KAWSAYNINMANTA WILLAKUY
Dioswanpas mamaywanpas thakpin kawsani
HUK kutinmi mamay niwarqan: “¡Imanaqtinmi mana adorawaqchu wañupuq ñawpa machulanchiskunata! ¿Manachu reparanki paykunarayku kawsashasqanchista? ¡Maypis chhayna mana agradecekuq kasunman! ¿Imanaqtinmi machulanchiskunaq costumbrenkunata qonqapuyta munanki? Paykunata mana adoraspaqa religionninchistan pisichashanki”, nispa. Hinamantaq waqayta qallarirqan.
Chay tiempopaqqa Bibliatan estudiasharqani. Ñawpaqtaqa mamaymanmi Jehová Diospa testigonkuna munachisqaku Bibliata estudiananpaq. Paymi ichaqa mana munasqachu, sumaqllata chayta ninanpaqtaq ñoqata yachachiwanankupaq nisqa. Chhaynaqa, ¿imaraykutaq phiñasqari kasharqan? Jehová Diosta kusichiyta munasqayraykun. Mamaypa wakin kamachiwasqanqa manan Bibliaq nisqanman hinachu karqan, chaymi mana kasurqanichu. Sasan karqan, ichaqa Diosmi kallpata qowarqan.
¿IMAYNAPIN JEHOVÁ DIOSTA REQSIRQANI?
Japón nacionpiqa yaqa llapankun budismo religionmanta kanku, ñoqapas familiaypas chay religionmantan karqayku. Ichaqa iskay killaña Testigokunawan Bibliata estudiaspan repararqani Bibliaqa cheqaq kaqtapuni willasqanta. Hanaq pachapi taytayoq kasqayta yachaspaymi, reqsiytapuni munarqani. Mamaymanmi willaq kani imachus yachashasqayta paytaq kusisqa uyariwaq, hinaspapas huñunakuykunamanmi domingonkunata risharqani. Bibliamanta yachasqayman hinan mamayta nirqani manaña budismo religionpi ruwaykunata ruwanaypaq. Chaymi payqa phiñakuspa niwarqan: “Pipas ñawpa machulanchiskunata mana respetaqqa p’enqaypin familiata rikuchin”, nispa. Manañataq munarqanchu huñunakuykunaman rinayta nitaq Biblia estudianaytapas. Mamayqa manan hayk’aqpas chhayna millaytaqa tratawaqchu.
Papayqa mamaypa nisqanta hinan piensallarqantaq. Bibliapin yacharqani Efesios soqta capitulopi tayta-mamay kasunay kasqanta. Chay hinapaqtaq colegioman haykunaypaq examenta qonay kasharqan, chaymi tayta-mamaywan rimanakurqayku kinsa killa huñunakuyman mana rinaypaq. Jehová Diosmantaq prometerqani chay killakuna qhepata rinaypaq. Piensarqanin chayta ruwaqtiyqa tayta-mamay manaña hark’awanankupaq, chhaynapi thakpi kawsanaykupaq.
Chay ruwasqayqa manan allinchu karqan. ¿Imanaqtin? Ñoqaqa piensarqani kinsa killa qhepaman Jehová Diosta kaqlla munakushanaypaqmi, ichaqa manan chhaynachu karqan. Pisi
tiempollapin Jehová Diosta manaña amigoyta hinachu qhawaripurqani. Hinaspapas chay kinsa killapin tayta-mamayqa astawan tanqawarqanku Jehová Diosta saqepunaypaq.YANAPAYKUNA
Iñiq t’aqapin reqsirqani ñoqa hina tarikuq Testigokunata. Paykunan niwarqanku Jehová Dios kallpachawananta (Mat. 10:34-37). Hinaspapas entiendechiwarqankun aguantaqtiyqa familiay yaqapas Diosta reqsinankuta. Chaymi tukuy sonqoymanta Diosta mañakurqani paypi confianaypaq.
