1. ¿Imaynapin yachanchis astawanqa Diospa gobiernonmanta Jesuspa rimasqanta?

JESUSQA maytan kusikuq Diospa gobiernonmanta runakunaman willaspa. Chayta willaymi paypaqqa aswan importante karqan, chaymi kay pachapi predicashaspaqa 100 más kutita Diospa gobiernonmanta rimarqan. Imamantapas astawanqa chaymantan rimarqan (leey Mateo 12:34).

2. ¿Hayk’a runakunan uyarirqanku Jesuspa kamachisqanta?

² Wañusqanmanta kawsarimpusqan qhepallamanmi Jesusqa 500 más runakunaman rikhurirqan (1 Cor. 15:6). Yaqapaschá paykunata Jesusqa kamachirqan “llapa suyu runakunata” predicamunankupaq. * Pachantinpi predicayqa sasachá  karqan, Jesuspunin nirqan askha tiempopiraq chay hunt’akunanta. P’uchukay tiempokunapipas predicakushanantaraq. Chaymi predicaqtinchisqa Jesuspa kamachisqanta hunt’ashanchis (Mat. 28:19, 20).

3. ¿Imatan kay estudiopi yachasun?

³ Predicanankupaq Jesús kamachispaqa nillarqantaqmi: “Qankunawanmi sapa p’unchay kashani”, nispa (Mat. 28:20). Chaywanmi Jesusqa prometesharqan mana sapallankutachu saqerparisqanta aswanpas pachantinpi predicanankupaq yanapananta. Kay tiempopipas Jehová Diosqa ‘tukuy imaymana allinkunatan’ qowashanchis, chaykunan predicacionpi yanapawanchis (Heb. 13:20, 21). Kay estudiopin yachasun imakunatas utilizarqanchis predicananchispaq, imayna formakunamantan predicarqanchis, imaynatan predicayta yacharqanchis chaykunatawan. Yachasun kay 100 watakunapi imakunawan predicasqanchista.

4. ¿Imapaqmi yanapawarqanchis imaymana herramientakunata utilizasqanchis?

⁴ Jesusmi nirqan Diospa gobiernonqa tarpunapaq muhu hina kasqanta (Mat. 13:18, 19). Chakra llank’aq runaqa imaymana herramientakunatan necesitan allpata alistananpaq. Chhaynallataqmi runakunaman Diospa gobiernonmanta willanapaqpas imaymana herramientakunata utilizanchis. Wakintaqa pisi tiempollan utilizarqanchis wakintataq kunankama utilizashanchis, chaykunan yanapawarqanchis aswan allinta predicananchispaq.

5. a) ¿Imaynan karqan predicanapaq tarjeta? b) ¿Imaynatan chay tarjetawan predicakurqan?

⁵ 1933 watapin predicanapaq tarjetata utilizayta qallarirqanchis. Chayqa chayllaraq predicaqkunatan yanaparqan. Chay tarjetaqa huch’uyllan karqan, chaypin pisillapi qelqasqa kasharqan Bibliaq yachachisqan. Unay-unaymantan huk yachachikuyñataq lloqsimuq. ¿Imaynatan chay tarjetawan predicakurqan? Chunka watanpi kashaspan huk cristiano chayllaraq predicaq lloqsishaspa chay tarjetawan predicarqan. Paymi willakun: “Tarjetawan predicanaykupaqmi niq kayku: ‘Ama hina kaspa, kay tarjetata leey’, nispa. Leesqan qhepamantaq ima qelqatapas qoq kayku, chaymantataq ripuq kayku”, nispa.

6. ¿Imaraykun ancha allin karqan predicanapaq tarjetakuna?

⁶ Predicanapaq tarjetakunaqa ancha allinmi karqan. Manaraq kashaqtinmi wakin cristianokunaqa predicayta munarqanku ichaqa sinchi manchali kaspankun mana atirqankuchu ima niytapas. Wakintaq llapa yachasqankuta huk ratollapi willaqku, mayninpin ichaqa mana sumaq simiwanchu willaqku. Predicanapaq tarjetan ichaqa yanaparqan Bibliaq yachachisqanta sut’ita willanankupaq.

7. ¿Imaraykun mana facilchu karqan tarjetakunawan predicay?

⁷ Ichaqa manan facilchu karqan tarjetakunawan  predicayqa. Huk cristianan nirqan: “Mayninpin niwaqku: ‘¿Ima nintaq tarjetari? ¿Manachu qan kikiyki niwankiman?’”, nispa. Wakintaqsi mana leeyta yachaqkuchu, hukkunataq tarjetata chaskirqospa punkunkuta wisq’arakamuqku, mana uyariyta munaqkunataq qhasurpariqku. Chaywanpas tarjetakunaqa iñiqmasikunatan yanaparqan predicanankupaq, Diospa gobiernonmanta predicaqkuna kasqankuta reqsichikunankupaqpas.

8. ¿Imaynatan apakachanapaq tocadiscokunata utilizakurqan? (27 paginapi fotota qhaway.)

