1, 2. ¿Imatan munanchis llapa bautizasqa cristianokuna? Ejemplota willay.

FRUTATA rantikuyta munaspaqa tapurinchismi hayk’a valesqanta, ichaqa astawanqa qhawarinchis sumaqchus, poqosqañachus kasqantan.

² Chay hinatan bautizasqa cristianokunapas iñiyninchispi poqosqa otaq allin takyasqa kayta munanchis. Chayqa manan kuraqyapuychu aswanpas sumaq runa kananchispaq, Jehová Dioswanpas allin amigontin kananchispaq kallpachakuymi. Apóstol Pablon Éfeso llaqtamanta cristianokunata nirqan Cristo hina iñiyninkupi allin takyasqa kayta munaspaqa huk nisqalla kanankuta, Jesustapas reqsishanallankuta (Efes. 4:13).

3. ¿Imapin kaqlla kanku Éfeso llaqtamanta iñiq t’aqa kay tiempopi iñiq t’aqakunawan?

³ Ñawpa tiempo Éfeso iñiq t’aqapin karqan iñiyninkupi allin takyasqa cristianokuna, paykunaqa unay watakunañan  Jehová Diosta servirqanku. Ichaqa kallarqantaqmi iñiyninkupi manaraq allin takyasqa cristianokunapas. Chay hinallataqmi kay tiempopi iñiq t’aqakunapipas, askha cristianokunan unay watakunaña Diosta servishanku. Wakintaq ichaqa manaraq allin takyasqaraqchu iñiyninkupi kashanku, wakinqa chayllaraq bautizakuq cristianokunan kanku. Qanri, ¿ñachu iñiyniykipi allin takyasqa cristianoña kanki? (Col. 2:6, 7.)

4, 5. a) ¿Kaqllachu kanku iñiyninkupi allin takyasqa cristianokuna? b) ¿Imapin reparasunman iñiyninkupi allin takyasqa cristianokuna kasqankuta? (3 paginapi dibujota qhaway.)

⁴ Poqosqa frutakunaqa manan igualkamachu kanku. Kanmi huch’uypas, hatunpas, imaymana formakunapas; ichaqa reparakunmi llapanpas poqosqa kasqanta. Chay hinallataqmi iñiyninkupi allin takyasqa cristianokunapas kanku. Manan llapankuchu kaqlla kanku, sapankankupas hukniray edadniyoq, llaqtayoq, gustoyoq iman kanku, ichaqa reparasunmanmi iñiyninkupi allin takyasqa kasqankuta. ¿Imaynata?

⁵ Iñiyninkupi allin takyasqa cristianokunaqa Jesuspa yupintan qatikunku (1 Ped. 2:21). Paymi nirqan Jehová Diosta tukuy sonqonchiswan, tukuy almanchiswan, tukuy yuyayninchiswan munakunanchista. Chaymantapas nirqanmi runamasinchista ñoqanchista hina munakunanchista (Mat. 22:37-39). Iñiyninkupi allin takyasqa cristianokunaqa kallpachakunkun chay kamachikuykunata kasukunankupaq. Hinaspapas imayna kawsasqankuwanmi rikuchinku Jehová Dioswan amigontin kay aswan importante kasqanta, runamasinkuta munakusqankutapas.

6, 7. a) ¿Imakunatawanmi iñiyninkupi allin takyasqa cristianokuna rikuchinanku? b) ¿Imatan tapukunanchis?

⁶ Iñiyninkupi allin takyasqa cristianokunaqa manan munakuq kasqallankutachu rikuchinku (Gál. 5:22, 23). Rikuchillankutaqmi sumaq sonqo, llamp’u sonqo, pacienciakuq kasqankutapas. Sasachakuypi tarikuspankupas pacienciawanmi aguantanku, llakikuykunapi tarikuspataq Jehová Diospi suyakunku. Hinaspapas Bibliatan estudianku imachus allin, imataqchus mana allin kasqanta yachanankupaq chayman hinataq imatapas allinta decidinku. Chaywanmi rikuchinku  huch’uyyaykukuq kasqankuta, Jehová Diospa kamachikuyninkunaman hina kawsasqankutapas. * Chaymantapas tukuy sonqonkuwanmi predicanku, iñiq t’aqankupipas huk nisqalla kanankupaqmi yanapakunku.

⁷ Hayk’a wataña Jehová Diosta servishanchis chaypas, llapanchismi tapukunanchis: “¿Imakunapin allinyanay kashan Jesús hina iñiyniypi allin takyasqa kanaypaq?”, nispa. Chaypaq yachasun kinsa yanapaykunamanta.

