1. a) ¿Imata ruwananpaqmi Jehová Dios Adanta kamachirqan? b) ¿Imapaqmi Diosta serviqkuna utilizanchis rimay atisqanchista?

RIMAYTA atinanchispaqmi Jehová Diosqa kamawarqanchis. Paraisopin Adanta kamachirqan llapa animalkunaman sutita churananpaq. Rimay atisqanwantaqmi chayta ruwarqan (Gén. 2:19, 20). Chay tiempokunamantaraqmi Diosta serviqkunaqa Jehová Diosta hatunchananchispaq, paymanta hukkunaman willananchispaq rimay atisqanchista utilizanchis. Kay tiempokunapitaq rimay atisqanchista utilizanchis Bibliata t’ikrananchispaq.

2. a) ¿Imaynatan t’ikrarqanku Traducción del Nuevo Mundo Bibliata? b) ¿Imatan kay estudiopi yachasun?

² Bibliaqa askha simikunamanmi t’ikrakurqan, ichaqa manan llapankuchu Diospa mensajenta k’apaqta willanku. Traducción del Nuevo Mundo Bibliata ruwaqkunaqa k’apaqtan t’ikrayta munarqanku. Chaymi decidikurqanku Diospa sutinta maypichus kananpi churanankupaq, chhaynapi Diospa sutinta hatunchanankupaq (leey Mateo 6:9). Hinamantaq atikusqanman hina sapanka palabrata t’ikrarqanku, mana atikuqtintaq imachus nisqallanta. Chaymantataq fácil  leenapaq entiendenapaq palabrakunallata utilizarqanku (leey Nehemías 8:8, 12). Chhaynata ruwanankupaqmi kallpachakurqanku 130 simikunaman Bibliata t’ikraqkunapas. Kay estudiopin yachasun imaynatas revisakurqan inglés simipi Traducción del Nuevo Mundo Bibliata. Yachallasuntaqmi huk simikunaman t’ikraqkunapas imayna ruwasqankuta.

3, 4. a) ¿Maypin Diospa sutin rikhurin hebreo simipi? b) ¿Imatan ruwarqanku Bibliata wakin t’ikraqkuna?

³ Diospa sutinqa hebreo simipi tawa letrakunan. Chay sutin askha kutita rikhurin ñawpa qelqakunapi, hukninmi Kachi qochapi tarisqanku k’uyu qelqakuna. Hinaspapas Diospa sutinqa tarikun Septuaginta Bibliaq wakin copiankunapin, chay copiakunaqa 200 watakuna manaraq Jesús hamusqan tiempomantan, wakintaq 100 watakuna Jesuspa hamusqan qhepaman. Askha runakunan admirakunku ñawpa qelqakunapi Diospa sutin chhaytukuy kutipi rikhurisqanwan.

⁴ Chhaynaña kaqtinpas, Bibliata t’ikraqkunaqa yaqa llapankun Diospa sutinta mana churamunkuchu. Ejemplopaq, 1901 watapin horqomurqanku American Standard Version Bibliata, chaypin Diospa sutinta churamurqanku. 1952 watapi chay Bibliata revisaspan ichaqa Diospa sutinta horqopusqaku. ¿Imanaqtin? Mana rimanapaq hinata qhawarisqankurayku. Chay hinatan ruwallarqankutaq huk simikunaman Biblia t’ikraqkunapas. 1950 watapin ichaqa inglés simipi Traducción del Nuevo Mundo de las Escrituras Griegas Cristianas Bibliata horqomurqanku, chaypiqa karqanmi Diospa sutin.

5. ¿Imaraykun Diospa sutin Bibliapi rikhurinan?

⁵ Librota t’ikraqqa reparananmi imatachus chay librota qelqaq yachachiyta munasqanta, chay hinamantaqmi t’ikranan. Biblia t’ikraqpas chayllatataqmi ruwanan. Askha textokunan rikuchin Diospa munasqanta, paymi munan sutinta runakuna reqsinankuta hatunchanankutapas (Éx. 3:15; Sal. 83:18; 148:13; Is. 42:8; 43:10; Juan 17:6, 26; Hech. 15:14). Chaychá Bibliata qelqaqkunawan askha kutipi sutinta churachirqan. Paypunin nirqan: “Chay hinapin askha suyukunaman rikuchisaq hatun-kayniyta ch’uya-kayniytawan. Ñoqa kikiytapunin paykunaman reqsichikusaq, hinan reqsiwanqaku ñoqa Jehová Dios kasqayta”, nispa (Ezequiel 38:23, NM). Chaymi Biblia t’ikraqkunaqa mana horqonankuchu Bibliamanta Diospa sutinta, horqospaqa manan respetashankuchu Jehová Diosta.

6. ¿Imanaqtinmi Diospa sutinta soqta kutitawan churakurqan revisasqa Bibliapi?