Tayta-mamayqa imaymanatan ruwarqanku Diosmanta karunchakunaypaq. Wasipin imaymana ruwaykunata qowarqanku, chhaynapi mana lloqsinaypaq. Maynintaq wasiman mana haykuchiwaqkuchu otaq mikhunata mana qowaqkuchu. Sapa kutillanmi mamayqa rogawaq Bibliata amaña estudianaypaq, ñoqan ichaqa ch’inlla uyariq kani mana discutinaykupaq. Kunanraqmi reparakuni imaynachus piensasqanta astawan respetanay kasqanta. Sichus chayta ruwayman karqan chayqa, yaqapaschá mana sinchitachu phiñakunman karqan.
Mamayqa huk runakunamanmi willakuq ñoqamanta, chhaynapi yanapanankupaq. Huk kutinmi profesorniywan rimarqan, paymi ichaqa mana problemaykuman metekuyta munarqanchu. Chaymantataq llank’ananman pusawaspa jefenta nirqan budismo religionlla allin nispa niwananpaq. Hinaspapas waqaykuspan familiaykuta telefononta waqyaq, valekuqtaq yanapanankuta. Chaykuna ruwasqanmi sinchita phiñachiwaq. Huñunakuykunaman riqtiymi ichaqa, umallikuna niwaqku runakunaman mamay ñoqamanta willakuspanqa, mana reparakuspalla predicashasqanta.
Tayta-mamayqa munarqanku universidadpi estudiamuspa allin llank’anayoq kanaytan. Chayllamantan sapa kutin discutiq kayku, mana discutinaypaqtaq cartakunata qelqaspa willaq kani imatachus vidaywan ruwayta munani chayta. Huk kutinmi sinchi phiñasqa taytay niwarqan: “Manachus paqarin llank’anata tarimunki chayqa, wasimantan ripunki”, nispa. Chaymi Jehová Diosta rogakurqani yanapawananpaq. Paqaristin predicaq riqtiymi iskay hermanakuna niwarqanku ususinkuta yachachispa llank’anaypaq. Chaywanpas taytayqa manan kusikurqanchu, paypaqqa wañusqapas kashayman hinan karqani. Mamaymi niwaq “suwachá aswanpas kawaq karqan Testigo kanaykitaqa” nispa.
Jehová Diosmi yanapawarqan piensayniyta cambianaypaq, allinta decidinaypaqpas
Mayninpin piensaq kani: “¿Allintachu Dios qhawarishanman tayta-mamayta mana kasusqayta?”, nispa. Chaymi payman orakurqani, piensarqanitaqmi Diospa munakuyninmanta rimaq textokunapi. Chaymi yanapawarqan allinkunallapi piensanaypaq, entienderqanitaqmi tayta-mamayqa allinnillayta munasqankuta. Jehová Diosmi yanapawarqan piensayniyta cambianaypaq, allinta decidinaypaqpas. Anchatan gustawaq Diosmanta hukkunaman willay, chaymi precursora kayta munarqani.
PRECURSORAN KAPURQANI
Precursora kay munasqayta yachaspankun wakin hermanakunaqa niwarqanku tayta-mamaypa sonqonraq tiyaykunanta. Jehová Diospa yanapaynintan mañakurqani, qelqanchiskunatan estudiarqani, piensarqanitaqmi imarayku precursora kay munasqayta, chaymantapas unayña Diosta serviq iñiqmasikunatan tapukurqani. Hinan entienderqani Jehová Diosta kusichiy imamantapas aswan allin kasqanta. Repararqanitaqmi precursora kanaypaqqa mana tayta-mamaypa cambianantaraqchu suyanay kasqanta.
Chaymi colegiota tukunay watapi precursora kapurqani. Chaymantaqa predicayta necesitakusqan llaqtamanmi riyta munarqani, tayta-mamaymi ichaqa mana munarqanchu wasiymanta ripunayta. Chaymi suyakurqani 20 watayoq kanaypaq. Chhayna watayman chayaspan sucursalta nirqani Japonpa uray ladonman kachawananpaq chaypi familiayku kasqanrayku, chhaynapi mamay ama llakikunanpaq.
