1, 2. ¿Imakunatan Biblia willan munakuymanta?

JEHOVÁ DIOSQA ancha munakuqmi (1 Juan 4:16). Jesuspas taytan hina munakuqllataqmi. Payqa manaraq imapas kashaqtinmi kamasqa karqan, waranqa-waranqa watakunataq taytanwan kuska hanaq pachapi tiyarqan; chaymi yacharqan taytanqa sinchi munakuq kasqanta (Col. 1:15). Jesuspas chay hina munakuytan rikuchirqan kay pachapipas hanaq pachapipas. Chaymi mana iskayanchischu Jehová Diospas Jesuspas munakuywan gobiernawananchista.

² Huk runan Jesusta tapurqan: “Yachachikuq, ¿mayqentaq Diospa kamachikuyninmantaqa aswan chaniyoq?”, nispa. Chaymi Jesusqa kutichirqan: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan. Chaymi aswan chaniyoq ñawpaqkaq kamachikuyqa. Iskaykaq aswan chaniyoqqa kaymi:  Runamasiykitan qan kikiykita hina munakunki”, nispa (Mat. 22:37-39).

3. ¿Pin runamasinchis?

³ Chhaynaqa manan Diosllatachu munakunanchis, runamasinchistapas munakunanchismi. Runamasinchisqa ladonchispi kaq llapa runakunan. Casarasqa qharipaqqa aswan importante runamasinqa esposanmi, casarasqa warmipaqtaq qosan. Iñiqmasinchiskunapas, predicasqanchis runakunapas runamasinchismi. Kay estudiopin yachasun imaynatan runamasinchisman munakusqanchista rikuchisunman chayta.

4. ¿Imaynapin casarasqakuna kusisqa kawsankuman?

⁴ Jehová Diosmi casarakuytaqa paqarichirqan. Paymi Adanta Evatawan casarachirqan. Diosqa kusisqa kawsanankutan munarqan, kay pachatapas wawankunawan hunt’anankuta (Gén. 1:27, 28). Paykunan ichaqa Dios contra hatarispanku sumaq kawsayta chinkachirqanku. Hinaspapas huchata wañuytawanmi llapa wawankunaman saqewarqanchis (Rom. 5:12). Chaymi llapa casarasqakuna imapipas pantankupuni. Ichaqa, ¿chayraykuchu casarasqakuna mana kusisqa kankuman? Manan. Sichus Bibliapi Jehová Diospa kamachikuyninkunata kasukunqaku chayqa, kusisqan kawsanqaku (leey 2 Timoteo 3:16, 17).

5. ¿Imaraykun casarasqakuna munanakunanku?

⁵ Casarasqakuna kusisqa kawsanankupaqqa anchatan munanakunanku. Apóstol Pablon cheqaq munanakuymanta nirqan: “Pipas munakuqqa muchukuqllan, sumaq sonqollan, munakuqqa manan envidiakunchu, manan k’ankaykachanchu, manan hatunchakunchu, manan mana ruwanakunatachu ruwan, manan payllapaq kanantachu munan, manan phiñakunpachachu, manan sientepakunchu, manan mana chanin kaqmantachu kusikun, aswanpas cheqaqkaqmantan kusikun. Munakuqqa tukuy imatan muchun, tukuy imatan creen, tukuy imatan suyakun, tukuy imapin pacienciakun. Munakuyqa wiñaypaqmi”, nispa (1 Cor. 13:4-8). Chay simikunapi piensasun chayman hinataq casado kawsayninchispi kawsasun chayqa, kusisqan kasun.

6, 7. a) ¿Ima ninmi Biblia familiapi umamanta? b) ¿Imaynatan qosa esposanta tratanan?

