QUEENSLAND (Australia) llaqtapin nacerqani 1955 watapi. Tayta-mamayqa Ron, Estelle iman. Nacesqay qhepallatan mamitayqa Testigokunawan estudiayta qallarirqan, huk wata qhepamantaq bautizakapurqan. Taytayqa 13 watakuna qhepatañan bautizakurqan. Ñoqataq 1968 watapin bautizakurqani Queensland llaqtaq qayllanpi.

Huch’uychaymantapachan anchata gustawaq leey, huk rimaykunamanta yachaypas. Familiaywan carropi viajashaqtiykupas campokunata qhawanaymantaqa librokunatan leeq kani. Yaqapaschá tayta-mamayqa chaywan llakikuqku. Ichaqa chhayna kasqaymi escuelapi yanapawarqan, colegiopipas askha premiokunata ganarqani, colegioymi kasharqan Glenorchy (Tasmania) llaqtapi.

Chaymantapas colegioypi kashaqtiyraqmi invitawarqanku universidadpi gratislla estudianaypaq. ¡Chayta decidiyqa importanten karqan! Anchataña leey estudiay gustawarqan chaypas astawanmi Jehová Diosta munakurqani, chaytan mamitay yachachiwarqan (1 Cor. 3:18, 19). Chayraykun decidirqani colegiota tukuspa hina precursor kanaypaq. Tayta-mamayqa  apoyawarqankun, chaymi 1971 watapi enero killapi precursor kapurqani 15 wataypi kashaspa.

Chay qhepamantaq pusaq wata Tasmania islapi precursor karqani. Chaypin munay sipaswan casarakurqani, paymi karqan Jenny Alcock. Paywanmi tawa wata precursor especial karqayku Smithton, Queenstown llaqtakunapi.

1978 watapin Port Moresby llaqtapi askha nacionkunamanta asamblea karqan, chaymanmi Jennywan rirqayku, chayqa kashan Papúa Nueva Guinea nacionpin. Chaypin huk misionero hiri motu simipi discursota qorqan. Manaña imatapas entienderqanichu chaypas piensachiwarqanmi misionero kanaypaq, chhaynapi huk rimaykunata yachaspa huk nacionniyoq iñiqmasikunata kallpachanaypaq. Anchatataq huk rimaykunamanta yachay gustawarqan chayqa, Jehová Diosta chaywan serviyqa kusichiwarqanmi.

Australia nacionman kutimpuqtiykuqa Funafuti (Tuvalu) islapi misionero kanaykupaqmi invitawarqanku. ¡Chay invitacionqa anchatan kusichiwarqanku! 1979 watapin enero killapi chay llaqtaman ripurqayku, chaypiqa kinsa Testigokunallan karqanku.

Tuvaluano simita yachayqa sasan karqan. Manan chay simipi diccionariokuna kaqchu nitaq pipas yachachiqchu. Mosoq Testamentollan chay simipi kasharqan. Chaywanpas sapa p’unchay 10 otaq 20 palabrakunata yachanaykupaqmi decidikurqayku. Wakin palabrakunaqa sasa entiendenapaqmi karqan. Ejemplopaq: supaykunawan rimay mana allin kasqanta yachachinaykumantaqa, balanzakuna bastonkuna utilizay mana allin kasqantan yachachishasqayku. Chaywanpas manan pisiparqaykuchu askha runakunawan Bibliata estudiasqaykurayku. Unay watakuna qhepamanmi paykunamanta huknin kaq niwarqanku: “Allintañan yacharqonkichis tuvaluano simita, qallariypiqa manan imatapas entienderqaykichischu”, nispa.

Chay islapiqa manan karqanchu alquilanapaq cuartokuna, chaymi huk Testigoq wasinpi alojakurqayku. Chaypiqa munay mana munaymi tuvaluano simita rimaq kayku, inglés simitaqa manañan rimaqchu kayku, chaytaqmi yanapawarqanku ratulla yachanaykupaq.

