqa mana imamantapas llakikusqankuta. ¿Imanaqtin? Chaykunataqa Diosmi cuidan, astawanraqmi ñoqanchista cuidawasun imachus necesitasqanchista qowaspanchis. Chaymi Jesús nirqan: “Ama llakipakuychischu paqarinmantaqa”, nispa (Mat. 6:30-34). Sapa p’unchaypaq imachus necesitallasqanchiswanmi kusisqa kananchis. Chaymi Jehová Diosmanta mañakusunman maypi tiyananchispaq, llank’anata tarinapaq, onqosqa kaqtinchis yanapawananchispaq. Ichaqa astawanraqmi iñiyninchispi yanapawananchispaq mañakunanchis.

8. ¿Imatawanmi mañakushanchis “sapa p’unchay t’antaykuta qowayku” nispa? (27 paginapi fotokunata qhaway.)

⁸ “Sapa p’unchay t’antaykuta qowayku” nispaqa Jehová Diosmantan mañakushallanchistaq astawan yachachiwananchispaq,  paywan aswan amigontin kanapaqpas. ¿Imaraykun chayta ninchis? Jesusmi nirqan: “Manan t’antallawanchu runaqa kawsanqa, aswanpas Diospa llapa siminwanmi”, nispa (Mat. 4:4).

9. ¿Imaraykun huchata ruwaspa manu kapunchis?

⁹ Yayayku mañakuypin Jesús nirqan: “Huchaykutapas [otaq manuykutapas] pampachawayku”, nispa (Mat. 6:12, willakuy; Luc. 11:4). Chaypi nisqan hina, huchata ruwaspaqa Jehová Diosmanmi manu kapunchis. 1951 watapin Qhawaq revistanchispi willakurqan Jehová Diosta kasukunanchis, munakunanchis kasqanta. Huchata ruwaspan ichaqa mana kasukushanchischu nitaq Dios munakusqanchista rikuchishanchischu, chaymi manu kapunchis. Chay revistaq nisqan hina, munaspaqa Jehová Diosninchisqa karunchakunmanmi ñoqanchismanta. Chay revistan nillarqantaq: “Huchapi kawsaqqa Diostan mana munakunchu”, nispa (1 Juan 5:3).

10. a) ¿Imaraykun Jehová Dios perdonawanchis? b) ¿Imaynan sientekunki Jehová Dios wawanta kachamusqanmanta?

¹⁰ Sapa p’unchaymi necesitanchis Jehová Dios perdonawananchista. Payqa  Jesuspa sacrificakusqanraykun huchanchiskunata perdonawanchis, mana chaywanqa manan atisunmanchu huchamanta wañuymantawan salvakuyta. Unayña pasarqon Jesuspa wañupusqanmanta chaypas, maytan Jehová Diosta agradecekunchis wawanta kachamusqanmanta (leey Salmo 49:7-9; 1 Pedro 1:18, 19). “Huchaykutapas pampachawayku” nispaqa iñiqmasinchiskunaraykun mañakushanchis. Paykunapas necesitankun Diospa perdonasqan kayta, chhaynapi paywan amigontin kashanallankupaq. Chhaynaqa, ¿ima ruwananchistan Jehová Dios munan? Iñiqmasinchiskuna phiñachiwaqtinchis perdonananchistan, hinaspapas yaqa llapa huchankun mana hatunchu. Perdonaspaqa rikuchinchis paykuna munakusqanchista, Jehová Diospa perdonawananchista munasqanchistapas (Col. 3:13).

11. ¿Imaraykun perdonanayki?

¹¹ Huchayoq kasqanchisraykun mayninpi sasa kanman iñiqmasinchista perdonay (Lev. 19:18). Sichus imayna phiñachiwasqanchista hukkunaman willasun chayqa, iñiqmasinchiskunatan t’aqanachishasunman. Hinaspapas sichus chay sasachakuyta allichanapaq mana imatapas ruwasunchu chayqa, manan rikuchishanchischu Jesuspa wañupusqanmanta agradecido kasqanchista (Mat. 18:35). Chaymi hukkunata perdonananchis, mana chayqa Jehová Diospas manan perdonawasunchu (leey Mateo 6:14, 15). Chaymantapas Jehová Dios perdonawananchispaqqa manapunin millay huchakunata ruwananchischu (1 Juan 3:4, 6).

12, 13. a) ¿Iman sucederqan Jesuspa bautizakusqan qhepaman? b) ¿Imanaqtinmi mana hukkunamanchu tumpananchis tentacionpi urmasqanchismanta? c) ¿Imatan Jesús rikuchirqan Diosllata kasukusqanwan?

¹² Yayayku mañakuypin Jesús nillarqantaq: “Ama wateqaymanqa [otaq tentacionmanqa] urmanaykuta munaychu”, nispa. Chaymi yuyarichiwanchis Jesuspa bautizakusqan qhepaman pasasqanta. Jehová Diosmi hinallata qhawarqan Jesús tentasqa kananta (Mat. 4:1; 6:13). ¿Imanaqtinmi hinallata qhawarqan? Paymi munarqan Jesusqa kay tapuykunaman kutichinanta: ¿Pantanankupaqchu Jehová Dios runakunata kamarqan? ¿Atinmanchu ch’uya runa tentasqa kaspa Diospaq hunt’aq sonqo kayta? ¿Aswan allinchu runakuna kankuman Diosmanta t’aqakuspa? Chay tapuykunaqa Adán Evaq tiemponpin paqarirqan Diospa kamachikuyninta mana respetasqankurayku (Gén. 3:4, 5). Hamuq tiempopin ichaqa chay tapuykuna hukpaqkama kutichikunqa. Hinan hanaq pachapipas kay pachapipas llapanku yachanqaku Jehová Dioslla kamachinanpaq derechoyoq kasqanta.