⁶ Jehová Diosmi qharita churarqan familiapi uma kananpaq. Pablon nirqan: “Cristoqa llapa qhariq umanmi, qharitaq esposanpa uman, Diostaq Cristoq uman”, nispa (1 Cor. 11:3). Qhariña familiapi uma chaypas, manan chayraykuchu familianta millayta tratanan, aswanpas munakuywanmi tratanan. Qosakunaqa Diospa ruwasqantan qhawarinanku. Diosqa munakuywanmi Jesusta tratan manataqmi  hayk’aqpas pay kikillanpichu yuyaykun, chaymi Jesusqa mana sasachakuspalla respetan. Chaychá Jesusqa nirqan taytan munakusqanta (Juan 14:31). Sichus Jehová Dios millayta tratanman karqan chayqa, manachá chay simikunata Jesús ninmanchu karqan.

⁷ Qosaqa esposanpa umanmi, chaywanpas Biblian qosata kamachin esposanta sonqomanta respetananpaq (1 Ped. 3:7). ¿Imaynatan chayta ruwanman? Esposanpa necesitasqanta qospan, atikuqtintaq ima munasqantapas gustachispa. Biblian nin: “Qosakuna, esposaykichista munakuychis, imaynan Cristopas iglesiata [otaq iñiq t’aqata] munakuspa payrayku wañurqan hinata”, nispa (Efes. 5:25). Chay textoq nisqan hina, Jesusqa anchatan qatikuqninkunata munakurqan chayraykun paykunarayku kawsayninta qorqan. Sichus qosakuna esposankuta munakuywan tratanqaku chayqa, esposaqa mana sasachakuspallan qosanta munakunqa, respetanqa, yanapanqataq (leey Tito 2:3-5).

8. ¿Imaynatan iñiqmasinchiskunata tratananchis?

⁸ Jehová Diosta serviqkunaqa mundontinpin kashanku. ¿Imaynatan paykunata  tratananchis? Biblian kamachiwanchis llapa runakunata sumaqta tratananchista, astawanqa iñiqmasinchiskunata (Gál. 6:10; leey Romanos 12:10). Apóstol Pedron nirqan Diosta munakuspaqa, iñiqmasinchiskunatapas sonqomanta munakunanchista. Nillarqantaqmi cristianokunaqa anchata munanakunanchista (1 Ped. 1:22; 4:8).

9, 10. ¿Imaraykun Diosta serviqkuna huk nisqalla kanchis?

⁹ Jehová Diosta serviqkunaqa hukniraymi llapa runakunamanta kanchis. ¿Imarayku? Sonqomanta munanakusqanchisrayku. Hinaspapas Diostan munakunchis kamachikuyninkunatataq kasukunchis. Chayraykun santo espiritunta qowanchis, chay espirituqa hatun kallpan chaytaqmi yanapawanchis huk nisqalla pachantinpi iñiqmasinchiskunawan kananchispaq (leey 1 Juan 4:20, 21).

¹⁰ Apóstol Pablon nirqan: “P’achawan hina p’achakuychis khuyapayakuq-kaywan, sumaq sonqo-kaywan, huch’uyyaykukuywan, llamp’u sonqo-kaywan, pacienciawan ima [...]. Chaykunamanta astawanqa munakuq sonqo kaychis, munakuymi tukuy imatapas sumaqta hukllaman tukuchin”, nispa. Nillarqantaqmi: “Sumaq sonqo kaychis, khuyapayanakuq, pampachaykunakuq, imaynan Diospas Cristopi qankunata pampacharqasunkichis ahinata”, nispa (Col. 3:12, 14; Efes. 4:32). Chay textokunapi nisqan hina cristianokunaqa may nacionmantaña kaspapas munanakunchismi, huk nisqallataq kawsanchispas. ¡Maytan Jehová Diosta agradecekunchis chhayna munanakuyta yachachiwasqanchismanta!

11. ¿Iman rikuchin cheqaq religionpi kashasqanchista?