Tuvalu nacionpiqa askha runakunan Bibliamanta yachayta munarqanku, ichaqa rimasqanku simipi qelqakunaqa manan karqanchu. Chhaynaqa, ¿imaynatan Jehová Diosmanta yachankuman  karqan? ¿Imawanmi huñunakuykunapi takinkuman karqan? ¿Imawanmi preparakunkuman karqan? ¿Imaynatan bautizakunkuman karqan? Chaypaqqa rimasqanku simipi qelqakunan necesitakurqan (1 Cor. 14:9). Ichaqa yaqa 15.000 runakunallan tuvaluano simita rimaqku, chaymi tapukurqayku: “¿Hayk’aqllapas chay simipi qelqakuna ruwakunmanchu?”, nispa. Tiempowanmi entienderqayku Jehová Diospa munasqanta: payqa munarqanmi “karu qocha patapi” tiyaqkuna paymanta yachanankuta, pisipaq qhawarisqa runakuna yanapasqa kanankutapas (Jer. 31:10; Sof. 3:12).

1980 watapin sucursalmanta niwarqanku tuvaluano simiman qelqakunata t’ikranaykupaq. Chay ruwaytaqa mana atinaykupaq hinan qhawarirqayku, chaywanpas qallarirqaykun t’ikrayta (1 Cor. 1:28, 29). Chay tiempopiqa manan electricidad karqanchu, chaymi gobiernomanta rantirqayku huk impresorata makillawan manejanaykupaq. Qallariypiqa huñunakuykunapaq qelqakunatan ruwarqayku. Chaymantapas La verdad que lleva a vida eterna librota ruwarqayku. Yuyashaniraqmi impresoraman churasqayku tintaq sinchi q’aparisqanta, nishu ruphay kasqanrayku hump’isqaykutapas.

Tuvaluano simiman t’ikranaykupaqqa sasan karqan chay simipi diccionariokuna librokuna mana kasqanrayku. Jehová Diosmi ichaqa yanapachiwaqku mana piensasqayku runakunawan. Huk kutinmi Testigokunata mana chaskiq runaq punkunta takarqani, payqa jubilasqa profesormi karqan. Punkunta kichamuwaspan yuyarichiwarqan amaña visitanaykupaq. Ichaqa niwallarqantaqmi t’ikrasqayku qelqakuna mana Tuvalu runakunaq rimasqankuman hinachu kasqanta, hinaspan niwarqan imayna t’ikranaykuta. ¡Chayqa anchatan admirachiwarqan! Huk runakunata tapuqtiyqa kaqtan niwallarqankutaq, chaymi chay profesorpa nisqanman hina ruwarqayku. Anchatan admirakurqani Jehová Dios  mana uyariy munaq runawan yanapawasqankumanta.

Qelqakunawan predicamunaykupaqqa ñawpaqtan ruwakurqan Jesuspa wañusqanta yuyarinapaq invitacionkuna, chaymantataq Diospa gobiernonmanta willakuykuna (núm. 30) nisqa tratadota. Chayqa inglés simipi lloqsimusqan tiempollapitaqmi lloqsimurqan. Chaykunawanmi runakunaman rimasqanku simipi kusisqa predicaq kayku. Tiempowanmi lloqsimullarqantaq askha folletokuna, librokuna. 1983 watapitaq Australia sucursalpin Qhawaq revista ruwakuyta qallarirqan tuvaluano simipi, chayqa karqan 24 paginakunayoqmi, sapa kinsa killamantataq lloqsimuq. Tuvalu runakunaqa anchatan munarqanku qelqanchiskuna leeyta. Mosoq qelqakuna lloqsimusqanta yachanankupaqmi gobiernopas radiopi willachimuq, mayninpitaq chayllamantan rimakamuq. *

Ichaqa, ¿imaynatan qelqakunata t’ikraq kayku? Ñawpaqtaqa makillawanmi t’ikraq kayku, chaymantataq maquinaman pasachiq kayku. Chayta revisaruspataq hukmanta maquinaman pasachiq kayku allin kanankama. Chaytan Australia sucursalman correopi apachiq kayku, chaypin iskay iñiqmasikuna computadoraman pasachiqku. Manataq tuvaluano simita yachaqkuchu chayqa, sapankankun computadoraman pasachiqku, chaymantataq comparaqku. Chay qhepamantaq dibujonkunata churaqku. Hinamantaq avionpi hukmanta apachimpuwaqku. Chayta hukmanta revisaspataq ñoqaykuñataq apachiq kayku chay qelqata imprimichimunankupaq.