⁸ Predicananchispaqmi yanapawallarqanchistaq apakachanapaq tocadisco. Chayqa utilizakurqan 1930 watakunapin. Chaypin pisillapi grabasqa discursokunata runakunaman uyarichiqku. Wakin cristianokunaqa Aarón nispan sutichaqku, paykunaq rantinpi rimasqanrayku imaynan Moisespa rantinpi Aarón rimarqan hinata (leey Éxodo 4:14-16). ¿Imaynatan apakachanapaq tocadiscokunata utilizakurqan? Wasiyoq uyariyta munallaqtinmi chay tocadiscotaqa hap’ichiqku, hinamantaq huk qelqata munachiqku. Mayninqa llapa familiantinsi grabasqa discursokunata uyariqku. 1934 watapin Testigokunaqa predicanankupaq hina tocadiscokunata ruwarqanku, tiempowanqa 92 discursokuna grabakurqan.

9. ¿Ima allinkunan karqan tocadiscokunawan predicakuqtin?

⁹ Huk iñiqmasin grabasqa discursota huk runaman uyarichirqan. Chaymi chay runaqa iñiqmasiq tocadisconta semanapaq mañakurqan, chay semanapin wasimasinkunaman uyarichimurqan. Qatiqnin semanata iñiqmasi kutiqtinsi askha runakuna suyashasqaku Bibliata estudianankupaq. Wakinmi bautizakurqanku, chay runapas bautizakurqanmi. Tiempowantaq iskay ususinkuna misionerakuna kapurqanku. Tarjetakunaq yanapasqanta hinan chay tocadiscokunapas chayllaraq predicaqkunata yanaparqan. Tiempowanmi rey Jesucristoqa Bibliamanta allin yachachiq kanapaq escuelatañataq utilizarqan qatikuqninkunata yachachinanpaq.

10, 11. ¿Imaynatan yanapawarqanchis periodicokunapas radiopas predicananchispaq?

¹⁰ Reyninchis Jesuspa yanapayninwanmi imaymana formamanta predicarqanchis tukuy atisqanchis runaman. Chaykunan yanapawarqanchis pachantinpi pisi Testigokunallaraq kashaqtinchis (leey Mateo 9:37). Hukninmi karqan periodicokuna. Russell iñiqmasinchismi sapa semanan huk discursota apachiq huk reqsisqa periodicoman. Chay periodicotaq apachiq Canadá, Estados Unidos, Europa ladokunapi periodicokunaman. 1913 watapaqqa 2.000  periodicokunapiñan Russell iñiqmasiq discursonkuna lloqsimurqan, yaqa 15 millón runakunataq leerqanku.

¹¹ Chaymantapas radiopin predicallarqanchistaq. 1922 wata 16 abril killapin Rutherford iñiqmasinchis radiopi discursota qorqan. Chaytan uyarirqanku 50.000 runakuna hina. Chay qhepamanmi radio wasinchis kapuwarqanchis. 1924 watapin 24 febrero killapi funcionayta qallarirqan, chaymi chay wata tukuyta inglés simipi Qhawaq revistanchis nirqan: “Radiota utilizayqa ancha allinmi runakunaman cheqaq kaqta yachachinaykupaq, manataqmi nishu qolqepaqchu”, nispa. Periodicokunapi, radiopi ima predicasqanchisqa ancha allinmi karqan, Testigokunaq mana kasqanmanraqmi chayarqan.

12. a) Askha runakunaq kasqanpi predicaspa, ¿maypin astawan gustanki predicayta? b) ¿Imatan ruwanayki askha runakunaq kasqanpi predicayta manchakuspa?

¹² Kay tiempokunapitaq askha runakunaq kasqanpi predicayta qallarirqanchis. Terminalkunapi, tren estacionpi, negociokunapi, plazakunapi mercadokunapipas. Sichus manchakunki chay sitiokunapi predicayta chayqa, Diosmantan kallpata mañakunayki. Hinaspapas piensawaqmi huk watukuq umalliq nisqanpi. Paymi nirqan:  “Chayllaraq lloqsimuq formakunamanta predicaspan rikuchiyku Diospaq hunt’aq sonqo kasqaykuta, ancha munakusqaykutapas. Paypa munasqan formakunamanta predicanaykupaqmi kallpachakuyku, Jehová Diospa yanapawanankupitaq confiayku”, nispa. Manchapakuyninchista atipaspa mosoq formakunamanta predicaspaqa aswan allin cristianokunamanmi tukupunchis, astawantaq Jehová Diospi confianchis (leey 2 Corintios 12:9, 10).

13. a) ¿Imaraykun internetpi direccionninchismanta hukkunaman willananchis? b) ¿Imaynatan utilizashanki internetpi direccionninchista?

¹³ Askha iñiqmasikunan internetpi direccionninchismanta hukkunaman willanku. Sapa p’unchaymi 1.600.000 más runakuna haykunku jw.org direccionninchisman. Chaypin qelqanchiskunata leenkuman otaq horqonkuman 700 más simikunapi. Ñawpa tiempopin radiowan yanapachikurqanchis karupi tiyaq runakunaman predicananchispaq, kunantaq internetwan yanapachikunchis chhaynata predicananchispaq.

