1, 2. a) ¿Imakunatan paraisopi ruwayta munanki? (Kay paginapi dibujota qhaway.) b) ¿Imakunan paraisopi astawan kusichiwasun?

APÓSTOL Pablon willarqan cheqaq kawsayqa wiñay kawsay kasqanta, chaymi nirqan tukuy atisqanchista chayta aypananchispaq kallpachakunanchista (leey 1 Timoteo 6:12, 19). Yaqa llapanchispaqmi chay wiñay kawsayqa kay pachapi kanqa. ¡Munashankiñachá chaypi kawsayta! Sapa tutamantanmi sayarinki kusisqa, qhali, mana imamantapas llakikuspa (Is. 35:5, 6). May kusisqachá kanki familiaykiwan amigoykikunawan, wakinninkuqa kawsarimpuqkunachá kanqa (Juan 5:28, 29; Hech. 24:15). Hinaspapas imaymanata yachanaykipaqmi tiempo kanqa. Yaqapaschá cienciamanta yachayta munanki, guitarrata arpata hukkunatapas tocayta munanki otaq wasi hatarichiyta munanki.

² Ichaqa, ¿imakunan paraisopi astawan kusichiwasun?  Jehová Diospa ch’uya sutinta llapa runakunaq respetasqankun, payllata kasukusqankupas (Mat. 6:9, 10). Chaymantapas pachantinpi runakunan ch’uya kanqaku, chaytan Diosqa ñawpaqmantapacha munarqan. Hinaspapas ch’uya kasqanchisman hinan Jehová Dioswan aswan amigontin kasun (Sal. 73:28; Sant. 4:8).

3. ¿Imapaqmi kunan preparakushananchis?

³ ¿Imanaqtinmi seguro kashanchis chaykuna hunt’akunanpi? Biblian nin: “Diospaqmi ichaqa tukuy imapas atikun”, nispa (Mat. 19:25, 26). Pablon nirqan wiñay kawsayta aypananchispaq tukuy atisqanchista ruwananchista. Chaymi Diospa phiñakunan p’unchay imay ratopipas chayamunanta kawsayninchispi rikuchinanchis. Paraisopi tiyayta munaspaqa kunanmi preparakushananchis.

4. ¿Imaynatan preparakusunman paraisopi tiyanapaq? Ejemplota willay.

⁴ Wak nacionman astakuyta munaqqa ñawpaqmantan preparakunan, ¿imaynata? Chay nacionpipas tiyashanman hinaña kawsaspa. Chay nacionpi rimasqanku simita, imakunachus ruwasqankuta yachaspa. Yaqapaschá mikhusqanku mikhunata mikhushanmanña, chay hinapi yachakushananpaq. Chay hinatan preparakusunman paraisopi tiyanapaqpas, chaypiñapas kashasunman hinatan kawsananchis. ¿Imakunatan ruwananchis? Chaykunata yachasun.

5, 6. ¿Imanaqtinmi kunanmantapacha Diospa llaqtanpi kamachikuykunata kasukunanchis?

⁵ Saqran runakunaq piensayninta pantachipun. Askha runakunan ima munasqankuta ruwanku, manan Diosta kasukuyta munankuchu. Chayraykun ñak’arinku, manataq kusisqachu kawsanku (Jer. 10:23). Ñoqanchismi ichaqa yachanchis Jehová Diosqa munakuq kasqanta, chaymi kasukunchis. Paraisopi tiyaspaqa kawsayninchismi aswan munay kanqa llapa runa Diosta kasukusqanrayku.

⁶ Chaypi tiyanapaqmi ichaqa preparakushananchis. Kunanmantapachan Diospa llaqtanpi kamachikuykunata kasukunanchis. ¿Imanaqtin? Kay pacha sumaq paraisoman tukupunanpaqmi imaymana kamachikuykunata chaskisun. Hinaspapas kawsarimpuqkunatan Jehová Diosmanta yachachinanchis kanqa. Chhaynaqa askhan ruwananchis kanqa, chaymi piensananchis: “¿Imatan ruwayman mana munasqay llank’anata Diospa llaqtanpi qowaqtinku? ¿Kasukuspachu tukuy sonqowan llank’asaq?”, nispa.

7, 8. a) ¿Imaraykun Diospa llaqtanpi huk llank’aypiñataq kananchispaq kamachiwaqtinchis kusisqa llank’ananchis? b) ¿Imatan wakin cristianokunata nirqanku? c) ¿Imaynan paraisopi sientekusun?

