1, 2. a) ¿Imaraykun mana iskayanchischu Jehová Diospa munakuyninmanta? b) ¿Imaynatan Jehová Dios kamawarqanchis?

¿IMARAYKUN mana iskayanchischu Diospa munakuwasqanchismanta? Kay ejemplokunapi piensasun. Taylene cristianan imatapas allinllatapuni ruwayta munaq, mana hinaqa sinchi llakisqas tarikuq. Askha kutipin iñiqmasikuna niqku ama chay hina kananta. Paymi nin: “Sichus Jehová Dios mana munakuwanmanchu chayqa, manachá chhaytukuy tiempo iñiqmasikunawan yanapachiwanmanchu karqan”, nispa. Iskay wawayoq viuda cristianan nillantaq: “Saqraq kamachisqan pachapi wawakunata uywayqa sinchi sasan, astawanqa sapallay kasqayrayku. Chaywanpas Jehová Diosqa manan hayk’aqpas saqerpariwarqanchu, aswanpas kallpatan qowarqan sasachakuyniykunawan ama atipachikunaypaq, chaymi munakuyninmanta mana iskayanichu”, nispa (1 Cor. 10:13). Sandra cristianapas mana hampiy atina onqoywanmi tarikun. Huk kutinmi asambleapi mana reqsisqanku cristiana paywan parlarirqan. Sandraq qosanmi nin: “Mana reqsiwashaspankupas sonqoman chayaqtan  parlapayawarqanku. Chay hinata iñiqmasikuna munakuyninkuta rikuchiwasqankupin Jehová Diospa munakuyninta rikullaykutaq”, nispa.

² Jehová Diosmi kamawarqanchis munakunanchispaq, munasqa kananchispaqpas. Ichaqa onqosqa kaspa, qolqewan pisichikuspa otaq predicasqanchista mana pipas uyariyta munaqtinmi llakikusunman, hinaspa piensasunman Jehová Diospas manaña munakuwananchispaq. Chhaynapi tarikuspaqa yuyarinanchismi Jehová Diosqa ñoqanchismanta llakikusqanta, yanapay munawasqanchistapas. Payqa manan hayk’aqpas saqerpariwasunchu hunt’aq sonqolla kasun chayqa (Is. 41:13; 49:15).

3. ¿Imaynatan yachasunman Jehová Dios munakuwasqanchista?

³ Qhawarimusqanchis hina, sasachakuypi tarikuq cristianokunaqa manan iskayarqankuchu Jehová Diospa yanapasqanmanta. Ñoqanchispas manan iskayananchischu sasachakuypi tarikuqtinchis Jehová Dios yanapawananchismanta (Sal. 118:6, 7). Sichus ñoqanchisrayku allinkuna ruwasqanpi piensasun chayqa, sut’itan yachasun munakuwasqanchista (leey Salmo 77:11, 12). Kay estudiopin yachasun Jehová Dios munakuwasqanchisrayku imakuna qowasqanchista, chaykunamanta imayna agradecekunanchismantawan. Chay qowasqanchiskunan: kamasqankuna, Biblia, oración, kacharichiypiwan.

4. ¿Imatan yachanchis Diospa kamasqankunata rikuspa?

⁴ Kamasqankunata rikuspan yachanchis sinchita Jehová Dios munakuwasqanchista (Rom. 1:20). Kay pachatan ruwarqan chaypi kusisqa kawsananchispaq. Imaymana clase mikhuykunan kan, chaykunata mikhuspa kusikunanchispaq (Ecl. 9:7). Canadá nacionmanta cristianan anchata kusikun t’ikay tiempo chayamuqtin. Paymi nin: “Admirakunapaqmi rit’i tiempo pasaqtin yapamanta campokunaq q’omeryasqan, t’ikakunan pampamanta phutumun, urpikunan kutimpunku. Maytan kusikuni q’entepas mikhuna qosqayman mikhuq kutimusqanmanta. Chaykunan rikuchiwanchis Jehová Diosqa maytapuni munakuwasqanchista”, nispa. Diosqa anchatan kusikun kamasqankunata rikuspa, munantaqmi ñoqanchispas chaykunata rikuspa kusikunanchista (Hech. 14:16, 17).

5. ¿Imaynapin yachallanchistaq Diospa munakuwasqanchista?

⁵ Imayna kamasqa kasqanchispin yachallanchistaq Jehová Diospa munakuwasqanchista. Runatan kamarqan llank’aspa kusisqa kananchispaq (Ecl. 2:24). Kay pachaman hunt’aykunanchispaq, chaypi  llank’ananchispaq, animalkunata plantakunata cuidananchispaqpas (Gén. 1:26-28). Hinaspapas payman rikch’akuq kananchispaqmi kamawarqanchis (Efes. 5:1).

6. ¿Imaraykun Bibliamanta agradecesqa kananchis?

