1. a) ¿Imatan astawan Dios rikuchiwanchis? b) ¿Imaynan sientekunki munakuq Diosniyoq kasqaykimanta?

BIBLIAN nin: “Diosqa munakuymi”, nispa (1 Juan 4:8). ¿Imaraykun Diosmanta chhaynata nin? Munakuyta astawan rikuchisqanraykun. Pay hina munakuqqa manan pipas kanchu. Diosqa manan munakuyllachu-munakun, aswanpas ruwasqankunawanmi munakuyninta rikuchin. Anchatan agradecekunchis munakuyninrayku runatapas tukuy imatapas kamasqanmanta.

2. ¿Imatan Dios hunt’anqapuni munakuwasqanchisrayku? (16 paginapi dibujota qhaway.)

² Jehová Diosqa llapa kamasqankunatan munakun, chaymi llapa promesankunata hunt’anqapuni. Payqa “huk p’unchaytan churanña, chay p’unchaypin akllasqan Jesuswan kay pachapi tiyaqkunata chaninninpi juzganqa” (Hech. 17:31). Hinaspapas Jesusqa chanintapunin juzgawasun. Chhaynapin  Diosta kasukuqkuna hamuq tiempopi sumaq kawsayta chaskinqaku, wiñaypaqtaq kusisqa kanqaku.

3. ¿Imapin hamuq tiempopi tarikusunman Dios mana munakuwaqtinchis?

³ ¿Imapin hamuq tiempopi tarikusunman Dios mana munakuwaqtinchis? Sinchi llakipin tarikusunman. Saqraq tanqasqanmi runakuna kamachikushallankuman (2 Cor. 4:4; 1 Juan 5:19; leey Apocalipsis 12:9, 12).

4. ¿Imaraykun Dios dejallarqan Saqraq kamachikunanta?

⁴ Dios contra Saqra hatarispaqa, Adantawan Evatawanmi Dios contra hatarinankupaq tanqarqan. Chaypin iskayachirqan Dioslla kamachinanpaq derechoyoq kasqanta, hinaspapas Diosmanta aswan allin kamachikuq kananpaqmi piensarqan (Gén. 3:1-5). Chaymi Jehová Diosqa dejallarqan Saqraq kamachinanta, chhaynapi llulla kasqanta rikunanchispaq. Sut’itataqmi rikushanchis Saqrapas, runakunapas mana allin kamachikuqkuna kasqankuta.

5. ¿Imatan tiempoq pasasqanman hina rikushanchis?

⁵ Sapa p’unchaymi kay pachaqa aswan mana allin kapushan. 100 watakunallapin waranqa-waranqanpi runakuna guerrakunapi wañurqanku. Chaychá Bibliaqa nirqan “tukukuy qaylla p’unchaykunataqa” aswan mana allinmanraq runakuna tukupunankuta (2 Tim. 3:1, 13). Nillantaqmi: “Runaqa manan atiyniyoqchu kikillanmanta allinta purinanpaqqa. Mana qan pusaqtiykiqa manan allintaqa kawsanmanchu”, nispa (Jer. 10:23, NM). May cheqaqmi chay simikunaqa. Runaqa manan kamachikunanpaqchu kamasqa karqan, aswanpas Diosllan derechoyoq runata kamachinanpaq. Chaytan tiempoq pasasqanman hina rikushanchis.

6. ¿Imaraykun Dios dejallarqan mana allin runakunaq kananta?

⁶ ¿Imaraykun Dios dejallarqan mana allin runakunaq kananta? Paypa gobiernollan allin kasqanta rikuchinanpaqmi. Hamuq tiempopiqa wañuchinqan mana allin runakunata. Chay qhepamanqa manañan pipas iskayachinqachu Dioslla kamachikuq kasqanta, iskayachiqtaqa kaq raton wañuchinqa. Diosqa manan hayk’aqpas dejanqachu kay pachata runakuna wakmanta kamachinankuta.

7, 8. ¿Imaynatan Jehová Dios rikuchiwanchis munakuwasqanchista?

⁷ Jehová Diosqa imaymana formapin rikuchiwanchis munakuwasqanchista. Kamasqankunapi piensasun. Mana yupay atiytan planetakunata, ch’askakunatapas kamarqan. Huknin ch’askan intinchis, mana intiwanqa manan kawsay kanmanchu. Chaykunan rikuchiwanchis kamawaqninchis Jehová Diosqa sinchi atiyniyoq, yachayniyoq, ancha munakuq kasqanta (Rom. 1:20).

⁸ Jehová Diosqa hallp’anchistan kamarqan runakuna kusisqa chaypi kawsanankupaq, chaymi Adanman Evamanpas munay  huertata qorqan. Hinaspapas ch’uya yuyaytan, ch’uya cuerpotan qorqan, wiñay kawsanankupaqtaq kamarqan (leey Apocalipsis 4:11). Hinaspapas Jehová Diosqa munakuynin wiñaypaq kasqanraykun llapa kamasqankunata mikhuchin (Sal. 136:25).