⁷ Hinaspapas paraisopi tiyanapaqqa Diospa llaqtanpi imachus ruwananchiswanmi kusisqa kananchis, yanapakuqtaq kananchispas. Sichus kamachiwasun huk llank’anapiñataq yanapakunanchispaq chayqa kallpachakunanchismi allinta llank’ananchispaq, kusisqataq kananchis.  Chayta kunan ruwaqtinchisqa facil-llan paraisopipas kanqa (leey Hebreos 13:17). Israel runakuna Diospa prometesqan hallp’aman chayaqtinkupas, manan paykunachu maypi tiyanankupaq akllakurqanku. Aswanpas Diosmi kamachirqan maypi tiyanankuta (Núm. 26:52-56; Jos. 14:1, 2). Paraisopipas yaqapaschá chay hinallataq kanqa. Manapaschá ñoqanchischu akllakusun maypi tiyananchispaq. Sichus kunanmantapacha Diospa llaqtanpi ima llank’aypipas kusisqa yanapakusun chayqa, kusisqan paraisopipas Jehová Diosta servisun maypiña tiyananchis kaqtinpas.

⁸ Paraisopi Diosta serviyqa ancha kusikunapaqchá kanqa. Chaymi kunanmantapacha Diospa llaqtanpi tukuy sonqowan ruwaysikushananchis ima llank’aypipas. Yaqapaschá niwasunman huk ladopi servinanchista. Estados Unidos Betelpi llank’aq wakin cristianokunatan nirqanku necesitakusqan ladokunapi predicaq rinankupaq. Wakin watukuq umallikunatataq nirqanku precursor especial kanankupaq. Llapankun ancha kusisqa servishanku, Jehová Diostaqmi bendecishan. Ñoqanchispas Diospa bendecisqan kayta munaspaqa paypa yanapaynintan mañakunanchis, Diosta servinanchispaq tukuy atisqanchista ruwananchis, ima llank’aypipas kusisqa kananchis (leey Proverbios 10:22). Yaqapaschá paraisopiqa niwasun mana piensasqanchis lugarpi tiyananchispaq, chaywanpas kusisqan kasun maypiña tiyananchis kaqtinpas otaq imapiña llank’ananchis kaqtinpas. ¡Maytachá Jehová Diosta agradecekusunchis paraisota qowasqanchismanta! (Neh. 8:10.)

9, 10. a) ¿Imaraykun paraisopi yaqapas pacienciakunanchis kanqa? b) ¿Imaynatan kunan rikuchisunman pacienciayoq kasqanchista?

⁹ Paraisopiqa yaqapaschá mayninpi pacienciakunanchis kanqa. Yaqapaschá amigonchiskuna kusisqa kashanqaku wañupuq familiankuq kawsarimpusqanwan, wañupuq familianchistaq ichaqa manaraq kawsarimpunraqchu. Chay kaqtin, ¿pacienciawanchu suyakusun? ¿Kusikusunchu kusikuqkunawan? (Rom. 12:15.) Sichus kunanmantapacha pacienciawan Diospa promesankuna hunt’akunanpi suyakusun chayqa, paraisopipas aswan facilmi kanqa (Ecl. 7:8).

¹⁰ Hinaspapas pacienciakunanchismi qelqanchiskunapi ima yachachikuypas cambiaqtin. Chay mosoq yachachikuykunatan tukuy yuyay estudiananchis, mana llapanta entiendespataq pacienciakunanchis. Sichus chhayna kasun chayqa, paraisopipas facil-llatan pacienciakusun mosoq yachachikuykunata Jehová Dios qowaqtinchis (Prov. 4:18; Juan 16:12).

11. a) ¿Imapuwanmi preparawanchis paraisopi tiyananchispaq? b) ¿Imaynatan paraisopi yanapawasun kunanmantapacha perdonaq kasqanchis?

 ¹¹ Perdonaq kasqanchispas preparawanchismi paraisopi tiyananchispaq. Cristoq 1.000 wata kamachikuyninpiqa llapanchismi pisi-pisimanta ch’uyaman tukupusun (Hech. 24:15). Chayraykun imaymanapiraq pantasun. Chhayna kaqtin, ¿perdonasunchu hukkunata? Sichus kunanmantapacha perdonaq kasun chayqa, paraisopipas facil-llan kanqa perdonaspa hukkunawan sumaqta kawsayqa (leey Efesios 4:32).

12. ¿Imaraykun kunanmantapacha Diospa munasqanman hina kawsananchis?

¹² Jehová Diospa munasqanman hina kawsasqanchismi paraisopiqa yanapawasun. ¿Imaynapi? Yaqapaschá paraisopiqa mana munasqanchis ratopichu llapa munasqanchista chaskisun. Hinaspa pacienciawan suyakunanchis kanqa. Imaynapiña tarikuspapas kusisqan, agradecesqa kananchis kanqa. Sichus chaykunata kunanmantapacha ruwasun chayqa, paraisopi tiyananchispaqmi preparakusun, rikuchisuntaq Diosta serviq runakuna ukhupi tiyay munasqanchistapas (Heb. 2:5; 11:1).

