1, 2. ¿Imatan Jehová Diosta serviqkuna tukuy tiempo suyakurqanku?

DIOSTA serviqkunaqa ñawpa tiempomantaraqmi profeciakunaq hunt’akunanta makilla suyakuqku. Jeremiasmi profetizarqan Babilonia llaqta Judá llaqtata thuninanmanta, chaytaqmi sucederqan 607 watapi m.J.h. (Jer. 25:8-11). Isaiastaq profetizarqan Babilonia llaqtamanta judiokuna lloqsimunankupaq Diospa yanapananta. Nirqanmi: “¡Kusisamiyoqmi paypi suyakuqkunaqa!”, nispa (Is. 30:18). Miqueastaq mana iskayarqanchu profeciakunaq hunt’akunanpi, chaymi nirqan: “Ñoqan ichaqa Señor Diospi makilla suyakusaq”, nispa (Miq. 7:7). Diosta serviqkunataq pachak-pachak watakuna Mesiaspa chayamunanta suyakurqanku (Luc. 3:15; 1 Ped. 1:10-12). *

² Paykuna hinan ñoqanchispas suyakushanchis Diospa gobiernonmanta profeciakunaq hunt’akunanta. Chay  gobiernowanmi Jehová Diosqa pisillamanta salvawasun Saqraq kamachisqan millay pachamanta (1 Juan 5:19). Chay p’unchaypin Diosqa millay runakunata wañuchispa ñak’ariyninchiskunata tukuchinqa. Chayqa imay ratopipas chayamunqan, chaymi allin preparasqa kashananchis.

3. ¿Imatan nishankuman Diospa phiñakunan p’unchayta unayña suyakuq wakin cristianokuna?

³ Maytan munashanchis kay pachapi Diospa munaynin ruwakunanta (Mat. 6:10). Ichaqa askha cristianokunan Jehová Diospa phiñakunan p’unchayta unayña suyakushanku. Chaypaschá wakinqa ninku: “Manapaschá kawsasqay tiempopichu chayamunqa, ¿kaqllachu makilla kashanay?”, nispa. Chaytan kay estudiopi yachasun.

4. ¿Imaraykun makilla kashananchis?

⁴ ¿Imaraykun makilla kashananchis? Jesús kamachisqanraykun. Paymi nirqan makilla kashananchista, rikch’asqalla kashananchistawan (Mat. 24:42; Luc. 21:34-36). Hinaspapas Diospa llaqtanmi tukuy tiempo niwashanchis makilla preparasqa kashananchispaq, paraisopi yuyayninchis kashanantapas (leey 2 Pedro 3:11-13).

5. ¿Imaraykun preparasqa kashananchis Jehová Diospa phiñakunan p’unchaypaq?

⁵ Ñawpa tiempopi cristianokunaqa makillan kasharqanku Jehová Diospa phiñakunan p’unchaypaq. Ñoqanchisqa astawanraqmi preparasqa kashananchis, ¿imarayku? 1914 watamantapacha Jesús reyña kasqanrayku, tukukuy p’unchaykunapiña kawsashasqanchisraykupiwan. Saqraq kamachisqan pachaqa aswan-aswan millaymi kapushan, allin willakuykunataq pachantinpi predicakushan (Mat. 24:3, 7-14). Jesusqa manan willarqanchu hayk’a tiempochus tukukuy p’unchaykuna kananta, qonqayllan chayamunqa; chaymi preparasqa kananchis.

6. ¿Imaraykun nisunman kay pacha aswan millaymanraq tukupunanta?

⁶ Biblian willan tukukuy p’unchaykunapi runakunaqa aswan millayraq kanankuta (2 Tim. 3:1, 13; Mat. 24:21; Apo. 12:12). Chayraykun kay pachaqa aswantaraq millayman tukupunqa. Ichaqa, ¿sinchi millayraqchu kay pachaqa kanan Diospa phiñakunan p’unchay chayamunanpaq?

7. ¿Imatan reparanchis Mateo 24:37-39 textopi piensaspa?

⁷ Yaqapaschá wakin cristianokunaqa piensanku manchay ñak’ariy tiempo qallarinanpaqqa llapa runaraq yarqaypi kananta, lliw nacionkunaraq guerrapi kananta, sapanka familiapiraq pillapas onqosqa kananta (Apo. 7:14). Ichaqa manan chhaynachu kanqa. Chhayna kaqtinqa llapa runachá reparanman profeciakunaq hunt’akushasqanta. Bibliapi mana creeq runakunapaqpas sut’ichá kanman. Ichaqa Jesusmi nirqan yaqa llapa runakuna tukukuy p’unchaykunapi kawsashasqankuta mana reparanankuta, Diospa p’unchayninqa llakhi kashaqtinku qonqaylla hap’inantapas (leey Mateo 24:37-39). Chaykunapi piensaspan reparanchis  manchay ñak’ariy tiempo qallarinanpaqqa mana sinchi millayraqchu kay pachaqa kananta (Luc. 17:20; 2 Ped. 3:3, 4).