14. a) ¿Imatan iñiqmasikuna necesitarqanku? b) ¿Ima escuelan yanapawarqanchis allin yachachiq kanapaq?

¹⁴ Rikusqanchis hina, imaymanatan utilizarqanchis predicananchispaq, imaymana formamantataq predicarqanchispas. Ichaqa escuelakunan paqarimurqan preparawananchispaq. ¿Imaraykun chaykuna importante karqan? Tocadiscowan iñiqmasikuna predicaqtinkun wakin runakunaqa mana contentochu kasharqanku uyarisqankuwan, wakintaq astawan yachayta munaspa imaymanata tapukuqku. Chaymi iñiqmasikunaqa allin yachachiq kanankupaq preparasqa kananku karqan. Chaytan santo espirituq yanapayninwan Knorr iñiqmasi repararqan, chaymi 1943 watapi qallarirqan Bibliamanta allin yachachiq kanapaq escuela.

15. a) ¿Imakunatan pasarqanku allin yachachiq kanapaq escuelapi kaqkuna? b) ¿Imaynatan Jehová Dios yanaparqasunki Salmo 32:8 textopi nisqanman hina?

¹⁵ Iñiqmasikunaqa manan yachaqkuchu askha runakunaq qayllanpi rimayta. 1944 watapis huk cristiano chayllaraq discursota qosharqan, rimanansi karqan Doeg runamanta, phisqa kutillatan Bibliapi chay sutiqa rikhurin. Chaysi llapa discursonpi khatatataspa tullunkunaraq mana takyasqachu, chaywanpas tukurqansi discurso qoyta. Chay escuelapiqa wawakunapas participankun. Watukuq umallin willakun discursonta qoq yaqa qanchis watayoq wawamanta, ninmi: “Discursonta qallarispa hinan waqayta qallarirqan, ichaqa waqan-waqanpas tukurqanmi discursonta”, nispa.  Wakin iñiqmasikunaqa sinchitan manchakunku huñunakuykunapi makinku hoqariyta otaq ñawpaqman pasayta. Sichus qanpas manchali kanki chayqa, Jehová Diosmanta mañakuy manchakuyniykita atipanaykipaq. Paymi yanapasunki imaynan chayllaraq escuelapi kaqkunata yanaparqan hinata (leey Salmo 32:8).

16. ¿Imapaqmi Galaad escuela?

¹⁶ Hinaspapas Diosqa Galaad escuelawanmi siervonkunata prepararqan. Chay escuelan astawan predicanankupaq kallpachan. 1943 watapin qallarirqan, chaymantapachan 8.500 más Testigokunata prepararqan predicanankupaq, 170 nacionkunapi hinataqmi predicarqanku. 2011 watamantataq invitanku precursor especialkunata, watukuq umallikunata, betelitakunata, chay escuelaman manaraq riq misionerokunatawan.

17. ¿Ima allinkunan karqan Galaad escuelarayku?

¹⁷ ¿Ima allinkunan karqan Galaad escuelarayku? Japón nacionmanta yachasun. Agosto 1949 watapiqa manan chunka Testigokunallapas karqanchu chay nacionpiqa. Ichaqa chay wata tukuypaqmi 13 misionerokuna chayarqanku, chaymi kunanqa yaqa 216.000 Testigokunaña Japón nacionpi kanku; yaqa kuskantaq precursor regular otaq auxiliar kanku.

18. ¿Ima escuelakunapiwanmi kapuwanchis?

¹⁸ ¿Ima escuelakunapiwanmi kapuwanchis? Wakinmi nombrasqa qharikunapaq escuela, precursorkunapaq escuela, Diospa gobiernonmanta willaqkunapaq escuela, watukuq umallikunapaq esposankupaqwan escuela, sucursalkunamanta encargakuqkunapaq esposankupaqwan escuela. Chay escuelakunan iñiqmasikunata allinta prepararqan, kallpacharqantaq kanpas. Sut’itan rikunchis Jesusqa kunankamapas preparawashasqanchista.

19. a) ¿Imatan predicacionmanta Russell iñiqmasi nirqan? b) ¿Cheqaqpaqchu chay nisqan hunt’akurqan?

¹⁹ Diospa gobiernonqa 100 wata masñan kamachikushan. Chaymantapachan Jesucristo reyqa predicacionta aparichishan. 1916 watapin Russell iñiqmasi nirqan: “Predicacionqa ratullan mast’arikushan astawantaqmi yapakunqa, pachantinpin Diospa gobiernonmanta predicananchis kashan”, nispa (La fe en marcha, A. H. Macmillan, página 69). Rikusqanchis hina, Russell iñiqmasiqa cheqaqtan nisharqan, kunanqa pachantinpin predicashanchis. Maytan Jehová Diosta gracias ninchis predicananchispaq imaymana yanapaykuna qowasqanchismanta.