DIOSQA mana mich’akuspan tukuy imatapas qowanchis, chaytan sut’ita rikunchis kamasqankunapi (Sant. 1:17). Ch’askakunata kamashaspaqa manan pisillatachu ruwarqan aswanpas millonninpin. Kay pachapitaq askha plantakunata kamarqan (Sal. 65:12, 13; 147:7, 8; 148:3, 4).

Ñawpa tiempopi runan Jehová Diosta ancha agradecesqa kasharqan kamasqankunamanta, chaymi huk takita qelqarqan. Chay takin Salmo 104, chaypin payqa nirqan tukuy kawsasqan tiempopi Diosta hatunchananta (Sal. 104:33). ¡Ñoqanchispas pay hinan ruwayta munanchis!

Jehová Diosmi munan pay hina qoykukuq kananchista. Chaymi apóstol Pablowan qelqachirqan qhapaqkunaqa ama qolqenkupichu confiakunankuta. Aswanpas Diospi confianankuta, payllan tukuy allinkunata qowaqninchisqa. Pablon nillarqantaq hukkunapaq allin kaqkunata ruwapunanchista, qoykukuq kananchista, sonqomanta qonanchista. Sichus chay hinata ruwasun chayqa, hamuq tiempopin ancha kusisqapuni kasunchis (1 Tim. 6:17-19). Chhaynaqa Jehová Dios hinan qoykukuq kananchis.

Apóstol Pablon Bibliapi qelqarqan: “Sapanka imaynatachus sonqonpi yuyaykusqanman hina qochun, ama llakisqachu, amataq kamachisqa hinapaschu. Diosqa kusisqa qoqtan munakun”, nispa (2 Cor. 9:7). Chay textoq nisqan hina, kusisqa qonanchistan Diosqa munan. ¿Piqpa allinninpaqmi qoykukuq kasqanchis? Necesitasqanta chaskikuq runapaqmi. Ichaqa ñoqanchispa allinninchispaqwanmi, Jehová Diosmi allin kaqkunawan kutichipuwasun (2 Cor. 9:11-14).

Apóstol Pablon nillarqantaq sumaq regalo qowasqanchismanta Diosman graciasta qonanchispaq (2 Cor. 9:15). Chay regaloqa churinpa wañupuwasqanchisrayku imaymana allinkuna qowasqanchismi. Chaytaqa manan imawanpas kutichipuyta atisunmanchu.

Jehová Diospas Jesuspas ñoqanchisraykun tukuy imata ruwanku, kunanpas hamuq tiempopipas. ¿Imaynatan agradecekusunman chaykunamanta? Qoykukuq kaspan. Qosunmanmi tiemponchista, kallpanchista, qolqenchista, cosasninchiskunatapas Diosta servinapaq, paymanta hukkunaman willanapaqpas. Wakchaña qhapaqña kaspapas, llapanchismi qoykukuq kasunman (1 Crón. 22:14; 29:3-5; Luc. 21:1-4).