1. a) ¿Imatan Pedro ruwarqan lamar-qochapi sinchi wayra kaqtin? (Kay paginapi dibujota qhaway.) b) ¿Imaraykun Pedro unuman chinkaykusharqan?

HUK tutanmi Pedrowan huk discipulokunapiwan Galilea lamar-qochata botepi chimpasharqanku, hinan sinchi wayra qallarirqan. Chayllamanmi Jesusta rikurqanku unu patanta purishaqta, hinan Pedroqa Jesusta tapurqan paypas unu patanta purinanpaq. Rinanpaq niqtinmi Pedroqa botemanta lloqsispa unu patanta puriyta qallarirqan, chikanta puririspan ichaqa unuman chinkaykuyta qallarirqan. ¿Imarayku? Sinchi wayrata rikuspa mancharikusqanrayku. Chaymi Pedroqa Jesuspa yanapananta mañakurqan, hinan Jesusqa makinmanta hap’ispa nirqan: “¡Pisi iñiyniyoq runa! ¿Imanaqtinmi iskayrayanki?”, nispa (Mat. 14:24-32).

2. ¿Imatan kay estudiopi yachasun?

² Kay estudiopin yachasun Pedrota sucedesqanmanta. Chaypaqmi kay tapuykunata kutichisun: ¿Imaynatan Pedro rikuchirqan Jehová Diospi iñisqanta? ¿Imaraykun iñiyninpi pisiparqan? ¿Imaynapin hukmanta allin iñiyniyoq kapurqan?  Chay tapuykunata yachaymi yanapawasun iñiyninchispi allinta sayananchispaq (1 Cor. 16:13).

3. a) ¿Imaraykun Pedro botemanta lloqsispa unu patanta purirqan? b) ¿Imatan ñoqanchispas ruwarqanchis?

³ Jesús waqyaqtinmi Pedroqa botemanta lloqsispa unu patanta purirqan. ¿Imaraykun chayta ruwarqan? Jehová Diospi iñisqanraykun. Diosmi Jesusta yanapasharqan unu patanta purinanpaq, chaymi Pedropas Diospa yanapananpi confiarqan. Ñoqanchispas Bibliata estudiaspan yacharqanchis Jesuspa yupinta qatikunanchista, chaymi Jehová Diosman prometekurqanchis payllapaqña kawsananchispaq hinaspa bautizakurqanchis. ¿Imaraykun chayta ruwarqanchis? Jehová Diospa, Jesuspa yanapananpi iñisqanchisraykun (Juan 14:1; leey 1 Pedro 2:21).

4, 5. ¿Imaraykun iñiyninchis ancha valorniyoq?

⁴ ¿Imakunapin iñiyninchis yanapawanchis? Mana ruway atinakunata ruwananchispaqmi, chaymi ancha valorniyoq (Mat. 21:21, 22). Iñiyninmi Pedrota yanaparqan unu patanta purinanpaq. Ñoqanchispas iñiyninchisraykun sasa ruwanakunata ruwarqanchis. Bibliata yachaspan kawsayninchista cambiapurqanchis, chaytaqa reqsiwaqninchis runakunapas reparankun. Chaykunatan ruwarqanchis Jehová Diosta munakusqanchisrayku (leey Colosenses 3:5-10). Chaymantapas iñiyninchisraykun Diosllapaqña kawsanchis, paypa amigontaq kanchis. Ichaqa tukuy chaykunatan ruwarqanchis Diospa yanapayninwan (Efes. 2:8).

⁵ Hinaspapas iñiyninchisqa atiyniyoq Saqrata atipanapaqmi yanapawanchis, paymi imaymana trampakunata churawanchis (Efes. 6:16). Iñiyninchisqa yanapawallanchistaqmi sasachakuykunata atipananchispaq. Sichus Jehová Diospi iñisun tukuy yuyaytaq payta servisun chayqa, paymi tukuy necesitasqanchista qowasun (Mat. 6:30-34). Chaymantapas iñiyninchisraykun paraisopi wiñaypaq kawsasun (Juan 3:16).

6, 7. a) ¿Imakuna hinan Pedrota mancharichiq sinchi wayra? b) ¿Imanaqtinmi llapanchispas pisi iñiyniyoq kapusunman?

