ISQON wataykamallan wiñarqani, kunantaq 43 wataypiña kashani huk metrollatataq medinipas. Manaña wiñasqayta reparaspan tayta-mamay niwarqan llank’anapi ocupakunayta, chhaynapi huch’uychalla kasqaypi ama piensanaypaq. Chaymi wasi punkuypi frutata vendeq kani, limpiota chay sitiota hap’isqayraykun askha runa rantiwaqku.

Llank’anapi ocupasqa kashaspapas sasachakuniraqmi wakin ruwaykunapi. Llapa cosaskunapas hatun runakunapaq ruwasqan kashan, chaymi tiendaman rantiq rispapas ñak’ayta vitrinaman aypani, chaytaqmi sinchita llakichiwaq. 14 wataypi kashaspan ichaqa manaña nishutachu llakikuq kani, ¿imarayku?

Huk kutinmi iskay Testigokuna frutata rantikuwarqanku, Bibliata estudianaypaqtaq ofrecewarqanku ñoqataq aceptarqani. Hinan entienderqani huch’uychalla kasqaypi nishuta piensanaymantaqa, Jehová Diosmanta yachay aswan importante kasqanta. Chaymi anchata yanapawarqan. Salmo 73:28 texton sonqoypaq hina kapurqan, chay texton khaynata qallarin: “Ñoqapaq aswan allinqa Diospa qayllanpi kayniymi”, nispa.

Chay tiempopiqa Costa de Marfil llaqtapin familiaywan tiyarqani. Chaypi runakunaqa manañan admirakuqkuchu sayayniywan. Burkina llaqtaman ripuqtiykun ichaqa llapa runa sayasparaq qhawawaqku, chaymi manaña wasiymanta lloqsiqchu kani. Semanakunaq pasasqanmanmi yuyarirqani Bibliamanta estudiaspa kusisqa kasqayta. Chaymi Testigokunaq sucursalninman qelqarqani, hinan Nani sutiyoq misionerata kachamurqanku. Payqa motonpin wasiyman hamurqan.

Tiyasqaypi callekunaqa manan pistachu karqan chaymi sasa purinapaq karqan. Paraqtintaq t’uru karqan. Hayk’a kutitachá Naniqa motonmanta urmaykuq wasiyman hamushaspa, chaywanpas hamushallarqanmi. Huk kutinmi huñunakuyman invitawarqan, hinan mana ima niytapas atirqanichu. Piensasharqanin wasiymanta lloqsiqtiyqa runakunaq qhawaywanankupi, hinaspapas Naniq motonpi riqtiyqa astawanchá sasachakunman manejaspa. Ichaqa sonqoypaq hina kaq textotan yuyarirqani, chay textopin nillantaq: “Señor Diosníy, qanmi pakakunayqa kanki”, nispa. Chaymi huñunakuyman rinaypaq aceptarqani.

 Askha kutipin Naniwan ñoqawan t’uruman urmaykuq kayku, chaywanpas huñunakuymanqa rishallaqmi kayku anchata gustawasqankurayku. Callepiqa manan sumaqtachu qhawaywaqku, huñunakuypi Testigokunan ichaqa sumaqta chaskiwaqku. Hinan isqon killallamanta bautizakurqani.

Sonqoypaq hina kaq texton kay simikunawan tukun: “Lliw ruwasqaykitan willakusaq”, nispa. Chay texton yuyarichiwarqan predicanayta, ichaqa manan ñoqapaqqa facilchu karqan wasin-wasinta riyqa. Chayllaraq predicaq lloqsishaqtiymi erqekunapas kuraqkunapas qhawaywarqanku, qhepayta hamurqanku, purisqaytapas yachapayawarqanku. Chaymi sinchita llakichiwarqan. Ichaqa piensarqanin paykunapas paraisota necesitasqankuta, imaynan ñoqapas necesitani hinata, chaymi predicashallarqani.

Predicanaypaqmi makillawan manejanapaq triciclota rantikurqani. Wichayman rinay kaqtinqa predicaqmasiymi triciclopi tanqawaq, urayman rinay kaqtintaq tricicloman wicharqoq. Qallariypiqa sasan ñoqapaqqa predicayqa karqan. Pisi-pisimantan ichaqa gustapuwarqan, hinan 1998 watapi precursora kapurqani.

Askha runamanmi Bibliamanta yachachirqani. Paykunamantan phisqa bautizakurqanku, hukninmi sullk’a ñañay. Estudiantekuna Diosmanta astawan yachasqankun anchata kallpachawan llakisqa kashaqtiy. Huk kutinmi chukchu onqoywan kashaqtiy cartata chaskirqani. Chaypin willawarqanku estudio qosqay universitario wayna predicashasqantaña. Paytaqa punkullanpin estudiota qoq kani, hinamantaq huk hermanota pusarqani estudianankupaq. Chaymantataq chay waynaqa Costa de Marfil llaqtaman astakurqan. ¡Maytan kusikurqani predicaqña kasqanmanta!

Ñoqa hina onqosqa kaqkunata yanapaq institucionmi yachachiwarqan p’acha sirayta. Chaypin huk profesora repararqan k’uchi llank’aq kasqayta. Chaymi jabón ruwayta yachachiwarqanku. Kunanqa wasiypin ruwani p’acha t’aqsanapaq jabonta, jabonsillokunatapas. Rantiwaqniykunamanqa gustanmi chay jabonkuna, chaymi hukkunamanpas munachinku. Jabonkunata mañawaqtinkuqa ñoqa kikiymi kinsa llantayoq motoypi apani.

Kunanqa sinchitañan wasay nanapuwashan. Chay hawan 2004 watapi precursora kasqaytapas saqepurqani. Ichaqa atisqayman hinan predicashaniraq.

Runakunaqa reqsiwanku kusisqa uyallantin kasqayraykun. Maypis mana kusisqachu kayman, ñoqapaqqa aswan allinqa Diospa qayllanpi kaymi. (Sarah Maiga cristianaq willakusqan.)