9. ¿Imatan Jehová Dios cheqnikun?

⁹ Jehová Diosqa ancha munakuqmi, ichaqa cheqnikunmi mana allin ruwaykunataqa. Biblian nin: “Diosnilláy, millay ruwayqa manan kusichisunkichu [...]. Cheqnikunkin llapa mana chanin ruwaqkunataqa, ch’inyachinkin llullakunataqa, millakunkin runa wañuchiqkunatapas q’otuqkunatapas”, nispa (Sal. 5:4-6).

10, 11. a) ¿Iman pasanqa mana allin runakunawan? b) ¿Imatan chaskinqaku Diosta kasukuqkuna?

¹⁰ Rikusqanchis hina ancha munakuq Jehová Diosninchisqa cheqnikunmi mana allin ruwaykunata. Chaymi llapa mana allinkunata wiñaypaq chinkachipunqa. Biblian nin: “Millay runakunaqa wikch’usqapunin kanqaku, Señor Diosta suyakuqkunan ichaqa kay hallp’ata chaskinqaku. Pisi tiempomantaqa chinkapullanqan millay runakunaqa, maskhaspaykipas manañan tarinkichu”, nispa. Nillantaqmi Diospa enemigonkunaqa q’osñi hina chinkapunankuta (Sal. 37:9, 10, 20).

¹¹ Ichaqa, ¿imatan chaskinqaku Jehová Diosta kasukuqkuna? Ancha sumaq kawsaytan. Biblian nin: “Chanin runakunaqa kay hallp’atan hap’ikapunqaku, chaypin wiñaypaq tiyanqaku”, nispa (Sal. 37:29). Hunt’aq sonqowan Diosta serviq runakunaqa ancha kusisqan thakpi kawsanqaku (Sal. 37:11). Munakuq Diosninchisqa chay promesankunatan hunt’anqa, chhaynapi payta serviqkuna kusisqa kawsanankupaq. Biblian nin: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa (Apo. 21:4).

12. ¿Imatan ruwananchis mana huchachanata hina Diospa qhawariwananchispaq?

¹² Biblian nin: “Qhawariy mana huchachana runata, qhawariy chanin runata, thak-kaypi kawsaq runaqa mirayniyoqmi kanqa. Huchasapakunan ichaqa llapallan wañuchisqa kanqa, mirayninkupas chinkachisqan kanqa”, nispa (Sal. 37:37, 38). Mana huchachanata hina Diospa qhawariwananchispaqqa reqsinanchismi paytapas, Jesustapas, Bibliaq nisqantataq kasukunanchis (leey Juan 17:3). Hinaspapas iñinanchismi kay pacha pisillamanta chinkapunanpi, ‘Diospa munayninta ruwaqkuna wiñaypaq kawsanankupipas’ (1 Juan 2:17). Chayraykun Jehová Diospi ‘suyakunanchis, simintapas kasukunanchis’ (Sal. 37:34).

13. ¿Imaynatan Dios rikuchiwarqanchis maytachus munakuwasqanchista?

¹³ Jesusmi ñoqanchisrayku wañurqan, chaymi pantaq runakunaña kanchis chaypas,  Dios kasukuytapas amigon kaytapas atisunman. Diosmi churinta kay pachaman kachamurqan kasukuq runakunata huchamanta wañuymantawan kacharichinanpaq, chaywanmi Diosqa rikuchiwarqanchis maytachus munakuwasqanchista (leey Romanos 5:12; 6:23). Jehová Diosqa manan iskayarqanchu churinpa kay pachapi kasukunanmanta, churinqa ñan unay tiempoña hanaq pachapi kasukuq karqan. Jehová Diosqa maytachá ñak’arirqan munasqan churinta runakuna ñak’arichiqtinku. Jesusmi ichaqa Diospa gobiernonta tukuy tiempo defienderqan, hinaspapas rikuchirqanmi sinchi sasachakuypiña perfecto runa tarikunman chaypas, Diospaq hunt’aq sonqo kay atisqanta.

14, 15. ¿Imaraykun paraisopi wiñaypaq tiyayta atinchis?