⁶ ¿Imaraykun Pedro mancharikurqan unu patapi purishaspa? Jesusta manaña qhawasqanraykun, Jesús qhawanantaqa lamar-qochapi sinchi wayra unu hatarichisqantan qhawarqan (Mat. 14:30). Chaymi iñiyninpi pisipaspa unuman chinkaykuyta qallarirqan. Problemakunapas, tentacionkunapas chay sinchi wayra hinan. Sinchi sasaña atipanapaq chay problemakuna chaypas, Jehová Diosmi kallpata qowasun aguantananchispaq. Problemanchiskunallapi piensaspan ichaqa, pisi-pisimanta Diospa yanapawananchispi manaña iñisunmanchu.

 ⁷ ¿Imanaqtinmi chayta ninchis? Biblian nin, iñiyninchispi pisipayqa ‘usqhaylla mayt’uwaqninchis hucha’ kasqanta (Heb. 12:1, NM). Chaymi llapanchispas Pedro hina ratulla pisi iñiyniyoq kasunman. ¿Imaynapin yachasunman iñiyninchispi pisipashasqanchista? Chayta yachasun.

8. ¿Imaynapin Jehová Diospa promesankunapi manaña iñisunmanchu?

⁸ ¿Iñishallanchischu Jehová Diospa promesankunapi? Jehová Diosmi prometerqan Saqraq kamachisqan pachata chinkachipunanta. Ichaqa kay pachaq kusirikuyninkunapi piensasun chayqa, qonqapusunmanmi chay promesata Diospa hunt’ananpi (Hab. 2:3). Chaymantapas Diosmi prometewarqanchis Jesuspa sacrificionrayku huchanchiskunata perdonawananchispaq, ichaqa kaqlla ñawpa huchanchiskunamanta pesapakusun chayqa, iskayasunmanmi Jehová Dios perdonawasqanchismanta (Hech. 3:19). Chayraykutaq manaña kusisqachu Jehová Diosta servisunman hinaspa manaña predicasunmanchu.

9. ¿Imapin tarikusunman huk ruwaykunataraq aswan importantepaq hap’ispa?

⁹ ¿Tukuy sonqowanchu Jehová Diosta servishallanchis? Jehová Diospaq tukuy kallpanchiswan llank’aymi yanapawanchis wiñay kawsay suyakusqanchispi piensananchispaq. Ichaqa, ¿imapin tarikusunman huk ruwaykunataraq aswan importantepaq hap’ispa? Yaqapaschá allin pagasqa llank’anapi kaspa manaña ñawpaqpi hinachu Diosta servishasunman. Chaymi iñiyninchispi pisipasunman manañataq tukuy sonqochu Jehová Diospaq llank’asunman (Heb. 6:10-12).

10. ¿Imaynapin hukkunata perdonaspa Diospi iñisqanchista rikuchinchis?

¹⁰ ¿Sasatachu hukkunata perdonanchis? Sichus hukkuna phiñachiwaqtinchis manaña rimaypunchischu chayqa, yaqapaschá sinchita ñoqallanchispi piensashanchis. Perdonaspan ichaqa rikuchisunchis Jehová Diospi iñisqanchista. ¿Imaynataq chayri? Jehová Diospa perdonananta munaspaqa, hukkunatan perdonananchis (Luc. 11:4). Perdonaspaqa Diospa perdonawananchispin iñinchis. Chaymi aswan importante mana allin ruwawasqanchismanta vengakuymantaqa. Hinaspapas Jesusmi qatikuqninkunata nirqan sapa kutillan phiñachiq runakunatapas perdonanankuta. Chaymi qatikuqninkuna nirqanku: “Astawan iñinaykupaq yanapaykuwayku”, nispa (Luc. 17:1-5). Paykunaqa yacharqankun perdonanapaqqa allin iñiyniyoq kanankuta.

11. ¿Imatan mana ruwananchischu iñiqmasinchis anyawaqtinchis?

 ¹¹ ¿Phiñakunchischu pantasqanchismanta anyawaqtinchis? Iñiqmasinchis anyawaqtinchisqa manan pantaq runa kasqanpichu piensananchis nitaq imayna niwasqanchispichu, chayta ruwaspaqa manan imatapas yachasunchu. Chaymi tukuy yuyay kananchis consejonkuna imaynata yanapawananchispi (Prov. 19:20). Chhaynapin rikuchisun iñiyniyoq kasqanchista, Jehová Dios hina piensasqanchistapas.

12. ¿Imatan rikuchishasunman umallikunamanta rimapakuspa?