Kay tiempopiqa manañan chay hinatachu ruwakun, kunanqa ratullan computadorapi t’ikranku, allichankupas. Dibujokunatapas huk iñiqmasin usqhaylla churan. Tukuqtinku hinataq internetpi sucursalman apachinku imprimimunankupaq.

Watakunaq pasasqanman hinan océano Pacífico islakunata rinaykupaq niwarqanku. 1985 watapitaq Samoa sucursalpi yanapakunaykupaq niwarqanku. Chaypiqa tuvaluano simitan t’ikrasharqayku, ichaqa yanapallarqaykutaqmi samoano, tongano, toquelao simikunaman t’ikraq iñiqmasikunata. * 1996 watapitaq Fiyi sucursalman rinaykupaq invitawarqanku, chaypipas t’ikraypin yanapakurqayku fiyiano, kiribatiano, nauruano, rotumano simikunapi.

T’ikraypi yanapakuq iñiqmasikunaqa tukuy sonqon llank’aqku, sasaña sinchi sayk’unapaqña karqan chaypas. ¡Chayta rikuyqa anchatan admirachiwarqan! Paykunapas Jehová Dios hinan munarqanku llapa runakuna rimasqanku simipi allin willakuykuna uyarinankuta (Apo. 14:6). Qhawaq revista tongano simipi t’ikrayta qallarinayku kashaqtinmi Tonga nacionmanta umallikunawan huñunakurqani, chaypin tapurqani  mayqenchus t’ikraypi yanapakunanta. Hukninmi karqan mecánico, llank’ananpitaq allin pagasqa karqan. Paymi nirqan qhepa p’unchayllata llank’ananta saqespa t’ikraypi yanapakunanpaq. Familiayoqña karqan chaypas, Jehová Diospin confiarqan. Payqa unay watakunan t’ikraypi yanapakurqan, Jehová Diostaqmi payta familiantapas cuidarqan.

Umalliq t’aqamanta iñiqmasikunaqa munankun llapa simikunapi qelqakuna ruwakunanta, mana reqsisqa simikunapipas. Huk kutinmi chay iñiqmasikunata tapurqanku tuvaluano simipi t’ikrakushallanqachus manachus chayta. Hinan paykunaqa nirqanku: “Manan imaraykupas tuvaluano simiman t’ikraytaqa saqenaykichischu, pisi runakunalla kanku chaypas necesitankun rimasqanku simipi allin willakuykuna uyariyta”, nispa. Chhayna kutichimuwasqankuqa anchatan kallpachawarqan.

Jennywan ñoqawanqa Fiyi sucursalpin llank’arqayku 2003 watakama. Chay watapin invitawarqanku Estados Unidos (Patterson) Betelpi llank’anaykupaq. Chaypiqa qelqakuna t’ikrakusqanta qhawariqkunatan yanaparqayku. Paykunan encargakuqku askha simikunaman qelqakuna t’ikrakunanpaq. ¡Paykunawan llank’ayqa ancha kusikunapaqmi karqan! Ñoqaykuqa iskay wata masmi askha nacionkunaman rirqayku t’ikraqkunata yanapaq.

¿Yuyashankichu qallariypi willasqay huñunakuymanta? Chayqa 2000 watapin karqan. Chaypin umalli t’aqamanta iñiqmasikuna decidirqanku t’ikraq iñiqmasikunapaq huk escuela ruwayta. Pachantinpi t’ikraqkunaqa yanapaytan necesitarqanku allin t’ikraq kanankupaq. Chay escuelapin yachachirqanku t’ikraqkuna inglés simita allinta entiendenankupaq, sasa t’ikrana kaqkunata allichanankupaq, huk nisqalla llank’anankupaqpas.