¹³ Jehová Diosqa manan hayk’aqpas tentacionpi churawasunmanchu, Saqrallan chaytaqa ruwan (Mat. 4:3). Tentasqa kaspaqa ñoqanchismantan kanqa tentacionpi  urmananchispaq mana urmananchispaqpas (leey Santiago 1:13-15). ¿Imatan Jesús ruwarqan Saqra tentaqtin? Manan huk ratullapas rimapayasqanpi piensarqanchu, aswanpas Bibliaq nisqanman hinan kutichirqan, chhaynapin rikuchirqan hunt’aq sonqo kasqanta. Chaywanpas Saqraqa hukpiña tentananpaqmi suyarqan (Luc. 4:13). Jesusqa kasukuqpunin karqan, chhaynapin rikuchirqan imaynapiña tarikuspapas ch’uya runaqa Jehová Diospaq hunt’aq sonqo kay atisqanta. Ñoqanchistapas Saqraqa tentawanchismi Diosta mana kasukunanchispaq.

14. ¿Iman yanapawasunman tentasqa kaqtinchis hunt’aq sonqo kanapaq?

¹⁴ Adán Evaq tiemponpi paqarisqan tapuykunaqa kay tiempopipas kutichikunanraqmi kashan. Chaymi Jehová Diosqa hinallata qhawan Saqraq tentasqan kananchista. Ichaqa manapunin Jehová Dioschu chaykunataqa churawanchis, aswanpas tentasqa kaqtinchismi payqa yanapayta munawanchis, ñoqanchispitaq confian. Ichaqa manan obligawanchischu kasukunanchispaq, ñoqanchismantan kanqa hunt’aq sonqochus kasunchis icha manachus chayqa. ¿Iman yanapawasunman hunt’aq sonqo kanapaq? Jehová Dioswan allin amigontin kasqanchismi, ima ratopipas yanapayninta mañakusqanchismi. Ichaqa, ¿imaynatan Jehová Dios mañakusqanchisman kutichimun?

15, 16. a) ¿Ima tentacionkunatan atipananchis? b) ¿Pin huchayoq tentacionpi urmasqanchismanta?

 ¹⁵ Jehová Diosqa santo espiritunwanmi yanapawanchis tentasqa kaqtinchis atipananchispaq. Chaymantapas Bibliawan iñiq t’aqapi huñunakuykunawan iman willawanchis imakunas tentacionman apawasunman chayta. Yaqapaschá yanqa ruwaykunapi usuchishasunman tiemponchista, qolqenchista otaq kallpanchista. Chaymantan cuidakurqanku Europa ladomanta huk cristiano casarasqa warmi-qhari. Paykunaqa qhapaq llaqtapi tiyaspankun decidirqanku pisi predicaqkuna kasqanman astakuyta. Chaypin askha watakuna precursor karqanku. Tiempowanmi ichaqa iskay wawayoq kapurqanku, manañataq precursorchu kapurqanku. Chaymi qosa nin: “Sapa kutinmi Jehová Diospa yanapayninta mañakuyku tentacionman ama urmanaykupaq. Manaña iñiq t’aqapi nishutachu yanapakuyku chaypas, iñiyniykupi qaqa kanaykupaqmi mañakuyku, kusisqalla predicanaykupaqpas”, nispa.

¹⁶ Hinaspapas qhelli ruwaykunata qhawananchispaqmi tentasqa kasunman. Sichus chay tentacionman urmasunman chayqa, manan Saqramanchu tumpananchis. Payqa manan chaykunata qhawananchispaqchu obligawanchis. Wakinqa chaykunatan qhawanku mana allinkunapi piensasqankurayku. Ichaqa askha iñiqmasikunan chay tentacionta atiparqanku, ñoqanchispas atipasunmanmi (1 Cor. 10:12, 13).

17. a) ¿Ima ruwananchispaqmi kallpachakunanchis Saqramanta Diospa librawananchista munaspa? b) ¿Imatan pisillamanta Dios ruwanqa?

¹⁷ “Mana allinkaqmanta qespichiwayku [otaq librawayku]” nispaqa mañakushanchis Saqramanta librawananchispaqmi. Chayraykun kallpachakunanchis manaña kay pachaqchu kananchispaq, kay pachapi kaqkunatapas manaña munakunanchispaq (Juan 15:19; 1 Juan 2:15-17). Pisi tiempollamantan Jehová Diosqa Saqrata wisq’apunqa, millay runakunatataq wiñaypaq chinkachipunqa. Chaykaman ichaqa Saqraqa imaymanata ruwanqa Diosta mana kasukunanchispaq. Payqa sinchi phiñasqan kashan tiempon pisi kasqanta yachasqanrayku. Chaymi Diosmanta mañakushanallanchis Saqramanta librawananchispaq (Apo. 12:12, 17).

18. ¿Imatan ruwananchis wiñaypaq kawsayta munaspa?

¹⁸ Wiñaypaq kawsayta munaspaqa yayayku mañakuypi yachachiwasqanchisman hinan kawsananchis. Mañakunanchismi Diospa gobiernon hamunanpaq, Diospa sutin ch’uyanchasqa kananpaq, kay pachapi Diospa munaynin ruwakunanpaq. Chaymantapas confiananchismi sapa p’unchaypaq tukuy necesitasqanchista Dios qowananchispi, chhaynapin paypa yanapayninwan hunt’aq sonqo kasunchis.