8. ¿Imaynapin yachanchis Diospa siminmanta Jesús allinta yachasqanta?

⁸ Jesusqa Diospa simintan allinta estudiaq. 12 watanpi kashaspanmi kamachikuy simita yachachiqkunawan Diospa siminmanta rimarqan. Payta uyariqkunataq admirakurqanku yachayninmanta (Luc. 2:46, 47). Kuraq kaspataq Bibliata allinta utilizaspa enemigonkunata upallachirqan (Mat. 22:41-46).

9. a) ¿Imatan ruwananchis iñiyninchispi allin takyasqa kanapaq? b) ¿Imatan ruwananchis Bibliata estudiaspa?

 ⁹ Ñoqanchispas Jesús hinan Bibliata allinta estudiananchis iñiyninchispi allin takyasqa kanapaq. Manan chayllaraq estudiashaspa yachasqanchiswanchu contentakunanchis. Biblian nin ‘khamuna mikhuyqa wiñasqakunapaqña kasqanta’, chaymi allintapuni Bibliamanta yachananchis (Heb. 5:14; Efes. 4:13). Chaypaqmi huk programata ruwakunanchis sapa p’unchay Bibliata leenapaq, sapallanchispi otaq familianchiswanpas sapa semana estudianapaq. Hinaspapas Bibliata estudiaspan entiendenanchis imata Jehová Dios piensasqanta sientesqantapas, chayman hinataq allinta imatapas decidinanchis. Chhaynapin Jehová Diosta astawan munakusun.

10. ¿Imaynatan iñiyninkupi allin takyasqa cristianokuna rikuchinku Diospa kamachikuyninkunata, consejonkunatapas valorasqankuta?

¹⁰ Chaymantapas iñiyninkupi allin takyasqa cristianokunaqa valorankun Jehová Diospa kamachikuyninkunata, consejonkunatapas. Chaymi kallpachakunku Diospa munasqanta ruwanankupaq, chaypaqmi ichaqa kawsayninkuta, piensasqankuta, imakuna ruwasqankutapas cambianku. Paykunaqa Jesús hinan hunt’aq sonqo, chanin kaqta ruwaq kanku (leey Efesios 4:22-24). Jehová Diosqa santo espiritunwanmi yanaparqan Biblia qelqaqkunata. Chaymi Bibliata estudiaqtinchisqa santo espiritunwan yanapawanchis Bibliamanta astawan yachanapaq, consejonkunata valoranapaq, Diosta astawan munakunapaqpas.

11. ¿Imaynan karqanku Jesuswan kuska kaq runakuna?

¹¹ Jesusqa mana huchayoq runan karqan, ichaqa paywan kuska kaq runakunapas familianpas pantaq runakunan karqanku. Qatikuqninkunapas mayninpiqa hatunchakuqmi karqanku, paykunallapitaqmi piensaqku. Ejemplopaq, Jesusta wañuchinankupaq pisi horakunallaña kashaqtinmi mayqenninkuchus aswan importante kasqankumanta discutisharqanku (Luc. 22:24). Chaywanpas Jesusqa confiarqanmi qatikuqninkuna iñiyninkupi allin takyasqa kanankupi, huk nisqalla kawsanankupipas. Chaymi wañuchinankupaq manaraq hap’iq hamushaqtinku Jehová Diosman orakurqan qatikuqninkunata yanapananpaq, huk nisqalla kawsanankupaqwan. Khaynatan orakurqan: ‘Imaynan ñoqanchispas hukllapuni kanchis, chay hina paykunapas hukllapuni kachunku’, nispa (Juan 17:21, 22).

12, 13. a) ¿Imapaqmi llapanchispas kallpachakunanchis? b) ¿Imaynatan huk iñiqmasinchis yacharqan iñiq t’aqapi huk nisqalla kawsayta?

¹² Chaymantapas iñiyninkupi allin takyasqa cristianokunaqa iñiq t’aqapi huk nisqalla kawsay kananpaqmi yanapakunku (leey Efesios 4:1-6, 15, 16). Llapanchismi kallpachakunanchis iñiqmasinchiskunawan huk nisqalla llank’ananchispaq. Chaypaqmi huch’uyyaykukuq kananchis. Sichus huk iñiqmasi imapipas pantaspa phiñachiwasunman chayqa, manan sientepakunanchischu; aswanpas perdonananchismi. Sichus iñiyninchispi allin  takyasqa cristiano kanchis chayqa, sasachakuykunatan allichasun.