¹² ¿Umallikunamantachu rimapakunchis? Mana allin willakuykunata chunka qhamiyaqkuna Israel runakunaman willaqtinkun Moisés contra, Aarón contra rimapakurqanku. Chaymi Jehová Diosqa Moisesta tapurqan: “¿Hayk’aqkamataq kay runakunari pisichashallawanqa? Paykuna ukhupi askha milagrokunata ruwashaqtiypas, ¿manapunichu hap’ipakuwanqaku?”, nispa (Núm. 14:2-4, 11). Israel runakunan rimapakurqanku Jehová Diospa churasqan runakunamanta, chayta ruwaspan rikuchirqanku Diospi mana iñisqankuta. Sichus ñoqanchispas umallikunamanta rimapakusunman chayqa, Israel runakuna hinan Diospi mana iñishasunmanchu.

13. ¿Imaraykun mana hinatachu saqerparinanchis iñiyninchispi pisipashasqanchista reparakuspa?

¹³ Yaqapaschá chay tapuykunata qhawarimusqanchis qhepaman reparakunchis iñiyninchispi pisipashasqanchista. Chhayna kaqtinqa ama hinataqa saqerparisunchu. Apóstol Pedropas mancharikuspan iñiyninpi pisiparqan, wakin kutipitaq apostolninkunata Jesús anyarqan pisi iñiyniyoq kasqankurayku (Mat. 16:8). Ichaqa,  ¿imatan Pedro ruwarqan iñiyninpi pisipasqan qhepaman? Chayta yachasun.

14, 15. a) ¿Imatan Pedro ruwarqan unuman chinkaykushaspa? b) ¿Imaynatan Jesusta tukuy yuyay qhawasunman?

¹⁴ Unuman Pedro chinkaykushaspaqa nadaspan boteman kutipunman karqan (Juan 21:7). Ichaqa manan chaytachu ruwarqan. Manan nadayta yachasqanpi confiaspachu pay kikin salvakurqan. Aswanpas Jesustan qhawarqan hinaspa yanapayninta mañakurqan. Sichus ñoqanchispas reparakunchis iñiyninchispi pisipashasqanchista chayqa, Pedroq ruwasqanta hinan ruwana, ¿imaynatan chayta ruwasunman?

¹⁵ Jesusta tukuy yuyay qhawaspan (Heb. 12:2, 3). Ichaqa manan ñoqanchisqa Pedro hinachu ñawinchiswan Jesusta qhawasun. Aswanpas ruwasqankunata, yachachisqankunata estudiaspan, hinaspapas payta qatikuspa. Chayta ruwaymi yanapawasun yapamanta allin iñiyniyoq kanapaq. Yachasun imakunata ruwaspan Jesusta qatikusunman chayta.

16. ¿Imaynatan Biblia yanapawanchis iñiyninchispi allinta sayananchispaq?

¹⁶ Bibliapin astawan confiananchis. Jesusqa manan iskayarqanchu Bibliaqa Diospa simin kasqanta, consejonkunapas allinpuni kasqanta (Juan 17:17). Sichus Jesús hina iñiyniyoq kayta munanchis chayqa, Bibliatan sapa p’unchay leenanchis, estudiananchis, piensananchistaq imachus yachasqanchispi. Sichus iskayashanchis ima yachachikuymantapas chayqa, aswan-aswantan Bibliata t’aqwirinanchis. Yaqapaschá iskayashanchis tukukuy p’unchaykunapi kawsashasqanchismanta. Chhayna kaqtinqa tukukuy p’unchaykunamanta profeciakunatan estudiana. ¿Segurochu kashanchis promesankunata Diospa hunt’ananpi? Chaypaq estudiasun ñawpa tiempopi profeciakunaq hunt’akusqanta. ¿Allinpunichu Bibliaq consejonkuna kay tiemponchispaq? Chaypaq leesun Bibliaq consejonkunarayku askha runakuna vidankuta cambiasqankuta. * Chaykunata ruwaspan iñiyninchispi allinta sayasun (1 Tes. 2:13).

17. a) ¿Iman Jesusta yanaparqan sasa pruebakunapi tarikuqtin? b) ¿Imaynatan Jesuspa ruwasqanta hina ruwasunman?

