1, 2. ¿Imamantan rimashan hebreo qelqakunapi Diospa chaki samanan, chaki sarunan nisqa?

JEHOVÁ DIOSMI nirqan: “Hanaq pachan kamachikuy tiyanay, hallp’a pachataq chakiypa samanan”, nispa. Nillarqantaqmi: “Chaki sarunaytan hatunchasaq”, nispa (Is. 66:1; 60:13, NM). ¿Imaynatan Jehová Dios chaki sarunanta hatunchan sumaqyachinpas? ¿Imaynapin chay ruwasqan chaki sarunanpi tiyaqkunaq allinninpaq?

² Hebreo qelqakunapi Diospa chaki samanan, chaki sarunan nispaqa rimashan ñawpa Israel llaqtapi templomantan (1 Crón. 28:2; Sal. 132:7). Chay templotan Jehová Diosqa sumaqta qhawarirqan, chaypin pay sonqo runakuna payta adoraqku hatunchaqkupas.

3. a) ¿Imatan kay tiempopi necesitanchis Diosta adorananchispaq? b) ¿Hayk’aqmi espiritual templo qallarirqan?

³ Kunanqa manañan runaq ruwasqan templotachu necesitanchis Diosta adoranapaq, aswanpas ‘espiritual  templotan’. ¿Imataq chayri? Chayqa Diosta adoranapaq, amigonkuna kanapaq tukuy imaymana yanapaykunan; chaykunatan pay ruwarqan. Ichaqa Jesuspa wañusqanraykullan chayqa atikun. ¿Hayk’aqmi espiritual templo qallarirqan? 29 watapin, chay watapin Jesús bautizakuspa espiritual templomanta sacerdote kapurqan (Heb. 9:11, 12).

4, 5. a) ¿Imatan ruwananku Jehová Diosta serviqkuna Salmo 99 nisqanman hina? b) ¿Imatan sapankanchis tapukunanchis?

⁴ Maytan Jehová Diosta gracias ninchis payta adorananchispaq imaymanakuna ruwasqanmanta. Chaymi agradecekusqanchista rikuchinapaq lliwman willananchis Diospa sutinqa Jehová kasqanta, kay pachaman churinta ñoqanchisrayku wañunanpaq kachamusqanmantawan. ¡Anchatan kusikunchis pusaq millón más Jehová Diospa testigonkuna payta hatunchasqanchismanta! Askha runakunan creenku hanaq pachaman rispaña Diosta hatunchanankuta. Ñoqanchismi ichaqa mana chhaynatachu creenchis, aswanpas kunanmi Diostaqa hatunchashanchis.

⁵ Ñawpa tiempopi Jehová Diosta adoraqkuna hinan ñoqanchispas payta adorallanchistaq (leey Salmo 99:1-3, 5-7). Wakinmi Moisés, Aarón, Samuel; paykunaqa Jehová Diospa munasqanman hinan adorarqanku. Kay tiempopiqa iskay clase suyakuyniyoqkunan Jehová Diosta huk nisqalla yupaychashanku. Hukninmi hanaq pachapi tiyanankupaq suyakuyniyoqkuna, paykunaqa manaraq hanaq pachaman ripushaspan espiritual templopi Diosta servishanku. Hukkaqtaq kay pachapi tiyanankupaq suyakuyniyoqkuna, paykunan tukuy imapi akllasqa cristianokunata yanapanku (Juan 10:16). Ichaqa sapankanchismi tapukunanchis: “¿Jehová Diospa munasqanman hinachu payta adorashani?”, nispa.

6, 7. a) ¿Iman pasarqan cristianokunaq paqarisqan qhepaman? b) ¿Iman pasarqan 1919 watapi?

⁶ Apóstol Pablon willarqan Diospa llaqtan ukhupi llulla yachachikuykuna paqarinanta (Hech. 20:28-30; 2 Tes. 2:3, 4). Chay willasqanqa hunt’akurqan cristianokunaq paqarisqanmanta manaraq 100 watakuna qhepamanmi. Chayraykun sasa reqsiy karqan cheqaq cristianokunata falso kaqkunamanta. Tiempowanmi ichaqa Jehová Dios sut’iman horqorqan pikunachus Diosta servishanku espiritual templonpi pikunachus mana chayta.