Chay escuela kasqanmi yanaparqan qelqanchiskuna allin t’ikrasqa kananpaq, askha simikunapipas t’ikrakunanpaq. 1979 watapi misionero kashaqtiykuqa 82 simikunallapin Qhawaq revistaqa lloqsimuq, hinaspapas inglés simipi lloqsimusqan askha killakuna qhepatañan lloqsimuq. Kunanmi ichaqa 240 simikunapi lloqsimun, yaqa llapantaqmi inglés simipi lloqsimusqan tiempopi lloqsimun. Kunanqa qelqanchiskunaqa 700 simikunapiñan t’ikrakushan. ¡Chayqa ancha admirakunapaqmi!

2004 watapin umalli t’aqamanta iñiqmasikunaqa decidirqanku Traducción del Nuevo Mundo nisqa Bibliata huk simikunaman usqhaylla t’ikrakunanpaq. Chhaynapin askha runakunaqa rimasqanku simipi Bibliata leerqanku. 2014 watapaqqa 128 simikunapiñan Biblia t’ikrasqa kasharqan, wakinta hunt’asqata t’ikrakurqan wakintataq partellanta. Wakin simikunataq océano Pacificoq islankunamantan karqan.

Ancha kusikuywanmi yuyashaniraq 2011 watapi Tuvalu nacionpi asamblea aparikusqanta. Chay nacionpiqa askha killakunan mana paramurqanchu, chaymi unu mana karqanchu. Chay  kasqanraykun iñiqmasikunaqa asamblea mana aparikunanpaq piensasharqanku. Chay llaqtaman chayasqay tardepin ichaqa sinchita paramurqan, chaymi asambleata ruwallarqanku. Chay asambleapin ancha kusikuywan presentarqani Traducción del Nuevo Mundo de las Escrituras Griegas Cristianas nisqa Bibliata tuvaluano simipi. Pisi runakunalla chay simita rimanku chaypas, Jehová Diosmi chay regalota paykunaman qorqan. Asamblea tukukusqan qhepamanpas hukmantan sinchita paramurqan. Chaytapas iñiqmasikunaqa sumaq regalopaqmi qhawarirqanku.

Chay asambleamanqa sapallayñan rirqani 2009 watapi esposay wañupusqanrayku, payqa chunka watan cáncer onqoywan ñak’arirqan. Paywanqa 35 watan casarasqa karqani. Paraisopi kawsarimpuspaqa anchatachá kusikunqa tuvaluano simiman Biblia t’ikrasqa kasqanmanta.

Kunanqa hukmantan casarakurqani munay warmiwan. Paypa sutinmi Loraini Sikivou. Payqa t’ikraypin yanapakurqan Jennywanpas llank’arqanmi Fiyi sucursalpi. Lorainiqa anchatan Jehová Diosta munakun, gustantaqmi huk rimaykunaman t’ikraypas, chaymi anchata kusikuni paywan casarakusqaymanta. ¡Jehová Diospa sumaq regalonmi!

Kay kawsasqay watakunapin rikurqani Jehová Dios llapa runakunata cuidasqanta, payqa munakunmi mana reqsisqa simikunata rimaq runakunatapas (Sal. 49:1-3). Rikullarqanitaqmi iñiqmasikuna rimasqanku simipi qelqakunata chaskispa, rimasqanku simipi Jehová Diosman takispa ancha kusikusqankuta (Hech. 2:8, 11). Huk kutinmi Saulo Teasi sutiyoq iñiqmasi tuvaluano simipi takisqan qhepata niwarqan: “Umalli t’aqamanta iñiqmasikunatan nipuwanki tuvaluano simipi takikuna inglés simipi takikunamantaqa aswan sumaq uyarikusqanta”, nispa.

2005 watapin setiembre killapi invitawarqanku umalli t’aqamanta kanaypaq. Manaña t’ikraniñachu chaypas, yanapakushaniraqmi pachantinpi t’ikraqkunata. ¡Maytan Jehová Diosta chaymanta agradecekuni! Jehová Diosmi llapa serviqninkunata cuidan, océano Pacificoq islankunapi tiyaq iñiqmasikunatapas. Chayqa anchatan kusichiwan, yuyarichiwantaq Bibliaq nisqanta, ninmi: “¡Señor Diosmi kamachikushan! Teqsimuyuntin kusikuchun, karu lamar-qocha patapi tiyaqkuna q’ochukuchun”, nispa (Sal. 97:1).