¹⁷ Jehová Diospa promesankunapin piensananchis. Jesusqa imatachus Jehová Dios payman prometerqan chaykunapin piensarqan. Chaymi yanaparqan sinchi sasa pruebakunapi tarikuqtin (Heb. 12:2). Payqa manan kay pachaq kaqninkunawanchu distraekurqan (Mat. 4:8-10). Ñoqanchispas pay hinan Jehová Diospa promesankunapi piensananchis. ¿Iman yanapawasunman chayta ruwanapaq? Paraisopi kaspa imakunata ruway munasqanchista qelqaymi, dibujaypas. Otaq kawsarimpuqkunamanta pikunawan rimay munasqanchista, imakunata willay munasqanchista qelqaymi. Piensay Diospa promesankunaqa sapankanchispaq kasqanta.

18. ¿Iman yanapawasun astawan iñinanchispaq?

¹⁸ Astawan iñinanchispaqmi mañakunanchis. Jesusmi qatikuqninkunata nirqan Diosmanta santo espirituta mañakunankuta (Luc. 11:9, 13). Chaymi  yanapawasun astawan iñinanchispaq. Hinaspapas iñiyninchista pisipachiq ruwaykunata ama ruwananchispaqmi kallpata mañakunanchis. Sichus pitapas mana perdonayta atishanchischu chayqa, Jehová Diospa yanapaynintan mañakunanchis astawan iñinanchispaq, perdonaq kananchispaqpas.

19. ¿Imayna runakunan kananku amigonchiskuna?

¹⁹ Allin iñiyniyoq amigokunatan akllakunanchis. Jesusqa allintan amigonkunata akllarqan. Paypa amigonkunaqa apostolkunan karqanku, paykunaqa hunt’aq sonqoyoq, payta kasukuqkunan karqanku (leey Juan 15:14, 15). Ñoqanchispas allin iñiyniyoq, Jesusta kasukuq amigokunatan akllakunanchis. Allin amigokunaqa mana llullakuspan imatapas rimanku. Sichus consejanata necesitanchis chayqa, consejawanchismi. Ñoqanchis consejaqtinchispas uyarikunkun (Prov. 27:9).

20. ¿Imanaqtinmi hukkunata yanapananchis iñiyninkupi allinta sayanankupaq?

²⁰ Hukkunatan yanapananchis iñiyninkupi allinta sayanankupaq. Jesusqa rimasqanwan, ruwasqanwan iman qatikuqninkunata yanaparqan allin iñiyniyoq kanankupaq (Mar. 11:20-24). Ñoqanchispas hukkunatan yanapananchis iñiyninkupi allinta sayanankupaq. ¿Imanaqtin? Chayta ruwaspan ñoqanchispas aswan allin iñiyniyoq kasunchis (Prov. 11:25). ¿Imaynatan chayta ruwasunman? Predicaspan. Chaypin entiendechinanchis imarayku Diospi creesqanchista, runakunata Dios munakusqanta, Biblia paypa simin kasqantapas. Iñiqmasinchiskunatapas yanapananchismi iñiyninkupi allinta sayanankupaq. Huk iñiqmasinchis iñiq t’aqapi umallimanta rimapakuqtinqa, manan paymanta mana allinta piensaspachu manaña rimaypunanchis. Aswanpas pacienciawanmi yanapananchis Jehová Diospi astawan iñinanpaq, iñiqmasinchiskunapi confiananpaqpas (Jud. 22, 23). Escuelapi estudiashankiraq chayqa, yaqapaschá profesorniyki evolución nisqamanta rimanqa, chay kaqtinqa ama manchakuspa imapichus iñisqaykita defiendey. Yaqapaschá profesorniykipas, compañeroykikunapas allinpaq qhawarinqaku nisqaykita.

21. ¿Imatan Jehová Dios prometewarqanchis?

²¹ Rikusqanchis hina, Jehová Dioswan Jesuswanmi yanaparqanku Pedrota manchakuyninta atipananpaq, hinaspa iñiyninpi allinta sayananpaq. Tiempoq pasasqanmantaq Pedroqa allin iñiyniyoq kapusqanrayku llapanchispaq ejemplo kapurqan. Jehová Diosmi prometewarqanchis iñiyninchispi allin sayasqa kananchispaq yanapawananchista (leey 1 Pedro 5:9, 10). Iñiyninchispi allin sayasqa kananchispaqmi ichaqa kallpachakunanchis. Chayta ruwaspaqa ancha kusisqan kawsasun.