¹⁴ Jesusqa sinchitan ñak’arirqan, chaywanpas wañunankaman defienderqan Dioslla kamachinanpaq derechoyoq kasqanta. Paypa wañusqanraykun atinchis paraisopi wiñay kawsayniyoq kayta. Apóstol Pabloqa allintan entienderqan Jesuspas taytanpas ancha munakuwasqanchista. Chaymi nirqan: “Huk chanin runaq rantinpi wañuyqa sinchi sasan, ichapaschá pillapas wañunman sumaq runaq rantinpiqa. Diosmi ichaqa munakuyninta rikuchiwanchis, huchasaparaq kashaqtinchis Cristoq wañupuwasqanchiswan”, nispa (Rom. 5:6-8). Apóstol Juantaq nirqan: “Diosqa munakuyninta rikuchiwarqanchis sapan Churinta kay pachaman kachamuspanmi, paypi iñispa wiñay kawsayniyoq kananchispaq. Kaymi munakuyqa: Manan ñoqanchischu Diostaqa munakurqanchis, aswanpas Diosmi ñoqanchista munakuwarqanchis, chaymi Churinta kachamurqan wañusqanwan huchanchista pampachananpaq”, nispa (1 Juan 4:9, 10).

¹⁵ Hinaspapas Jesuspunin nirqan: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq,  aswanpas wiñay kawsayniyoq kananpaq”, nispa (Juan 3:16). Jehová Diosqa sinchitan churinmanta llakikurqan, chaywanpas dejallarqanmi ñoqanchisrayku wañunanta. Chaymi rikuchiwanchis Diospa ancha munakuwasqanchista, wiñaypaqtaqmi munakuwasunpas. Pablon nirqan: “Allintapuni yachani: Manan wañuypas, kawsaypas, angelkunapas, kamachikuqkunapas, atiyniyoqkunapas, kunankaqpas, hamuqkaqpas, hanaq pachapi kaqpas, Ukhupachapi kaqpas, ima kamasqapas Señorninchis Jesucristopi Diospa munakuyninmantaqa t’aqawasunchischu”, nispa (Rom. 8:38, 39).

16. a) ¿Imataq Diospa gobiernonri? b) ¿Pitan Dios churarqan chay gobiernopi kamachinanpaq?

¹⁶ Diosmi munakuyninta rikuchiwallanchistaq gobiernonta qowaspanchis. Chay gobiernoqa hanaq pachapi Diospa takyachisqan gobiernon, Jesustataq rey kananpaq churarqan. Jesusqa anchatan runakunata munakun, kamachinanpaqtaq allin preparasqa kashan (Prov. 8:31). Hinaspapas 144.000 runakunatan akllarqan Jesuswan kuska kamachikamunankupaq. Paykunaqa ñoqanchis hinan ñak’ariykunapi tarikurqanku, chaymi runakunata yanapayta atinqaku (Apo. 14:1). Kay pachapi Jesús kashaspaqa, Diospa gobiernonmantan tukuy tiempo rimarqan. Chaychá qatikuqninkunamanta kay hinata mañakunankupaq yachachirqan: “Yayayku hanaq pachapi kaq, sutiyki yupaychasqa kachun, Qhapaqsuyuyki [otaq gobiernoyki] hamuchun, munayniyki kay pachapi ruwakuchun, imaynan hanaq pachapipas ruwakun hinata”, nispa (Mat. 6:9, 10). Chay gobiernoqa bendicionkunatan apamunqa, ¡maytan munashanchis chaykuna hunt’akunanta!

17. ¿Imaynan Jesuspa kamachikuynin runaq kamachikuyninmanta?

¹⁷ Runaq kamachikusqanqa maqanakuyllatan paqarichin, chhaynapitaqmi askha runakuna wañurqanku. Jesuspa kamachikuyninmi ichaqa thak-kayta apamunqa. Jesusqa anchatan runakunata munakun, taytan hinataqmi sumaq sonqo, khuyapayakuq astawanqa taytan hina ancha munakuqmi (Apo. 7:10, 16, 17). Jesusmi nirqan: “Ñoqaman hamuychis llapa sayk’usqakuna q’episapakuna, ñoqan samachisqaykichis. Yugoyman k’umuykukuychis, hinaspa ñoqamanta yachaqakuychis llamp’ulla, huch’uyyaykukuq sonqoyoq kasqayta, chaymi qankunaqa samakuyta tarinkichis. Yugoyqa ch’usallan, q’epiypas manan llasachu”, nispa (Mat. 11:28-30). Rikusqanchis hina, ¡Jesusqa anchatan munakuwanchis!

18. a) ¿Iman pasashan 1914 watamantapacha? b) ¿Imatan qatimuq estudiopi yachasun?

¹⁸ Bibliaq nisqan hina, Diospa gobiernonqa hanaq pachapin 1914 watamantapacha kamachikushan. Chay watamantapachan 144.000 akllasqa cristianokunamanta faltaqkunata huñukushan hanaq pachapi Cristowan kuska kamachikamunankupaq. Hinaspapas kay pachapi tiyanankupaq runakunatan huñukushallantaq. Paykunatan nikun ‘ancha askha runakuna’ nispa (Apo. 7:9, 13, 14). ¿Hayk’an kanku kay pachapi tiyanankupaq suyakuyniyoqkuna? ¿Imatan Dios paykunamanta munan? Chaykunatan qatimuq estudiopi yachasun.