⁷ Chayqa 1919 watapiñan yachakurqan. Espiritual templopi serviqkunaqa imaymana cambiokunatan ruwarqanku Jehová Diospa munasqanman hina  payta adoranankupaq (Is. 4:2, 3; Mal. 3:1-4). Chaymi rikhuriypi Pabloq rikusqan hunt’akuyta qallarirqan. ¿Imatan rikurqan?

8, 9. ¿Ima ‘paraisotan’ Pablo huk rikhuriypi rikurqan?

⁸ Jehová Diosmi atiyninwan Pablota rikuchirqan hamuq tiempopi imachus pasananta (leey 2 Corintios 12:1-4). Pablon rikurqan ‘paraisota’. ¿Imataq chayri karqan? Chayqa yaqachus hina kinsa clase paraíso: Hukninmi kay pachapaq Diospa prometewasqanchis paraíso, chayqa pisi tiempollamantan kanqa (Luc. 23:43). Hinamantaq espiritual paraíso, chayqa mosoq pachapin aswan munay kanqa. Chaymantataq ‘Diospa paraison’, chayqa hanaq pachapi Dioswan kuska kaymi (Apo. 2:7).

⁹ Ichaqa, ¿imaraykun Pablo nirqan uyarisqankunata mana willay atisqanta? Manaraq tiemporaqchu chaykunata willananpaq kasqanraykun. Kunan tiempopin ichaqa lliw runaman willasunman Diospa llaqtanpi sumaq bendicionkuna kasqanmanta.

10. ¿Kaqllachu espiritual paraíso espiritual templowan?

¹⁰ Qelqanchiskunaqa sapa kutillanmi espiritual paraisomanta willan. Ichaqa manan kaqllachu espiritual templowan. Espiritual temploqa Diosta adoranapaq imaymana yanapaykunan, chaykunatan pay ruwarqan. Espiritual paraisotaq Diospa llaqtanpi huk nisqalla thakpi kawsasqanchis. Chaymi sut’ita rikuchiwanchis pikunachus espiritual templopi Dios servisqankuta (Mal. 3:18).

11. ¿Imapin llapa cristianokuna yanapakusunman?

¹¹ 1919 watamantapachan Diospa yanapayninwan espiritual paraisonchista cuidashanchis, hatun kananpaqtaq yanapakushanchis. ¡Chayqa ancha kusikunapaqmi! Qanri, ¿yanapakushankichu espiritual paraisonchis sumaq kananpaq? ¿Valorankichu chay ruwayta?

12. ¿Imaynapin yachanchis Isaías 60:17 textoq hunt’akushasqanta? (3 paginapi fotota qhaway.)

¹² Bibliaqa willarqanñan kay pachapi Diospa llaqtan aswan sumaqyachisqa kananmanta (leey Isaías 60:17). ¿Imaynapin chay hunt’akurqan? Cambiokuna kasqanwanmi. Chaykunamantan wayna-sipaskuna, chayllaraq Diospa llaqtanpi kaqkunapas leerqanku otaq kurakkunaq willakusqankuta uyarirqanku. Diospa llaqtanpi unayña kaq kurak iñiqmasikunaqa rikurqankun chay cambiokunata. Chaykunawanmi entienderqanku Jesuswan Jehová Dios llaqtanta  pusarichisqanta. Chay cambiokuna kasqanmanta kurak iñiqmasikunaq willakusqankupi piensasun chayqa, astawanmi Jehová Diospi confiasun.

13. ¿Imatan ruwananchis Salmo 48:12-14 textoq nisqanman hina?

¹³ Hayk’a tiempoña Diospa llaqtanpi kashanchis chaypas, llapanchismi hukkunaman Diospa llaqtanmanta willananchis. Kay pachaqa sinchi millaymi kashan, chaywanpas pachantinmanta iñiqmasikunawanmi thakpi huk nisqalla espiritual paraisopi kawsashanchis. Chayraykun wayna-sipaskunaman, chayllaraq Diospa llaqtanpi kaqkunamanpas willananchis Diospa llaqtanmanta, espiritual paraisomantapas (leey Salmo 48:12-14).

14, 15. a) ¿Ima cambiokunatan 1970 watakuna ukhupi ruwakurqan? b) ¿Imaraykun chay cambiokuna allinpaq karqan?