¹¹ Jehová Diospa testigonkunaqa anchatan munanakunchis, huk nisqallataq kanchispas. Chaymi rikuchin cheqaq religionpi kashasqanchista. Jesusmi nirqan: “Ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:34, 35). Apóstol Juanmi nillarqantaq: “Pipas chaninkaqta mana ruwaqqa, iñiqmasintapas mana munakuqqa, manan Diospa wawanchu. Kaymi qallariymantapacha uyarisqaykichis willakuyqa: Hukkuna hukkunawanmi munanakunanchis”, nispa (1 Juan 3:10, 11). Jehová Diospa testigonkunaqa cheqaq cristianokuna kasqanchistan rikuchinchis munanakusqanchisrayku, huk nisqalla kasqanchisraykupiwan. Hinaspapas Diosmi ñoqanchiswan gobiernonmanta willachishan pachantinpi runakunaman (Mat. 24:14).

12, 13. a) ¿Imatan ruwashanku kay pachapi tiyanankupaq suyakuyniyoqkuna? b) ¿Imatan Dios qonqa kay pachapi tiyanankupaq suyakuyniyoqkunaman?

¹² Kay tiempopiqa yaqa llapa Testigokunan kay pachapi tiyanankupaq suyakuyniyoqkuna kanku. Paykunan lliw nacionkunamanta kanku pachantinpitaq predicashanku. Biblian nin: “Kaykunaqa manchay ñak’ariymanta lloqsimuqkunan, p’achankuta t’aqsaspa Corderoq yawarninpi yuraqyachiqkunan”, nispa. Chayqa Jesuspa sacrificionpi iñisqankun. Hinaspapas paykunaqa Jehová Diosta munakusqankuraykun ‘tuta-p’unchay’ adoranku, Jesustapas munakunku (Apo. 7:9, 14, 15).

¹³ ‘Manchay ñak’ariy’ tiempon chayamushanña, chaypin Jehová Diosqa kay millay pachata tukuchipunqa (Mat. 24:21; leey Jeremías 25:32, 33). Ichaqa serviqninkunata munakusqanraykun pakaykunqa, paraisotataq qonqa. “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu”. ¡May munaychá kawsayqa kanqa llapa mana allinkuna chinkapuqtinqa! (Apo. 21:4.)

14. ¿Hayk’a runakunan kay pachapi tiyanankupaq suyakuyniyoqkuna kanku?

¹⁴ P’uchukay tiempo 1914 watapi qallarishaqtinqa, yaqa 5.000 runakunallan Diosta servisharqanku. Sinchi sasachakuykunapiña tarikurqanku chay akllasqa cristianokuna chaypas, runamasinkuta munakusqankuraykun santo espirituq yanapayninwan predicashallarqanku. Chay ruwasqankuwanmi huñukushan kay pachapi tiyanankupaq suyakuyniyoq runakunatapas, pusaq millón hinañataqmi kashanku. 115.400 más iñiq t’aqakunapin huñunakunku, ichaqa sapa watanmi astawan yapakushan. 2013 wata setiembre killamanta 2014 wata agosto killakaman 275.500 más runakuna bautizakurqanku. Chayqa, ¡sapa semanapas 5.300 runakuna bautizakunkuman hinan!

15. ¿Iman yanapawanchis predicananchispaq?

¹⁵ Askha runakunan predicasqanchista uyarinku. Chaypaqmi yanapawanchis qelqanchiskuna, chaykunaqa 700 más simikunapiñan t’ikrakamushan. Qhawaq revistanchisqa 52 millón masmi sapa killan ruwakamun 247 simikunapi. ¿Imatapunin Biblia yachachin? nisqa librotaq 200 millón masraq ruwakamurqan 250 más simikunapi.

16. ¿Imaraykun Jehová Diosta serviqkuna astawan yapakushan?

¹⁶ Diosta serviqkunaqa astawanmi yapakushanchis. ¿Imarayku? Jehová Diospi iñisqanchisrayku, paypa siminta hina Bibliata aceptasqanchisrayku (1 Tes. 2:13). Saqraña cheqnikuwanchis qatiykachawanchis chaypas, kaqllan Jehová Dioswanqa amigontin kashanchis (2 Cor. 4:4).