8. ¿Imamantan seguro kashanchis Diosta serviqkuna?

⁸ Makilla kashaq cristianokunallan tukukuy p’unchaykunata reparananku karqan. Chaypaqmi Jesusqa profeciakunata willarqan (Mat. 24:27, 42). 1914 watamantapachan rikurqanchis chay profeciakunaq hunt’akusqanta. Chaymi seguro kashanchis tukukuy p’unchaykunapi kawsasqanchismanta, kay millay pachata Jehová Dios chinkachinanmantapas.

9. ¿Imaraykun makilla kashananchis?

⁹ Chhaynaqa, ¿imaraykun makilla kashananchis? Cristoq kamachiwasqanchista kasukusqanchisraykun, tukukuy p’unchaykunamanta profeciakunaq hunt’akusqanpi creesqanchisrayku. Manan yanqallachu creenchis, aswanpas Bibliaq nisqanmi hunt’akushan.

10, 11. a) ¿Imaraykun qatikuqninkunata Jesús nirqan makilla kashanankupaq? b) ¿Imatan ruwananchis unayña Diospa phiñakunan p’unchayta suyakuqkuna? (9 paginapi dibujota qhaway.)

¹⁰ Askha Testigokunan unayña suyakushanchis Diospa phiñakuynin p’unchay chayamunanta. Ichaqa manan chayraykuchu pisikallpayananchis, aswanpas makillan kashananchis. Saqraq kamachisqan pachata Jesuspa chinkachinan p’unchaypaqmi listo kashananchis. Jesusmi nirqan: “Manan yachankichischu hayk’aqchus chaykuna kanantaqa, chayrayku cuidakuychis, makilla kashaychis. Kayqa karuman puriq runamanmi rikch’akun, paymi wasinta saqerqan, kamachinkunamanpas atiyta qorqan, sapankamantaq ruwanata, punku qhawaqtapas kamachirqan makilla kashananpaq. Makilla kashaychis, manan yachankichischu hayk’aqchus wasiyoqpa hamunantaqa, ch’isintachus, icha kuska tutatachus, icha gallo waqaytachus, ichari tutamantataqchus. Paqtataq qonqaylla hamuspa puñushaqta tarirqosunkichisman. Qankunaman nisqaykunataqa, llapanmanmi nini: ‘¡Makilla kashaychis!’”, nispa (Mar. 13:33-37).

¹¹ Jesuspa kamachikusqan tiempo 1914 watapi qallarisqanta entiendespan, cristianokunaqa repararqanku Diospa phiñakunan p’unchay imay ratopipas chayamunanta. Chaymi preparakurqanku, ¿imaynata? Tukuy atisqankuta Diospa gobiernonmanta predicaspa. Jesusmi nirqan kamachikunaq mana piensasqanku horapi patronninku chayamunanta. Yaqapaschá kuska tutata, gallo waqayta otaq illarimuyta. Ima horastaña chayamunan kaqtinpas, kamachikunaqa  makilla kashananku karqan. ¿Imatan Jesuspa nisqan yachachiwanchis? Diospa phiñakunan p’unchayta unayña suyashanchis chaypas, manan chayraykuchu nisunman “manan chayamunqachu” otaq “chay p’unchaykamaqa wañupusunñachá” nispaqa, aswanpas makillan kashananchis.

12. a) ¿Imatan Habacuc tapurqan Jehová Diosta? b) ¿Imatan Jehová Dios kutichirqan?

¹² Profeta Habacucmi willamurqan Jerusalén llaqta thunisqa kananmanta. Ñawpaq watakunatan huk profetakunapas kaq mensajellatataq runakunaman willamurqanku. Habacuctaq repararqan runakunaq aswan millayman tukupusqankuta. Chaymi Jehová Diosta tapurqan: “¿Hayk’aqkamataq waqyakamusqayki, manataq uyariwankichu?”, nispa. Manaña Jehová Dios willarqanchu hayk’aqchus Jerusalén thunisqa kananta chaypas, makilla kananpaqmi kamachirqan, prometerqantaqmi: “Tiemponpipunin chayamunqa”, nispa (leey Habacuc 1:1-4; 2:3).

13. a) ¿Imatan Habacuc mana piensarqanchu? b) ¿Iman pasanman karqan chhaynata piensaqtin?