⁶ Traducción del Nuevo Mundo Bibliapiqa  7.210 kutitan Diospa sutin rikhurirqan, 2013 watapi revisakuqtinmi ichaqa soqta kutitawan Diospa sutinta churakurqan. ¿Imanaqtin? Kachi qochapi tarisqanku k’uyukunata estudiaspan Diospa sutinta tarirqanku phisqa textokunapiwan. * Chay textokunan tarikun 1 Samuel libropi. Soqta kaqtataq churakurqan ñawpa k’uyukunata allinta estudiaspanku, chaymi Jueces libropi kashan. *

7, 8. ¿Ima ninanmi Diospa sutin?

⁷ Cheqaq cristianokunapaqqa Diospa sutinqa ancha importanten. Chay sutiqa “Paymi ruwachin imapas kananta” ninanmi. * ¿Imaynataq chayri? Munayninta hunt’ananpaq Jehová Dios imatapas ruway atisqanmi. Unay watakunan qelqanchiskunapi chhaynata entienderqanchis Bibliaq kay nisqanwan: “Ñoqan munasqayman hina kasaq”, nispa (Éx. 3:14, NM willakuyninpi). 2013 watapi Bibliata revisaspan ichaqa astawan entienderqanchis Diospa sutinta. ¿Imatawanmi entienderqanchis? “Diosqa kamasqankunatan imatapas ruwachinman otaq imamanpas tukuchinman munaynin hunt’akunanpaq” (qhaway Bibliata estudianapaq yanapaykuna folletota, 5 paginata).

⁸ ¿Imaynatan Jehová Dios munayninta hunt’ananpaq kamasqankunata imatapas ruwachinman otaq imamanpas tukuchinman? Chayta entiendesun ejemplokunawan. Noetan Jehová Diosqa arca ruwaqman tukuchirqan, Bezaleeltan allin artesanoman tukuchirqan, Gedeontan allin maqanakuqman tukuchirqan, Pablotataq misioneroman tukuchirqan. Rikusqanchis hina, Diospa sutinqa ancha importanten cheqaq cristianokunapaq. Chaymi Traducción del Nuevo Mundo Bibliata ruwaqkunaqa, Diospa sutinta maypichus kananpi churamurqanku.

9. ¿Imaraykun hunt’aq kamachi munan askha simikunaman Biblia t’ikrakunanta?

⁹ Sapa kutinmi Biblia t’ikraqkunaqa Diospa sutinta Bibliamanta horqopushanku. Chaypa rantinpitaq churashanku “Señor” nispa otaq llaqtankupi diosninkuq sutinta. Chayraykun hunt’aq kamachiqa munan llapa runakunaq rimasqan simipi Biblia t’ikrakunanta, chhaynapi Diospa sutinta reqsinankupaq hatunchanankupaqpas. Biblian nin: “Chay p’unchaypin Jehová Diosta manchakuqkuna sapankanku compañeronkuwan rimarqanku, chaytan Jehová Diosqa maki uyarispa yacharqan. Paypa ñawpaqenpitaq huk libropi qelqasqa karqan, Jehová Diosta manchakuqkuna sutinpi yuyaykuqkunapas yuyarisqa kanankupaq”, nispa (Malaquías 3:16, NM). Traducción del Nuevo Mundo Biblianchisqa 130 simikunapiñan Diospa sutinta hatunchan.

10, 11. ¿Ima sasachakuykunan rikhurirqan inglés simipi Biblianchismanta huk simikunaman t’ikrakuqtin?

¹⁰ Inglés simipi Traducción del Nuevo Mundo Bibliamanta huk simikunaman  t’ikrayqa manan facilchu karqan. ¿Imarayku? Wakin palabrakuna mana allinta entiendekusqanrayku. Ejemplopaq, Eclesiastés 9:10 textopi huk textokunapipas hebreo simimanta Seol palabratan churarqanchis. Huk Bibliakunapas chay hinatan churallarqankutaq. Huk simikunapin ichaqa Seol palabra mana rikhurinchu diccionariokunapi, chaymi runakunaqa mana reqsinkuchu. Askha runakunan piensanku Seolqa huk llaqta kananpaq. Chhaynata mana piensanankupaqmi decidikurqan hebreo simipi Seol palabrata, griego simipi Hades palabratapas “Sepultura” nispa t’ikrakunanpaq. Chaytaqa facil-llatan lliwpas entienden.

¹¹ Huk simikunapitaq sasata t’ikrarqanku hebreo griego simikunamanta “alma” palabrata. Chay palabrata leespan piensanku huk runa wañupuqtin cuerponmanta imapas lloqsispa kawsashanallanpaq. Chhaynata ama piensanankupaqmi decidikurqan revisasqa Biblianchispi alma palabrata imamantachus rimasqanman hina t’ikrakunanpaq, chhaynapi facilta entiendekunanpaq. Paginaq uranpitaq huk willakuyta churakamurqan ima nikunsi alma palabra hebreo simipi, griego simipi chayta yachanapaq. Traducción del Nuevo Mundo (con referencias) Biblianchispiqa apéndice nisqapin willakushan imaymana formamanta alma palabrata t’ikrakunanpaq.