13. ¿Iman aswan importante paraisopi kanqa?

¹³ Paraisopiqa llapa necesitasqanchismi kanqa kusisqa kananchispaq. Ichaqa astawanqa kusichiwasun Jehová Dioswan amigontin kasqanchismi (Mat. 5:3). Paraisopiqa Diosta serviymi aswan importante kanqa, ancha kusisqataqmi chayta ruwasun (Sal. 37:4). Chayraykun paraisopaq preparasqa kanapaqqa, kay tiempopi Diosta serviy aswan importante kanan (leey Mateo 6:19-21).

14. ¿Imakunata ruwanankupaqmi wayna-sipaskuna decidikunkuman?

 ¹⁴ Ichaqa, ¿imaynatan Diosta aswan kusisqa servisunman? Diospa llaqtanpi astawan ruwanapaq decidikuspan. Wayna-sipas kanki chayqa Diosta astawan servinaykipaq decidikuy. Yaqapaschá precursor otaq betelita kawaq. Qelqanchiskunapin tarinki imakunapiwan yanapakunaykipaq. * Hinaspapas tapurikuy askha watakunaña tukuy tiemponkuwan Diosta serviq iñiqmasikunata. Sichus Diosta servispa kawsanki chayqa imaymanatan yachanki, chaykunataqmi paraisopaq preparasunki.

15. ¿Imakunatawan ruwananchispaqmi kallpachakusunman?

¹⁵ Llapanchismi decidikusunman Diospa llaqtanpi astawan yanapakunanchispaq. Yaqapaschá astawan kallpachakusunman estudiokunata qoypi, revisitakuna ruwaypi, hukkunapipas. Hinaspapas Bibliaq nisqanman hina kawsananchispaqmi astawan kallpachakusunman. Otaq kunkawan leesqanchispi astawan allinyasunman, comentarionchiskunapi, discursonchiskunapipas. Chaykunata ruwaymi yanapawasun tukuy sonqowan Diosta servinapaq, paraisopaq preparakunapaqpas.

16. ¿Imaraykun Diosta servispa aswan sumaq kawsayta tarinchis?

¹⁶ Paraisopaq preparakuspaqa manan tiemponchistachu usuchishanchis, manataqmi imatapas pierdekunchischu. Aswanpas Jehová Diosta servispan sumaq kawsayta tarinchis. Manan obligasqachu servinchis nitaq phiñakuyninmanta salvakunallapaqchu. Diospa amigon kayqa vidanchistan allinyachin,  aswan kusisqataqmi kawsachiwanchis. Chhayna kananchispaqmi Jehová Diosqa kamawarqanchis. Munakuyninpas kamachikuyninkunapas imamantapas aswan allinmi (leey Salmo 63:1-3). Diosta tukuy sonqowan servispan ancha kusisqa kasun. Askha watakunaña Diosta serviqkunan yachanku chay hina kasqanta (Sal. 1:1-3; Is. 58:13, 14).

17. ¿Atisunchu paraisopi kusirikuyta samarikuytapas?

¹⁷ ¿Atisunmanchu paraisopi kusirikuyta samarikuytapas? Arí. Jehová Diosmi kamawarqanchis kusisqa kawsananchispaq. Paymi prometewanchis llapa munasqanchista qowananchispaq (Sal. 145:16; Ecl. 2:24). Ichaqa Jehová Dioswan amigontin kaspallan imata ruwaspapas kusikunchis. Chhaynaqa paraisopi kusirikuytaña samarikuytaña atisun chaypas, Jehová Diosta serviymi aswan importante kanqa. Chaymi kunanmantapacha chay hinata kawsashananchis, Diosta servisqanchisrayku bendicionkuna chaskisqanchiswantaq kusikunanchis (Mat. 6:33).

18. ¿Imaynatan kunanmantapacha preparakushananchis paraisopaq?

¹⁸ Paraisopi kawsayqa mana hayk’aq piensasqanchis sumaq kawsaymi kanqa. Chaymi kunanmantapacha preparakushananchis. ¿Imaynata? Jehová Diospa munasqanman hina kawsaspa, tukuy sonqowan predicaspa, Jehová Diosta tukuy kallpanchiswan servispa. Seguron kashanchis Jehová Dios paraisopi llapa prometesqanta hunt’ananpi, chayraykun paraisopiñapas tiyashasunman hinata kawsananchis.