¹⁴ Unay watakunaña Diospa llaqtanpi kaq cristianokunaqa rikurqankun wakin cambiokunata, chaykunan Diospa llaqtanta sumaqyachirqan. Ñawpaqpiqa huk iñiqmasillan iñiq t’aqamanta encargakuq, huk iñiqmasillan sucursalmanta encargakuq, Diospa llaqtantapas hukllan umalliq. Sapankankuña yanapaqnikunayoq karqanku chaypas, hukllan decidiq imachus ruwakunanta iñiq t’aqapi, sucursalpi, Diospa llaqtanpipas. Ichaqa 1970 wata qhepatan chaykunaqa cambiarqan. Chaymantapachan sapanka iñiq t’aqapi imatapas decidinankupaqqa huk  t’aqa umallikuna kanku. Sapanka sucursalpitaq kan sucursalmanta encargakuqkuna, Diospa llaqtantaq umalli t’aqaq pusarisqan kanku.

¹⁵ Chay cambiokunaqa ancha allinpunin Diospa llaqtanpaq karqan. ¿Imarayku? Bibliata astawan entiendespa chayman hina ruwakusqanrayku. Kunanqa manañan huk runallachu decidin Diospa llaqtanpi imakunapas ruwakunanta. Kunanqa Diospa regalawasqanchis llapa umallikunan ruwaykuna atisqankuwan Diospa llaqtanta sumaqyachishanku (Prov. 24:6; Efes. 4:8).

16, 17. ¿Mayqen cambiokunan astawan gustarqasunki?

¹⁶ Hinaspapas kunanqa qelqanchiskunan aswan munaycha kashan, runakunatataq kawsayninkupi yanapashan. Chaymantapas kay tiempokunapi imakunachus rikhurimusqanwanmi yanapachikushanchis. Internetpi jw.org direccionninchisraykutaq aswan askha runakuna yanapayta chaskishanku. Lliw chay cambiokunan rikuchiwanchis runakunata Jehová Dios munakusqanta, paykunamanta llakikusqantapas.

¹⁷ Chaymantapas maytan agradecekunchis huñunakuykunapi cambiokunaq kasqanwan, chaykunan tiempota qowarqanchis sapallanchispi otaq familianchiswan Bibliata estudiananchispaq. Asambleakunapi cambiokunaq kasqanpas allinninchispaqmi  karqan, sapa watantaqmi aswan-aswan munay kashan. Hinaspapas agradecekunchismi Diospa llaqtanpi escuelakunapi yachamusqanchismanta. Chaykunan rikuchiwanchis Jehová Dios llaqtanta pusarisqanta, espiritual paraisota aswan-aswanta sumaqyachisqantapas.

18, 19. ¿Imaynatan yanapakusunman espiritual paraisonchista sumaqyachiypi?

¹⁸ Ñoqanchispas yanapakunanchismi espiritual paraisonchis aswan sumaqyachisqa kananpaq. ¿Imaynatan chayta ruwasunman? Tukuy sonqo predicaspa, Bibliamanta runakunaman yachachispa iman. Chay runakuna Jehová Diospa testigon kapuqtinkun espiritual paraisonchis astawan hatunyapun (Is. 26:15; 54:2).

¹⁹ Hinaspapas allinta portakuspan espiritual paraisonchista sumaqyachisun. Chaymi runakunaq sonqonman chayan. Diospa llaqtanmanqa astawanqa hamunku manan Bibliamanta imaymanata yachasqanchisraykuchu, aswanpas sumaq sonqota qhawariwasqanchisraykun.

20. ¿Imatan ruwananchis Proverbios 14:35 textoq nisqanman hina?

²⁰ Jehová Diospas Jesuspas maytachá kusikun espiritual paraisonchista rikuspa. Ñoqanchispas maytan kusikunchis sumaqyachinapaq yanapakuspa. Ichaqa kunan kusikusqanchisqa manan imanpaschu. Kay pacha paraisoman tukuchinapaq llank’aqtinchismi astawanraq kusikusun. Biblian willan allin yuyayniyoq ‘kusa llank’aq kamachita reypa sumaq qhawarisqanmanta’ (Prov. 14:35). Chaymi ñoqanchispas allin yuyayniyoq kananchis, kallpachakunanchistaqmi espiritual paraisonchista sumaqyachinapaq.