12. ¿Ima cambiokunatawanmi ruwakurqan Bibliata revisaspa?

¹² Huk simikunaman Bibliata t’ikraqkunan  tapuyninkuwan rikuchirqanku inglés simipi Biblianchismanta wakin palabrakuna mana allin entiendekusqanta. Chayraykun umalliq t’aqa 2007 watapi setiembre killapi decidirqan inglés simipi Traducción del Nuevo Mundo Bibliata revisakunanpaq. Revisaqkunaqa allintan estudiarqanku chay t’ikraqkunaq tapukamusqankuta. Chaymantapas manaña rimakusqan palabrakunatan cambiakurqan kay tiempopi rimakusqan palabrakunawan. Kallpachakurqankun k’apaq t’ikrasqa kananpaq, fácil entiendenalla kananpaqpas. Chaykunata ruwakunanpaqmi yanaparqanku huk simikunaman Bibliata t’ikraq iñiqmasikuna, chaymi kunanqa inglés simipi Biblianchis aswan allin ruwasqa kashan (Prov. 27:17).

13. ¿Imaynan sientekurqanku iñiqmasikuna inglés simipi revisasqa Bibliata leespanku?

¹³ Inglés simipi revisasqa Biblianchista iñiqmasinchiskuna leespankun mayta agradecekurqanku, chaymi umalliq t’aqaman askha cartakunata apachirqanku. Huk cristianapaqmi Bibliaqa ancha valorniyoq cosaskunawanpas hunt’a kashanman hina. 2013 watapi revisasqa Bibliata leespan ichaqa, sapanka valorniyoq cosastapas hoqarispa qhawanman hina sientekun. Fácil entiendenalla kasqanraykus chay Bibliaqa yanapan astawan Diosta reqsinanpaq. Leespansi payqa reparan Jehová Diosqa huk tayta hina abrazasqanta, munakuywan rimapayasqantapas.

14, 15. ¿Imaynan sientekunku rimasqanku simipi Bibliayoq iñiqmasikuna?

¹⁴ Huk iñiqmasikunapas ancha agradecesqan kashanku rimasqanku simipi Traducción del Nuevo Mundo ruwakamusqanmanta. Bulgaria nacionmanta runan askha watakunaña Bibliata leesqa, ichaqa manas hayk’aqpas leesqachu fácil entiendenallapaq Bibliataqa, chaysi sonqonman chayasqa. Albania nacionmanta  cristianan nin albanés simipi Bibliaqa aswan sumaq entiendenapaq kasqanta. Nillarqantaqmi: “¡May munaymi rimasqanchis simipi Jehová Diospa rimapayawasqanchisqa!”, nispa.

¹⁵ Wakin nacionkunapiqa pisi runakunallan Bibliayoq kanku sinchita valesqanrayku otaq sasata tarikusqanrayku. Ruanda nacionpin askha runakuna Testigokunawan Bibliata estudianku, ichaqa manan decidikuqkuchu Dios serviyta Biblianku mana kasqanrayku. Chaypi kaq iglesiaqa nishutas valechiq, mana entiendenataqsi kaqpas. Traducción del Nuevo Mundo Bibliata rimasqanku simipi chaskispankus tawa wawayoq tayta-mama Jehová Diosta, hunt’aq kamachitapas mayta agradecekurqanku. Antesqa manas sapankankupaqqa Bibliata rantiyta atisqakuchu, kunantaq llapanku Bibliayoq kanku. Jehová Diosta agradecekusqankuta rikuchinankupaqtaq sapa p’unchay familiantin Bibliata kuska leenku.

16, 17. a) ¿Imatan Jehová Dios munan llapanchispaq? b) ¿Imata ruwanaykipaqmi kallpachakunayki?

¹⁶ Traducción del Nuevo Mundo revisasqa Bibliaqa huk simikunamanpas t’ikrakamunqan. Chay ruwakunantaqa maytachá Saqraqa hark’akunqa, Jehová Diosmi ichaqa mana dejanqachu. Payqa munan llapa serviqninkuna Bibliapi yachachisqanta sut’ita facil-llata entiendenankutan (leey Isaías 30:21). Pisillamantan “kay pachaqa” Jehová Diospa yachachikuyninwan hunt’a kanqa (Is. 11:9).

¹⁷ Chhaynaqa allinta utilizasun Jehová Diospa llapa qowasqanchiskunata. Hukninmi revisasqa Biblianchis, chayqa Diospa sutintan hatunchan. Diosqa sapa p’unchaymi Bibliawan rimapayawanchis, chaymi niwasqanchista uyarinanchis. Ñoqanchispas oracionpin paywan rimananchis, payqa uyariwanchispunin. Sichus paywan rimashallasun chayqa astawanmi reqsisun, astawantaq payta munakusun (Juan 17:3).