Maytan kusikuni chay llaqtapi askha runakunata Testigo kanankupaq yanapasqaymanta. Hinaspapas inglestan estudiarqani chhaynapi astawan predicaypi yanapakunaypaq. Iñiq t’aqaypin karqanku iskay precursor especialkuna, paykunaqa anchatan llank’aqku Jehová Diospaq, hukkunatapas yanapaqku. Paykunaq ruwasqankuta hinan ñoqapas ruwayta munarqani, chaymi precursora especial kayta munarqani. Ichaqa mamaymi iskay kutipi graveta onqorqapurqan, chaymi cuidanaypaq chay kutikunapi wasiyman rirqani. Payqa manan piensasqachu chayta ruwanaypaq, chaymi mana nishutañachu anyawaq.
JEHOVÁ DIOSQA SUMAQ SONQO DIOSMI
Qanchis wata qhepamanmi ñawpa iñiq t’aqaymanta Atsushi sutiyoq precursor especial cartata apachimuwarqan. Chaypin niwarqan casarakuy munasqanta, hinaspa tapuwarqan: “¿Munawaqchu ñoqawan casarakuyta?”, nispa. Ñoqan ichaqa mana piensarqanipaschu paywan casarakuyta. Chaywanpas killa pasasqan qhepamanmi nirqani astawan reqsinakunaykupaq. Iskayniykun munarqayku maypipas tukuy tiempoykuwan Dios serviyta, tiempowantaq casarakurqayku. Casarakusqayku p’unchayqa tayta-mamaypas huk familiaykunapas hamurqankun, chaymi anchata kusichiwarqan.
Nepal
Iskayniykun precursor karqayku, tiempowanmi ichaqa qosayta nirqanku wakin iñiq t’aqakunata
visitananpaq. Chay qhepamantaq precursor especial kapurqayku, hinamantaq qosayta invitarqanku watukuq umalli kananpaq. Soqta killa iñiq t’aqakunata visitasqayku qhepamanmi sucursalmanta waqyamuwarqanku, hinan tapuwarqanku: “¿Munawaqchischu Nepal nacionpi iñiq t’aqakuna visitayta?”, nispa.Askha nacionkunapi servispan Jehová Diosta astawan reqsirqani
Chayta uyarispaqa piensarqanin tayta-mamay imachus niwanankupi. Telefonopi paykunaman willaqtiymi papay niwarqan: “Ancha munaymá chay nacionqa”, nispa. Huk semana ñawpaqllatan chay nacionmanta willaq librota amigon regalasqa. Chayta leespan papayqa piensasqa chay nacionman viajananpaq.
Nepal nacionpiqa kusisqan karqayku, chaypi runakuna sumaq sonqo kasqankurayku. Tiempowanmi niwarqanku Bangladesh nacionpi iñiq t’aqakunatawan visitanaykupaq. Qaylla-qayllalla chay nacionkuna kashanku chaypas, costumbrenkuqa manan kaqllachu. Chaymi predicasqaykupas huk hina kanan karqan. Phisqa wata qhepamanmi Japón nacionman kutinaykupaq niwarqanku. Kunanpas chaypin kusisqa kashayku iñiq t’aqakunata visitaspa.
Astawanmi Jehová Diosta reqsirqani Japón, Nepal, Bangladesh nacionkunapi servispa. Chay llaqtakunapi runakunaqa manan kaq costumbrekunayoqchu kanku, sapankankun huknirayta imatapas ruwanku. Chaywanpas Jehová Diosqa llapankutan munakun, cuidan, yanapantaq.
Maytan Jehová Diosta agradecekuni imaymana bendicionkuna qowasqanmanta. Payta reqsisqaymanta servisqaymanta, sumaq sonqo qosayoq kasqaymanta, allinta decidinaypaq yanapawasqanmantapas. Kunanqa mamaywanmi yapamanta amigantin kapuyku, llapa familiaywanpas sumaqtan kawsani. Tukuy tiempon agradecekusaq Dioswanpas mamaywanpas thakpi kawsasqaymanta.
Ancha kusisqan kayku iñiq t’aqakunata visitaspa