¹³ Uwe iñiqmasimanta yachasun. Payqa iñiqmasikunaq pantasqankuwanmi phiñakuq. Ichaqa huk kutinmi Davidpa kawsayninmanta Bibliapi estudiarqan, chaypaqmi yanapachikurqan Perspicacia librowan. Davidpas pay hinan sasachakuypi tarikurqan hukkunaq pantasqanwan. Rey Saulmi askha kutipi wañuchiyta munarqan. Chaymantapas wakin Israel runakunan rumiwan ch’aqespa wañuchiyta munarqanku, esposanpas burlakurqanmi (1 Sam. 19:9-11; 30:1-6; 2 Sam. 6:14-22). Chhaynapiña tarikuspapas Davidqa Jehová Diostan munakushallarqan, yanapananpitaq confiashallarqan. Davidmanta estudiasqanraykun Uwe iñiqmasiqa cuentata qokurqan iñiqmasinkunaq pantasqanta ama qhawananpaq. Chaymantapas entienderqanmi iñiq t’aqapi huk nisqalla kawsay kananpaq perdonakuq kay allinpuni kasqanta. Ñoqanchispas chay iñiqmasinchispa ruwasqanta hinan ruwananchis.

14. ¿Pikunatan Jesús akllarqan amigonkuna kananpaq?

¹⁴ Jesusqa llapa runakunawanmi sumaq sonqo karqan: qharikunawan, warmikunawan, kuraqkunawan, wayna-sipaskunawan, wawakunawanpas. Chaywanpas payqa manan comuntachu llapanwan amigontin karqan. Huk kutinmi apostolninkunata nirqan: “Qankunachus kamachikuyniykunata hunt’ankichis chayqa, amigoykunan kankichis”, nispa (Juan 15:14). Jesusqa pikunachus paypaq, Jehová Diospaqpas hunt’aq sonqo kaqkunallatan akllarqan amigonkuna kanankupaq. Chaymi ñoqanchispas Jehová Diosta munakuqkunallata amigonchis kanankupaq akllakunanchis, chayqa ancha importanten. ¿Imarayku?

15. ¿Imaraykun wayna-sipaskuna unay watakunaña Diosta serviqkunawan amigontin kananku?

¹⁵ Imaynan frutakunaqa ruphaywan allinta poqonku, chay hinan iñiqmasinchiskunaq munakuyninpas iñiyninchispi allinta takyachiwanchis. Wayna-sipas, ¿imatan vidaykiwan ruwanki? Allinta imatapas decidinaykipaqqa unay watakunaña Jehová Diosta serviqkunatan amigoyki kananpaq akllakunayki. Paykunaqa imaymana sasachakuykunatan atiparqanku, iñiq t’aqapipas huk nisqalla kawsay kananpaqmi yanapakunku; chaymi yanapasunki allinta imatapas decidinaykipaq, iñiyniykipi allin takyasqa kanaykipaqpas (leey Hebreos 5:14).

16. ¿Imaynatan iñiyninkupi allin takyasqa cristianokuna yanaparqanku huk iñiqmasita sipas kashaqtin?

 ¹⁶ Helga iñiqmasinchis colegionta tukushaqtinmi compañeronkuna rimaqku colegionkuta tukuspa imakuna ruwanankumanta. Yaqa llapankun munarqanku universidadman rispa allin carrera estudiayta. Helga iñiqmasinchismi ichaqa iñiyninkupi allin takyasqa cristianokunata tapukurqan. Chay iñiqmasikunan kallpacharqanku Jehová Diosta tukuy tiemponwan servinanpaq. Chaymi payqa phisqa wata precursora regular karqan. Unay watakuna qhepamanpas manan pesapakunchu Jehová Diosta sipas kashaspa servisqanmanta.

17, 18. ¿Imatan ruwananchis Jehová Diospaq astawan llank’anapaq?

¹⁷ Jesuspa ejemplonta qatikusun chayqa, iñiypi allin takyasqa cristianon kasun. Hinaspapas Jehová Dioswanmi allin amigontin kasun, serviytataqmi munasunpas. Chhaynapin Jehová Diospaq astawan llank’asun. Jesusmi qatikuqninkunata nirqan: “K’anchayniykichis runakunaq ñawpaqenpi k’anchachun, allin ruwasqaykichista rikuspa, hanaq pachapi kaq Yayaykichista yupaychanankupaq”, nispa (Mat. 5:16).

¹⁸ Rikusqanchis hina, iñiyninkupi allin takyasqa cristianokunaqa iñiq t’aqankupin allinta yanapakunku. Hinaspapas paykunaqa concienciankutan allinta utilizanku. ¿Imaynatan conciencianchis yanapawanchis imatapas allinta decidinapaq? ¿Imaynatan respetasunman hukkunaq conciencianta? Chaytan qatimuq estudiopi yachasun.