⁶ Bibliata qowasqanchispin yachallanchistaq Jehová Diospa munakuwasqanchista. Chaypin yachanchis imayna Dioschus kasqanta, runakuna munakusqantapas; chaymi Bibliamanta agradecekunanchis. Bibliapin yachanchis Israel runakuna sapa kutilla mana kasukushaqtinkupas Jehová Dios imachus ruwasqanta. Ninmi: “Diosmi ichaqa khuyapayakuq kaspa huchallikusqankuta pampachallaqpuni, manataq paykunata tukurparirqanchu. Askha kutin mana phiñakurqanchu”, nispa (Sal. 78:38). Chay  textopi piensaymi yanapawasun Diospa munakuyninmanta ama iskayanapaq, payqa pantaq runaña kaqtinchispas ñoqanchismantan llakikun (leey 1 Pedro 5:6, 7).

7. ¿Imaraykun Bibliata valorananchis?

⁷ Bibliataqa valorananchismi, chaywanmi Jehová Dios parlapayawanchis. Sichus huk tayta wawanwan parlarin chayqa astawanmi munanakunku, confianakunku. Chay hinan Jehová Dioswanpas. Paytaqa manan hayk’aqpas rikunchischu nitaq kunkanta uyarinchischu, chaywanpas Bibliawanmi rimapayawanchis. Chaymi tukuy yuyay leenanchis (Is. 30:20, 21). Chhaynapin rikusun Jehová Dios pusariwasqanchista, cuidawasqanchistapas. Chaytaq yanapawasun payman astawan achhuykunanchispaq, paypi confiananchispaqpas (leey Salmo 19:7-11; Proverbios 1:33).

8, 9. ¿Ima yachananchistan Jehová Dios munan? Ejemplota willay.

⁸ Jehová Diosqa manan pantasqanchiskunatachu qhawashan aswanpas allin ruwasqanchiskunatan, chayta yachananchistan munan (2 Crón. 16:9). Judá rey Josafatmi mana allinta decidispa Israel rey Ahabwan huñukurqan Siria contra maqanakunankupaq. 400 pantasqa profetakunan Israel reyman willarqanku guerrata gananankuta, cheqaq profeta Micaiasmi ichaqa willarqan maqanakuspa atipachikunankuta. Chaytaqmi sucederqan. Rey Ahabmi wañurqan chay guerrapi, Josafat-taq yanqallaña ayqekamurqan. Hinan Jehová Diosqa Jehuta kacharqan Josafat-ta anyananpaq, ichaqa nillarqantaqmi: “Chaywanpas wakintaqa allintan ruwarqanki”, nispa (2 Crón. 18:4, 5, 14-22, 33, 34; 19:1-3).

⁹ ¿Imakunatan rey Josafat allinta ruwarqan? Ñawpaq watakunapin Josafatqa oficialninkunata, levitakunata, sacerdotekunatapas kamachirqan Judá llaqtantinpi Diospa kamachikuy siminta yachachinankupaq. Chhaynapin wak nacionniyoq runakunapas Jehová Diosmanta yacharqanku, chaymi chay ruwasqanqa allin karqan (2 Crón. 17:3-10). Chay qhepamanña Josafat pantarqan chaypas, manan Jehová Diosqa qonqarqanchu allinkuna ruwasqanta. ¿Imatan chaymanta yachasunman? Pantaq runaña kanchis chaypas, Jehová Diosta servishanallapaq kallpachakuqtinchisqa payqa munakuwashallasunmi, manataqmi qonqanqachu allinkuna ruwasqanchista.

10, 11. a) ¿Imaraykun ninchis oracionqa Diospa regalon kasqanta? b) ¿Imaynatan Dios orakusqanchisman kutichimun? (3 paginapi fotota qhaway.)

¹⁰ Allin taytaqa wawankunaq rimasqankutan uyarin, paykunata munakuspan yachayta munan imachus llakichisqanta, imachus sonqonkupi kasqantapas. Chay hinallataqmi Jehová Diospas, payqa anchatapunin ñoqanchispi interesakun. Chaymi orakuqtinchisqa tukuy yuyay uyariwanchis. Chaymi Jehová Dioswan rimaytaqa ancha valorniyoqpaq qhawarinanchis.

¹¹ Oracionqa Diospa regalonmi, ¿imarayku? Imay ratopas paywan parlay atisqanchisrayku.  Payqa amigonchismi, p’unchay ch’isiyaqtaq uyariwanchis. Ñawpaqpin rimamurqanchis Taylene cristianamanta. Paymi nin: “Jehová Diosmanqa ima munasqanchistapas willasunmanmi”, nispa. Imaynachus tarikusqanchista Jehová Diosman willaqtinchisqa, yaqapaschá Bibliapi huk textowan kutichimuwasun, huknin qelqanchiswan otaq kallpachawasun huk iñiqmasinchiswan. Jehová Diosqa uyariwanchispunin, entiendewanchistaqmi mana pipas entiendewaqtinchispas. Orakusqanchisman kutichimusqanwanmi yachallanchistaq munakuwasqanchista.

12. ¿Imaraykun Bibliapi tarikuq oracionkunata estudiananchis? Wakinmanta willay.