¹³ Habacucqa manan sayk’urqanchu suyakuspa. Manan piensarqanchu: “Askha watakunañan Jerusalenpa thunisqa kananmanta willashani. Yaqapaschá unay tiemporaq faltan chay pasananpaqqa, chhaynaqa hukkuna willashachunku”, nispa. Sichus chhaynata piensanman karqan chayqa, manañan Diospa amigonchu kanman karqan, Jerusalén thunisqa kaqtintaq wañupunman karqan.

14. Mosoq pachapiña kaspa, ¿imamantan Jehová Diosta agradecekusun?

¹⁴ Mosoq pachapiña kaspaqa yuyarisunmi tukukuy p’unchaykunapi profeciakunaq hunt’akusqanta. Chayta yuyarispaqa maytachá agradecekusunchis kay millay pachata tiempollanpi Dios tukuchisqanmanta, makilla kananchispaq sapa kutillan niwasqanchismantapas (Hech. 1:7; 1 Ped. 4:7). Hinaspapas Jehová Diospa huk promesankuna hunt’ananpipas astawanchá confiasunchis (leey Josué 23:14).

15, 16. ¿Imaraykun usqhaylla predicananchis?

¹⁵ Jehová Diospa llaqtanpiqa sapa kutillanmi niwasunchis Diosta serviyninchis  aswan importante kasqanta. Chaymi yanapawasun tukukuy p’unchaykunapaq profeciakunaq hunt’akusqanpi confiananchispaq, makilla kashananchispaqpas. Chayraykun Jehová Diosta serviyninchis, gobiernonmanta predicayninchispas aswan importante kanan (Mat. 6:33; Mar. 13:10).

¹⁶ Saqraq kamachisqan pachaqa ñan tukukapunqaña, chaymi runakunata predicaspa salvananchis. Chay ruwayqa imamantapas aswan importanten. 1945 watapin huk barco qochaman chinkaykurqan, askha runakunataq wañurqanku. Huk casarasqa warmi-qhari salvakuqmi qhepaman Jehová Diospa testigon kapurqanku. Esposan nirqan: “Barco chinkaykushaqtinmi huk warmi maletankunamanta, joyankunamanta waqaykusharqan”, nispa. Rikusqanchis hina, wakinqa wañuy patapiña tarikushaspapas manan reparankuchu vidanku hukkunaq vidanpas aswan importante kasqanta. Wakin pasajerokunan ichaqa tukuy atisqankuta ruwasharqanku unuman urmaykuq runakunata salvanankupaq. Ñoqanchispas chay pasajerokuna hinan tukuy atisqanchista ruwananchis runakunata salvananchispaq, chaymi usqhaylla predicamunanchis.

17. ¿Iman rikuchiwanchis Diospa phiñakunan p’unchay imay ratopipas chayamunanta?

 ¹⁷ Bibliaq willasqan profeciakunaqa hunt’akushanmi. Pisillamantan Organización de las Naciones Unidas nisqa, paywan kashaq gobiernokunapas pantasqa religionkunata chinkachinqaku (Apo. 17:16). Diosmi imay ratopipas chay gobernantekunaq sonqonman churanqa pantasqa religionkunata chinkachinankupaq (Apo. 17:17). Chaymi rikuchiwanchis Diospa phiñakunan p’unchay imay ratopipas chayamunanta. Chayraykun Jesuspa nisqanta kasukunanchis, paymi nirqan: “Cuidakuychis qankuna kikiykichista, paqtataq sonqoykichis rumiyanman viciokunawan, machaywan, kay kawsaypa llakichikuyninwan, chaytaq Runaq Churin kutimunan p’unchay qonqaylla hap’isunkichisman”, nispa (Luc. 21:34, 35; Apo. 16:15). Chhaynaqa makilla kashasun, Diosta serviypitaq yuyayninchis kashachun. Confiasuntaq Jehová Diospa salvawananchispi (Is. 64:4).

18. ¿Imamantan qatimuq estudiopi yachasun?

¹⁸ Diospa phiñakunan p’unchayqa chayamunqapunin. Chaykaman ichaqa Bibliaq kay nisqanta kasukushana: “Ancha ch’uya iñiyniykichispi wiñachinakuychis, Santo Espirituq yanapayninwan Diosmanta mañakuychis. Diospa munakuyninpi allinta takyaychis, Señorninchis Jesucristoq khuyapayakuyninpi, wiñay kawsay qonasuykichista suyakuychis”, nispa (Jud. 20, 21). Ichaqa, ¿imaynatan rikuchisunman paraisopi tiyay munasqanchista? Chaytan qatimuq estudiopi yachasun.