17, 18. ¿Imaynatan runakunata tratananchis predicasqanchista mana uyarikuqtinku?

¹⁷ Predicaqtinchisqa wakin runakunan uyarikunku wakintaq mana. Chaywanpas Biblian kamachiwanchis sumaqta paykunawan rimananchispaq. Ninmi: “Rimakuyniykichisqa ancha sumaqpuni kachun, kachiwan kachichasqa hina, ahinapin  yachankichis imaynatachus sapankamanpas allinta kutichinaykichista”, nispa (Col. 4:6). Runamasinchista munakusqanchisraykutaqmi imamantapas tapuwaqtinchis ‘kutichinchis llamp’u sonqowan respetowan’ (1 Ped. 3:15).

¹⁸ Phiñakunkuña runakuna predicasqanchiswan chaypas, Jesús hinan munakuywan tratananchis. Biblian nin: “Payqa k’amishaqtinkupas manan k’amipakullarqantaqchu, ñak’arichishaqtinkupas manan amenazarqanchu, aswanmi chaninninpi juzgaq Diosman hap’iykachikurqan”, nispa (1 Ped. 2:23). Chhaynan ñoqanchispas k’umuykukuq kananchis, runakunaña millayta tratawaqtinchispas manan vengakunanchischu. Aswanpas kallpachakunanchismi paykunapaq allinkunata ruwapunanchispaq (1 Ped. 3:8, 9).

19. ¿Imaynatan enemigonchiskunata tratananchis?

¹⁹ Humilde kaspaqa Jesuspa niwasqanchistan kasukunanchis, paymi nirqan: “Uyarillarqankichistaqmi: ‘Runamasiykitan munakunki, awqaykitataq cheqnikunki’, nisqa kasqanta. Ñoqataq ichaqa niykichis: Munakuychis awqaykichiskunata, [...] mañapuychis k’amiqniykichiskunapaqpas qatiykachaqniykichiskunapaqpas. Ahinapin hanaq pachapi kaq Yayaykichispa wawankuna kankichis, payqa intintan lloqsichimun allinkunapaqpas mana allinkunapaqpas, parachimullantaqmi chaninkunapaqpas mana chaninkunapaqpas”, nispa (Mat. 5:43-45). Imaynataña enemigonchiskuna tratawaqtinchispas munakunanchismi.

20. ¿Hayk’aqmi kay pachapi llapa tiyaqkuna munakunqaku Jehová Diosta runamasinkutapas? (21 paginapi fotota qhaway.)

²⁰ Imaynapiña tarikuspapas Jehová Diostan munakunanchis, runamasinchistapas. Runakuna cheqnikuwaqtinchispas otaq manaña chaskiwaqtinchispas, yanapananchismi yanapayta necesitaqtinkuqa. Apóstol Pablon nin: “Ama pimanpas ima manupas kaychischu, aswanpas qankunapura munanakuy manulla kaychis. Pipas runamasinta munakuqqa Diospa kamachikuy simintan hunt’anña. Chay kamachikuy simikunan nin: ‘Aman wasanchankichu, aman pitapas wañuchinkichu, aman suwakunkichu, [...] aman munapayankichu’, nispa. Chay kamachikuykunapas wakin kamachikuykunapas hukllamanmi huñukun: ‘Runamasiykitan qan kikiykita hina munakunki, niq simiman’. Munakuqqa manan runamasinta ima mana allintapas ruwanchu, chayraykun munakuyqa kamachikuy simita hunt’ay”, nispa (Rom. 13:8-10). Saqran runakunata cheqninachin, ñoqanchismi ichaqa runamasinchista sonqomanta munakunchis (1 Juan 5:19). Ichaqa Saqrata, supayninkunata, kay millay pachatapas Jehová Dios chinkachiqtinmi, llapa runa Jehová Diosllata munakunqa, runamasintawan. ¡May munaymá chayqa kanqa!