¹² Bibliapi tarikuq oracionkunamantan askhata yachasunman. Chaymi allinpuni kanman familiantin estudiasqanchispi chaykunata t’aqwiriyqa. Estudiasunmanmi challwaq wiksan ukhumanta humillakuspa Jonaspa orakusqanta (Jon. 1:17-2:10). Hinaspapas estudiasunmanmi templota inaugurashaspa sonqomanta Salomonpa orakusqanta (1 Rey. 8:22-53). Chaymantapas Jesuspa oración yachachiwasqanchispin piensasunman (Mat. 6:9-13). Sichus chay hina oracionkunapi piensasun chayqa, aswan allintan orakusun. Astawanqa mana p’itiytan orakunanchis, ‘hinan Diosqa thak-kayta qowasun runakunaq mana aypay atisqan thak-kayta, chhaynapin sonqonchis yuyayninchispas cuidasqa kanqa’. Chaykunawanmi yachanchis Jehová Diospa munakuwasqanchista (Filip. 4:6, 7).

13. ¿Imapaqmi yanapawanchis kacharichiy?

¹³ Kacharichiymi rikuchillantaq Jehová Diospa munakuwasqanchista. Paymi chay valorniyoq regalota qowarqanchis “wiñay kawsayniyoq kananchispaq” (1 Juan 4:9). Apóstol Pablon nirqan: “Huk chanin runaq rantinpi wañuyqa sinchi sasan, ichapaschá pillapas wañunman sumaq runaq rantinpiqa. Diosmi ichaqa munakuyninta rikuchiwanchis, huchasaparaq kashaqtinchis Cristoq wañupuwasqanchiswan”, nispa (Rom. 5:6-8). Kacharichiymi rikuchiwanchis Diospa sinchi munakuwasqanchista, yanapawanchistaqmi Diospa amigonkuna kananchispaq.

14, 15. ¿Imatan akllasqa cristianokuna wak ovejakunapas chaskinqaku kacharichiyrayku?

¹⁴ Kacharichiywanmi Diosqa rikuchin akllasqa cristianokunata sinchi munakusqanta (Juan 1:12, 13; 3:5-7). Diosmi paykunataqa santo espiritunwan akllarqan, chaymi wawankuna kapunku (Rom. 8:15, 16). Pablon nirqan paykunaqa hanaq pachapi Jesucristowan kuska tiyaykusqankuta (Efes. 2:6). Ichaqa kay pachapiraqmi akllasqa cristianokunaqa kasharqanku, chhaynaqa ¿imaraykun Pablo nirqan Jesucristowan kuska tiyaykusqankuta? Llapallanku hanaq pachapi wiñaypaq tiyanankupaq akllasqa kasqankuraykun (Efes. 1:13, 14; Col. 1:5).

 ¹⁵ Wak ovejakunapas kacharichiypi iñisqankuraykun Diospa amigonkuna kanku. Hamuq tiempopiqa Diospa wawankunamanmi tukupunqaku, hinaspan kay pachapi wiñaypaq tiyakunqaku. Kacharichiymi rikuchin llapa runakunata Jehová Dios munakusqanta (Juan 3:16). Kay pachapi tiyanankupaq suyakuqkunaqa sumaq kawsaytan suyakushanku, chaypaqmi hunt’aq sonqolla Diospaq kananku. Chaymi llapallanchis kacharichiymanta sapa p’unchay sonqomanta Diosta agradecekunanchis.

16. ¿Imatan ruwasun munakuwasqanchisrayku Diospa tukuy ruwasqankunapi piensaspa?

¹⁶ Jehová Diosqa imaymanata ruwaspan may munakuwasqanchista rikuchiwanchis. Chaymi rey Daviqqa nirqan: “Diosníy, ñoqapaqqa ancha chaniyoqmi yuyaykusqaykikunaqa, ancha askhallañan chaykunaqa. Chaykunata yupariyta munayman chaypas, aqomantapas aswan askharaqmi kanman”, nispa (Sal. 139:17, 18). Sichus piensasun munakuwasqanchisrayku tukuy imaymana ruwasqanpi chayqa astawanmi Diosta munakusun, tukuy sonqowantaq payta servisun.

17, 18. ¿Imaynatan rikuchisunman Jehová Dios munakusqanchista?

¹⁷ ¿Imaynatan rikuchisunman Jehová Diosta munakusqanchista? Tukuy sonqowan predicaspan (Mat. 24:14; 28:19, 20). Sasachakuykunapi tarikuspapas hunt’aq sonqolla kaspan (leey Salmo 84:11; Santiago 1:2-5). Jehová Diosqa munakuwasqanchisraykun yanapawasun sinchi sasachakuypiña tarikuqtinchispas (Sal. 56:8).

¹⁸ Kay estudiopi qhawarimusqanchis hina, Jehová Dios munakusqanchistan rikuchinchis kamasqankunapi piensaspa, tukuy yuyaywan Bibliata estudiaspa, mana p’itiyta orakuspa, kacharichiypi piensaspa ima (1 Juan 2:1, 2). Sichus chaykunata ruwasun chayqa, seguron kasun Jehová Diospa munakuwasqanchismanta, aswan-aswantataq payta munakusunchis.